Read Saluan LUKAS 1 Bible Online

LUKAS 1 - Saluan bible

LUKAS 1

¹Teofilus anu manonong, Manjoo' na mian anu binala usahamo montulis mato-matopos mongkona hahan anu jinadimo i totonga'to.

²Aha nontulis sosok tiba apaa na anu sinisikakon hi kita nu to mia-mian anu pinosi toanyo na hahan aijo' lengkat pe'e i momonanyo, ka' lapas mae nompolele lelenyo.

³Pinoko palesangku ima-ima' iwi-iwi' aijo' lengkat pe'e i pu'unnyo, kututugi ma'ima' da montulis sa'angu' na lapulan anu ta'atun toka hi kita Tuan.

⁴Kubau na aijo', da i Tuan monsumbu' saba' apaa na anu ingajanakonmo hi kita Tuan, memang totu'u.

⁵ Tempo'nyo i Herodes tinimbalimo tomundo lipu' nu Yudea, daagi' ko sa'angu' na imam sanggonyo i Zakharia. Ia ninsoop i kumpulan nu to ima-imam Abia. Sanggo nu bengkele'nyo i Elisabet, suele lee' nu imam.

⁶Kantumuu'an moto bengkele' aijo' momposanang kinyonyoa nu Tumpu. Ua-ua'aha tulut hondo i palentah ka' Atulan nu Tumpu Allah totu-totu'u.

⁷Aha madi' kino anak, sabab i Elisabet lengke' tiba mule' ua-ua'aha binengkele'mo ka' i langkai'mo.

⁸Tempo'nyo kumpulan Abia nohumpak bahagian, i Zakharia nontoongi pangkat imam, i ahop nu Tumpu.

⁹Ia tinompile'i ingundiakon sumo kabiasa'an anu nubau nu to ima-imam, Zakharia tiniju' da minsoop i Laigan nu Tumpu, ka' mompapui kamangian.

¹⁰Hau-haunyo mompapui kamangian, mian da'isan binalado'a i sambiha'nyo.

¹¹Tempo'nyo aitu Malaikat nu Tumpu nanintoa hi Zakharia. Malaikat aijo' tinuminjo i sasu koanan i meja' pompapuian kamangian.

¹²Salatan tinoa i Zakharia na malaikat aijo', ia biningong ka' nabuhuk.

¹³Panyo koonyo nu malaikat aijo', “Boli mabuhuk, Zakharia! Tumpu mohongo do'aum. Bengkele'um i Elisabet tionyo mohampeakon samian na anak mo'ane. Beleyum tionyo monsanggohi ia, i Yohanes.

¹⁴Lame' na beleyum ka' sanang na mian da'isan de anak aijo' hampemo!

¹⁵ Pontoa nu Tumpu ia timbali daka', ka' ia madi' monginum anggur kabai inumon anu molangui. Salatanmo pe'e i hampe, ia nu kuasai nu Roh nu Tumpu.

¹⁶Manjoo' na mian nu Israel nu laya'je minsusule' hi Tumpu Allah, Tumpu nu aha.

¹⁷ Ia timbali pokauhon nu Tumpu anu mahoson, ka' bala kuasa sumo i Elia. Ia mompodameje tuuma ka' anak, ka' mian anu madi' tulut nu laya'je minsusule' i jalan pikilan anu hondo. Sumo aijo' na ia momposadia mian anu sadiamo toka hi bele nu Tumpu.”

¹⁸“Mosia na kusumbu' saba' sisikon aijo' tionyo timbali?” pinokilawa i Zakharia hi malaikat aijo'. “Aku i langkai'mo, ka' bengkele'ku mule' binengkele'mo.”

¹⁹ Malaikat aijo' nontaami, “Aku aiya i Gabriel. Aku mombau apaa na pinoto'i nu Tumpu, ka' iamo na nompokau aku mompotokakon lele ma'ima' aiya hi beleyum.

²⁰Apaa na kutaloakon, tionyo tontimbali toka i tempo'nyo. Panyo kalana beleyum madi' palesaya, beleyum madi' moko ala basisik; beleyum tionyo momo' sampe apaa na anu tinaloakonku aijo' tontimbalimo.”

²¹Hau-haunyo aijo' to mia-mian tataap montanda'i i Zakharia. Aha binangang, kadaka' ia pininmo i Laigan nu Tumpu.

²²Ka' salatan ia nosabatmo, madi'mo ia noko potatae hi aha. Ia me mompoti-potiju' nu limanyo, panyo tataap momo'. Sahingga to mia-mian nangalati'mo, tukoonyo nu aha, ia nontoamo apa-apaa kiijo' i Laigan nu Tumpu.

²³Salatan ilapasmo na kalajanyo i Laigan nu Tumpu, i Zakharia ninsusule'mo i laigan.

²⁴Mamanga madi' pinin osoanyo i Elisabet pinoboamo, olima' na bitu'on ia saja' jinojoong i laigan.

²⁵Notatae na ia, “Ahennyo Tumpu nontulungi aku, ka' nohapusakon ka'ambanganku.”

²⁶Tempo'nyo i Elisabet pinoboamo anomo na bitu'on, Tumpu Allah nompokau i Malaikat Gabriel da namba i Nazaret, sa'angu' na kota i da'erah Galilea.

²⁷ I Gabriel sinai da namba hi samian na langkoyang sanggonyo i Maria. Langkoyang aijo' no dohoimo ka' samian sanggonyo i Yusuf, lee' mae i Tomundo Daud.

²⁸Malaikat aijo' tinoka hi Maria ka' notatae, “Tabea' hi kita anu nu balakati nu Tumpu molabi-labi! Tumpu mosangalu hi beleyum!”

²⁹Nohongo potatae nu malaikat aijo', i Maria tinolokengkeng, ka' nompokilawa i kinyonyoanyo pa' apaa na kahanda' nu tabea' aijo'.

³⁰Lantas malaikat aijo' notatae hi belenyo, “Boli mabuhuk, Maria, kalana beleyum nusetujui nu kinyonyoa nu Tumpu.

³¹ Beleyum poboa ka' mohampeakon samian na anak, ka' tionyo nu sanggohi Yesus.

³² Ia saidi' mae bau kasanggoan ka' osanggohi Anak nu Tumpu Allah anu Matangkas na Kuasa-Nyo. Tumpu mompotimbali Ia Tomundo, sumo i Tomundo Daud, kampue'-Nyo mae.

³³Ka' Ia mompalentah sumo tomundo i katulunan Yakub sidu-sidutu'. Kalaja-Nyo madi' ko kamingkotannyo.”

³⁴“Panyo aku ma'isa toho' no'osoa,” koonyo i Maria hi malaikat aijo', “mosia na anu sumo itina' timbali?”

³⁵Tinaaman nu malaikat aijo', “Roh nu Tumpu tokaje hi beleyum, ka' kuasa nu Tumpu monjagaije beleyum. Mokonyo sumo aitu, anak anu o hampe'akonto atina' osanggohi Susi', Anak nu Tumpu.

³⁶Inau': I Elisabet, tominsanum kiijo' pinoboamo anomo na bitu'on, mau mule' ia notu'amo, ka' mian nontaloakon tukoonyo nu aha, ia lengke'.

³⁷ Kalana hi Tumpu madi' ko sa'angu' na madi' tontimbali.”

³⁸Lantas i Maria notatae, tukoonyo, “Aku aiya posaihon nu Tumpu; bakasmo da timbali hi belengku sumo anu tinaloakonto.” Lantas i namba na malaikat nompala'i Maria.

³⁹Lia-lia' ilapas aijo', i Maria namba i sa'angu' na kota i Yudea, i da'erah bungkutnyo.

⁴⁰Namba na ia i laigan i Zakharia, ka' salatan ia ninsoop, ia nontabea'i Elisabet.

⁴¹Ka' salatan i Elisabet nohongomo tabea' i Maria i uno nu ma'alum hi Elisabet nongkohenggomo. Lantas i Elisabet kinuasanmo nu Roh nu Tumpu,

⁴²lantas notatae, “Beleyum na anu talalo hondo binalakatan i totonga' nu iwi-iwi' na boune! Binalakatan na anak anu nu hampeakon aijo'!

⁴³Ihe na aku sahingga tina nu Tumpu kona hi belengku?

⁴⁴Salatan aku nohongo tabea' nu belento, anak anu i uno nu ma'alumku nongkohenggomo kalana ilame'mo.

⁴⁵Kopi-kopianmo na beleyum, kalana palesaya, sabab apaa na anu tinaloakon nu Tumpu hi beleyum, atina' tionyo tondaagi'!”

⁴⁶ I Maria notatae, “Kinyonyoangku mompuji' Tumpu,

⁴⁷ka' santuu'ku binilahimo kalana Tumpu Pomposalamatku.

⁴⁸ Inginau'-Nyo na aku, posaihon-Nyo anu madi' talakana'! Lengkat uuka iwi-iwi' na bansa montaloakon aku kinopi-kopianmo.

⁴⁹Kalana Tumpu Anu Matangkas na Kuasa nombaumo anu to daka-daka' hi belengku. Susi' na sanggo-Nyo.

⁵⁰Mompolee' toka mompolee' Tumpu mongkalibosi mian anu mabuhuk hi bele-Nyo.

⁵¹Tiba lima-Nyo maho-mahoson Ia momposungkehet mian anu ko bubuun, ka' mongidei tanga'an nu aha.

⁵² To Tomu-tomundo tinauhakon-Nyo na pangkatnyo ka' mian loloison i hangkatakon.

⁵³Mian mo'ohop pinopuas-Nyo nu iwi-iwi' na ka'ima'an, mian kaya i laa'akon tiba madi' ko apa-apaa.

⁵⁴Ia nontulungi Israel posaihon-Nyo, sumo janji' anu pinodaagi'-Nyo tiba mompolee'to.

⁵⁵ Tumpu madi' mongkolilimi janji'-Nyo, kinyonyoa-Nyo manonong hi Abraham ka' lee'nyo sampe toka sidu-sidutu'.”

⁵⁶Kila-kila nu kona totolu' na bitu'on na kopinnyo i Maria jinojoong hi i Elisabet, nambaje na i Maria ninsusule' i laigannyo.

⁵⁷Sinaanyo tinokamo i Elisabet mompohampeakonmo. Ia mohampeakon samian na anak mo'ane.

⁵⁸Sampo dewe tiba to utu-utusnyo nohongo tukoonyo kino ima' na Tumpu montoa i Elisabet, aha suele ilame'mo hingga-hinggat tiba ia.

⁵⁹ Salatan anak aijo' ialunmo na umunnyo, aha tinoka da monsunat ia. Aha ka'oho' monsanggohi anak aijo' sumo sanggo nu Tuumanyo i Zakharia,

⁶⁰panyo tinanyo notatae, “Madi'! Ia tionyo osanggohi Yohanes.”

⁶¹“Madi' ko samian pe'e sampoto utusanum na ko sanggo sumo atina',” koonyo nu aha hi ia.

⁶²Lantas opoponyihingakon nu lima na aha mompokilawa hi Zakharia, pa' ihe na ponsanggohi anaknyo.

⁶³I Zakharia nompoita sa'angu' na batu tulis, ka' tinulisnyo, “Sanggonyo, i Yohanes.” Aha iwi-iwi' binangangmo.

⁶⁴Tempo' aitu mule' i Zakharia moko potataemo, ka' nompuji'mo Tumpu.

⁶⁵Sampo dewe iwi-iwi' nabuhukmo, lele aijo' tinolelemo i tano' nu bungkutnyo nu Yudea.

⁶⁶Iwi-iwi' mian anu nohongo nompokilawa i kinyonyoanyo, “Apaa na katimbaliannyo nu anak aijo' saidi' mae?” Kalana Tumpu monsangalui ia.

⁶⁷I Zakharia, tuuma nu anak aijo', kinuasanmo nu Roh nu Tumpu Allah, sahingga ia nompotoka potuunon nu Tumpu. Ia notatae,

⁶⁸“Imbo' da kita mompuji' Tumpu, Tumpu mian nu Israel! Ia tinokamo montulungi mian anu palesayamo hi Ia ka' mompobebas aha.

⁶⁹Ia nombee'imo kita pomposalamat anu baani, lee' i Daud, posaihon-Nyo.

⁷⁰Naipuan mae nompake to nabi-nabi anu pinile'an-Nyo, Tumpu nombee'mo anu jinanji'-Nyo

⁷¹da momposalamat kita i sampo bali'to ka' lengkat i kuasa nu to mia-mian anu mongka'ideki kita.

⁷²Da mompotoa ka'ima'an nu kinyonyoa-Nyo hi mompolee'to, janji'-Nyo anu belesi' tionyo Nupodaagi'.

⁷³Ia binasumpa' hi Abraham tuumanto, ka' binajanji' momposalamat kita lengkat i bali'to, da kita madi' mabuhuk monjalanakon palentah-Nyo,

⁷⁴

⁷⁵saja' tulut hi Ia ka' momposanang kinyonyoa-Nyo i uno nu kantumuu'anto.

⁷⁶ Beleyum, oanakku tionyo osanggohi nabi Tumpu Anu Matangkas na Kuasanyo. Beleyum na momonanyo sinai nu Tumpu da momposadia jalanan-Nyo,

⁷⁷da mompoto'i hi mian anu palesayamo hi Ia tukoonyo aha oposalamatmo, de Tumpu mongampunimo iwi-iwi' na dosa' nu aha.

⁷⁸Tumpunto manonong ka' mongkalibosi; da momposalamat kita, sahingga Ia tinoka. Sumo batu nu sinaa bete' daagi' subu,

⁷⁹ sumo aitumo na Ia mombee'i jingka-Nyo hi iwi-iwi' na mian anu tumuu' i uno nu kapintungan ka' i kabuhukan. Ia montaka' kita i jalan anu mokiijo' i kadamean.”

⁸⁰Anak i Zakharia kino daka-daka'nyomo, ka' kino hoso-hosonnyomo na rohnyo. Ia jinojoong i padang bolaa, sampe tinokamo na tempo'nyo ia nompotoamo butongnyo hi bansa Israel.