Read Saluan LUKAS 10 Bible Online

LUKAS 10 - Saluan bible

LUKAS 10

¹Lapas aijo' Tumpu nompile'i mule' pitumpulu' na anu saja' mombatuki, lantas nonsai aha toto ua'aha mamba i moona i toto sa'angu' na kota ka' tampat anu okahanda'i o lambani.

² “Hasin anu tionyo o padak manjoo',” tukoo-Nyo hi aha, “panyo mian anu mokalaja mompadak ola sangkiding. Kalana aijo' poita hi tumpu nu ale' da Ia monsai mae mian anu mompadak hasin nu sosu'anon-Nyo.

³ Yo, lako'mo! Aku monsai komiu sumo domba i totonga'nu serigala.

⁴ Boli momboa dompet kabai botutu nu anu opoita, kabai sapatu. Boli milawe i totonga' nu jalan ka'oho' montabea'i mian mau pe'e ola samian.

⁵De komiu minsoop i sa'angu' na laigan, momonanyo otaloakon, ‘Bee'akon bila-bilahi i uno nu laigan aiya.’

⁶De i kiijo' ko mian anu mongka'oho' dame, salan do'a nu dameum aijo' tataap hi ia; de madi', po'ule' o ala na salan do'a nu dameum aijo'.

⁷ Jojoong ola i sa'angu' na laigan. Talima apaa na anu nubagiakon i kiijo' hi komiu, kalana mian mokalaja ko hak montalima tamboonyo. Bolimo molali-lalin lengkat i laigan sa'angu' mamba i laigan sangga'at.

⁸De komiu toka i sa'angu' na kota, ka' i kiijo' komiu tinalima ma'i-ma'ima', kaan apaa na anu nubagiakon i kiijo' hi komiu.

⁹Opa'alinakon na to mia-mian anu masakit i kota aijo', ka' opoto'i hi to mia-mian i kiijo'. ‘Tumpu malia'mo montampu'uni mompalentah sumo Tomundo hi komiu.’

¹⁰ Panyo de komiu toka i sa'angu' na kota, ka' i kiijo' komiu madi' otalima, posabat mokiijo' i jalan ka' otaloakon,

¹¹‘Ka' mule' abu' nu kota'um anu matikampit i tengke mami, o sapuakon mami sumo salaku pokinde' hi beleyum. Panyo osumbu'mo saba' malia'mo na tempo'nyo Tumpu montampu'uni mompalentah sumo Tomundo hi komiu!’

¹² O inau', i Sinaa Kakiamatan, mian nu Sodom lebe dengke o ampuni nu Tumpu, panyo mian nu kota aijo' madi' dengke na o ampuni!”

¹³ “Silakamo na komiu, Korazim! Ka' silakamo na komiu, Betsaida! Sa'andenyo anu okabangangi binau hi komiu aijo', binaumo i kota Tirus tiba i Sidon, tantu to mia-mian i kiijo' mae pininmo na binala tobat, madi'mo mombau dosa-dosa' nu aha ka' mibaju'mo nu baju' nu mian de ko anu silaka, ka' mongabu'imo ubak nu aha.

¹⁴Sinaa nu Kakiamatan, to mia-mian nu Tirus tiba Sidon lebe dengke na o ampuni nu Tumpu, panyo komiu madi' dengke na o ampuni.

¹⁵ Ka' komiu, Kapernaum! Otutugi miu, komiu o hangkatje tangka-tangkas toka i suluga'? Madi'! Panyo komiu o alinmo i nalaka!”

¹⁶ Lantas i Yesus notatae hi anu saja' mombatuki Ia, “Mian anu mohongo komiu, mohongo Aku. Mian anu madi' montalima komiu, madi' montalima Aku. Ka' mian anu madi' montalima Aku, singkona madi' montalima Ia anu nonsai mae Aku.”

¹⁷Anu saja' mombatuki aha pitumpulu' aijo' binilahimo hondo mae na ninsusule'. “Tumpu,” tukoonyo nu aha, “to roh-roh ma'idek mohongo-hongo kami, de kami mompalentah aha mompake sanggo nu Tumpu!”

¹⁸I Yesus nontaami, “Aku nontoa Ibilis nanabu' lengkat mae i langit sumo kilat.

¹⁹ Osumbu'mo! Komiu binee'ankumo kuasa da komiu timbali mompeja' ulo tiba beyua' ka' mompato'i iwi-iwi' na kahosonan nu sampo bali', tiba madi' ko apa-apaa na anu timbali monsilakai komiu.

²⁰Mau mule' sumo aijo', boli bilahi kalana to roh-roh ma'idek mohongo-hongomo komiu. Sahanyo komiu bilahi kalana sanggoum tinulismo i suluga'.”

²¹Tempo'nyo aitu suele, i Yesus binilahimo kalana kinuasanmo nu Roh nu Tumpu. I Yesus notatae, “Tuuma, Tumpu anu mongkuasai langit tiba tano'! Aku montalima kaseh hi Belento kalana iwi-iwi' aijo' pinohowinintomo hi to mia-mian anu pande tiba anu ko ilimu', panyo pinotiju' nu Belento hi to mia-mian anu madi' binalagulu'. Aijo'mo na nomposanang kinyonyoa nu Kita Tuuma.

²² Iwi-iwi' na apa-apaa binee'mo nu Tuuma hi beleng-Ku. Madi' ko samian pe'e monsumbu' Anak, de misa' Tuuma. Madi' mule' suele ko anu monsumbu' Tuuma, de misa' Anak; ka' to mia-mian pa' hi he na anu nukahanda'i nu Anak aijo' pomposumbu'annyo Kita Tuuma.”

²³Lantas i Yesus nosiloi hi anu saja' mombatuki Ia, lapas aijo' notatae hi aha, “Ko dale' na komiu, kalana nontoamo anu tinoa miu tempo' uuka aiya.

²⁴Kalana inau': Manjoo' na nabi tiba Tomundo mongindi montoa anu tinoa miu tempo' uuka aiya, panyo aha madi' montoa. Aha mongindi mohongo anu i hongo miu tempo' uuka aiya, panyo aha madi' mohongo.”

²⁵ Lapas aijo' samian na gulu' agama tinokamo da monsobai Yesus. Ia nompokilawa, “Tuumangku Gulu', apaa na tionyo kubau da montalima kantumuu'an anu mingkaliangan ka' toka sidu-sidutu'?”

²⁶I Yesus nontaami, “Apaa na anu tinulismo i uno nu Kitab nu Tumpu? Mosia na pikilanum mongkona han aijo'?”

²⁷ Mian aijo' nontaami, “ ‘Kalibosi na Tumpu-Um nu kinyonyoaum iwi-iwi', ka' totu-totu'u na santuu'um, ka' kahosonanum, tiba iwi-iwi' na kapandeanum,’ tiba ‘Kalibosi na sangko kita mian, sumo beleyum mongkalibosi posi butongum.’ ”

²⁸ “Pinontaamium aijo' totu'u,” koonyo i Yesus. “Baumo na aijo' da beleyum tumuu'.”

²⁹Panyo gulu' agama aijo' mompai pototu'u butongnyo. Ia nompokilawa, “Ihe na sangko mianku?”

³⁰I Yesus nontaami, “Daagi' ko samian na mo'ane nintudun mae lengkat i Yerusalem mamba mokiijo' i Yerikho. I totonga' nu jalan, ia tinumbuhanmo nu tololang, ingagoanmo iwi-iwi' na anu daagi' hi ia, binandahannyo boboli' inate, lantas pinala'iannyo banda-bandang i jalan kahomo bela daka'.

³¹Madi' sinangka-sangka samian na imam suele ilumajang nontulu i kiijo'. Salatan tinoanyo na mian aijo' ola pinolilitnyo nokiijo' i sambiha' nu jalan, ka' ilumajang lau-laus.

³²Sumo aijo' mule' na samian, mian nu Lewi anu notulu i kiijo'; salatan tinoanyo na mian aijo', ingohaniannyomo da mompinasa. Panyo ia suele nolilit nokiijo' i sambiha' nu jalan ka' ilumajang lau-laus.

³³ Panyo ilapas aijo' samian na mian nu Samaria anu hau-haunyo lumambanan notulu suele i kiijo'. Salatan tinoanyo na mian aijo' talalomo ginuaon na kinyonyoanyo kalana molibosmo.

³⁴Sahingga ingohaniannyo na mian aijo' ka'binaso'annyo iwi-iwi' na belanyo nu anggur ka' nompakuli'i nu lanya', lantas binobodannyomo na bela aijo'. Lapas aijo' pinosake'nyomo na mian aijo' iposi keledainyo, lantas binoanyo i sa'angu' nalaigan panumpangan da opalakai.

³⁵Nopatas mae ia nongala uwambatu na doi salaka, ka' binee'nyo hi tumpu nu laigan panumpangan aijo' ka' notatae. ‘Palakaiakon na ia, ka' de ko balanja sangga'at ku bayanje de aku minsusule'mo mae.’ ”

³⁶Lapas aijo', sisikon aijo' pinopupus i Yesus nu pompokilawa aiya, “Aha anu toto-totolu' na mian aijo', iya na anu mingkona i pikilanum anu ko usaha i sangko mian, hi mian anu tinumbuhanmo nu tololang aijo'?”

³⁷Gulu' agama anu pinokilawa aijo' nontaami, “Mian anu nontulungimo mian aijo',” “Yo, lako'mo ka' baumo suele sumo aijo'!” na koonyo i Yesus.

³⁸ Lapas aijo' i Yesus tiba anu saja' mombatuki Ia nolausakonmo lumambanan nu aha, lantas tinokamo i sa'angu' na kampung ise'. I kiijo' daagi' ko samian na boune, sanggonyo i Marta, nolaga i Yesus da sonso' i laigannyo.

³⁹I Marta ko utusnyo boune, sanggonyo i Maria. I Maria aiya sinumuhang koko hi Tumpu Yesus mohongo to poki-pokinde'-Nyo.

⁴⁰Panyo i Marta tasiaga hondo nu hia i uno nu laigan nu aha. Ia namba hi Yesus ka' notatae, “Kita Tumpu, kabai Kita Tumpu ola mompojohok i Maria, da aku mosi bau hia? Saimae na ia nontulungi aku!”

⁴¹“Marta, Marta!” tinaaman nu Tumpu. “Beleyum bata-bata ka' tasiaga mompopikilakon, aiya ka' aijo',

⁴²padahan anu penting ola sa'angu'. Ka' i Maria nompile'imo anu ma'ima', anu madi'mo timbali o ala aijo' hi ia.”