Read Saluan LUKAS 11 Bible Online

LUKAS 11 - Saluan bible

LUKAS 11

¹Daagi' ko sansinaan i Yesus binalado'a i sa'angu' na tampat. Noko balado'a sala'samian na anu saja' mombatuki Ia notatae, “Kita Tumpu, soba potingan mae na kami balado'a sumo i Yohanes nompotingan aha anu saja' mombatuki ia balado'a.”

²Lantas i Yesus notatae hi aha, “De komiu balado'a, taloakon sumo uuka, ‘Tuuma, Kitamo na Tumpu anu sa'a-sa'angu'nyo. O amalakon na Kita o sombah ka' o angga'i.

³Bee'iakon mae sansina-sinaa kaanon anu opalalui mami.

⁴Ampuniakon na dosa-dosa' mami, kalana kami suele nongampunimo batu-batu mian anu kosala'nyo hi kami. Ka' boli mompojohok kami nukona nu soba'an dumo kami madi' palesaya.’ ”

⁵I Yesus notatae hi anu saja' mombatuki Ia, “De daagi' ko samian atina' hi komiu mamba i laigan nu sangalunyo tonga' pahu, ka' motatae, ‘Sangalu, posabolaakon mae roti tolumbatu,

⁶kalana sangalungku anu hau-haunyo lumambanan, sala'je mae sinonso' i laigan ka' aku madi'mo ko anu o kaan, obee' hi ia!’

⁷De sangaluyum anu kinalambanan aijo' montaami sumo uuka, lengkat mae i uno nu laigannyo, ‘Boli momposusa' aku! Tumban ginunsingmo, ka' aku tiba to ana-anakku i hoyotmo. Madi'mo aku moko pobula mombee' apa-apaa hi beleyum.’ ”

⁸“Lantas mosia?” i Yesus nolausakonmo potataenyo. “Kupoto'i, ya! Mau mule' beleyum te sangalunyo, ia madi' mongka'oho' mobula ka' mombee' apa-apaa hi beleyum. Panyo kalana beleyum madi' mongoa'i ma'ambang sapoi-poita hi belenyo, sahingga ia ahi' nobula ka' nombee' hi beleyum apaa na anu nu kahanda'i.

⁹Jadi, aku motatae hi beleyum: Poitamo, saba' komiu obee'ije; liomo, saba' komiu mohumpakje; kutetekmo, saba' tumban otuhea'akonje da bau pinsoopan miu.

¹⁰Kalana mian anu momoita, montalima; mian anu molio, mohumpak; ka' mian anu mongkutetek otuhea'akonje na tumban.

¹¹Te atina' hi komiu daagi' ko tuuma anu mombee'i ulo hi anakum, de anakum momoita ikan?

¹²Kabai mombee' beyua' de ia momoita nggalau'?

¹³Mau mule' komiu ma'idek, komiu ahi' monsumbu' mombee' anu ma'ima' hi anakum. Apaa mule' Tuuma i suluga'! Ia mombee' Roh-Nyo hi aha anu momoita hi Ia!”

¹⁴Daagi' ko sansinaan i Yesus nolaa' roh ma'idek nosabat lengkat hi samian na anu momo'. Salatan roh ma'idek aijo' nosabatmo, mian aijo' nontampu'unimo binasisik. Manjoo' na mian binangang,

¹⁵ panyo daagi' ko anu notatae, “Ia moko ala molaa' roh ma'idek kalana kuasa nu Beelzebul, hi roh ma'idek aijo'.”

¹⁶ Daagi' mule' ko to mia-mian sangga'at anu kahanda' molio kasala'an i Yesus, jadi, aha momoita Ia mombau sa'angu' na anu okabangangi salaku tanda, saba' Ia nolengkat mae hi Tumpu.

¹⁷Panyo i Yesus monsumbu' kahanda' nu aha. Sahingga Ia notatae hi aha, “De sa'angu' na Negara moga'a-ga'at, ka' mompaha bali' tompuk sa'angu' ka' sangga'at, negara aijo' madi' mahoson. Ka' sa'angu' na sampoto utusan moga'a-ga'at ka' mompaha bali' sa'angu' ka' sangga'at, tantu madi'mo mompaha ima'.

¹⁸Sumo aitumo i uno nu kalaja'an Ibilis; de sa'angu' na gombu mahantuda' tiba gombu sangga'at, kalaja'an aijo' mahungku'. Komiu motatae, tukoo miu, Aku molaa' roh ma'idek kalana kuasa nu Beelzebul.

¹⁹Desumo aijo', tiba kuasa nu apaa na anu saja' mombatuki belento molaa' to roh-roh ma'idek aijo'? Posimo anu saja' mombatuki belento aijo' na momponyata', memang komiu sinala'mo!

²⁰Panyo Aku molaa' roh ma'idek tiba kuasa nu Tumpu, ka' aijo' alati'nyo, saba' Tumpu montampu'unimo mompalentah atina' hi komiu.

²¹De samian anu mahoson, ko toongon sasadia monjagai posi laigannyo, iwi-iwi' na halata'nyo salamat.

²²Panyo de samian anu lebe mahoson montumbuhi ka' mohungku'i ia, saba' mian anu lebe mahoson aijo' mongagoi iwi-iwi' na toongon anu otaha'imani nu tumpu nu laigan aijo', lantas mombagi-bagi iwi-iwi' na halata'nyo.

²³ Mian anu madi' mosambiha' hi beleng-Ku, totu-totu'u mongewa Aku, ka' mian anu madi' montulungi Aku, totu-totu'u mongidei kalajang-Ku!”

²⁴“De roh ma'idek mompala'i sala'samian, roh aijo' mamba songko i tampa-tampat anu mapengges molio pilawean, panyo ia madi' nohumpak. Kalana aitu, ia notatae, ‘Aku po'ule'mo minsusule' i laigan anu pinala'iankumo mae!’

²⁵Tempo'nyo ia tinoka i kiijo', tinokannyo na laigan aijo' belesi' ka' ta'atun.

²⁶Lantas ia i namba ka' nomboa popitu' na roh sangga'at anu lebe ma'idek molingkudui ia. Lapas aijo' aha ninsoop i uno nu mian aijo' lantas jinojoong i kiijo'. Ka' ahennyo kalakuan nu mian aijo' tinimbali lebe ma'idek molingkudui anu i momonanyo.”

²⁷Salatan i Yesus notatae sumo aijo', samian na boune anu aijo' hi mian da'isan aijo' notatae hi Yesus, “Totu'u ko dale' na boune anu nompohampemo ka' nomposusumo Beleyum!”

²⁸Panyo i Yesus nontaami, “Lebe bilahi mule' na mian anu mohongo potatae nu Tumpu ka' mombau palentah-Nyo!”

²⁹Hau-haunyo to mia-mian sinilimu'mo montikubi Yesus, Ia nolausakonmo sisik-Nyo, tukoo-Nyo, “Palias na ko ide'nyo na to mia-mian tempo' uuka. Aha momoita sa'angu' na anu okabangangi, da aha timbali palesaya hi beleng-Ku, panyo aha madi' kubee'i sa'angu' pe'e na anu okabangangi, boli mompiakon anu okabangangi i Nabi Yunus.

³⁰Susumo i Nabi Yunus salakumo anu okabangangi nu to mia-mian anu i kota Niniwe, sumo aitu mule' na Anak nu Mian timbalimo sa'angu' na anu okabangangi nu to mia-mian tempo' uuka.

³¹I sinaa kakiamatan, Tomundo boune nu lipu' Salatan tootinjomo tiba to mia-mian tempo' uuka, ka' mompisala'i aha. Kalana mohongo pokinde-pokinde' i Salomo anu pande. Tomundo boune aijo' nombau lumambanan anu majo'on hondo lengkat mae i puus nu tano'. Panyo uuka aiya daagi' ko anu lebe daka' molingkudui Salomo!

³² I sinaa kakiamatan, anu monjoongi Niniwe tootinjomo tiba to mia-mian tempo' uuka, ka' mompisala'i aha, kalana mian nu Niniwe aijo' binala tobatmo madi'mo mombau dosa-dosa' nu aha tempo'nyo i Yunus nompotokakon potatae nu Tumpu hi aha. Panyo uuka aiya daagi' ko anu lebe daka' molingkudui Yunus!”

³³ “Madi' ko anu montutungi sulu' lantas momposuluk kabai mongkulubi nu gumbang. Ia mompo'una' sulu' aijo' i tengke nu sulu', da mian anu minsoop timbali montoa jingkanyo.

³⁴Mata, te sulu' nu butong. De mataum montoa, songko-songko na butongum majingka hondo-hondo. Panyo de mataum mapisok songko-songko na butongum timbali pintung.

³⁵Kalana aijo' obala'ingati, dumo jingka atina' hi beleyum pintungmo.

³⁶De songko-songko na butongum majingka, ka' madi' ko sambagian pe'e na anu pintung, saba' songko-songko na butongum aijo' majingka hondo sumo nu jingkaimo nu sulu'.”

³⁷Salatan ilapas na i Yesus notatae, samian na mian nu Farisi nompasomo Ia mongkaan i laigannyo. Sahingga i Yesus namba nongkaan i kiijo'.

³⁸Mian nu Farisi aijo' binangang na nontoa i Yesus nongkaan madi' nombaso'i pe'e limanyo susumo atulan nu agama.

³⁹Kalana aijo' Tumpu notatae hi ia, “Memang komiu to mia-mian nu Farisi saja' mombaso'i mangko' ka' lean i sasu sambiha'nyo, panyo i uno nu posi butongum saja' hondo panggaga ka' manjoo' na ka'idekan.

⁴⁰Komiu ponga'! Te misa' Tumpu na nombau sasu sambiha'nyo aijo', ka' suele nombaumo sasu unonyo?

⁴¹Anu i uno nu mangko' ka' i leanum aijo', aijo'mo na anu tionyo obee' miu hi to mia-mian anu kasiasi. Tiba jalan aijo', iwi-iwi' timbalije mompobelesi' butong komiu.

⁴² Silakamo na komiu to mia-mian nu Farisi! Hasin sosu'anonum sumo solasi, ka' inggu, ka' lampa-lampa sangga'at, sampulu' na bahagian obee' miu sambahagian hi Tumpu, panyo ka'adilan ka' liibos hi Tumpu madi' okalinga komiu. Padahan aijo'mo na anu tionyo obau miu, ka' boli momadi'akon anu sasangga'atannyo.

⁴³Silaka na komiu, to mia-mian nu Farisi! Komiu mongka'ima'i tampa-tampat anu o angga'i i uno nu laigan pogalejaan, ka' ka'oho' o adati i pasa-pasan.

⁴⁴Silaka na komiu! Komiu sumo kubun anu madi' ko paliasa'nyo, anu nu peja-peja' nu mian kalana madi' nu sumbu'.”

⁴⁵Sala'samian na gulu' agama notatae hi Yesus, “Tuumangku Gulu', tiba potatae aijo', Kita Tuuma mongambangimo ahi' kami!”

⁴⁶I Yesus nontaami, “Silaka na komiu suele, to gulu-gulu' agama! Komiu montuntut hahan anu susa' ka' mombee'i atu-atulan anu maboat, panyo komiu sangkiding pe'e madi' ka'oho' montulungi mian anu montuluti atulan aijo'.

⁴⁷Silaka na komiu! Komiu mombau polamunan to nabi-nabi anu pinosi patean nu mompolee' miu.

⁴⁸Jadi, posi komiu mongakuimo, saba' komiu monsitujuimo apaa na anu binaumo nu mompolee' miu; kalana memang aha na nompatei to nabi-nabi aijo', ka' komiumo na nombau polamunannyo.

⁴⁹Aijo' na sababnyo Kapandean nu Tumpu notatae, ‘Ku saije mamba hi aha na to nabi-nabi ka' to posa-posaihon-Ku; sambagian o patei ka' sambagian o sakisa!’

⁵⁰Tumpu mombau aijo' da to mia-mian tempo' aiya o hukum kalana nompateimo, anu bina-binau hi iwi-iwi' na nabi salatanmo pe'e dunia pinotimbali,

⁵¹ salatanmo pe'e i Habel pinatean sampe i Zakharia pinatean, anu tinimbali i olot nu mezbah ka' Laigan nu Tumpu. Palesayamo: To mia-mian tempo' aiya, tantu o hukum kalana iwi-iwi' sinumo aijo'mo.

⁵²Silaka na komiu to gulu-gulu' agama! Gunsing bau pontuhea'akon tumban kapandean, pino'una'mo hi komiu, panyo posi komiu madi' mongka'oho' minsoop i unonyo da molio kapandean aijo'. Ola mule' komiu mombau hahan, sahingga to mia-mian madi' mongka'oho' ko usaha minsoop i unonyo!”

⁵³Tempo'nyo i Yesus nompala'imo tampat aijo', to gulu-gulu' agama ka' to mia-mian nu Farisi notataemo hi Yesus, nu potatae anu tala-talalomo ma'idek. Aha nontampu'unimo molio-lio kasala'annyo da Ia motataemo mongkona manjoo' na han.

⁵⁴Ka' hau-haunyo aijo', aha nondingangangmo Ia ima-ima', da mohongo apa-apaa na anu Nu taeakon.