Read Saluan LUKAS 12 Bible Online

LUKAS 12 - Saluan bible

LUKAS 12

¹ Momada-madala na mian nompaha genso-gensotmo sampe ko anumo pinahampeja'akon na tengkenyo. Hau-haunyo mian haha aijo' gombu-gombu, i Yesus notatae hi anu saja' mombatuki Ia, “Obala'ingati na ragi nu mian Farisi, patu nu potataeng-Ku, kageguanan nu aha.

² Madi' ko anu sulu-suluk na anu madi' kantoan, ka' madi' ko anu opohowini na anu madi' oponyata.

³Anu otaloakon miu tempo'nyo malom, kahongoan sinaa; ka' anu o'oyongakon miu i bihing nu mian i uno nu salipi' tumba-tumban, obebakon iwi-iwi'.”

⁴“O inau', to sanga-sangalung-Ku! Boli mabuhuk hi aha anu mompatei butong, panyo madi' moko ala mombau anu molingkuduimo aijo'.

⁵Sahanyo Ku potiju' hi belemiu ihe na tionyo okabuhuk miu. Pabuhuk hi Tumpu! Kalana nu poko patei, Ia ko kuasa mule' mongalin i uno nu nalaka! Palesayamo, Ia na anu tionyo okabuhuk miu.

⁶Olima' na tomonsi' peheet pinobaluk, olinyo ohua' na mata nu doi anu ise' hondo. Mau mule' sumo aijo' madi' ko sa'angu' pe'e na nu kolilimi nu Tumpu.

⁷Hambahan pe'e nu ubak i ubakum binilangmo iwi-iwi', kalana aijo' boli mabuhuk: Komiu lebe ko olinyo molingkudui to tomo-tomonsi' peheet!”

⁸“O inau' ma'i-ma'ima': Mian anu mongakui i ahop nu mian da'isan tukoonyo ia anu saja' mombatuki Aku, ia o akui suele nu Anak nu Mian i ahop nu to mala-malaikat nu Tumpu.

⁹Panyo mian anu madi' mongakui i ahop nu mian da'isan tukoonyo ia anu saja' mombatuki Aku, ia suele opojalo nu Anak nu Mian i ahop nu to mala-malaikat nu Tumpu.

¹⁰ De mian montaloakon apa-apaa monggagakon Anak nu Mian, ia timbali o ampuni; panyo de ia mompopo'ise' Roh nu Tumpu Allah, ia madi' timbali o ampuni.

¹¹ De komiu oboa i to lai-laigan pogalejaan da opalesa i ahop nu pamalentah kabai anu ko kuasa, boli bata-bata mongkona mosia na komiu tionyo mompototu'u butong, kabai mongkona apaa na anu tionyo otaloakon miu.

¹²Kalana apaa na anu tionyo otaloakon miu aijo' nupotiju'je nu Roh nu Tumpu hi belemiu toka i tempo'nyo.”

¹³Samian anu aijo' hi mian da'isan notatae hi Yesus, “Kita Tuumangku Gulu', pisoba kita Tuumangku mompokau utusku mombee' mae hi belengku sambagian na halata' anu pinala'ianmo nu tuuma mami.”

¹⁴I Yesus nontaami, “Utus, ihe na nohangkat Aku timbali anu momputusi kabai mombagi buden atina' hi komiu ohua'?”

¹⁵Lapas aijo', kona hi mian iwi-iwi' anu daagi' i kiijo', i Yesus notatae, “Obala'ingati ka' bajaga-jaga, boli sampe komiu mangoa. Kalana kantumuu'an nu mian madi' ola taha'iman i kakaya'annyo mau mule' halata'nyo molabi-labi.”

¹⁶Lantas i Yesus nonsisikakon kantuang aiya, “Daagi' ko samian anu kaya. Ia daagi' ko tano' anu manjoo' na hasinnyo.

¹⁷Mian kaya aijo' nontampu'unimo binapikin i uno nu kinyonyoanyo, ‘Madi'mo daagi' ko tampat bau pompo'una'an hasin nu tano'ku. Mosia na pikilanku tempo' uuka?’

¹⁸Lapas aijo' ia binapikin mule' ka' notatae hi posi butongnyo, ‘Ah, aku ko pikilan; gudangku iwi-iwi' ku poki ideimo, lantas ku potinjo na anu lebe daka'. I kiijo' na ponguna'anku gandumku iwi-iwi' tiba to langke-langkengku sangga'at.’

¹⁹Lapas aijo' kutaloakonje i posi butongku, ‘Beleyum mohumpakmo dale'! Iwi-iwi' anu ma'ima' daagi'mo hi beleyum ka' madi' ko kamingkotannyo sataun toka sataun. Pingkainmo tempo' uuka! Lewa'mo pongkaan ka' ponginum ka' o'oa'i na kasanangan nu kantumuu'an!’

²⁰Panyo Tumpu notatae hi ia, ‘O anu ponga'! Pihi uuka mule' beleyum matemo, lantas ihemo ahi' na mohumpak iwi-iwi' kakaya'an anu ilimu'umo bau kapentingan nu butongum?’

²¹Sumo aitumo na katimbaliannyo nu batu-batu mian anu ko usaha da timbali kaya bau kapentingan nu butongnyo, panyo madi' ko usaha da timbali kaya i mata nu Tumpu.”

²²Lantas i Yesus notatae hi anu saja' mombatuki Ia, “Aijo' na sababnyo Aku motatae, ‘Boli bata-bata mongkona kantumuu' anum, aijo'mo pa' apaa na anu okaan miu, kabai apaa na anu opake miu.’

²³Tumuu' molingkudui kaanon, ka' butong molingkudui pakean.

²⁴Soba potomatakon na to tomo-tomonsi' papaa'! Aha madi' monsu'an, madi' mompadak, madi' mule' ko gudang kabai alang. Panyo Tumpu mompotuu' aha! Komiu lebe ko angga'nyo molingkudui to tomo-tomonsi'!

²⁵Ihemo na anu itina' hi komiu, kalana ia bata-bata timbali mompomantan umunnyo mau ola sangkiding!

²⁶De ola han anu ise' aijo' madi'mo opoko bau miu, ka' kadaka' bata-bata mongkona hahan sangga'at?

²⁷ Soba potomatakon mosia na bunga-bunga bakung tumuu'; bunga-bunga aijo' madi' mokalaja, madi' mule' montonun. Panyo i Tomundo' Salomo anu kaya sumo aijo' madi' mompake pakean anu ko ima'nyo sumo bunga-bunga aijo'!

²⁸Hemput i padang tumuu' sinaa aiya, ka' dodop opapui mingkotmo. Panyo Tumpu mombaju'i hemput aijo' kino handaanyo. Apaa mule' komiu! Panyo komiu madi' talalo palesaya!

²⁹Jadi, bolimo bata-bata ka' bingong mongkona apaa na anu okaan miu ka' o inum.

³⁰Hahan sumo aijo' nu tumput nu mian anu madi' monsumbu' Tumpu. Padahan Tuumaum, monsumbu', komiu mompalalui iwi-iwi' aijo'.

³¹Panyo komiu tionyo ko usaha da Tumpu mompalentah i kantumuu'an miu, sahingga anu sangga-sangga'at aijo' obee'je nu Tumpu hi beleyum.”

³²“Komiu anu ola sangkiding na konjoo'nyo, boli mabuhuk! Kalana Tuumaum sanang mombee' hi beleyum balakat lengkat mae i Kapalentahan-Nyo.

³³Pobaluk na anu daagi' hi beleyum ka' bee' na doinyo hi mian kasiasi. Pombaumo dompet bau kapentingan nu butongum, anu madi' toho' ma'idek, aijo'mo halata' anu opo una' i suluga'. Halata' aijo' madi' ko kapolapusannyo, kalana madi' nupoko ala nu anu buling, ka' atak madi' moko ala mongidei.

³⁴Kalana iya na halata'um, i kiijo' suele na kinyonyoaum!”

³⁵ “Bajaga-jaga na mongahopi iwi-iwi' na han. Komiu tionyo saja' mosadia mipake ka' sulu'um tataap opomoak,

³⁶ pokakana sumo to posa-posaihon anu hau-haunyo sasadia montanda'i tuannyo minsusule'mo lengkat mae i bau-bauon monika'. De tuan aijo' minsusule' mae ka' mongkutetek tumban, aha malia-lia' mombukai tumban.

³⁷Palias na ko untungnyo na to posa-posaihon anu tinokan hau-haunyo montanda'i tuannyo toka. Palesayamo: Tuan aijo' nosadia'imo, ka' nompokaumo posaihon haha aijo' sumuhang, lantas ia mombee'imo apaa na anu palalu hi aha.

³⁸Palias na kinodale'nyo na posaihon haha aijo', de tuan nu aha aijo' montokai aha hau-haunyo sasadia montanda'i, mau mule' ia toka tonga' pahuumo kabai talalomo pinin!

³⁹ O inau' na aiya! De nusumbu' nu tumpu nu bonua jam sangkuka na anu mombuling toka, nu jagaimo da anu mombuling toka madi' minsoop i uno nu laigannyo.

⁴⁰Kalana aijo' komiu suele tionyo bajaga-jaga, kalana Anak nu Mian toka, i tempo' anu madi' opoko ala osumbu-sumbu' miu.”

⁴¹“Tumpu, ugaat pangajalan aijo' opadonakon nu Tumpu hi kami, kabai hi iwi-iwi' na mian?” pinokilawa i Petrus.

⁴²Tumpu nontaami, “Ihe na posaihon anu mohongo-hongo ka' pande, sahingga i hangkat nu tuannyo timbali kapala nu to posa-posaihon sangga'at da ia mombee'i aha mongkaan toka i tempo'nyo?

⁴³Palias na ko bilahinyo na posaihon aijo' de tuannyo minsusule'mo mae ka' montokai ia hau-haunyo mombau anu pinokauhakonnyo!

⁴⁴Palesayamo: Tuan aijo' mompotongooje iwi-iwi' na halata'nyo hi posaihon aijo'.

⁴⁵Panyo de pokauhon aijo' motatae i uno nu kinyonyoanyo, ‘Tuanku daagi' pin minsusule'je mae,’ lantas dinokenyo iwi-iwi' na posaihon, ka' nongkaan nonginum sampe nalangu,

⁴⁶saba' tuannyo ninsusule' mae i sinaa ka' jam anu madi' opoko sumbu-sumbu'. Ka' posaihon aijo' nu bandahije hondo-hondo nu tuannyo ka' nu potimbali pokakana tiba to mia-mian anu madi' mohongo-hongo Tumpu.

⁴⁷Posaihon anu monsumbu' pongka'oho' nu tuannyo, panyo madi' mosadia ka' madi' mombau kahanda' nu tuannyo aijo', o doke maho-mahoson.

⁴⁸Panyo posaihon anu madi' monsumbu' pongka'oho' nu tuannyo, saidi' mae mombau apa-apaa anu sala', sahingga tionyo o doke, ola gagana' o doke. Kalana mian anu binee'an manjoo', hi ia o tuntut suele manjoo' ka' anu otanggungkanmo manjoo' hi ia suele otuntut manjoo'.”

⁴⁹“Aku toka monsabapi popapuan i dunia aiya. Talalo ma'ima' de apunyo i noakmo!

⁵⁰ Daagi' ko kasansala'an anu maboat, anu tionyo Ku oa'i. Ka' kinyonyoang-Ku mangada' hondo de ma'isa aijo' timbali.

⁵¹Kabai osangka miu, Aku toka momboa mae paladamean i dunia? Madi', misa' paladamean, panyo mule' mongewa.

⁵²Mulai uuka, poto utusan anu aha olima' na mian, tionyo mompaha idek, totolu' mongewa ohua', kabai ohua' mongewa totolu'.

⁵³ Tuuma mongewa anaknyo mo'ane, ka' anaknyo mo'ane mongewa tuumanyo. Tina mongewa anaknyo boune, ka' anaknyo boune mongewa tinanyo. Tina nu monian mongewa moniannyo boune, ka' monian boune mongewa tinanyo nu moniannyo.”

⁵⁴I Yesus notatae hi mian da'isan, “De komiu montoa kundom moliba' i sasu Kinsoban, balo komiu motatae, ‘Ko ujanmo.’ Ka' totu-totu'u ujanmo.

⁵⁵De komiu mongoa'i mombun toka lengkat mae i Salatan, komiu motatae, ‘Posinaamo.’ Ka' totu-totu'u posinaamo.

⁵⁶Komiu mian anu mongka'ima'i saja' mimpula-pula! Komiu timbali mongkila-kila sinaa ola montoa lupa nu langit ka' tano'. Kadaka' tanda-tanda nu tempo' aiya madi' opoko kila-kila miu?”

⁵⁷“Kadaka' komiu madi' mosi tantukan apaa na anu totu'u?

⁵⁸De ko mian anu mongkalak komiu hi mian kopian, sabole-bole o usahakon da o putusi na komiu hau-haunyo komiu daagi' i tonga' nu jalan. De madi' nuhela'mo na komiu mokiijo' i ahop nu mian kopian, sahingga Pulisi momposoopmo komiu i uno nu talungku'.

⁵⁹Opalesaya! Madi'mo komiu osabatakon i talungku', de ma'isa o bayan lunas na dendanyo.”