Read Saluan LUKAS 13 Bible Online

LUKAS 13 - Saluan bible

LUKAS 13

¹Tempo'nyo aijo' mian nonsisikmo hi Yesus mongkona aha sangkuka na mian nu Galilea anu pinatean i Pilatus, hau-haunyo aha monsombahkon koloban hi Tumpu.

²Mompalahatikan sisik aijo', i Yesus notatae, “Kalana to mia-mian nu Galilea aijo' pinateanmo sumo aijo', komiu monsangkamo aijo'mo na bukuti'nyo aha talalomo binala dosa' molingkudui mian iwi-iwi' i Galilea sangga'at?

³Totu-totu'unyo misa'! Panyo o inau': de komiu madi' balatobat i dosa-dosa' miu, komiu suele iwi-iwi' matemo sumo aha.

⁴Mosia na anu sampulu' ka' uwalu' na mian anu nate i Siloam, tempo'nyo menara aijo' nontuda' aha? Komiu monsangka aijo', pomponyata'mo aha anu talalomo baladosa' molingkudui aha iwi-iwi' to mia-mian anu jojoong i Yerusalem?

⁵Totu-totu'u misa'! Daagi' minsan na kutaeakon: De komiu madi' balatobat i dosa-dosa' miu, komiu suele iwi-iwi' mate sumo aha.”

⁶Lapas aijo' i Yesus nonsisik mule' kantuangan aiya, “Daagi' ko samian na anu ko kau' ara i ale' nu anggurnyo. Daagi' kino sansinaa nia namba nolio bua' nu kau' aijo', panyo madi' nohumpak mau pe'e ola sambatu.

⁷Sahingga ia notatae hi anu mongkalajakon ale'nyo, ‘Toa, totolu'mo na taun aku tinoka molio bua' nu kau' aiya, panyo sahanyo pe'e sambatu madi' ko anu i humpak. Taa'mo sahanyo na kau' aitu! Ia ola mongingkoti lompo' nu kaanon lengkat i tano'!’

⁸Panyo tinaaman nu anu mokalaja ale' aijo', ‘Pojohok pe'e da ia tumuu' sataun aiya, Tuan. Da ku pason pe'e na tano' i duhu-duhuk nu pu'unnyo, ka' ku una'i pokolompo' tano'.

⁹Ihe na monsumbu' taun aiyamae mimbua'je. Panyo de madi', timbalimo na kita Tuan mompokau anu montaa'.’ ”

¹⁰Daagi' ko sansinaan i sinaa nu Sabat, i Yesus nompogulu' i sa'angu' na Laigan Pogalejaan.

¹¹I kiijo' daagi' ko samian na boune masakit sampulu'mo ka' uwalu' na taun, kalana daagi' ko roh ma'idek i uno nu butongnyo. Boune aijo' tabohukut ka' madi'mo moko tuminjo hodi-hodi'.

¹²Salatan tinoa i Yesus, Ia notatae daka-daka' hi ia, “Kita Tina, beleyum ma'alinmo i panyakitum!”

¹³Lantas i Yesus nompanya ubak nu boune aijo', ka' tempo'nyo ai-aitumo na ia tinuminjo hodi-hodi' ka' nompuji' Tumpu.

¹⁴ Kapala nu laigan pogalejaan aitu notambuha'mo, kalana i Yesus nompa'alinmo mian i sinaa nu Sabat, kalana aijo' ia notatae hi to mia-mian, “Daagi' anom na sinaa na mokalaja; toka mae i sinaa aijo' da opa'alin boli i sinaa nu Sabat!”

¹⁵Tumpu nontaami, “Baleko' na komiu aiya! I sinaa nu Sabat iwi-iwi' na mian mompolapas sapi' kabai keledainyo i pangkungnyo, ka' oboa i sambiha'nyo da opo'inum nu aha.

¹⁶Yo, uuka aiya daagi' ko samian na boune lee' i Abraham, anu sampulu'mo uwalu' na taun na kopinnyo pinungu nu Ibilis. Pa' madi' ia olapasakon kiijo' pungu-pungu na ia i sinaa nu Sabat?”

¹⁷Potaam i Yesus aijo' nombaumo anu mongka'ideki i Yesus aijo' na'ambangmo hondo; iwi-iwi' na to mia-mian sangga'at, sinanangmo na nontoa iwi-iwi' anu okabangangi anu binaumo i Yesus.

¹⁸Pinokilawa i Yesus, “De Tumpu mompalentah, mosia na balu-balu'nyo? Tiba apaa na pompokakanakonan-Ku?

¹⁹Balu-balu'nyo sumo kantuang aiya. Sambatu na batu nu sasawi ingala nu sala'samian, lantas sinaunyo i ale'nyo. Batunyo aijo' tinumuu' lantas tinimbali kau', ka' to tomo-tomonsi' nimpetamo i to panga-panga'nyo aijo'.”

²⁰Po'ule' mule' na i Yesus nompokilawa, “De Tumpu mompalentah, tiba apaa na pompokakanakonan-Ku balu-balu'nyo?

²¹Balu-balu'nyo sumo ragi anu ingala nu samian na boune, lantas ingehoknyo tiba patompulu' na liten na labu, sampe no'insu' iwi-iwi'.”

²²Namba nokiijo' i Yerusalem notulu i kota-kota ka' kampu-kampung batuk so' mompogulu'.

²³Lantas daagi' ko mian nompokilawa hi Ia, “Kita Tuuma, apaa ola sangkiding na mian anu oposalamat?” I Yesus nontaami,

²⁴ “Bala usaha da minsoop montulu sabatan anu soki. Kalana, inau'! Da'isan na mian bala usaha minsoop, panyo madi' timbali.

²⁵Tempo'nyo tumpu nu laigan nobula ka' nontumban, komiu tinjo-tinjo i sambiha'nyo ka' nongkutetekmo lantas notataemo, ‘Tuan, tuhea'akon mae na tumban da minsoop na kami!’ Tuan aijo' nontaami, ‘Aku madi' monsumbu' pa' komiu lengkat mae iya!’

²⁶ Komiu montaami, ‘Kami nongkaanmo ka' nonginumo hingga-hinggat i Tuan, ka' kita Tuan nompogulu'mo kami ahi' i jala-jalan nu kota mami!’

²⁷ Panyo i Tuan aijo' notatae mule', ‘Aku madi' monsumbu' pa' komiu lengkat mae ya. Lako'mo pala'i na tampat aiya, komiu anu mombau anu ma'idek!’

²⁸ Tempo'nyo komiu montoa i Abraham, i Ishak ka' i Yakub tiba iwi-iwi' na nabi balame-lame' i uno nu Dunia Bu'ou nu Tumpu Allah, komiu humaang ka' nonta'up sansala, kalana komiu olaa'mo mamba i sambiha'nyo.

²⁹To mia-mian toka mae i sasu Kabete'an tiba Kinsoban, lengkat i Utara tiba Salatan, ka' balame-lame' i uno nu Dunia Bu'ou nu Tumpu.

³⁰ Totu-totu'u daagi' ko anu tongkoimihi anu timbalije mian tongkoimoona, ka' daagi' ko mian anu tongkoimoona timbalije mian anu tongkoimihi.”

³¹I sinaa aitu mule', daagi' ko to pia-piangkuka na mian nu Farisi tinoka hi Yesus ka' notatae, “Boli jojoong i aiya! Lako'mo i tampat sangga'at, kalana i Herodes moniatmo mompatei Beleyum.”

³²I Yesus nontaami, “Lako' poto'iakon hi mian anu madi' mingguna aijo', ‘Sinaa uuka ka' dodop Aku molaa'mo roh ma'idek ka' nompa'alin mian masakit, panyo i sinaa kototolu'nyo, Aku mompomingkotmo pakalaja'an-Ku.’

³³Mau mule' sumo aitu, Aku tionyo molausakon ahi' lajang-Ku sinaa aiya, dodop ka' hipuan, kalana madi' ma'ima' na samian na nabi opatei i sambiha' nu Yerusalem.

³⁴Yerusalem, Yerusalem! To nabi-nabi pinateanmo! To poka-pokauhon nu Tumpu pinahambunu'akonkumo nu batu sampe i nate! To pimpi-pimpianmo na Aku kahanda' molimu' iwi-iwi' na tumpu nu lipu'um sumo tinaan nu manuk mongokobi to sio-sioknyo i aluk nu polipiknyo, panyo beleyum madi' mongka'oho'!

³⁵ Kalana aitu Tumpu madi'mo monjagai beleyum. Osumbu'mo, mulai uuka beleyum madi'mo daagi' montoa Aku, sampe beleyum motatae, ‘Nubalakati na Ia anu tinokamo i uno nu sanggo nu Tumpu.’ ”