Read Saluan LUKAS 15 Bible Online

LUKAS 15 - Saluan bible

LUKAS 15

¹ Daagi' ko sansinaan, da'isan na anu topo tage hasin tiba to mia-mian anu osangka madi' ma'ima' nu mian da'isan, tinokamo mohongo i Yesus.

²To mia-mian Farisi ka' to gulu-gulu' agama mulaimo nompisala'i. Aha notatae, “Se', na mian aiya montalima to mia-mian anu madi' ma'ima', ka' aijo' mongkaanmo hingga-hinggat tiba aha!”

³Mokonyo sumo aijo' i Yesus nonsisikakonmo kantuangan aiya hi aha,

⁴“De ko samian anu itina' hi komiu daagi' ko sa'atu na domba, lantas nolapus na sa'angu' — apaa na tionyo nubau? Tantu nu pala'i na domba siompulu' ka' osio', aijo' i hemput padang, ka' mamba molio anu i nolapusmo sampe o humpak.

⁵Ka' de po'ule'mo nu humpak na domba aijo', ia sanangmo sahingga sinimbunyomo na domba aijo' i bikoangnyo,

⁶lantas binoanyomo ninsusule'. Ka' ilapas aijo' i laganyomo na to sanga-sangalunyo tiba anu mompaha ohani laigannyo ka' notatae, ‘Imbo' da kita balame-lame'. Dombangku anu inolapus po'ule'mo kinabotku!’

⁷Jadi, sumo aitumo na i suluga' ko kalame'an anu daka' hondo kalana samian anu baladosa' binala tobatmo, nolingkuduimo anu siompulu' ka' osio', na mian anu na'ima'mo ka' madi'mo palalu balatobat.”

⁸“Kabai de samian na boune daagi' ko doi sampulu' na doi salaka, lantas nolapusmo na sambatu — apaa na anu tionyo nubau? Nututungi na sulu' ka' monsapui laigannyo ka' molio iyayamae sampe nu humpak na doinyo aijo'.

⁹Salatan i humpaknyomo na doi aijo', nu laganmo na to sanga-sangalunyo tiba anu mompaha ohani laigannyo, lantas notatae, ‘Aku sinanangmo hondo po'ule'mo i humpakku na doingku anu nolapusmo. Imbo' da kita balame-lame'!’

¹⁰Sumo aitumo na malaekat nu Tumpu lame' de daagi' ko samian anu ma'idek balatobatmo i dosa-dosa'nyo. Palesayamo!”

¹¹I Yesus po'ule' notatae, “Daagi' ko samian na tuuma anu ko anak mo'ane ua'aha.

¹²Anu tatampalui' notatae hi ia, ‘Papa, bee'akonmo mae uuka aiya na bahagianku nu kakaya'anto.’ Sahingga papanyo nombagimo kakaya'annyo hi ua-ua'aha na anaknyo.

¹³Madi' pinin lengkat i aitu pinobaluknyomo nu anak tatampalui' aijo' na pusaka' anu binagimo, ka' i namba i lipu' majo'on. I kiijo' mae ia nombeasakonmo doinyo ka' tumuu' moluluk.

¹⁴Salatan doinyo ningkotmo iwi-iwi' i lipu' aijo', tinokamo na tempo' nu ohop isongko-songko na lipu', sahingga ia nontampu'unimo kinasiasi.

¹⁵Lantas ia nambamo nongala tamboo hi samian na tumpu nu lipu' i kiijo', anu nompokau ia namba i ale' monjagai bau'nyo.

¹⁶Ia talalomo no'ohop, mompai isimo kompongnyo nu kaanon nu bau' haha aijo'. Mau ia talalomo no'ohop, madi' ko samian pe'e nombee'i kaanon hi ia.

¹⁷Kinahimpusannyo ia sininsumbu'mo ka' notatae, ‘To mia-mian anu mokalaja hi tuumangku molabi-labi na kaanonnyo, jo aku i aiya mompai patemo nu ohop!

¹⁸Aku molengkatmo ka' mamba hi tuumangku, ka' motatae hi ia: Papa, aku binala dosa'mo i ahop nu Tumpu ka' i ahop nu kita tuumangku.

¹⁹Madi'mo nukona na aku osanggohi anak nu kita tuuma. Sanggohimo mae na aku samian anu mongala tamboo hi kita Tuuma.’

²⁰Saba' ia nolengkat ka' ninsusule' hi tuumanyo. Daagi' jo'o-jo'on aijo' mae i laigan, ia tinoamo nu tuumanyo. Liibos nu tuumanyo tahahumo, nopadeka' nonsingkaboti, lantas nontanggogoli ka' nongooki ia.

²¹‘Papa,’ tukoonyo nu anak aijo', ‘aku binala dosa'mo i ahop nu Tumpu tiba hi Papa. Madi'mo nukona na aku osanggohi anak i Papa.’

²²Panyo papanyo nolaga to poka-pokauhonnyo ka' notatae, ‘Lia-lia'! Alamae na baju' anu talalo ma'ima' ka' popusok hi ia. Posolutakon na sinsing i kangkamnyo, ka' sapatu i tengkenyo.

²³Lapas atina' hakop na anak nu sapi' anu molompo' ka' kolot. Da kita mongkaan ka' balame-lame'.

²⁴Kalana anakku aiya i natemo, aiya tinumuu'mo mule'; ia nolapusmo, uuka i humpakkumo mule'.’ Balo aha nombau bau-bauon.

²⁵Hau-haunyo aijo' anak tumpe-tumpe daagi' kiijo' mae i ale'. Salatan ia ninsusule'mo ka' malia'mo toka i laigannyo i hongonyomo na onyi' nu musiik ka' anu monsalelei.

²⁶I laganyomo na sala'samian pokauhon, lantas pinokilawanyomo, ‘Ko apaanyo na uutu i laigan?’

²⁷Pokauhon aijo' nontaami, ‘Utus ise' i Tuan ninsusule'mo mae! Ka' tuuma i Tuan noki kolotmo anak nu sapi' anu molompo', kalana po'ule'mo i humpaknyo na anaknyo ninsusule'mo mae ma'i-ma'ima'.’

²⁸Anak tumpenyo aijo' pinusamo hondo, sahingga madi'mo mongka'oho' minsoop i laigan. Lantas tuumanyo nosabat ka' nongindeeko' da ia minsoop.

²⁹Panyo ia notatae, ‘Notau-taunmo na kopinnyo aku nokalaja mate-matemo bau kapalaluan i Papa. Madi' toho' aku nonggagakon apaa na pinokauhakon i Papa. Yo apaamo na binee' i Papa hi belengku? Sa'angu' pe'e na mee' ma'isa toho' binee' i Papa hi belengku, da aku mombau bau-bauon tiba to sanga-sangalungku!

³⁰Anak i Papa aitu nombeasakonmo kakaya'an i Papa tiba boune masala', panyo salatan ia ninsusule'mo mae, kita Tuuma nongkolotimo anak nu sapi' anu molompo' polame'akon ia!’

³¹‘Anakku,’ tinaaman nu Papanyo, ‘beleyum saja' aiya tiba aku. Iwi-iwi' na anungku, aijo' suele beleyum na tumpunyo.

³²Panyo kita tionyo mombau-bauon ka' balame-lame', kalana utusum ise' aijo' sinilakamo, panyo uuka po'ule'mo tinumuu'; ia nolapusmo, panyo uuka po'ule'mo kinabot.’ ”