Read Saluan LUKAS 16 Bible Online

LUKAS 16 - Saluan bible

LUKAS 16

¹I Yesus notatae hi anu saja' mombatuki Ia, “Daagi' ko samian anu kaya. Ia daagi' ko samian anu binee'anmo kalaja mongulus doi ka' mongatun kakaya'annyo. Mian kaya aijo' nohumpak lapulan, tukoonyo pongulus doi nombeasakon doinyo.

²Sahingga i laganyo na pongulus doi aijo' ka' notatae, ‘Mosia na uuka anu i hongongkumo mongkona beleyum? Uuka aiya bee'mae hi belengku na lapulan iwi-iwi' nu kalajaum nongatun kakaya'anku. Beleyum madi'mo daagi' timbali mongulus doingku.’

³Saba' pongulus doi aijo' binapikin, ‘Apaa na kubau uuka? Tuanku ka'oho'mo mompobelenti aku. Mompason, aku madi' mahoson; lewa' momoita aku ma'ambang.

⁴Aku ko akan; de aku opobelenti, ku'usahakon da manjoo' na sangalu anu mongka'oho' montalima aku i laigan nu aha!’

⁵Sahingga pongulus nu doi no laga batu-batu mian anu ko samaya' hi tuannyo. Hi anu momona ia notatae, ‘Sangkuka na samaya'um hi tuangku?’

⁶Mian aijo' nontaami, ‘Sa'atu na gumbang, lanya' nu zaitun.’ Pongulus doi aijo' notatae hi ia, ‘Aiya na sulat nu samaya'um. Suhangmo ka' lia-lia' tulis: Limampulu'.’

⁷Lapas aijo' ia notatae hi mian ko ohua'nyo, ‘Ka' kita Utus, sangkuka na samaya' nu kita Utus?’ Mian aijo' nontaami, ‘Samadala na kalung nu gandum.’ Pongulus nu doi aijo' notatae hi ia, ‘Aiya na sulat nu samaya'um. Tulismo: Uwalu'atu.’

⁸Saba' Tuan nu pongulus doi anu madi' hodi' aijo' nonpuji'mo pongulus aijo', kalana kapandean anu binaunyo aijo'; sabab to mia-mian i dunia aiya lebe pande mongatun ulusan nu aha molingkudui to mia-mian anu tumuu' i uno nu jingka.”

⁹Lantas i Yesus po'ule' notatae, tukoo-Nyo, “Hongo! Pakemo na kakaya'an nu dunia aiya da mohumpak sangalu, da de kakaya'an nu dunia aiya madi'mo ko olinyo, komiu otalimaje i tampat kajojoongan anu sidu-sidutu'.

¹⁰Mian anu timbali opalesaya i uno nu hahan anu ise', timbali opalesaya mule' i hahan anu daka'. Panyo mian anu madi' timbali opalesaya i hahan anu ise', madi' timbali opalesaya i hahan anu daka'.

¹¹Jadi, de mongkona kakaya'an nu dunia aiya komiu madi'mo timbali palesaya, ihe na mongka'oho' mompalesayakon hi komiu kakaya'an nu santuu'?

¹²Ka' de mongkona balang-balang anu nu san-samianan, komiu madi'mo timbali opalesaya, ihe na mongka'oho' mombee' hi beleyum apaa na anu timbali bau bahagian nu beleyum?

¹³ Madi' ko samian moko ala mombau kalaja hi aha ohua' na tuan; kalana ia lebemo mongkalibosi samian lantas sangga'at madi'mo. Sumo aijo'mo mule' na komiu. Komiu madi' moko ala mombau kalaja nu Tumpu Allah ka' mule' halata' nu dunia aiya.”

¹⁴To mia-mian Farisi nohongomo iwi-iwi' anu tinaloakon i Yesus. Lantas kinokojoanmo nu aha, kalana aha mongka'ima'i doi.

¹⁵Panyo i Yesus notatae hi aha, “Komiumo na mian de i ahop nu san-samianan otoa totu'u, panyo Tumpu monsumbu' isi nu kinyonyoaum. Kalana apaa na anu osangka matangkas nu mian, nutoa nu Tumpu heede'.

¹⁶ Atulan anu binee' i Musa tiba ajalan nu to nabi-nabi, tataap o pake sampe tempo'nyo i Yohanes anu Mompalamandikan. Mulai tempo' aitu, Lele Ma'ima' mongkona mosia na Tumpu mompalentah susumo Tomundo, saja'mo i leleakon. Ka' mian mompakisakon butong da timbali minsoop mian anu palesayamo hi Tumpu.

¹⁷ Panyo lebe dengke langit tiba dunia lanyap, ka' de mule' sa'angu' na hulup i uno nu Atulan nu Tumpu na o alinakon.

¹⁸ Ihe na mongga'atakon bengkele'nyo, ka' mo'osoa tiba boune sangga'at, mian aijo' masala'. Ka' mian anu mongosoai boune anu gina'atakonmo, masala' suele.”

¹⁹“Daagi' ko samian anu kaya. Pakeannyo to maha-mahan, tiba mule' kantumuu'annyo tumuu' molabi-labi sansina-sinaa.

²⁰I ahop nu sabatan nu laigannyo, pino'una' samian na anu kasiasi sanggonyo i Lazarus. Butongnyo kaho bela.

²¹Ia ka'oho' mongisi kompongnyo nu laaya' anu manabu' lengkat i meja' nu mian kaya aijo'. Dedeng pe'e saja' toka mojila'i belanyo.

²²Mian kasiasi aijo' imihinyo mae natemo, lantas binoa nu malaikat i tampat anu ko angga'nyo i sohipi' i Abraham i suluga'.

²³Mian kaya aijo' suele i nate ka' i lamun. I dunia nu mian mate aijo' sinansala hondo. Ka' tempo'nyo ia nontanggalakon aijo' mae nokiita' i bawo, tinoanyo na i Abraham i tampat majo'on, ka' i Lazarus i sohipi' i Abraham.

²⁴‘Tuumangku Abraham!’ loboo' nu mian kaya aijo'. ‘Kalibosi na aku. Pokau mae na i Lazarus molobong bua' nu limanyo i uno nu uee lantas toka mae mohumpisi jila'ku. Tahahumo sansala na aku i uno nu apu aiya!’

²⁵Panyo i Abraham nontaami, ‘Tutugi anakku: Salatanmo pe'e tinuu'um, beleyum nohumpakmo anu toto ima-ima'; sadang i Lazarus nohumpak anu toto ide-idek. Uuka ia sanangmo i aiya, ka' beleyumo na sansala.

²⁶Ka' mule' aitu i olotum ka' kami binaumo na keles daka', de mian lengkat mae aiya madi' moko pokiijo', ka' anu lengkat mae aijo', madi' moko po'uuka mae!’

²⁷‘Desumo aitu, Kita Tuumangku;’ tukoonyo nu mian kaya aijo', ‘ku poita sabole-bole Kita Tuumangku monsaiakon i Lazarus mamba i laigan nu tuumangku.

²⁸Daagi' olima' na utusku i kiijo' mae. Saiakon na i Lazarus mompokinde'i aha, da boli sampe aha mule' manabu' i tampat kasansala'an sumo aiya.’

²⁹I Abraham nontaami, ‘Aha ko kitab-kitabmo i Musa tiba kitab nu to nabi-nabi! Bakas aha montulutije apaa na anu tinulismo i uno nu kitab-kitab aijo'!’

³⁰Panyo tinaaman nu mian kaya aijo', ‘Aijo' madi' sukup, kita Tuumangku Abraham. Panyo de ko anu mate ka' po'ule' tumuu' ka' toka hi aha, aha balatobatje i dosa-dosa' nu aha.’

³¹Panyo i Abraham notatae, ‘De aha madi' mompajuli palentah i Musa ka' to nabi-nabi, tantu ahi' aha madi' palesaya mau mule', ko anu i nate po'ule' tinumuu'.’ ”