Read Saluan LUKAS 17 Bible Online

LUKAS 17 - Saluan bible

LUKAS 17

¹I Yesus notatae hi anu saja' mombatuki Ia, “Hahan anu monsaduakon mian mombau dosa' tantu daagi'. Panyo silaka na mian anu monsaduakon!

²Lebe ma'ima' de batu ponggiling oposegot i gogohongnyo, lantas ia o alin i uno nu ambai, ka' de mule' ia monsaduakon sala'samian na to mia-mian ise' aiya mombau dosa'.

³ Kalana aitu, balajaga-jaga! De utusum baladosa', pokinde'i na ia. De ia mompele-pele'mo, ampuniakon na ia.

⁴De ia baladosa' hi beleyum pimpitun lipat sansinaa ka' ia toka hi beleyum ka' motatae, ‘Aku momoita ampun,’ o ampuni na ia.”

⁵To rasul-rasul notatae hi Tumpu Yesus, “Tumpu, pohosonakon mae na palesaya mami.”

⁶Tumpu nontaami, “De komiu ko palesaya anu totu-totu'u sumo batu nu sasawi, komiu timbali motatae hi kau' murbei aiya, ‘Tonggaut na oko ka' tumuu' i ambai,’ tantu kau' aiya mombatuki palentaum.”

⁷“De atina' hi komiu ko posaihon anu mompajeko i ale' kabai molaya' domba. De posaihon aijo' minsusule'mo mae, apaa na tinaeakonnyo hi ia, ‘Imbo' sampa' dongan mongkaan?’

⁸Tantu madi'! Ola ahi' ia notataemo hi posaihon aijo', ‘Posadia na kaanonku. Pompake baju' anu belesi' ka' tanda'i na aku hau-haunyo mongkaan ka' monginum; lapas aitu timbalije na oko mongkaan.’

⁹Posaihon aijo' madi' pilenje o puji' kalana nohongo-hongomo palentah nu tuannyo, kabai misa'o sumo aitu?

¹⁰Sumo aitumo na komiu. De komiu mombaumo iwi-iwi' anu pinalentahkon hi komiu, otaloakon, ‘Kami ola posaihon biasa; kami ola mombau anu pinalentahkon hi kami.’ ”

¹¹Kinalambanan namba i Yerusalem, i Yesus notulu i da'erah potempasan nu Samaria tiba Galilea.

¹²Tempo'nyo ninsoop i sa'angu' na kampung, Ia ilambanan mae nu sampulu' na mian anu ko panyakit kilit anu okabuhuk. Tinuminjo majo'on na aha aijo' mae.

¹³Ka' noloboo', “Yesus! Yesus! Kalibosi na kami!”

¹⁴ Tempo'nyo i Yesus nontoa aha, Ia notatae, “Lako'mo hi to ima-imam, poita da aha mompalesa butongum.” Hau-haunyo aha laja-lajang, na'alinmo na panyakitnyo.

¹⁵Salatan samian aijo' hi aha nonsumbu'mo taalu' ia na'alinmo, ia ninsusule' ka' ilame'mo, ka' nompuji'mo Tumpu.

¹⁶Lantas i ahop i Yesus ia nonsombah, ka' nontalima kase hi Ia. Mian aijo' mian nu Samaria.

¹⁷Lapas aijo' i Yesus notatae, “Te misa' aha sampulu' na pina'alin? Iya na osio'?

¹⁸Kadaka' ola mian nu santano'an aiya na ninsusule' mae nontalima kase hi Tumpu?”

¹⁹Lantas i Yesus notatae hi mian aijo', “Bulamo ka' lako'mo. Kalana beleyum palesaya hi beleng-Ku, beleyum ina'alinmo.”

²⁰To pia-piangkuka na mian nu Farisi nompokilawa hi Yesus, hipian na Tumpu toka mae mompalentah. I Yesus nontaami, “Pompalentan nu Tumpu madi' otampu'uni nu tanda anu timbali nu toa nu mian,

²¹sahingga mian timbali montaloakon, ‘Imbo' toa, aiyamo na ia!’ kabai, ‘Aijo' mae na ia!’ Kalana Tumpu montampu'unimo mompalentah atina' hi komiu.”

²²Lapas aijo' i Yesus notataemo hi anu saja' mombatuki Ia, “Tokaje na tempo'nyo komiu kahanda' montoa sansinaa, i sinaa Anak nu Mian, panyo komiu madi' moko ala toa.

²³Mianje na motatae hi komiu, ‘Toa, i kiijo'!’ kabai, ‘Toa, i aiya!’ Panyo boli komiu mosabat molio ia.

²⁴Sumomo kilat pojohonjit i langit ka' monjingkai lengkat mae i puusnyo toka i puusnyo, sumo aitumo saidi' mae na baunyo Anak nu Mian toka i sinaanyo.

²⁵Panyo momonanyo Ia tionyo mongoa'i manjoo' na kasansala'an ka' madi' otalima nu to mia-mian tempo' uuka.

²⁶ I sinaanyo Anak nu Mian oponyata'je na baunyo sumo tempo'nyo, i Nuh naipuan mae.

²⁷ Mian mongkaan monginum, ka' mo'osoa; saja' sumo aitu sampe i Nuh ninsoop i kapan, ka' iaba' tinoka nohopu'i to mia-mian aijo' iwi-iwi'.

²⁸ Sumo anu tinimbali tempo'nyo hi Lot. Mian mongkaan monginum, mobalu-baluk, mongale', ka' mombau laigan.

²⁹Panyo salatan i Lot nosabatmo lengkat mae i Sodom, i sinaa aitu apu tiba belelang nintau'mo lengkat mae i langit ka' nonsilakai aha iwi-iwi'.

³⁰Sumo aitumo na baunyo saidi' mae de sinaa Anak nu Mian oponyata'mo.

³¹ I sinaa aijo' mian anu hau-haunyo i bawo nu atop nu laigannyo, boli mintau' mongala to paka-pakakasnyo i uno nu laigan. Sumo aitu mule' mian anu hau-haunyo i ale', bolimo minsusule' mae i laigannyo.

³² O inau' apaa na anu tinimbalimo hi bengkele' i Lot!

³³ Mian anu bala usaha momposalamat kantumuu'annyo, saidi' mae madi' mohumpak kantumuu'annyo. Panyo mian anu madi' mohumpak kantumuu'annyo, han aijo'mo na momposalamat ia.

³⁴Palesayamo: I pihi aijo', ua'aha na mian hau-haunyo hoyot i sa'angu' na koi, samian oboa, ka' samian opala'i.

³⁵Ua'aha na boune hau-haunyo monggiling gandum, samian oboa, ka' samian opala'i. [

³⁶Ua'aha na mian hau-haunyo mongkaeng i ale', samian oboa, ka' samian opala'i.]”

³⁷Anu saja' mombatuki Yesus nompokilawa, “Iyamae na katimbaliannyo nu han aijo', Tumpu?” I Yesus nontaami, “Iya na ko bangke', i kiijo' ko tomonsi' mongkaan bangke'.”