Read Saluan LUKAS 18 Bible Online

LUKAS 18 - Saluan bible

LUKAS 18

¹Lapas aijo' i Yesus nonsisikakonmo sa'angu' na kantuangan da bau pompotingan anu saja' mombatuki Ia, da aha aja' balado'a, ka' boli mongoa'i susa'.

²Koonyo i Yesus, “I sa'angu' na kota daagi' ko samian na mian kopian anu madi' mabuhuk hi Tumpu, ka' madi' mompajuli mau mule' ihe.

³I kota aijo' daagi' suele ko samian na balu anu saja'mo mangadap hi mian kopian mongkakase da palakalanyo o tinjohi. ‘Tulungi na aku mongahopi sampo palakalangku,’ koonyo nu balu aijo'.

⁴U'utu mae mian kopian aijo' madi' mongka'oho' montulungi balu aijo'. Panyo ahennyo mian kopian aijo' binapikinmo, ‘Mau mule' aku madi' mabuhuk hi Tumpu, ka' madi' mompajuli mau mule' pa' ihe,

⁵panyo kalana balu aiya saja'mo molingkang aku, sahanyo kutinjohimo na palakalanyo. De madi', ia saja'mo mae toka ka' momposusa' aku.’ ”

⁶Lantas Tumpu notatae, “Soba hongo apaa na anu tinaeakonmo nu mian kopian anu madi' adin aijo'!

⁷Yo, te Tumpu madi' montinjohi palakala nu mian anu palesayamo hi Ia, anu momoita tulung hi Ia sinaa ka' malom? Te Ia montunda-tunda tempo' na montulungi aha?

⁸Palesayamo: Ia malia-lia' montinjohi palakala nu aha! Panyo de Anak nu Mian tokamo, pa' daagi' okabot na mian palesaya hi Ia, i dunia aiya?”

⁹I Yesus nonsisikakon suele kantuangan aiya anu pinatuakon hi mian anu montoa mian sangga'at madi' talakana', panyo mangaku posi butongnyo ma'ima'.

¹⁰Koonyo i Yesus, “Daagi' ko ua'aha na mian anu namba i Laigan nu Tumpu da balado'a. Samian, mian nu Farisi, sangga'at mian anu topo tage hasin.

¹¹Mian nu Farisi aijo' tinuminjo posi sausa'nyo, ka' binalado'a, ‘O Tumpu, aku mompotoka talima kaseh hi kita, kalana aku madi' sumo sangga'at, mangoa, tageo'kabai masala'. Aku montalima kaseh, kalana aku madi' sumo topo tage hasin aijo'.

¹²Aku bapuasa' pinduan saduminggu, ka' monsombahkon hi kita iwi-iwi' apaa na anu i humpakku, sampulu' na bagian, sambagian na anungku.’

¹³Panyo topo tage hasin aijo' tinuminjo jo'o-jo'on ka' madi' baani montihanga langit. Ka' nompanyamo saha'annyo ia notatae, ‘O Tumpu, kalibosiakon na aku mian baladosa' aiya!’ ”

¹⁴ “Palesayamo” na koonyo i Yesus, “salatan ninsusule'mo i laigan, topo tage hasin aijo' na tinalima nu Tumpu, misa' mian nu Farisi aijo'. Kalana batu-batu mian anu mohangkat butongnyo otau'akon, ka' batu-batu mian anu montau'akon butongnyo, o hangkat.”

¹⁵Daagi' ko to mia-mian nomboa to ana-anak ise' hi Yesus da Ia mompanya ka' mombalakati aha. Salatan tinoa nu anu saja' mombatuki Yesus, aha nontambuha'imo to mia-mian haha aijo'.

¹⁶Panyo i Yesus nolaga to ana-anak haha aijo', ka' notatae hi anu saja' mombatuki Ia, “Pobee' mae na to ana-anak atina' toka mae hi beleng-Ku! Boli montewa' aha, kalana mian anu sumo aiya na timbali minsoop mian anu palesayamo hi Tumpu.

¹⁷O inau'! Mian anu madi' mangadap hi Tumpu sumo samian na anak, madi' timbali minsoop mian anu palesayamo hi Tumpu Allah.”

¹⁸Samian na Polaya' nu Yahudi nompokilawa hi Yesus, “Tuumangku Gulu' anu ma'ima', apaa na tionyo kubau da mohumpak tumuu' kopian sidu-sidutu'?”

¹⁹“Kadaka' kooyum Aku ma'ima'?” Pinokilawa i Yesus hi ia. “Madi' ko anu ma'ima', de misa' ola ahi' Tumpu.

²⁰ Sinumbu'mo na pale-palentah nu Tumpu: ‘Boli masala', boli mompatei, boli mombuling, boli timbali sakisi baleko', ka' o adati na tuuma ka' tinaum.’ ”

²¹“Iwi-iwi' na palentah aijo' binatukankumo, salatanmo pe'e daagi' olitau,” tinaaman nu mian aijo'.

²²Nohongo aijo', i Yesus notatae, “Daagi' ko sa'angu' na han na anu tionyo nu bau: Pobaluk na anu iwi-iwi' hi beleyum, bee' hi mian kasiasi na doinyo, mohumpakje halata' i suluga' na beleyum. Lapas aijo' tokaje mae mombatuki Aku.”

²³Panyo salatan i hongo nu mian aijo', ia sinusa'mo kalana ia kaya hondo.

²⁴Sinumbu' i Yesus na mian aijo' sinusa'mo na kinyonyoanyo, kalana aijo' Ia notatae, “Susa' hondo na mian kaya minsoop mian anu palesayamo hi Tumpu!

²⁵Lebe dengke sa'angu' na unta minsoop i bolo' nu paka'ut, ka' de mule' mian kaya minsoop i Dunia Bu'ou nu Tumpu.”

²⁶To mia-mian anu nohongo i Yesus nontaloakon sumo aijo', nompokilawamo, “Desumo aitu, ihe na moko ala salamat?”

²⁷I Yesus nontaami, “Anu madi' timbali opoko ala o bau nu mian, hi Tumpu timbali!”

²⁸Lantas i Petrus notatae, “Toa! Kami mompala'imo auwan mami da mombatukimo kita Tuumangku.”

²⁹“Palesayamo!” na koonyo i Yesus. “Mian anu mompala'imo laigannyo, kabai bengkele'nyo, kabai utusnyo, kabai tuuma tinanyo, kabai to ana-anaknyo, kalana mohongo anu o atun nu Tumpu,

³⁰mian aijo' obalosije pimpian lipat tempo' uuka, ka' tempo' anu tokaje mae, ia obee'ije tumuu' kopian sidu-sidutu'.”

³¹I Yesus nomposihuk sampu-sampulu' ka' ohua' na anu saja' mombatuki Ia, ola posi aha, lantas Ia notatae. “Potombihing! Kita uuka mambamo mokiijo' i Yerusalem. Kiijo' mae iwi-iwi' na anu tinulismo nu to nabi-nabi mongkona Anak nu Mian, timbalimo.

³²Ia obee'mo hi to mia-mian misa' Yahudi, anu monyaat, mompopisik, ka' montupe'i Ia.

³³Aha monsakisa ka' mompateimo Ia, panyo i sinaa ko totolu'nyo, Ia po'ule'je tumuu'.”

³⁴Iwi-iwi' aijo' sangkiding pe'e madi' sinumbu' nu anu saja' mombatuki Yesus aijo'. Poso' nu potatae-Nyo aitu pinohowini hi aha. Aha madi' monsumbu' pa'apaa na tinaeakon-Nyo.

³⁵Tempo'nyo i Yesus malia'mo toka i Yerikho, samian na mian mapisok hau-haunyo suha-suhang lewa' momoita i sohipi' nu jalan.

³⁶De nuhongomo na mian da'isan notulu, nupokilawamo, “Daagi' ko apaa?”

³⁷“I Yesus, mian nu Nazaret aijo', notulu,” tinaeakon nu aha hi ia.

³⁸Sahingga mian mapisok aijo' noloboo', “Yesus anak i Daud! Kalibosiakon na aku!”

³⁹To mia-mian anu aita' imoona, nontambuha'i ia ka' nompokau ia momohokot. Panyo ia noloboo', lebe mahoson mule', “Anak i Daud! Kalibosiakon na aku!”

⁴⁰I Yesus tinolotinjo ka' nompokau mian momboa mae mian anu mapisok aijo' hi Ia. Salatan tinoka, i Yesus nompokilawamo,

⁴¹“Apaa na anu nuka'ima'i Kubau hi beleyum?” “Tuan,” tinaaman nu mian mapisok aijo', “aku ka'oho' montoa.”

⁴²Lantas i Yesus notatae, “Desumo aitu, toamo! Kalana beleyum palesaya hi belengKu, beleyum ma'alinmo.”

⁴³Tempo'nyo aitu ia nontoamo, lantas nombatukimo Yesus ka' nontaeakonmo talima kase hi Tumpu. Salatan mian da'isan nontoamo han aijo', aha iwi-iwi' nompuji-puji'mo Tumpu.