Read Saluan LUKAS 2 Bible Online

LUKAS 2 - Saluan bible

LUKAS 2

¹Tempo'nyo aijo' i Tomundo Agustus nompalentahkon da iwi-iwi' na layat nu kalaja'an Roma mombee' sanggo o tulis da o bilang na konjoo'nyo.

²Pombilangan anu momonanyo binau tempo'nyo i Kirenius tinimbali gubernur i lipu' nu Siria.

³Iwi-iwi' na mian tempo'nyo aitu namba da o tulis i posi kota'nyo toto samian.

⁴I Yusuf mule' namba lengkat i Nazaret i Galilea, namba i Betlehem i Yudea, tampat kinahampean i Tomundo Daud; kalana i Yusuf lee' i Daud.

⁵I Yusuf nompotulis sanggo ka' dohoinyo i Maria anu hau-haunyo poboa.

⁶Tempo'nyo kiijo' na aha i Betlehem, tinokamo na tempo'nyo i Maria mompohampemo.

⁷Ia nohampeakon samian na anak mo'ane, anaknyo anu tumpe. Anak aijo' sinabutannyo nu hude, ka' pinomale'nyo i tampat pompo'una'an hemput; kalana aha madi' nohumpak panumpangan.

⁸Pihi-pihi aijo' daagi' ko polaya' binatang anu hau-haunyo monjagai domba-dombanyo i hemput padang i da'erah aijo'.

⁹Monti-montiik malaikat nu Tumpu nompotoamo butongnyo hi aha ka' jingka lengkat hi Tumpu nonjingkai aha, ka' aha talalomo mabuhuk.

¹⁰Panyo koonyo nu malaikat, “Boli mabuhuk! Kalana aku toka momboa lele ma'ima' hi komiu — lele anu talalo mompolame' iwi-iwi' mian.

¹¹Sinaa aiya i kota Daud i hampemo na Tomundo anu Momposalamat komiu, aijo'mo i Kristus, Tumpu.

¹²Aiyamo na tandanyo: Komiu mambaje montoa samian na bungamea' anu sinabutan nu hude, ka' pinomale' i uno nu pompakanan domba.”

¹³Monti-montiik malaikat aijo' sinangaluan nu malaikat manjoo' sangga'at, mompuji' Tumpu. Aha notatae,

¹⁴“Puji' na Tumpu i langit anu matangkas hondo! Ka' i bawo nu dunia, salamatmo na mian anu momposanang kinyonyoa nu Tumpu!”

¹⁵Salatan mala-malaikat nompala'imo aha ka' ninsusule'mo i suluga', to pola-polaya' aijo' notatae hi samian ka' samian, “Imbo' da kita mamba i Betlehem montoa pa'apaa na anu tinimbalimo kiijo', anu pinoto'i nu Tumpu hi kita.”

¹⁶Lia-lia' na aha namba, ka' nonsingkaboti i Maria tiba i Yusuf, tiba mule' bungamea' anu pinomale' i pompakanan domba.

¹⁷Salatan to pola-polaya' domba nontoa bungamea' aijo', sinisikmo nu aha na anu tinaloakon nu to mala-malaikat mongkona bungamea' aijo'.

¹⁸Ka' binangang na mian da'isan no hongo sisik nu to pola-polaya' domba aijo'.

¹⁹Panyo i Maria nonguna' sisik iwi-iwi' aijo' i kinyonyoanyo ka' lewa' nompotutugakon.

²⁰Ninsusule' na to pola-polaya' domba i hemput padang, ka' aha nompuji' ka' nompopodaka' Tumpu, kalana iwi-iwi' na tinoa ka' i hongo nu aha, madi' sala' sumo anu tinaloakonmo nu malaikat.

²¹ Salatan umunnyo ingialunmo na sinaa, anak aijo' sinunatmo. Ka' sinanggohan nu aha i Yesus, sanggo anu binee' nu malaikat hi Ia, ma'isa pe'e pinoboa na tina-Nyo.

²² Tinokamo na tempo'nyo i Yusuf ka' i Maria nompojalanmo adat da oposusi' susumo atulan i Musa. Jadi binoa nu aha na Anak aijo' i Yerusalem da obee' hi Tumpu.

²³ Kalana i uno nu Atulan nu Tumpu tinulis sumo uuka, “Batu-batu anak tumpe mo'ane, tionyo obee' hi Tumpu.”

²⁴Aha mule' ko niat monsombahkon koloban, atina'mo beheenyo ka' lakinyo, tomonsi' sapatau, kabai ohua' na tomonsi' malapati' anu daagi' bata'nyo, sumo anu tinantukanmo nu Atulan nu Tumpu.

²⁵Tempo'nyo aijo' i Yerusalem daagi' ko samian sanggonyo i Simeon. Ia mian anu ma'ima', anu mabuhuk hi Tumpu, ka' hau-haunyo montanda'i tempo'nyo Tumpu momposalamat Israel. Roh nu Tumpu monsangalui ia,

²⁶ka' Roh nu Tumpu nompoto'imo hi ia, saba' ia ma'isa silaka de ma'isa pe'e montoa Tomundo anu Momposalamat, anu jinanji'mo nu Tumpu.

²⁷Kuasa nu Roh nu Tumpu na nonggai-gai' i Simeon ninsoop nokiijo' i Laigan nu Tumpu. Tempo'nyo aijo' i Yusuf ka' i Maria nomboa i Yesus ninsoop anu daagi' ise' aijo' da mombau atulan anu nu palentahkon nu atulan nu agama.

²⁸Ingala i Simeon na Anak aijo' ka' tinangkung-Nyo, ka' pinuji'nyo na Tumpu,

²⁹“Uuka, Kita Tumpu nongganapimo janji'-To. Pobee'mo na posaihon-To aiya silaka hoko-hokot.

³⁰Kalana posi matangku, aku nontoamo Anu Momposalamat lengkat hi Belento.

³¹Anu Momposalamat aijo' Pinosadiantomo bagi nu iwi-iwi' na bansa:

³² Sumo jingka anu monjingkai jalan bagi nu to bansa-bansa sangga'at, da toka hi Belento; aijo'mo jingka anu mompotoka mae kadaka'an bagi nu mian-To anu palesayamo Israel.”

³³Tuuma ka' tina nu Anak aijo' binangang nohongo apaa na anu tinaloakon i Simeon kona hi anak nu aha.

³⁴I Simeon nombalakati aha, ka' notatae hi Maria tina nu Anak aijo', “Anak aiya pinile'anmo nu Tumpu da mombahayai ka' momposalamat manjoo' na mian nu Israel. Ia timbalije tanda lengkat mae hi Tumpu, anu nugagakon nu mian da'isan,

³⁵ka' salatan sumo aitu, otoamo na isi nu kinyonyoa nu aha. Kasusa'an monsusuk kinyonyoaum sumo bajak anu matajom.”

³⁶Daagi' mule' ko samian na nabi boune anu binengkele'mo hondo. Sanggonyo i Hana, anak i Fanuel, lengkat mae lee' i Asyer. Ilapas popitu' na taun no'osoa,

³⁷i Hana binalumo, ka' uuka umunnyo uwalumpulu'mo opat na taun. Madi' toho' ia mompala'i Laigan nu Tumpu. Sinaa ka' malom, ia monsombah i kiijo' hi Tumpu balado'a ka' bapuasa'.

³⁸Pas tempo' aitu mule' ia tinokamo, lantas nompuji'mo Tumpu Allah, ka' nonsisik Anak aijo' kona hi iwi-iwi' na mian anu montanda'i tempo'nyo Tumpu mompobebas Yerusalem.

³⁹ Salatan i Yusuf ka' i Maria nombaumo anu nu tuntut nu Atulan nu Tumpu, ninsusule'mo na aha nokiijo' i Nazaret Galilea.

⁴⁰Anak aijo' kino daka-daka'nyomo ka' nahosonmo. Ia pande hondo ka' talalo nukalibosi nu Tumpu.

⁴¹ Sataun toka sataun tu'anyo i Yesus namba i Yerusalem molame'akon Sinaa Daka' Paskah.

⁴²Ka' tempo'nyo i Yesus umun sampulu'mo ohua' na taun, aha namba i lamean aijo' susumo anu saja' nubau nu aha.

⁴³Salatan ilapas na nolamean aijo' aha ninsusule'mo, panyo i Yesus, Anak aijo', daagi' jinojoong i Yerusalem, ka' madi' sinumbu' nu tina tuuma-Nyo.

⁴⁴Sinangka nu aha Ia nombatukimo mian da'isan. Salatan sinansinaamo na i lumajang, atina'je ka' aha nolio hi sampoto utusannyo ka' to sanga-sangalu nu aha.

⁴⁵Panyo madi' i humpak-Nyo nu aha, jadi po'ule'mo aha ninsusule' i Yerusalem nolio Ia.

⁴⁶Kino itolunnyo na nolio, i humpakje nu aha na Ia i uno nu Laigan nu Tumpu. Ia hau-haunyo suha-suhang mohongo gulu-gulu' agama, ka' mompoki-pokilawa.

⁴⁷Iwi-iwi' na anu nohongo Ia binangang kalana pontaami-Nyo minsoop i akan.

⁴⁸Tu'anyo-Nyo mule' suele bangangmo na montoa Ia. Tina-Nyo notatae hi Ia, “Anak, kadaka' nu bau na kami sumo aiya? Tuuma-Um ka' tina-Um binata-batamo na nolio Beleyum!”

⁴⁹Tinaaman i Yesus, “Kadaka' kita tuuma ka' kita tina molio Aku? Apaa kita tuuma ka' tina madi' monsumbu' saba' Aku tionyo daagi' i uno nu Laigan nu Tuumang-Ku?”

⁵⁰Panyo aha madi' mangalati' anu pinontaami i Yesus.

⁵¹Lapas aijo' i Yesus nambamo hingga-hinggat ka' aha ninsusule' nokiijo' i Nazaret, ka' nohongo-hongomo aha. Iwi-iwi' aijo' pino'una' nu tina-Nyo i uno nu kinyonyoanyo.

⁵² I Yesus kinodaka-daka'nyomo, ka' kino pande-pandenyomo, tiba mule' nukalibosi nu Tumpu, ka' nuka'ima'i nu mian.