Read Saluan LUKAS 20 Bible Online

LUKAS 20 - Saluan bible

LUKAS 20

¹Daagi' kino sansinaan, i Yesus hau-haunyo mompogulu' ka' mompolele Lele Ma'ima' lengkat hi Tumpu, hi to mia-mian i uno nu Laigan nu Tumpu. Kapala nu to ima-imam, gulu-gulu' agama tiba to pola-polaya' nu Yahudi, tinokamo

²ka' notatae hi Yesus, “Soba poto'i mae hi kami, mosia ka' Beleyum mombau iwi-iwi' aiya? Ihe na nombee'i hak aijo' hi Beleyum?”

³I Yesus nontaami, “Aku kahanda' mompokilawa. Soba poto'i mae hi beleng-Ku,

⁴I Yohanes mompalamandikan ihe na mombee'i hak? Tumpu kabai mian?”

⁵Saba' aha nontampu'unimo binasale', “De otaloakonto, ‘Tumpu Allah na nombee'i hak,’ tantu Nutaloakon, ‘Desumo aitu ka' kadaka' komiu madi' palesaya hi Ia?’

⁶Panyo de otaloakonto, ‘Mian na nombee'i hak,’ iwi-iwi' na mian mompahambunu'akon mae nu batu kita, kalana nu palesaya nu aha na i Yohanes samian na nabi.”

⁷Jadi, tinaaman nu aha, “Madi' osumbu' mami.”

⁸Jadi i Yesus notataemo hi aha, “Desumo aitu Aku mule' madi' mompoto'i hi komiu, nolengkat mae hi he na hak-Ku, nombau iwi-iwi' aiya.”

⁹ I Yesus nonsisikakon hi mian haha aijo', kantuangan aiya, “Daagi' ko samian anu nonsu'ani santake na ale' nu anggur. Tinamboakonnyo na ale' aijo' hi aha to pia-piangkuka anu mombauakon ale', lantas i namba i lipu' sangga'at, ka' jinojoong pinin kiijo' mae.

¹⁰Salatan tempo'mo nu pontipuan bua'nyo nu anggur, tumpu nu ale' aijo' nonsaimo posaihonnyo namba hi anu nombau ale' aijo', da montalima bagiannyo. Panyo anu nombauakon ale' aijo' nondoke posaihonnyo aijo' ka' nompokau ia minsusule' tiba madi' ko apa-apaa anu binoanyo.

¹¹Saba' tumpu nu ale' aijo' nonsai mule' samian na posaihon sangga'at; panyo posaihon aijo' suele dinoke ka' pinopo'ambang nu anu nombau ale' haha aijo', ka' sinai minsusule' tiba madi' ko apa-apaa anu binoanyo.

¹²Lapas aijo' tumpu nu ale' nonsai mule' posaihon ko totolu'nyo. Panyo posaihon aijo' dinoke suele nu anu nombau ale' aijo', ka' ingalin i sambiha' nu ale' aitu.

¹³Ahennyo tumpu nu ale' aijo' notatae, ‘Apaa mule' na tionyo kubau? Kusaije na posi anakku anu kuku kalibosi. Tantu iaje na nu adati nu aha!’

¹⁴Panyo salatan tinoa nu anu nombau ale' haha aijo' na anak nu tumpu nu ale' aijo', aha notatae samian ka' samian, ‘Aiyamo ia na tumpu nu budennyo. Imbo' da o pateinto na ia da o alanto na budennyo.’

¹⁵Lantas aitu i hela' nu aha i sambiha' nu ale' aijo' ka' pinateannyo na ia.” Lantas i Yesus nompokilawa, “Yo, de tumpu nu ale' aijo' minsusule'mo mae nu posia na anu nombau ale' haha aijo'?

¹⁶Tantu ia toka ka' mompatei anu nombau ale' haha aijo', lantas ale' aijo' nu bee'mo hi sangga'at na mombauakon.” Nohongo aitu, notataemo na to mia-mian hi Yesus, “Imadi' koko totu'u!”

¹⁷ Tinonto'an i Yesus na aha ka' notatae, “Desumo atina', apaa na alati'nyo ayat nu Kitab nu Tumpu aiya? ‘Batu anu madi' pinake nu tukang nu laigan, tinimbalimo batu anu talalo o palalui.’

¹⁸Iwi-iwi' na mian anu manabu' i batu aijo', tionyo mohopu', ka' ihe na nutuda' nu batu aijo', tondiodos timbali abu'.”

¹⁹To gulu-gulu' agama, ka' Kapala nu to ima-imam monsumbu' saba' kantuangan aijo' nu patuakon i Yesus hi aha. Mokonyo aitu aha kahanda'mo mohakop Ia tempo'nyo aitu, panyo aha mabuhuk hi mian da'isan.

²⁰Jadi aha molio kasampatan anu ma'ima'. Aha nonsuu'akon hi mian da montiho susumo mian tobos, ka' monsai mian haha aijo' mompoki-pokilawa apa-apaa hi Yesus da o humpak na kasala'annyo, da aha timbali momboa Ia hi anu ko kuasa ka' pamalentah nu Gubernur.

²¹Jadi to mia-mian anu pinonsuu' akonan aijo' notataemo hi Yesus, “Kita Tuumangku Gulu', osumbu' mami iwi-iwi' na anu tinaloakontomo nu Kita Tuuma ka' pinogulu'mo aijo' totu'u. Osumbu' mami mule' Kita Tuuma mompogulu' mana-manasa mongkona kahanda' nu Tumpu hi mian, kalana Kita Tuuma, madi' mompile'i mian.

²²Mokonyo sumo aitu, soba Kita Tuuma taloakonmo mae hi kami, mosia na atulan nu agamanto, pa' timbali mombayan hasin hi Tomundo kabai madi'?”

²³Panyo nusumbu' i Yesus na akan nu aha. Mokonyo aitu Ia notatae,

²⁴“Soba potoamae hi beleng-Ku sambatu na doi salaka. Gamban ka' sanggo ihe na aiya?” “I Tomundo!” na pinontaami nu aha.

²⁵“Desumo aijo',” koonyo i Yesus hi aha, “Bee' hi Tomundo apaa na anu i Tomundo, ka' hi Tumpu, apaa na anu nu Tumpu Allah.”

²⁶Jadi i ahop nu mian da'isan aitu, aha madi' moko ala nohumpak sa'angu' pe'e na kasala'an i Yesus. Aha ola nomohokot ka' binangang i pinontaami-Nyo aijo'.

²⁷ Daagi' ko to pia-piangkuka na mian lengkat i posa'angu'an nu Saduki tinoka hi Yesus. (Aha aitumo posa'angu'an anu ko pikilan, au'aitu anu matemo madi'mo po'ule' tumuu'.) Aha nompokilawa hi Yesus,

²⁸ “Kita Tuumangku Gulu', i Musa nontulis atulan aiya da bau kapalaluanto: De samian na mo'ane silaka, ka' ia madi' ko anak, saba' tionyo mongosoai balunyo, da mombee'i lee' hi mian anu sinilakamo aijo'.

²⁹Toho' jinadi popitu' na mian moto utus. Tumpenyo no'osoa, lantas sinilakamo madi' kino anak.

³⁰Ilapas mae ko ohua'nyo nongosoaimo balunyo, panyo ia mule' sinilakamo, madi' kino anak.

³¹Anu tinimbali sumo aijo' tinimbali mule' hi utusnyo anu ko totolu'nyo, ka' aijo' mule' tinoka-toka hi ko popitu'nyo.

³²Ahennyo boune aijo' sinilakamo.

³³I sinaa mian silaka po'ule'mo opotumuu', bengkele' ihe na boune aijo'? Kalana aha popi-popitu' nongosoaimo ia.”

³⁴I Yesus nontaami, “To mia-mian anu tumuu' tempo' uuka mo'osoa,

³⁵panyo to mia-mian anu pantas po'ule' opotumuu' de silakamo, ka' tumuu' i tempo' anu tokaje mae, aha madi'mo mo'osoa.

³⁶Baunyo nu aha sumomo malaikat, ka' madi'mo silaka. Aha te ana-anakmo nu Tumpu, kalana aha po'ule'mo tinumuu' lengkat i kapatean.

³⁷ Posi i Musa nomponyata'mo mana-manasa mian mate po'ule' opotumuu'. I uno nu tulisannyo mongkona kumbung anu i noak aijo', ia nonsanggo Tumpu, sumo, ‘Tumpu i Abraham, Tumpu i Ishak, ka' Tumpu i Yakub.’

³⁸Yo, Tumpu aijo' misa' Tumpu nu mian silaka! Ia Tumpu nu to mia-mian tumuu'! Kalana i ahop nu Tumpu, iwi-iwi' na mian tumuu'.”

³⁹To pia-piangkuka na gulu' agama notatae, “Potaam nu kita Tuumangku Gulu' ma'ima' hondo.”

⁴⁰Mokonyo aitu aha madi'mo daagi' baani nompokilawa apa-apaa hi Yesus.

⁴¹I Yesus nompokilawa hi aha, “Mosia ka' timbali otaeakon tukoo miu, Tomundo anu Momposalamat Lee' mae i Daud?

⁴² Padahan posi i Daud notatae i Kitab Mazmur, ‘Tumpu notatae hi Tumpungku: Suhangmo i sasu koanan-Ku,

⁴³sampe Aku mombaumo to bali-bali'-Um minsesuluk hi Beleyum.’

⁴⁴Jadi, de i Daud nonsanggo, Tomundo anu Momposalamat aijo' ‘Tumpu,’ mosia na Ia timbali Lee' mae i Daud?”

⁴⁵Hau-haunyo to mia-mian mohongo i Yesus notatae, Ia notatae hi anu saja' mombatuki Ia,

⁴⁶ “Obala'ingati na aha to gulu-gulu' agama. Nuka'ima'i nu aha na kolalajang mibaju' nu juba' mantan, ka' sanang na o adati iyayamae i pasan. Nuka'ima'i nu aha na i tampa-tampat anu o angga'i, i uno nu laigan pogalejaan tiba i bau-bauon.

⁴⁷Aha mongakali to balu-balu, ka' mongagoi laigannyo. Ka' da bau pongkulubi ka'idekan nu aha aijo', aha balado'a manta-mantan! Hukuman nu aha saidi' mae maboat!”