Read Saluan LUKAS 21 Bible Online

LUKAS 21 - Saluan bible

LUKAS 21

¹I Laigan nu Tumpu, i Yesus nontoa to mia-mian kaya nompo'isi doi i uno nu tampat ponsombahkonan.

²Ia nontoa mule' samian na balu anu talalo kasiasi, nompo'isi ohua' na doi tambaga.

³Lantas i Yesus notatae, “Potombihing: balu aiya nompo'isi lebe manjoo' molingkudui iwi-iwi' mian sangga'at.

⁴Kalana aha iwi-iwi' nombee' labinyo nu halata'nyo. Panyo balu aiya, mau mule' talalo kasiasi, nombee'mo iwi-iwi' anu daagi' hi ia, anu palalu bau kantumuu'annyo.”

⁵Daagi' ko to mia-mian anu basisik mongkona mosia na ko ima'nyo na Laigan nu Tumpu binunga-bungan nu batu toto ima-ima' tiba paka-pakakas anu osombahkon hi Tumpu. Lantas i Yesus notatae hi aha,

⁶“Tokaje na tempo'nyo iwi-iwi' anu otoa miu aiya ohobo'akonmo; madi'mo ko batu sambatu pe'e tongkunsun aiya i tampatnyo!”

⁷Aha nompokilawa hi Yesus, “Kita Tuumangku Gulu', hipian na anu sumo atina' timbali? Ka' apaa na tandanyo de han aijo' tempo'nyo timbalimo?”

⁸I Yesus notatae, “Obala'ingati mae, boli komiu o akali. Da'isan na mian toka mompake sanggong-Ku, ka' motatae, ‘Akumo aiya na Ia!’ ka' ‘Tinokamo na tempo'nyo.’ Panyo boli komiu mombatuki aha.

⁹Boli mule' komiu mabuhuk de komiu mohongo lele nu pahampatean tiba pahantuda'an. Iwi-iwi' aijo' tionyo timbali imoonanyo. Panyo aijo' misa' alati'nyo tempo'nyomo na kiamat.”

¹⁰Lantas i Yesus nolausakon sisik-Nyo tukoo-Nyo, “Bansa sa'angu' mahampate mongewa bansa sangga'at, ka' sa'angu' na negara montumbuhi negara sangga'at.

¹¹Iyayamae toka na luulu' anu daka', balaa' nu kapo'ohopan tiba panyakit anu molele. Saidi' mae toka na hahan anu okabuhuk ka' opalias hondo i langit.

¹²Panyo ma'isa pe'e iwi-iwi' aijo' toka, komiu o hakopmo ka' o sakisa. O putusi na palakala miu i Laigan Pogalejaan ka' oposoop i uno nu talungku'. Ka' komiu o hela' ka' opokiijo'akon i ahop nu to tomu-tomundo tiba anu batu-batu ko kuasa, kalana komiu anu mombatuki Aku.

¹³Aijo' na kasampatan hi komiu da mompolele Lele Ma'ima' lengkat mae hi Tumpu.

¹⁴ Balaniat na komiu da madi' bata-bata pa' apaa na anu tionyo otaloakon miu bau mompototu'u butong.

¹⁵Akuje na mombee' hi beleyum potatae tiba kapandean aijo', sahingga madi' ko samian pe'e hi anu sampo bali' miu moko ewa kabai motunde apaa na anu otaloakon miu.

¹⁶Komiu saidi' mae nukabisa'i nu tina ka' tuumaum nu to utu-utusum, nu anak nu to tomi-tominsanum tiba to sanga-sangaluyum. Sambagian na komiu saidi' mae nupatei nu aha.

¹⁷Komiu saidi' mae nuka'ideki nu mian iwi-iwi', kalana komiu mombatuki Aku.

¹⁸Panyo sahamba pe'e na ubakum madi' moko ala tombubut.

¹⁹De komiu moko tahan ka' sabaan, komiu saidi' mae salamat.”

²⁰“De otoa miu na Yerusalem nutumbuhimo nu suludadu, osumbu'mo miu taalu' madi'mo pin kota aijo' o ideimo.

²¹Tempo' aitu mian anu kiijo' i Yudea, tionyo malai mokiita' i bungkutnyo. Aha anu i kota, tionyo mompala'i kota, ka' aha anu i sambiha' nu kota, bolimo minsoop i uno nu kota.

²² Kalana sina-sinaa aijo' aitumo na ‘Sina-sinaa Hukuman Onabu'akonmo,’ da tiba anu sumo aijo' tinimbalimo apaa na anu tinulismo i uno nu Kitab nu Tumpu.

²³Paya'na ko ideknyo sina-sinaa aitu hi to bouboune anu poboa ka' hi to tina-tina anu daagi' momposusu bungamea'! Lipu' aiya saidi' mae mongoa'imo kasusa'an anu daka', ka' Tumpu mohukummo bansa aiya.

²⁴Daagi' ko anu opatei nu bajak, daagi' mule' ko anu oboa salaku anu i hakop, oboa i lipu-lipu' nu mian; ka' to mia-mian anu madi' monsumbu' Tumpu, mompeja-peja'mo i Yerusalem sampe mingkot na tempo' anu tinantukanmo nu Tumpu hi aha.”

²⁵ “Hi batuje nu sinaa, bitu'on ka' to manda-mandala' otoaje na tandanyo haha aijo'. I dunia aiya bansa-bansa mabuhukmo ka' bingongmo mongahopi buhook tiba bokon to daka-daka' nu ambai.

²⁶Mian mongoa'i buhuk mompaipatemo mongahopi apaa na anu jadimo i songko-songko nu dunia aiya, kalana anu mongkuasai aita' mae i langa saidi' mae kalangkabutmo.

²⁷ I tempo'mo aitu na Anak nu Mian toka i uno nu kundom tiba kuasa-Nyo anu o angga'i.

²⁸De hahan aijo' montampu'unimo jadi, pobulamo ka' bangonakon na ubakum kalana gagana' uuka komiu oposalamatmo.”

²⁹Lantas i Yesus nonsisikakon hi aha kantuangan sumo uuka, tukoo-Nyo, “Soba' toa na kau' ara, ka' iwi-iwi' na kau' sangga'at.

³⁰De londeknyo montampu'unimo kantoan, osumbu'mo miu saba' malia'mo na tempo' nu posinaa.

³¹Sumo aitumo mule' de komiu montoamo hahan aitu timbalimo, osumbu'mo miu saba' Tumpu malia'mo mompalentah susumo Tomundo.

³²Da osumbu' miu! Hahan aijo' timbalimo de to mia-mian tempo' uuka silakamo iwi-iwi'.

³³Langit ka' tano' mingkot, panyo potataeng-Ku tataap sidu-sidutu'.”

³⁴“Ojagai na butongum, boli komiu talalo mongka'ima'i mombau bau-bauon ka' lewa' monginum inumon anu moko langu, kabai talalo mompotutugakon kapalaluan nu kantumuu'anum, sahingga komiu madi' mosadia sampe toka sinaanyo aijo' anu nu potolokengkeng mae.

³⁵Kalana Sinaa aijo' toka sumo pangkun pohakop mian iwi-iwi' i dunia aiya.

³⁶Saja' bajaga-jaga ka' balado'a, da komiu mahoson na mongahopi iwi-iwi' na anu saidi' mae timbali, ka' komiu moko ala mangadap hi Anak nu Mian.”

³⁷I Yesus nompogulu' i Laigan nu Tumpu sina-sinaa, ka' malomnyo mambamo i Bungkut nu Zaitun ka' jojoongmo kiijo' mae.

³⁸Iwi-iwi' na mian saja' toka daagi' subu i Laigan nu Tumpu mohongo i Yesus mompogulu'.