Read Saluan LUKAS 23 Bible Online

LUKAS 23 - Saluan bible

LUKAS 23

¹Iwi-iwi' anu sinilimu' nongulus kiijo' tinuminjo, ka' nomboa i Yesus i ahop i Pilatus.

²I kiijo' aha nontampu'unimo nontuuk Ia. Koo-Nyo nu aha, “I humpak mami na Mian aiya, mompogulu' sala' hi mian daisan. Ia nonsale'i mian da boli mombayan hasin hi Tomundo, kalana tukoonyo Ia atina'mo i Kristus samian na Tomundo.”

³Lantas i Pilatus nompokilawa hi Yesus, “Totu'u Beleyum Tomundo nu mian Yahudi?” I Yesus nontaami, “Sumo itina' kooyum.”

⁴Lantas koonyo i Pilatus hi kapala nu to ima-imam, ka' hi mian da'isan aijo', “Aku madi' nohumpak sa'angu' pe'e na kasala'an hi Mian aiya, da o hukum na Ia.”

⁵Panyo aha lebemo nontuuk mule', “Pangajalan-Nyo na bau ponsale'inyo mian songko-songko i Yudea; momonanyo i Galilea, ka' tempo' uuka ia tinokamo suele i aiya.”

⁶Salatan i hongomo i Pilatus na aijo', ia nompokilawamo, “Pa' Mian aiya mian nu Galilea?”

⁷Salatan pinoto'i, taalu' i Yesus lengkat mae i da'erah anu nu kuasai Herodes, sinai i Pilatus na aha momboa i Yesus hi Herodes, anu tempo'nyo aitu ia kiijo' suele i Yerusalem.

⁸Sinanang hondo na i Herodes salatan nontoa i Yesus, kalana pininmo na ia nohongo lelenyo ka' mongka'oho' montoa Ia. Ia mongima-imani timbali monsakisi' i Yesus mombau anu okabangangi.

⁹Kalana aitu i Herodes nompokilawa manjoo' hi Ia, panyo i Yesus madi' hondo nontaami.

¹⁰Kapala nu to ima-imam ka' to gulu-gulu' agama suele nangadap i kiijo' ka' nontuuk tala-talalo i Yesus.

¹¹I Herodes ka' to sulu-suludadu nombia-biangakonmo ka' nongambangimo i Yesus, lantas nompopakemo hi Ia baju' pesalin, lapas aijo' po'ule' mule' nonsai Ia da o boa hi Pilatus.

¹²I sinaa aijo' mule' i Herodes tiba i Pilatus anu u'utumae nompaha idekmo, po'ule'mo nompaha ima'.

¹³I Pilatus nolimu' kapala nu to ima-imam, to pola-polaya' ka' layat.

¹⁴Lantas notatae hi aha, “Komiu nomboa mae Mian aiya hi belengku ka' notatae, tukoo miu Ia mompogulu' sala' hi to mia-mian. Uuka aiya i ahop miu pinalesangkumo na Ia. Panyo aku madi' hondo nohumpak sangahan pe'e na ka'idekan anu tinuukakon miu hi Ia.

¹⁵Sumo aitu mule' na koonyo i Herodes, kalana aitu ia mule' po'ule' nonsai da o boa na i Yesus minsusule' mae hi kami. Mian aiya madi' nombau apa-apaa anu patut o hukum nu hukuman mate.

¹⁶Kalana aitu ku dokeje na Ia, lapas aitu opolapas mo na Ia.” [

¹⁷De lameanmo nu Paskah, i Pilatus tionyo mompolapas samian na anu tinalungku' na layat.]

¹⁸Iwi-iwi' na mian anu sinilimu' i kiijo' noloboo', “Patei na Ia! Lapasakon na i Barabas hi kami!” (

¹⁹I Barabas tinalungku' kalana nangamu' anu tinimbali i kota ka' nompateimo.)

²⁰Pongka'oho' i Pilatus da opolapasamo na i Yesus, kalana aitu ia po'ule' notatae ninsan hi mian da'isan aijo'.

²¹Panyo aha noloboo', “Salibmo na Ia! Salibmo na Ia!”

²²Lantas kinopintolunnyo i Pilatus notatae daka-daka' hi aha, “Panyo apaa na kasala'an-Nyo? Aku madi' nohumpak sangahan pe'e na kasala'an hi Ia anu patut o hukum nu hukuman mate! Ku dokeje na Ia, lantas opolapasakonmo na Ia.”

²³Panyo aha saja'mo noloboo' hoso-hoson, tukoonyo nu aha i Yesus tionyo o salib. Ka' ahennyo tinangala i loboo' nu aha.

²⁴Jadi i Pilatus nompokonamo hukuman silaka hi Yesus susumo pongka'oho' nu to mia-mian haha aijo',

²⁵ka' nolapasakon mian anu pinoita nu aha, aijo'mo mian anu tinalungku' kalana nangamu' ka' nompatei. Lapas aijo' i Yesus binee'nyomo hi aha, da nubau nu aha yayamo pongka'oho' nu aha.

²⁶Lantas i Yesus binoamo nu aha. I tonga' nu jalan aha siningkabotmo tiba samian, sanggonyo i Simon, anu lengkat mae i Kirene, anu hau-haunyo minsoopmo i kota. I hakop nu aha na ia ka' pinakisa nonsimbu kau' salib aijo' i hiku i Yesus.

²⁷Da'isan na mian i lumajang aitu mae i hiku hi Yesus — i kiijo' daagi' ko to bou-boune. To bou-boune haha aijo' nohangimo ka' nontando'imo i Yesus.

²⁸Panyo i Yesus nosiloi ka' notatae hi aha, “To bou-boune nu Yerusalem! Boli mohaangi Aku. Haangi na posi butongum ka' to ana-anakum.

²⁹Kalana tokajemae na tempo'nyo mian motataemo, ‘Palias na ko untungnyo na to bou-boune anu madi' toho' nohempu, anu madi' toho' kino anak, ka' madi' toho' nomposusu bunga mea'!’

³⁰ I tempo' aitu, mian motataeje i to bungku-bungkutnyo, ‘Tuda' mae na kami!’ Ka' to puge-puge'nyo, ‘Tabuhi mae na kami!’

³¹Kalana de kona i kau' anu daagi' tutuu', mian mombaumo sumo aiya, pa' mosiaje mule' na nubau nu aha i kau' anu manggasmo!”

³²Daagi' mule' ko ua'aha na mian sangga'at — ua-ua'aha mian ma'idek — anu binoa nu aha da o hukum mate hingga-hinggat tiba i Yesus.

³³Salatan tinoka i tampat anu osanggohi, “Popoke',” aha nomposalibmo i Yesus ka' ua'aha na mian ma'idek aijo' — samian i sasu koanan ka' samian mule' i sasu kewe' i Yesus.

³⁴ Lantas i Yesus binalado'a, “Tuuma, ampuniakon na aha! Madi' sinumbu' nu aha pa' apaa na anu binau nu aha.”

³⁵ Baju' i Yesus binagi-bagimo i kiijo' nu aha binauakon undi. To mia-mian anu tinjo-tinjo i kiijo' mompotoakon, hau-haunyo to pola-polaya' nu Yahudi mompudik i Yesus nu potatae, “Ia nomposalamatmo mian sangga'at; soba' uuka posi posalamatmo na butong-Nyo, de Ia totu-totu'u Tomundo anu Momposalamat anu pinile'anmo nu Tumpu!”

³⁶ To sulu-suludadu suele nompopudikmo Ia. Aha tinokamo ka' nompo'inum anggur malosing hi Ia.

³⁷Ka' notatae, “De Oko Tomundo nu Mian Yahudi, posalamatmo na butong-Um!”

³⁸I bawo nu kau' salib i Yesus, tinulis na potatae aiya: “Aiyamo na Tomundo nu Mian Yahudi!”

³⁹Sala'samian na mian ma'idek anu sinalib aijo' nompopo'ambangmo i Yesus. Ia notatae, “Te Beleyum misa' Tomundo anu Momposalamat? Yo, posalamatmo na butong-Um tiba kami!”

⁴⁰Panyo mian ma'idek samian mule' nontewa' sangalunyo aijo', tukoonyo, “Te beleyum madi' nabuhuk hi Tumpu? Beleyum hingga-hinggat o hukum mate sumo Ia.

⁴¹Ola hukuman hi kita ohua' yo timbangnyomo tiba anu binaunto! Panyo Ia madi' hondo ko sala'nyo!”

⁴²Lantas ia notatae, “Yesus, inau' mae na aku, de Kita po'ule'mo tokamo mae sumo Tomundo!”

⁴³“Palesayamo,” na koonyo i Yesus hi ia, “Sinaa aiya beleyum hingga-hinggatmo ka' Aku i Firdaus.”

⁴⁴Kila-kila jammo sampulu' ka' ohua' sonsu'unmo na sinaa, batu nu sinaa madi'mo najingka, ka' songko-songko na lipu' aijo' pinikatmo hondo sinangkut jam totolu' mamalom.

⁴⁵ Lalanse' anu kala-kalayo' i Laigan nu Tumpu nobeakmo tinimbali ohua'.

⁴⁶ Lantas i Yesus noloboo' hoso-hoson, “Tuuma! I uno nu limanto Kusimpalakonmo na butong-Ku!” Noko potatae sumo aijo' ia sinilakamo.

⁴⁷Salatan tinoa nu kapala nu suludadu apaa na anu tinimbalimo aijo', ia nompuji'mo Tumpu. Lantas ia notataemo, “Totu-totu'u, Ia madi' ko sala'nyo!”

⁴⁸Mian da'isan anu tinoka i kiijo', da montoa, nontoamo apaa na anu tinimbali. Aha iwi-iwi' ninsusule' ka' nompele-pele'mo na kinyonyoa nu aha.

⁴⁹ Ka' iwi-iwi' na anu mompahasumbu' i Yesus sagala to bou-boune anu nombatuki Ia lengkat mae i Galilea, tinuminjo aijo' mae majo'on nontanggalakon iwi-iwi' aijo'.

⁵⁰Daagi' ko samian sanggonyo i Yusuf, anu nolengkatmae i kota Arimatea, i lipu' nu Yudea. Ia mian anu manonong anu o adati nu mian, ka' anu hau-haunyo montanda'i Tumpu montampu'unimo mompalentah salaku Tomundo. Mau mule' ia minsoop Mian Kopian Daka' nu Agama, ia madi' setuju tiba kaputusan ka' pikilan nu Mian Kopian Daka' aijo'.

⁵¹

⁵²I Yusuf aiya namba nangadap hi Pilatus momoita da bangke' i Yesus obee' hi ia.

⁵³Lapas aijo' tinauhakonnyo na bangke' i Yesus aijo' i kau' salib ka' sinaputnyo nu hude lenan. Lapas aijo' pino'una'nyomo i uno nu pongkubunan anu binau i uno nu bungkut nu batu — pongkubunan aijo' ma'isa toho' pinake.

⁵⁴Sinaa aitu sinaa nu Juma'at, ka' sinaa nu Sabat malia'mo otampu'uni.

⁵⁵To bou-boune anu tinoka tiba i Yesus lengkat mae i Galilea nombatuki Yusuf ka' nontoa pinongkubunan aijo'. Aha suele nontoa mosia na bangke' i Yesus pino'una' i uno nu pongkubunan.

⁵⁶ Lapas aijo' aha ninsusule'mo ka' nontoukai posadiaon ka' minya-minya' manohong da bau po minya-minya'i bangke' i Yesus. I Sinaa nu Sabat aha madi'mo nombau apa-apaa, kalana montuluti atulan nu agama.