Read Saluan LUKAS 4 Bible Online

LUKAS 4 - Saluan bible

LUKAS 4

¹I Yesus kinuasanmo nu Roh nu Tumpu tempo'nyo Ia nompala'imo Kaunyo nu Yordan. Roh nu Tumpu nolaya' Ia nokiijo' i padang bolaa.

²I kiijo' Ia sinobaanmo nu Ibilis patompulu' na sinaa na kinopinnyo. Tempo'nyo aitu, madi' toho' ko anu kinaan-Nyo. Ahennyo Ia nongoa'imo no'ohop.

³Ibilis notatae hi Ia, “Te misa' Beleyum anak nu Tumpu Allah? Jadi pokau na batu aiya da timbali roti.”

⁴ I Yesus nontaami, “I uno nu Kitab nu Tumpu tinulis, ‘Mian madi' ola tumuu' nu roti.’ ”

⁵Ka' binoanyo mule' nu Ibilis na i Yesus i tampat anu matangkas, ka' ola tinolo kulap, Ibilis nompotoamo hi Ia iwi-iwi' na kalaja'an nu dunia.

⁶“Iwi-iwi' na kakuasa'an ka' kakaya'an aiya ku bee'je hi Beleyum,” koonyo nu Ibilis hi Yesus, “Kalana iwi-iwi' binee'mo hi belengku, sahingga aku timbali mombee' pa' hi ihe na anu ku ka'ima'i pombee'an.

⁷Iwi-iwi' aijo' timbali Kita na tumpu-Nyo, de Kita monsombah aku.”

⁸ I Yesus nontaami, “I uno nu Kitab nu Tumpu tinulis, ‘O sombah na Tumpuum ka' o hongo na palentah-Nyo.’ ”

⁹Lapas aijo', Ibilis nomboamo i Yesus i Yerusalem, ka' pino'una'nyo i bawo nu binumbungan nu Laigan nu Tumpu, ka' notatae hi Ia, “Te misa' Beleyum Anak nu Tumpu? Jadi, pingkanabu'mo, mokaiyong lengkat i aiya.

¹⁰ Kalana i uno nu Kitab nu Tumpu tinulis, ‘Tumpu mompokauje to mala-malaikat-Nyo monjagai Beleyum ima-ima'.’

¹¹ Ka' mule', ‘Limaje nu to mala-malaikat na monsingkom de tengke-Um tosumpun i batu.’ ”

¹² I Yesus nontaami, “I uno nu Kitab nu Tumpu tinulis, ‘Boli monsobai Tumpuum.’ ”

¹³Salatan Ibilis lapasmo nanonsobai Yesus nu lupa-lupa na jalan, pinala'iannyomo na i Yesus, ka' nontanda'i tempo' anu ma'ima'.

¹⁴Lapas aijo', i Yesus ninsusule'mo nokiijo' i Galilea; Ia kinuasanmo nu Roh nu Tumpu. Lele mongkona butong-Nyo tinogilelemo i songko-songko na da'erah aijo'.

¹⁵Ia nongajan i to lai-laigan pogalejaan, ka' mian da'isan nompuji'mo Ia.

¹⁶I Yesus namba mule' i Nazaret, tampat pinompodaka'an Ia. I sinaa nu Sabat, sumo kabiasa'an-Nyo Ia namba i laigan pogalejaan. Ia tinuminjo nombasa' Kitab nu Tumpu,

¹⁷ka' binee'an kitab Nabi Yesaya. Ia nombuka' lulunan nu kitab aijo', ka' i humpak-Nyo na ayat aiya,

¹⁸ “Roh nu Tumpu daagi' hi beleng-Ku, kalana Ia nohangkatmo Aku da mompolele Lele Ma'ima' hi mian kasiasi. Ia nompokau Aku da mompoto'iakon opobebasmo na mian anu i hakop ka' kapa'alinan nu mian mapisok; da bau pompobebas mian anu o sansala

¹⁹ka' mompolele tempo' katokaan nu Tumpu momposalamat mian anu palesayamo hi Ia.”

²⁰Po'ule' i lulun i Yesus na kitab aijo', ka' po'ule' sinule'akonnyo hi mian anu ko tugasnyo i kiijo', ka' Ia sinumuhang. Iwi-iwi' na mian anu i uno nu laigan pogalejaan nontoa Ia.

²¹Ka' i Yesus nontampu'uni notatae hi aha sumo uuka, “Aya-ayat Kitab nu Tumpu aiya, sinaa aiya ginanapanmo salatan komiu nohongomo.”

²²Potatae anu tinaloakon-Nyo ma'ima' hondo, sahingga aha binangangmo ka' nompototu'umo Ia. Aha notatae, “Te misa' Ia anak i Yusuf?”

²³Lantas i Yesus notatae hi aha, “Tantu komiu mompake kantuang aiya hi beleng-Ku, ‘Dokoten posi opa'alin na butong-Um. Anu okabangangi i hongomo mami binauum i Kapernaum, soba baumo i posi kampung-Um.’ ”

²⁴ Tinuangan i Yesus, “O inau', madi' ko nabi anu o adati i posi kampungnyo.

²⁵ Panyo hongo: Tempo'nyo i Elia, tempo'nyo aitu madi' tinudun na ujan totolu' mintonga' na taun na kopinnyo, jinadimo na kapo'ohopan anu daka' i songko-songko na lipu'. Tempo'nyo aijo' manjoo' na to balu-balu i Israel.

²⁶ Mau mule' sumo aijo', Tumpu madi' nompokau i Elia namba hi sala'samian na to balu-balu aijo', panyo ola hi samian na balu anu kiijo' i Sarfat i da'erah Sidon.

²⁷ Sumo aitumo mule' tempo'nyo i Nabi Elisa, manjoo' na mian i Israel anu ko panyakit kilit mahumimi', panyo madi' ko samian pe'e aijo' hi aha na anu pina'alinakon, boli mompiakon i Na'aman mian nu Siria aijo'.”

²⁸Iwi-iwi' na mian i laigan pogalejaan aijo' pinusa hondo salatan nohongo han aijo'.

²⁹Aha tinuminjo ka' nolaa' i Yesus mosabat i kota, ka' binoa nu aha i tungebe nu bungkutnyo koko kota nu aha binau. Aha ko niat monsuulakon Ia da manabu' i tungebe.

³⁰Panyo i Yesus noko pinggegiang hi mian da'isan ka' i namba.

³¹Lapas aijo', i Yesus nambamo i kota Kapernaum i Galilea. I kiijo' mae ia nongajan to mia-mian i sinaa nu Sabat.

³² Aha binangang nontoa Ia mongajan, kalana Ia motatae ko angga'nyo.

³³I kiijo' i laigan pogalejaan daagi' ko samian anu kinuasanmo nu roh ma'idek. Mian aijo' ko kihi-kihis,

³⁴“O Yesus, mian nu Nazaret, apaa na anu ka'oho' obaunto hi kami? Beleyum toka monsilakai kami? Kusumbu' ihe na beleyum; beleyum posaihon nu mian susi' lengkat mae hi Tumpu!”

³⁵“Hokot!” sinegaan i Yesus na roh ma'idek aijo'. “Posabatmo lengkat hi mian aiya!” Lantas roh ma'idek aijo' nonsapahakon mian aijo' i ahop nu aha iwi-iwi', lapas aitu nosabatmo lengkat hi mian aijo', madi'mo nompasakiti.

³⁶Iwi-iwi' na mian binangang, ka' notatae samian ka' samian, “Palias hondo na potatae-Nyo. Ko angga'nyo ka' ko kuasa-Nyo na Ia nompalentah to roh-roh ma'idek mosabat, ka' aha mule' nosabatmo!”

³⁷Sahingga lele mongkona i Yesus tinogilelemo i da'erah aijo'.

³⁸Pinala'ian i Yesus na laigan pogalejaan aijo', ka' i namba i laigan i Simon. Tina nu bengkele' i Simon hau-haunyo masakit nusihabi, ka' to mia-mian nompoto'imo han aijo' hi Yesus.

³⁹I Yesus namba i kahoyotan nu totina aijo', lantas nolaa'mo anu nonsihabi aijo'. Anu nonsihabi aijo' i na'alinmo, tina nu bengkele' i Simon balo nobula ka' nongatuni apa-apaa na anu palalu hi aha.

⁴⁰Salatan sinaa nakakinsapmo, iwi-iwi' na mian nomboamo hi Yesus to utu-utusnyo anu mongoa'i sansala nu ngangahan nu panyakit. I Yesus nompotudu lima-Nyo i buan nu aha toto samian ka' nompa'alin aha.

⁴¹To roh-roh ma'idek nosabat hi mian da'isan ka' naha loboo'an, “Memang Beleyum Anak nu Tumpu!” Panyo i Yesus nonsegai aha, madi' mompoloas aha motatae, kalana nusumbu' nu aha Iamo na Tomundo anu Momposalamat.

⁴²Salatan sinaa nontampu'unimo binete' i Yesus nompala'imo kota aijo', ka' namba i sa'angu' na tampat anu liing. To mia-mian nontampu'unimo nolio Ia, ka' salatan i humpaknyomo, aha nompagalamo nolio jalan da Ia boli mompala'i aha.

⁴³Panyo i Yesus notatae, “Lele Ma'ima' mongkona mosia na Tumpu mompalentah, tionyo Ku poto'i i kota-kota sangga'at, kalana aijo' na kahanda'nyo nu Tumpu nompokau Aku toka i dunia.”

⁴⁴Kalana aijo', i Yesus nongajan i uno nu to lai-laigan pogalejaan i songko-songko na lipu' nu Yudea.