Read Saluan LUKAS 7 Bible Online

LUKAS 7 - Saluan bible

LUKAS 7

¹Salatan i lapasmo na nontaeakon hahan aijo' hi mian da'isan, i Yesus nambamo nokiijo' i Kapernaum.

²I kiijo' daagi' ko suludadu nu Roma anu ko posaihonnyo, anu talalo nu kalibosi. Posaihonnyo aijo' masakit, me ise-ise' sinilakamo.

³Tempo'nyo suludadu aijo' nohongo mongkona i Yesus, ia nompokaumo to pia-piangkuka polaya' nu mian Yahudi namba hi ia mompoita da ia toka mompa'alinakon posaihonnyo.

⁴Salatan tinokamo hi Yesus, to mia-mian haha aijo' nongkakase da Ia montulungiakon suludadu aijo'. “Suludadu aijo' pantas otulungi nu kita Tuuma,” koonyo nu aha hi Yesus,

⁵“kalana ia mongkalibosi bansanto, ka' nompotinjomo laigan pogalejaan mami.”

⁶Sahingga i Yesus namba hingga-hinggat tiba aha. Salatan i Yesus malia'mo toka i laigan aijo'. Suludadu aijo' nonsai to sanga-sangalunyo mamba hi ia da mompoto'i, “Bolimo kita Tuuma basusa-susa' mokiijo' i laiganku. Aku ma'isa pantas montalima kita Tuuma i laiganku.

⁷Aijo' na sababnyo aku madi' baani na mangadap hi Kita Tuuma. Jadi, ola o palentahkon da pokauhonku ma'alin.

⁸Kalana aku suele ta'aluk i palentah anu i bawongku, ka'i alukku daagi' suele ko to sulu-suludadungku anu tionyo mohongo palentangku. De aku mompalentah samian na suludadu, ‘Lako'!’ ia mule' mamba; ka' de aku montaloakon hi sangga'at. ‘Imbo' aiya!’ ia mule' toka. Ka' de aku mompalentah posaihonku, ‘Bau na aiya!’ ia tionyo mombau.”

⁹Binangang na i Yesus, nohongo aijo'. Ia nosiloi ka' notatae hi mian da'isan anu hau-haunyo mombatuki Ia, “Palias na mian aiya. Aha mian nu Israel ma'isa toho' sinahaku na palesaya anu totu-totu'u kinodaka'nyo aiya!”

¹⁰Salatan to mia-mian anu pinokau aijo' ninsusule'mo i laigan nu kapala nu suludadu aijo', posaihon aijo' na'alinmo.

¹¹Madi' pinin ilapas na aijo', i Yesus nambamo i kota Nain. Anu saja' mombatuki tiba mian da'isan namba ka' Ia.

¹²Tempo'nyo i Yesus tinokamo i koko tumban nu kota, to mia-mian hau-haunyo momboa anu sinilakamo mosabat i kota. Anu sinilaka anak mo'ane, sami-samiannyomo na anak nu samian na balu. Da'isan na mian nu kota nonsangalui tinanyo.

¹³Salatan i Tumpu Yesus nontoa boune aijo', Ia nolibos hi ia, lantas notatae, “Boli humaang kita Tina!”

¹⁴Lapas aijo' i Yesus nongohani pinolembanan anu sinilaka aijo', ka' tiniiknyo. Sahingga anu nolemban tinolotinjo. I Yesus notatae, “O olitau, Ku pokau na beleyum pobula!”

¹⁵Olitau anu sinilakamo aijo' nobulamo, sinumuhang ka' nontampu'uni binasisik. Lantas binee'mo i Yesus hi tinanyo.

¹⁶Iwi-iwi' na mian nabuhukmo ka' nontampu'uni nompuji' Tumpu Allah. Koonyo nu aha, “Samian na nabi daka' tinokamo i totonga'to! Tumpu tinokamo da momposalamat miannyo anu palesayamo!”

¹⁷Lele mongkona i Yesus aiya, tinolelemo i songko-songko na Yudea ka' i da'erah anu mompaha ohani.

¹⁸Anu saja' mombatuki Yohanes nompoto'imo hi Yohanes, iwi-iwi' na anu tinimbalimo aijo'. Sahingga i Yohanes nolaga ua'aha na anu saja' mombatuki ia.

¹⁹Lantas nonsai aha namba hi Tumpu Yesus ka' mompokilawa, “Kitamo Tuuma na mian anu toka mae susumo anu jinanji'mo nu Tumpu, kabai tionyo kami montanda'i san-samianan?”

²⁰Ua-ua'aha na anu saja' mombatuki Yohanes aijo' namba hi Yesus ka' notatae, “I Yohanes anu Mompalamandikan nompokau mae kami mompokilawa hi kita Tuuma, kugantang kitamo Tuuma na mian anu toka mae, susumo anu jinanji'mo nu Tumpu, kabai tionyo kami montanda'i san-samianan?”

²¹Tempo'nyo aitu i Yesus nompa'alin da'isan na mian, ka' nolaa' manjoo' na roh ma'idek tiba mule' nompotimbali da'isan na mian mapisok timbali nontoa.

²² I Yesus nontaami, “Pinsusule'mo hi Yohanes, ka' opoto'iakon apaa na anu ihongomo miu ka' tinoa: mian anu mapisok montoa, mian anu lupe i lumajang, mian anu ko panyakit kilit okabuhuk i na'alin, mian anu mabongon nohongo, mian anu sinilakamo po'ule' tinumuu', ka' Lele Ma'ima' lengkat mae hi Tumpu pinoto'iakon hi to mia-mian kasiasi.

²³Kopi-kopian na mian anu madi' ko kabalatan mongka'ideki Aku.”

²⁴Salatan to posa-posaihon i Yohanes aijo' nambamo, i Yesus nontampu'unimo notatae hi mian da'isan mongkona i Yohanes, tukoo-Nyo, “Komiu namba i padang bolaa montoa apaa? Santake na hemput anu nupuuhakon nu mombun?

²⁵Komiu namba montoa apaa? Samian na anu mimbaju' ma'ima'? To mia-mian anu mipake sumo aijo', ka' anu tumuu' molabi jojoong i laigan nu tomundo!

²⁶Jadi, komiu nosabat da montoa apaa? Pa' nontoa samian na nabi? Totu'u, aitu pe'e molingkuduimo samian na nabi.

²⁷ Kalana i Yohanesmo ai-aijo' na anu kokoonyo nu ayat nu Kitab nu Tumpu aiya, ‘Aiyamo na pokauhon-Ku,’ na koonyo nu Tumpu, ‘Aku nompokaumo ia, da ia pe'e na mamba i moona, da nu buka' na kajalanan nu beleyum!’ ”

²⁸“O inau'” na koonyo i Yesus mule', “i uno nu dunia aiya madi' toho' kino mian anu lebe daka' molingkudui Yohanes anu Mompalamandikan. Panyo mian anu talalo ise' i totonga' nu mian anu palesayamo hi Tumpu, lebe daka' molingkudui Yohanes anu Mompalamandikan.”

²⁹ Iwi-iwi' na mian — tiba topo tage hasin — nohongo i Yesus nontaloakon han aijo'; ahamo na to mia-mian anu montulutimo palentah nu Tumpu, ka' mongka'oho'mo opalamandikan i Yohanes.

³⁰Panyo to mia-mian nu Farisi tiba to gulu-gulu' agama madi' mongka'oho' montalima tanga'an nu Tumpu hi butong nu aha. Aha madi' mongka'oho' nu palamandikan i Yohanes.

³¹Lantas i Yesus notatae mule', tukoo-Nyo, “Tiba apaa na pompokakanakonan-Ku to mia-mian tempo' uuka? Sumomo apaa na aha?

³²Aha sumomo to ana-anak anu sumuhang i pasan; sanggombu moloboo'akon hi sangga'at, ‘Kami monyanyiakon elok da lame' na komiu, panyo komiu madi' mongka'oho' monsalelei! Kami monyanyiakon elok nu anu ko mian silaka, padahan komiu madi' humaang!’

³³I Yohanes anu Mompalamandikan tinoka — ia bapuasa' ka' madi' monginum anggur — ka' komiu notatae, ‘Ia sinoku'onmo nu setan!’

³⁴Anak nu Mian toka — Ia mongkaan ka' monginum — lantas komiu motatae, ‘Toa na mian aijo'! Mabebes, saja' ma langu, sangalu nu topo tage hasin, ka' sangalu nu mian baladosa'.’

³⁵Mau mule' sumo aitu, kapandean nu Tumpu ko bukuti'nyo hi mian anu nontalimamo Ia.”

³⁶Samian na Farisi sanggonyo i Simon, nolaga i Yesus mongkaan. I Yesus namba i laigannyo ka' sinumuhang nongkaan.

³⁷ I kota aijo' daagi' ko samian mule' na boune anu tumuu' i uno nu dosa'. Tempo'nyo ia nohongo i Yesus hau-haunyo mongkaan i laigan nu mian Farisi aijo', ia tinoka ka' nomboa sa'angu' na boton pualam ko isinyo minya-minya' manohong.

³⁸Ia tinuminjo i hiku i Yesus koko tengke-Nyo, ka' i humaang ka' nohumpisi tengke i Yesus nu lolu'nyo. Lapas aijo' tengke i Yesus ingambu'annyomo nu ubaknyo, lantas ingookannyo ka' dinudu'annyo nu minya-minya' manohong.

³⁹Salatan mian nu Farisi anu nolaga i Yesus nontoa han aijo', ia notataemo i kinyonyoanyo, “De mian aiya nabi, tantu nusumbu' ihe na boune aijo' anu nongkanyang Ia, apaa mule' boune aijo' tumuu' i uno nu dosa'!”

⁴⁰Lantas i Yesus notatae hi Simon, “Simon, daagi' ko apa-apaa anu ka'oho' Kutaloakon hi beleyum.” “Ii', Tuumangku Gulu',” tinaaman i Simon, “taloakonmo.”

⁴¹I Yesus notatae, “Daagi' ko ua'aha na mian anu bina samaya' hi mian anu nonsabonakon doi. Samian binasamaya' lima'atu na doi salaka, ka' anu samian mule' limampulu' na doi salaka.

⁴²Ua-ua'aha madi' moko ala nombolosi samaya' aijo', sahingga samaya' nu aha pinobakasnyomo, bolimo bolosi. Jadi anu ua'aha aijo' ihe na anu talalo mongkalibosi mian anu nonsabonakonmo doi aijo'?”

⁴³“Kusangka mian anu talalo manjoo' na samaya'nyo anu pinobakasnyomo!” na koonyo i Simon. “Pikilanum totu'u,” tinaaman i Yesus.

⁴⁴Lantas i Yesus nontoa boune aijo' ka' notatae hi Simon, “Beleyum nontoamo boune aiya? Aku tinoka i laiganum, ka' beleyum madi' nontoukai uee da pombaso'i tengkeng-Ku; panyo boune aiya nombaso'imo tengkeng-Ku nu lolu'nyo, ka' ingambu'nyomo nu ubaknyo.

⁴⁵Beleyum madi' nontalima Aku nu pongooki, panyo boune aiya madi' na'osa nongooki tengkeng-Ku salatanmo pe'e Aku tinoka i aiya.

⁴⁶Beleyum madi' nolana'akon lanya' i uba-Ku, panyo boune aiya nolana'akonmo lanya' manohong i tengkeng-Ku.

⁴⁷Totu'u: Liibosnyo anu tahahumo sumo aijo' momponyata'mo saba' dosa'nyo anu manjoo' ingampunanmo! De mian o ampuni sangkiding, ia suele mongampuni sangkiding.”

⁴⁸Lantas i Yesus notatae hi boune aijo', “To dosa-dosa'um ingampunanmo.”

⁴⁹To mia-mian sangga'at anu suha-suhang mongkaan hingga-hinggat ka' i Yesus, nontampu'unimo notatae hi samian ka' samian, “Ihe na mian aiya sampe timbali mongampuni dosa'?”

⁵⁰Panyo i Yesus notatae hi boune aijo', “Kalana beleyum palesaya hi beleng-Ku, beleyum oposalamat. Lako'mo ma'i-ma'ima'!”