Read Saluan LUKAS 8 Bible Online

LUKAS 8 - Saluan bible

LUKAS 8

¹Madi' pinin lengkat i aijo', i Yesus nambamo i kota-kota ka' i kampu-kampung da mompolele Lele Ma'ima', saba' Tumpu Allah montampu'unimo mompalentah susumo Tomundo. Sampulu' ohua' na anu saja' mombatuki namba hingga-hinggat ka' Ia.

² Sumo aitu mule' to pia-piangkuka na boune anu na'alinmo, anu kinona nu roh ma'idek ka' panyakit. Aha aijo'mo i Maria anu osa-osanggohi Magdalena (popitu' na roh ma'idek anu sinabatakon hi ia);

³singkona i Yohana bengkele' i Khuza, anu ko kalaja i laigan daka' hi Herodes; i Susana, ka' manjoo' mule' na boune sangga'at. Posi ongkos nu aha na montulungi Yesus ka' anu saja' mombatuki Ia.

⁴To mia-mian saja' toka hi Yesus lengkat mae i ngangahan nu kota. Ka' salatan nanjoo'mo na mian sinihuk, i Yesus nonsisikakonmo hi aha kantuangan sumo uuka:

⁵“Samian na topo ale' namba nonsau bine'. Hau-haunyo ia monsa'u, daagi' ko bine' anu ola nanabu' i jalan. Sambagian pineja' nu mian ka' sangga'at tinoluk nu tomonsi'.

⁶Daagi' mule' ko anu ola nanabu' i tampat anu ko batunyo. Salatan tinumuu'mo, anu sinu'annyo aijo' ola nangkaluale, kalana tano'nyo madi' ma'omuk.

⁷Daagi' mule' ko bine' anu ola nanabu' i uno nu hemput anu ko hii'nyo. Hemput mihii' aijo' tinumuu' hingga-hinggat tiba bine' aijo', ka' nombolungi sampe i nanggas.

⁸Panyo daagi' ahi' ko bine' anu nanabu' i tano' anu ma'omuk, lantas tinumuu' mohasinakon bua'nyo pininsa'atu lipat.” Lapas nonsisik kantuangan aijo', i Yesus notataemo, “De ko bihing, hongo!”

⁹Anu saja' mombatuki Yesus nompokilawa hi Ia alati'nyo nu kantuangan aijo'.

¹⁰ I Yesus nontaami, “Komiu binee'anmo balakat da monsumbu' lahasia mosia na Tumpu mompalentah susumo Tomundo. Panyo to mia-mian sangga'at o ajan nu kantuangan, da aha mongintomakon, panyo madi' monsumbu' pa' apaa na anu timbali; ka' aha mohongo, panyo madi' mangalati'.”

¹¹“Aiya na alati'nyo nu kantuangan aijo': Bine' aijo', aijo'mo potatae nu Tumpu.

¹²Bine' anu nanabu' i jalan sumomo to mia-mian anu mohongo potatae aijo'. Panyo Ibilis tinoka ka' nongagoi lele aijo' i kinyonyoa nu aha, da aha boli palesaya ka' oposalamat.

¹³Bine' anu nanabu' i tampat anu ko batunyo sumomo mian anu mohongo lele aijo', kinyonyoanyo sanang na montalima. Panyo lele aijo' madi' nimbakat i kinyonyoa nu aha. Aha palesaya ola sasaingoni', ka' de soba'an toka, aha madi'mo mule' palesaya.

¹⁴Bine' anu nanabu' i totonga' nu hemput hii'on, sumomo mian anu mohongo lele aijo', panyo bata-bata i kantumuu'an nu aha, ka' mongindi tumuu' molabi ka' sanang i dunia aiya. Iwi-iwi' aijo' mompeedi aha sahingga madi' mohasinakon bua' matantu.

¹⁵Bine' anu nanabu' i tano' anu ma'omuk, sumomo mian anu mohongo lele aijo', lantas monguna' i kinyonyoa anu ma'ima' ka' hodi'. Aha moko ala sabaan sampe mohasinakon bua'.”

¹⁶ “Madi' ko mian anu montutungi sulu', lantas mongkulubi nu gumbang kabai mompo'una' i aluk nu kahoyotan. Ia tionyo mompo'una' sulu' i sulaannyo nu sulu', da mian anu minsoop montoa jingkanyo.

¹⁷ Madi' ko anu sulu-suluk na madi' kantoan; ka' madi' ko anu ohokotakon na madi' o hongo ka' osumbu'.

¹⁸ Mokonyo aitu o intomakon ma'i-ma'ima' apaa na anu i hongomo miu. Kalana mian anu daagi'mo opaka bee'i mule' lebe manjoo'; panyo mian anu madi' ko apa-apaa, sangkiding pe'e anu daagi' hi ia suele o ala.”

¹⁹Tinanyo ka' to utu-utusnyo i Yesus kahanda' toka tinoka hi Ia, panyo aha madi' noko ala tinoka hi Ia, kalana mian talalo da'isan.

²⁰Lantas daagi' ko samian na notatae hi Yesus, “Kita Tuuma, tina ka' to utu-utus nu kita Tuuma kiijo' i sambiha'nyo. Aha mongka'oho' singkabot ka' kita Tuuma.”

²¹Panyo i Yesus notatae hi aha, “To mia-mian anu mohongo potatae nu Tumpu ka' montuluti, ahamo na tina ka' to utu-utus-Ku.”

²²Daagi' ko sansinaan i Yesus tiba anu saja' mombatuki Ia sinumake' i duangan. “Imbo' da kita mamba i santoa nu dowiwi,” koonyo i Yesus hi aha. Lantas aha nambamo.

²³Tempo'nyo aha hau-haunyo tinalabut, i Yesus kinahoyotanmo. Monti-montiik baleba' makansang nombokolimo dowiwi aitu. Uee nontampu'unimo ninsoop i duangan, sampe nombahayaimo aha iwi-iwi'.

²⁴Anu saja' mombatuki Yesus nambamo hi Ia, ka' nombulakon Ia. Aha notatae, “Tuumangku Gulu', Tuumangku Gulu', kita silakamo!” I Yesus nobula ka' nonsegai baleba', ka' bokon anu hau-haunyo kumelembuang aijo'. Baleba' ka' bokon aijo' binelenti ka' dowiwi aijo' tinendamo hondo.

²⁵Lantas i Yesus notatae hi anu saja' mombatuki Ia, “Ka' kadaka' komiu madi' palesaya hi beleng-Ku?” Aha binangang ka' nabuhuk. Ka' notatae na aha samian ka' samian, “Ihe sabenannyo na mian aiya sampe mompalentah baleba' ka' bokon, ka' Ia mule' i hongonyomo!”

²⁶I Yesus tiba anu saja' mombatuki Ia lau-laus tinalabut tinoka i da'erah nu Gerasa i santoa nu Dowiwi Galilea.

²⁷Tempo'nyo i Yesus nintau'mo i katano'an, Ia i lambanan mae nu samian na mo'ane anu sinoku'onmo nu roh ma'idek. Mian aijo' lengkat mae i kota. Pininmo na ia madi' mibaju' ka' madi' mongka'oho' jojoong i laigan. Ia ola mongka'ima'i lewa' jojoong i liang pompo'una'an mian anu silakamo.

²⁸Salatan nontoa i Yesus, ia noloboo'mo, lantas tinolodadupumo i ahop i Yesus, ka' notatae daka-daka', “Yesus Anak nu Tumpu Anu Matangkas na Kuasanyo! Nu posiamo na aku aiya? Ku poita boli monsakisa aku!”

²⁹Mian aijo' notatae sumo aitu, kalana i Yesus nompalentah roh ma'idek aijo' mosabat lengkat hi ia. Saja'mo ia nukona nu roh ma'idek aijo', sahingga mau mule' lima ka' tengkenyo o pungumo nu lante' ka' ia o toongi hoso-hoson hondo, ia daagi' moko botu'akon lante' aijo', lantas nuboa nu roh ma'idek i padang bone'.

³⁰Pinokilawa i Yesus hi mian aijo', “Ihe na sanggoum?” “Sanggongku i ‘Legiun’,” tinaaman nu mian aijo' — kalana manjoo' na roh ma'idek anu ninsoopmo i uno nu butongnyo.

³¹To roh-roh ma'idek haha aijo' nongkakasemo da i Yesus boli molaa' aha manabu' i Keles Kapatean.

³²Koko tampat aijo', daagi' ko bau' manjoo' hondo anu hau-haunyo molio mongkaan i sohipi' nu bungkutnyo. To roh-roh ma'idek haha aijo' nongkakase hi Yesus da opobee' minsoop i uno nu to bau-bau' haha aijo'.

³³I Yesus sinetuju, saba' to roh-roh ma'idek aijo' nosabat nompala'i mian ka' ninsoop i bau' haha aijo'. Lantas to bau-bau' haha aijo' nopadeka' ka' ningkanabu' nokaiyong i dowiwi ka' nolomos.

³⁴Anu monjagai bau' haha aijo' nontoa anu tinimbalimo aijo'. Saba' aha nopadeka'mo namba ka' nompaha poto'i lele aitu i kota, ka' i kampung toto ise-ise' anu mompaha ohani.

³⁵Lantas to mia-mian nosabatmo ka' nontoa apaa na anu tinimbalimo. Aha tinoka hi Yesus, ka' i kiijo' aha nontokai mian anu pinala'ianmo nu to roh-roh ma'idek aijo' hau-haunyo suha-suhang koko tengke i Yesus. Ia nimbaju'mo ka' pikilannyo sininsumbu'mo. Aha haha aijo' nabuhukmo.

³⁶Aha anu nontoa apaa na tinimbalimo aijo' nonsisik hi to mia-mian mosia na mian aijo' pina'alin.

³⁷Lantas songko-songko na anu jojoong i da'erah Gerasa aijo' nompoita sabole-bole da i Yesus mompala'i tampat aijo', kalana aha iwi-iwi' nabuhukmo hondo. Jadi, i Yesus sinumake'mo i duangan kahanda'mo minsusule'.

³⁸Mian anu pinala'ianmo nu roh-roh ma'idek aijo' nompoita hi Yesus da ia timbali mombatuki. Panyo i Yesus nonsai ia mamba, tukoo-Nyo,

³⁹“Pinsusule'mo ka' polele apaa na anu binaumo nu Tumpu hi beleyum.” Saba' mian aijo' i namba nompoto'i songko songko na puus nu kota, apaa na anu binaumo i Yesus hi ia.

⁴⁰Tempo'nyo i Yesus ninsusule'mo i santoa nu dowiwi, ilame'mo na to mia-mian nompolabot Ia, kalana aha hau-haunyo solaa' montanda'i Ia.

⁴¹Lantas tinoka na samian kapala nu laigan Pogalejaan i kiijo'. Sanggonyo i Yairus. Ia tinolodadupu i ahop i Yesus, ka' nompoita sabole-bole da i Yesus sonso' i lagiannyo,

⁴²kalana samba-sambatunyomo na anaknyo boune umunnyo sampulu'mo ohua' na taun, me ise-ise' sinilakamo. Hau-haunyo i Yesus laja-lajang mokiijo' i laigan i Yairus, to mia-mian nogogensotanmo mokiijo' hi Ia anu lengkat iyayamae.

⁴³I kiijo' daagi' mule' ko samian na boune anu umunnyo sampulu'mo ohua' na taun masakit binuntulan nu home, ola kalana tinokamo na adat nu boune. Ia nongingkotimo iwi-iwi' na halata'nyo bau bapakuli' hi dokoten, panyo madi' ko anu noko pa'alinakon.

⁴⁴Boune aijo' nongohani Yesus lengkat mae i hiku, lantas nontiik puus nu juba'-Nyo. Sinangkinihap home nu boune aijo' kinowotmo.

⁴⁵Pinokilawa i Yesus, “Ihe na anu nontiik Aku?” Iwi-iwi' na mian nojalomo. Lantas i Petrus notatae, “Kita Tuuma, manjoo' hondo na mian tiku-tikup hi kita Tuuma; aha nogogensotanmo atina' hi kita Tuuma!”

⁴⁶Koonyo i Yesus, “Panyo daagi' ko mian anu nontiik Aku. Kusumbu' na aijo', kalana daagi' ko kahosonan anu nosabatmo lengkat hi beleng-Ku.”

⁴⁷Boune aijo' tinonginau'mo, taalu' anu binaunyo sinumbu'mo. Jadi ia tinoka batuk nu lakat tinolodadupumo hi ahop i Yesus. Lantas sinisiknyo i ahop nu mian iwi-iwi', ka' kadaka' ia nontiik i Yesus, ka' mule' panyakitnyo na'alinmo tempo'nyo aitu mule'.

⁴⁸I Yesus notatae hi ia, “Anak-Ku, kalana beleyum palesaya hi beleng-Ku, beleyum na'alin. Lako'mo sinalamatmo.”

⁴⁹Hau-haunyo i Yesus daagi' motatae, samian na posaihon tinokamo lengkat mae i laigan i Yairus. Ia notatae hi Yairus, “Anak langkoyang nu kita Tuan sinilakamo. Bolimo kita Tuan momposusa' mule' Tuumanto Gulu'.”

⁵⁰Salatan i Yesus nohongo aijo', Ia notataemo hi Yairus, “Boli mabuhuk. Palesayamo anakum ma'alinje.”

⁵¹Salatan tinoka i laigan i Yairus, i Yesus madi' nompobee' mau samian pe'e minsoop tiba Ia, boli mompiakon i Petrus, i Yohanes, i Yakobus ka' tina tuuma nu anak aijo' samata-mata.

⁵²Iwi-iwi' na mian hau-haunyo humaang montando'i kalana kasilakan nu anak aijo'. Panyo i Yesus notatae, “Boli humaang. Anak aijo' madi' sinilaka, ia ola i hoyot!”

⁵³Aha nongkokojoi Yesus, kalana nusumbu' nu aha anak boune aijo' sinilakamo.

⁵⁴Lapas aitu, tinoongan i Yesus nalima nu anak aijo' ka' notatae, “Bulamo, Anak!”

⁵⁵Santuu' nu anak aijo' minsusule'mo hi anak aijo', ka' sakajab aijo' mule' ia nobulamo. Lapas aijo', i Yesus nompokaumo aha mombee'i mongkaan anak aijo'.

⁵⁶Tu'anyo nu anak aitu binangang hondo. Panyo i Yesus nontewa' aha monsisik anu tinimbalimo aijo' mau mule' hi he.