Read Saluan LUKAS 9 Bible Online

LUKAS 9 - Saluan bible

LUKAS 9

¹I Yesus nolagamo sampu-sampulu' ka' ohua' anu saja' mombatuki Ia, lantas nombee'i aha kuasa molaa' roh ma'idek ka' nompa'alin panyakit.

²Lapas aijo' Ia nompokau aha namba nompa'alinakon mian masakit, ka' mompolele lele mongkona mosia na Tumpu mompalentah sumo Tomundo.

³ “Boli momboa apa-apaa bau kapalaluan i lumambanan miu,” tukoonyo i Yesus hi aha. “Boli momboa tokon kabai botutu pongisian anu obee' nu mian, kabai kaanon, kabai doi, kabai mule' ohua' na paan na baju'.

⁴Pa' iyayamae na komiu otalima, jojoongmo i kiijo' sampe komiu mompala'i kota aijo'.

⁵ Ka' iyamae na komiu madi' otalima, de komiu mompala'imo kota aijo', sapuakon na abu' i pala nu tengkeum, salaku sa'angu' na tanda hi aha.”

⁶Anu saja' mombatuki Yesus nambamo, lantas namba i kampu-kampung ise' mompolele Lele Ma'ima' aijo' ka' nompa'alinakon mian masakit iyayamae.

⁷ Tempo'nyo i Herodes anu mompalentah Galilea, nohongomo iwi-iwi' anu tinimbalimo aijo', ia biningongmo. Kalana daagi' ko anu notatae, i Yohanes anu Mompalamandikan po'ule'mo tinumuu'.

⁸Daagi' mule' ko anu notatae tukoonyo, i Elia po'ule'mo i lubat mule'. Sangga'at mule' na mian notatae tukoonyo, samian na nabi lengkat i nabi naipuan mae po'ule'mo tinumuu'.

⁹I Herodes notatae, “Aku nompokaumo mian mompolo ubak i Yohanes. Panyo mian aiya pa' ihe ahi' na Ia? Manjoo'mo na pinohongoakonku mongkona Ia.” Lantas i Herodes binala usaha da montoa i Yesus.

¹⁰To rasul-rasul i Yesus ninsusule'mo ka' nonsisikakon hi Yesus iwi-iwi' na anu binaumo nu aha. I Yesus nongendemo aha, lantas namba hingga-hinggat aha nanintade i kota Betsaida.

¹¹Panyo salatan sinumbu'mo nu to mia-mian na han aijo', aha nombatukimo Yesus. Ia nontalima aha, lantas binasisik hi aha mosia na Tumpu mompalentah sumo Tomundo. Ka' Ia mule' nompa'alinmo mian masakit anu kiijo' hi aha.

¹²Salatan sinaa nontampu'unimo makakinsap, sampu-sampulu' ohua' na anu saja' mombatuki Yesus tinokamo hi Ia ka' notatae, “Kita Tuuma, tampat aiya nosi panintade. Sahanyo kita Tuuma monsai to mia-mian aiya mamba, da aha timbali molio kaanon ka' tampat kahoyotan i to kampu-kampung ise' anu ohani aiya.”

¹³Panyo i Yesus nontaami, “Komiumo ahi' na mombee'i aha mongkaan.” Anu saja' mombatuki Yesus notatae, “Kami ola ko roti olima', ka' uwambatu na ikan. Kabai kami tionyo mamba mongoli kaanon bau bagi nu iwi-iwi' na mian aiya?” (

¹⁴Daagi' kila-kila olima' na madala na to momo'ane i kiijo'.) I Yesus notatae hi anu saja' mombatuki ia, “Pokau na to mia-mian aiya sumuhang mogombu-gombu, kila-kila limampulu' na mian sanggombu.”

¹⁵Anu saja' mombatuki Yesus aijo' nombaumo apaa na anu tinaloakon i Yesus hi aha.

¹⁶Lantas i Yesus nongala olima' na roti ka' uwambatu na ikan aijo', lapas aitu nonsinda langit ka' nontaloakon talima kaseh hi Tumpu. Lapas aitu Ia nompuge-puge roti ka' ikan aijo' nu lima-Nyo, ka' binee'nyo hi anu saja' mombatuki Ia da obagi-bagiakon hi mian da'isan aijo'.

¹⁷Aha iwi-iwi' nongkaan sampe nobosuu. Lantas anu saja' mombatuki Yesus nolimu' labinyo nu anu kinaan aijo', sampulu' ohua' na ponang na konjoo'nyo.

¹⁸Daagi' ko sansinaan tempo'nyo i Yesus hau-haunyo balado'a sausa', anu saja' mombatuki tinokamo hi Ia. I Yesus nompokilawamo hi aha, “Koonyo nu mian Aku aiya ihe?”

¹⁹ Aha nontaami, “Daagi' ko anu notatae, i Yohanes anu Mompalamandikan. Daagi' mule' ko anu notatae, i Elia, sangga'at mule' notatae, sala'samian na nabi naipuan mae anu po'ule'mo tinumuu'.”

²⁰ “Panyo posi pikilan miu, Aku aiya ihe?” pinokilawa i Yesus. I Petrus nontaami, “Kita Tuuma, aijo'mo Tomundo anu Momposalamat anu jinanji'mo nu Tumpu.”

²¹Lantas i Yesus notatae hi anu saja' mombatuki Ia, “Boli hondo-hondo mompoto'i han aijo' mau mule' pa' hi he.”

²²I Yesus po'ule' notatae, “Anak nu Mian memang tionyo mongoa'i sansala manjoo', ka' nu ewa nu to pola-polaya' tiba kapala nu to ima-imam, ka' gulu-gulu' agama. Ia tionyo o patei, panyo sinaa kototolu'nyo po'ule'mo opotumuu'!”

²³ Lapas aitu, i Yesus notatae hi mian iwi-iwi' anu daagi' i kiijo', “Mian anu mongka'oho' mombatuki Aku, tionyo mongkolilimi anu nu posi palalui, monsimbu salib sansina-sinaa, ka' saja' mombatuki Aku.

²⁴ Kalana mian anu monggagan mompintoongi kantumuu'annyo, tionyo molapus na kantumuu'annyo. Panyo mian anu mombee' kantumuu'an bau kapalaluan-Ku, aijo' na momposalamat ia.

²⁵Apaa na ka'untungannyo hi toto samian, de songko-songko na dunia aiya ia na tumpunyo, panyo ia mongidei ka' molapus na kantumuu'annyo?

²⁶De mian ma'ambang mongakui Aku tiba pangajalan-Ku, Anak nu Mian suele ma'ambang na mongakui mian aijo', de Ia po'ule'mo toka tiba kuasa-Nyo, ka' tiba kuasa nu Tumpu hingga-hinggat kuasa nu to mala-malaikat anu susi'!

²⁷Osumbu'mo: Itotonga' miu aiya, daagi' ko mian anu madi' silaka de ma'isa montoa Tumpu mompalentah.”

²⁸ Kila-kila sa'angu' na duminggu noko lapas na i Yesus nongajanakon hahan aijo', Ia nomboa i Petrus, i Yohanes tiba i Yakobus i bawo nu sa'angu' na bungkutnyo da balado'a.

²⁹Hau-haunyo i Yesus balado'a i kiijo', ohup-Nyo sinangalasanmo tiba baju'-Nyo nopute'mo lonyi-lonyingkaban.

³⁰Monti-montiik ohua' na mian, aijo'mo, i Musa ka' i Elia nanintoamo i jingka lengkat i suluga'. Aha binasisik tiba i Yesus mongkona kasilakan-Nyo anu madi'mo pin nu oa'imo i Yerusalem.

³¹

³²Tempo'nyo aitu i Petrus tiba to sanga-sangalunyo kinahoyotanmo, panyo monti-montiik nobulamo ka' nontoa i Yesus jinongkilabanmo, ka' ua ua'aha na mian aijo' tinjo-tinjo tiba Ia.

³³Tempo'nyo ua'aha na mian aijo' nompala'imo i Yesus, i Petrus notatae hi Yesus, “Kita Tuumangku Gulu', sanang hondo na kita i aiya. Sahanyo kami mombaumo totolu' na palung: sa'angu' anunto nu kita Tuan, sa'angu' anu i Musa, sa'angu' mule' anu i Elia.” (I Petrus notatae sumo aijo', madi' sinumbu'nyo pa' apaa na anu tinaloakonnyomo.)

³⁴Hau-haunyo i Petrus daagi' motatae, tinokamo na kundom nonsaput aha, sahingga aha i nabuhuk.

³⁵ Ilapas na kundom aijo' i hongomo na lewo' notatae, “Aiyamo na Anak anu pinile'an-Kumo. O hongo na Ia!”

³⁶Salatan binelenti na lewo' aijo', tinoa nu aha na i Yesus aijo' me sausa'. Anu saja' mombatuki Yesus ola nomohokot mongkona iwi-iwi' aijo', ka' madi' nompoto'i mau mule' pa' hi he apaa na anu tinoamo nu aha.

³⁷Dodododopnyo sina-sinaa, i Yesus tiba totolu' na anu saja' mombatuki Ia nintatau'mo lengkat mae i bungkutnyo aijo', ka' mian da'isan tinokamo hi Yesus.

³⁸Samian na mo'ane i totonga' nu mian da'isan aijo' noloboo', “Tuumangku Gulu', tulungi toakon na anakku — samba-sambatunyomo na anakku!

³⁹De roh ma'idek aijo' montokamo ia, ia nu busak sapolo-poloboo' ka' butongnyo hojok sampe nganga'nyo mimbuha'. Roh aijo' saja' monsakisa ia madi' mongka'oho' mosabat lengkat hi ia!

⁴⁰Pinoitangkumo na anu saja' mombatuki kita Tuumangku, da molaa' roh aijo', panyo madi' pinoko ala nu aha.”

⁴¹I Yesus nontaami, “Palias na komiu aiya! Komiu totu'u to mia-mian anu tageo' ka' madi' palesaya! Toka ipian na aku tionyo jojoong hingga-hinggat komiu ka' sabaan hi komiu? Boa mae na anakum aijo' mo'uuka mae!”

⁴²Hau-haunyo anak aijo' laja-lajang mompanjolongi Yesus, roh ma'idek aijo' nonsapahakonmo ia ka' nombau butongnyo i hojok. Panyo i Yesus nompalentah roh ma'idek aijo' posabat, sahingga na'alinmo na anak aijo'. Lantas anak aijo' po'ule'mo binee' hi tuumanyo.

⁴³Iwi-iwi' na mian binangangmo na nontoa kuasa nu Tumpu anu daka' aijo'. Tempo'nyo to mia-mian daagi' kaho-kahonyo bangang montoa iwi-iwi' na anu binau-Nyo, i Yesus notataemo hi anu saja' mombatuki Ia.

⁴⁴“O intomakon ima-ima' ka' boli okolilimi na potataeng-Ku aiya: Anak nu Mian tionyo obee' i kuasa nu mian.”

⁴⁵Panyo anu saja' mombatuki Yesus aijo' madi' mangalati' i potatae-Nyo aitu. Han aitu pinohowini hi aha, da aha madi' mangalati'. Panyo aha mabuhuk na mompokilawa han aitu hi Ia.

⁴⁶ Hi aha anu saja' mombatuki Yesus jinadimo na painggagaan mongkona ihe na anu aitu hi aha lebe daka'.

⁴⁷Nu sumbu' i Yesus na pikilan nu aha, sabab aijo' Ia nongala samian na anak ise' ka' pinotinjonyo na anak i sohipi'-Nyo.

⁴⁸ Lantas Ia notatae hi anu saja' mombatuki Ia, “Mian anu montalima anak aiya kalana Aku, alati'nyo ia montalimamo Aku. Ka' mian anu montalima Aku, montalimamo Ia anu nonsai mae Aku. Sabab mian anu talalo ise' i totonga' miu, iamo na anu talalo daka'!”

⁴⁹Koonyo i Yohanes, “Kita Tuan, kami nontoamo mian nolaa' setan nonsanggo sanggonto Tuan, ka' kami nontewa' ia, kalana ia misa' lengkat hi kita.”

⁵⁰“Boli montewa' ia,” koonyo i Yesus hi Yohanes ka' hi anu saja' mombatuki Yesus sangga'atannyo, “kalana mian anu madi' mongewa komiu, ia atina' mosambiha' hi komiu.”

⁵¹Salatan ingohanimo na tempo'nyo i Yesus o hangkatmo mokiita' i suluga', Ia nongalamo katantuan da mamba i Yerusalem.

⁵²Sahingga pinokau-Nyo na mian da mamba pe'e i moona. To mia-mian anu pinokau-Nyo aitu namba, lantas ninsoop i sa'angu' na kampung i Samaria da montoukai apa-apaa na kapalaluan i Yesus.

⁵³Panyo to mia-mian i kampung aijo' madi' mongka'oho' montalima i Yesus, kalana i nyata'mo taalu' Ia hau-haunyomo kiijo'mo i Yerusalem.

⁵⁴ Saba' tempo'nyo anu saja' mombatuki Yesus, aijo'mo i Yakobus tiba i Yohanes nonsumbu'mo han nu aha aijo', aha notataemo, “Tumpu, de Tumpu mongka'oho', kami mompoita apu tudun lengkat mae i langit da monsilakai to mia-mian haha aiya!”

⁵⁵I Yesus nosiloi, ka' tinambuha'annyo na aha.

⁵⁶Ilapas aitu, aha nambamo i kampung sangga'at.

⁵⁷Hau-haunyo i Yesus tiba anu saja' mombatuki nolausakonmo da mambamo, daagi' ko mian notatae hi Yesus, “Kita Tuuma, aku mongka'oho' mombatuki kita Tuuma, mau mule' moyaya!”

⁵⁸I Yesus nontaami, “Pojek ko liangnyo, ka' tomonsi' ko petaanyo, panyo Anak nu Mian madi' ko kamale'annyo.”

⁵⁹Lantas i Yesus notatae hi samian anu sangga'atan, “Batuki na Aku.” Panyo mian aijo' notatae, “Kita Tuuma, pobee' pe'e mae na aku minsusule' mamba molamun tuumangku.”

⁶⁰I Yesus nontaami, “Pojohok na mian silaka molamun miannyo anu silaka. Panyo beleyum lako' ka' songkohakon na lele saba' Tumpu montampu'unimo mompalentah.”

⁶¹ Daagi' mule' ko samian anu sangga'atan anu notatae, “Kita Tuuma, aku mongka'oho' mombatuki Kita Tuuma, panyo pe'e na aku minsusule' momoita siloloa.”

⁶²I Yesus notatae hi mian aijo', “Mian anu montampu'unimo mompajeko, lantas mosiloi i hiku, madi' pantas timbali mian anu palesayamo hi Tumpu.”