Read Saluan PO'ULE' INGULIT 1 Bible Online

PO'ULE' INGULIT 1 - Saluan bible

PO'ULE' INGULIT 1

¹Kitab aiya isinyo potatae anu pinotoi i Musa toka hi bansa Israel tempo'nyo aha kijo i padang bola i bangka'nyo nu Yordan. Bangka, nyo aijo ikijo sasu kabetean kaunyo nu Yordan. Bangka'nyo aijo ikijo sasu kabeteau kaunyo nu Yordan ohani kota Suf olot nu kota Paran ka'kota-kota Tofel, Labau, Hazerot ka Di-Zahabab.

²(Lengkat i bungkut nu Sinai, toka i Kades-Barnea montulu da'erah bungku-bungkut nu Edom, olajangi sampulu'ka saangu na sina.)

³Tinoka tanggan saangu bituon sampulu ka'saangu i uno nu taun ko patompulu'nyo salatan aha nompala i Mesir, Musa nompoto'imo bangsa aijo iwi-iwi na pinalentah nu Tumpu da opotokakon hi aha.

⁴ Aijo tinimbali i lapas i Musa nompatundui Sihon, tomundo nu Amori anu mompalentah i kota Hesybon, ka Og, tomundo nu Basan anu mompalentah i kota-kota Asytarot, ka Edhei.

⁵Jadi sasu kabetean nu Yordan i da'erah nu Moab Musa momonanyomo nompotiju' atulan ka'palentah-palentah nu Tumpu. Konyo i Musa,

⁶“Tempo'nyo kita dagi'i Bungkut nu Sinai, Tumpu Allah-nto no tataemo ‘Belemiu sinukupmo na kopinnyo na jinojong i bungkutnyo aija.

⁷Uuka mo kijo i da'erah titikup aitumo Bangka'nyo nu Yordan da'erah nu sa bungku-bungkut ka' bangka'nyo da'erah sasu salaitan ka' bangka'nyo da'erah sasu salaitan ka' sonibi nu Ambai Totonga. Lako'mo jojong i tano nu Kanaan ka' bungkutnyo nu Libanon toka-toka kaunyo daka Efrat

⁸Aku Tumpu; no janji'mo iwi-iwi na tano aijo toka hi mompolee' miu Abraham, Ishak ka'i Yakub ka' lee'nu aha. Jadi lokenmo jojongi na tano' aijo.’ ”

⁹Musa notatae hi bansa aijo, “Tempo'nyo kita i Bungkut nu Sinai, Aku notatae hi komiu tanggung jawab molaya komiu talalo maboat hi belengku. Belengku niadi moko bau de ola posi butongku.

¹⁰Tumpu Allah miu nombaumo komiu nintuang susumo mandala ilangit na konjo'nyo.

¹¹O Amalakon da Tumpu Allah nu mompole' miu sabole-bole montuangi konjo'nyo nu belemiu, samadala na lipatannyo ka mompotimbali komiu bansa anu sanang sumo anu jinanji'nyomo.

¹²Panyo' mosia na timbali de posi aku na monsimbu tanggung jawab anu maboat, da mombauakon iwi-iwi na han.

¹³Pilei'mo hi posi-posi bansa ka' da kuhangkat na aha bau polaya' miu.

¹⁴Poitaon aijo tinalima miu maima.

¹⁵Saba' aitu i totonga polaya'-polaya anu pinela'an miu topia-piangkuka na anu pande ka ku ala ka ku hangkat da bau kapala miu. Topia-piangkuka obau kapala anu samadala, sagaat anu saatu na mian, anu limampulu na mian, ka' sampulu na mian. Aku suele mohangkat kapala-kapala sanggaat da mengatun bansa-bansa.

¹⁶Tempo'nyo aijo aku nompoto'i aha sumo aiya: Palahatikan pahantuda'an anu lubat itotonga i bansa miu. Be'i putusan anu adin, maima' i uno na palakala anu mongkona miau sa'a-sa'angu bansa miu, kabai mongkonai mian salipu'au anu jojong ito-tonga' mui.

¹⁷Koputusan boli mabuat sambiha'; iwi-iwi na mian tionyo oadini miu pokakana madi' mompine ihe na mian aijo. Boli mabuhuk pa ihe pe'e, saba keputusan anu ingala miu anu lengkat mae hi Tumpu Allah. Bisuannyo ko palakala talalo maboat hi belemiu, boamae hi belengku, da belengku na momputusi.

¹⁸Tempo'nyo aijo suele belengku nompotujumo hi komiu mongkona hah sagaat anu tionyo obau miu.”

¹⁹“Salatan susumo anu pinalentakon Tumpu Allahnto kita nompala'i Bungkut nu Sinai ka i lumajang non tulu padang bola anu ewa ka'okabuhuk mokijo da'erah bungkut nu mian Amori.

²⁰Tempo'nyo kita timoka i Kades-Barnea.

²¹Belengku notatae: Uka komiu timokamo i da'erah bungkut nu mian Amori, tano anu bine'mo hi kita i Tumpu-Allahnto ka Allah mompole'to. Toa i ahop miu tala-tala na tano' aijo. Lako'mo patundui susumo anu pinalentah nu Tumpu. Bolimo bata-bata kabai mabuhuk.

²²Panyo' komiu tokamo hi belengku ka notatae: Lebe maima kita mompokau toto piangkuka na mian anu tongkohimona memoloyoni lipu' aijo da aha mompotahi'i kita jalan ia na tionyo otului ka kota-kota anu o tokainto.

²³Usum aijo aku sinitujumo, saba aijo pinileankumo sampulu' ka ohua na mian da samian na o ala toka sa'angu na suku.

²⁴Aha nompisopi bungkut aijo kojoon bangka'nyo Eskol, ka no lajangimo.

²⁵Lapas aitu aha ninsusule'mo i kita nomboa bua-bua'on anu i humpak nu aha i kijo' mae ka nompoto'i talu lipu anu nu be'akon nu Tumpu Allah aitu talalo maomuk.

²⁶ Panyo komiu nolawanimo palentah Tumpu Allah nu belemiu ka madi mongka oho lipu' aijo.

²⁷Komiu motambuha sumo uka, Tumpu mongkaideki kita. Maka' ia nomboa kita nosabat lengkat i Mesin da obe'akon na kita i lima nu mian Amori da mompatei kita.

²⁸Jadi bau apa na kita mokijo? Tomi-mian anu pinokaunto no kijo' mombau kita mabuhuk tiba mompotoiakon saba bansa aijo lebe mahason ka lebe bani hondo tiba kita, ka'aha mule' jojong i kota-kota anu ko pimpi'nyo ko tangkasnyo toka i langit.

²⁹Panyo belengku no tatae, boli mabuhuk hi to mia-mian aijo'.

³⁰Tumpu Allah miu molaya'je komiu ka' mompagalakon komiu susumo pinositoa miu i Mesir

³¹ ka' i padang bola. Komiu nontoamo mosia na Tumpu Allah miu, nomboa komiu tiba salamat i kalajangan jalan aijo toka i tampat aiya, madi' ko gampanyo sumo samian na tuuma monguba', anua'nyo.

³² Panyo mau pe'e belengku no tataemo sumo aijo komiu maisa pe'e mongka'oho palesaya hi Tumpu Allah miu,

³³anu i lumajang i ahop miu da molioi tampat pombauan tahop. Ia nompotiju' jalan hikomiu tempoknyo pihi tuminjo na apu sumo ohi, ka tempoknyo sinaa tuminjo na kunoom sumo ohi.”

³⁴ “I hongo nu Tumpu noto'muhut na aha ia pinu'samo. Ia binalasumpa',

³⁵‘Madi' ko samiannyo lengkat i tulunan anu maidek aiya mompisopi lipu maomuk' anu jinanji'kumo toka hi mompole'miu.

³⁶Lahi Kaleb, anak Yefune na mompisopi, kalana ia tatap mohongo-hongo Aku. Toka hi Kaleb ka' tulunannyo ku bee'jena lipu anu i lambananmo aijo.

³⁷Komiu suele no sabapimo. Tumpu pinusa hi belengku ka' no tatae, Musa beleyum suele madi' mopinsopi lipu' aijo.

³⁸Panyo' patotongakon na kinyonyoa nu pombantum Yosua anaki Nun. Ia mo na kapala nu Israel mompatundu'i lipu' aijo.

³⁹Lantas Tumpa no tatae toka hi kita iwi-iwi, anak-anak miu anu dagi ise' hondo na monggihanakon anu maima tiba anu maidek, anak-anak anu susumo potatae miu nu agoi nu sampobali'miu, hi ahamo ku beiakon tano aijo, ka monjojongije.

⁴⁰Panyo' komiu pinsusule'mo i padang bola, montulu jalan anu mokijo i Laoknu Akaba.

⁴¹Komiu nontami 'Musa, kami binaladasa'mo i ahop nu Tumpu. Panyo uka aiya kami mongka'ohomo mahampate susumo anu pinalentahkon mo nu Tumpa Allah hi kita. Lantas komiu posi sansa mosadiamo mahampate, tiba mompotuka de mahampate i da'erah nu bungkutnyo aijo anu dengke.

⁴²Panyo Tumpu no tatae hi belengku, 'Bolinu pojohok na aha mahampate, saaba aku madi mombatuki aha, saidi aha nu patundu'i nu sampo bali' nu aha.

⁴³Belengku mompotoiakon hi komiu apa na anu tinaeakon nu Tumpu, panyo komiu madi mompajuli. Komiu monggagakon palentah nu Tumpu, ka mo junjuhi i mamba mokijo i bungkutnyo aijo.

⁴⁴Lantas mian nu Amori anu monjongi da'erah nu bungkutnyo aijo no sahabatmo mongewa komiu. Konjo'nyo nu aha daisan hondo, susumo posaanguan nu uani'. Aha nololoi komiu konjoonnyo Horma, lantas nompatunduimo komiu i da'erah bungkut nu Edom.

⁴⁵Mihinyo komiu ninsusule ka' no loobo' hi Tumpu momoita tulung, panyo ia madi' mongka oho' mohongo kabai mompajuli komiu.”

⁴⁶Lapas aitu kita jinojongmo i Kades pinin hondo.