Read Saluan PO'ULE' INGULIT 11 Bible Online

PO'ULE' INGULIT 11 - Saluan bible

PO'ULE' INGULIT 11

¹“Kanonongi na Tumpu Allah nu belemiu, ka' saja' otuluti na palentah-Nyo iwi-iwi'.

²Tutugi uuka aiya apaa na anu osumbu' miu mongkona Tumpu i uno nu han anu ingoa'anmo nu belemiu. To ana-anak nu belemiu ma'isa toho' nongoa'i sumo aijo'. Belemiu na anu nontoamo mosia na Tumpu Allah nu belemiu anu talasanggo hondo, kahosonan-Nyo, kakuasa'an-Nyo,

³ ka' hahan anu okabangangi bibinau-Nyomo. Pinosi toamo nu belemiu apaa na anu binau-Nyomo hi tomundo Mesir ka' songko-songko na lipu'nyo.

⁴ Tinoamo nu belemiu mosia na Tumpu nohopu'i suludadu nu Mesir ka' iwi-iwi' na ajahan ka' kareta anu opake mahampate. Iwi-iwi' na aha i lomosanmo i Ambai Gelagah tempo'nyo aha hau-haunyo mololoi' belemiu.

⁵Osumbu' nu belemiu apaa na anu binaumo nu Tumpu hi belemiu i padang bola ma'isa pe'e belemiu tinoka i aiya.

⁶ Osumbu' suele nu belemiu apaa na anu binaumo nu Tumpu hi Datan ka' hi Abiram to ana-anak i Eliab tulunan mae nu bansa Ruben. I ahop nu belemiu iwi-iwi', tano' nobiha'mo ka' nolonyomo iwi-iwi' to ana-anak nu aha, kemah, iwi-iwi' na posaihon, ka' potuu'on nu aha.

⁷Jadi belemiumo iwi-iwi' na mosi toa nu mata miu hahan anu okabangangi bibi nubaumo nu Tumpu.”

⁸“Otuluti iwi-iwi' na atulan anu ku potokakon hi belemiu sinaa aiya, da belemiu timbali moko ala motaap i kaunyo, ka' minsoop i lipu' anu madi'mo pin ojojoongimo miu.

⁹Ka' belemiu tumuu' pin i lipu' anu kaya ka' tano'nyo ma'omuk, anu jinanji'mo nu Tumpu hi mompolee' miu ka' mule' hi lee' nu aha.

¹⁰Lipu' anu ojojoongi nu belemiu saidi' mae, misa' sumo tano' nu Mesir, tampat anu u'utu mae kinajojoongan nu belemiu. Ikiijo' mae belemiu tionyo ahi' mokalaja totu-totu'u ka' o ueei na ale' de tempo'nyomo motugan bine'.

¹¹Panyo lipu' anu opinsoopi nu belemiu daagi' ko bungkutnyo ka' bangka'nyo; tano'nyo nu ueei nu ujan.

¹²Tumpu Allah nu belemiu na mompotuu' lipu' aijo' ka' monjagai sataun toka sataun.

¹³ Jadi otuluti na palentah haha aiya anu ku poto'i hi belemiu sinaa aiya: Okanonongi, na Tumpu Allah nu belemiu, ka' sombah na Ia nu kinyonyoa anu totu-totu'u.

¹⁴De belemiu mombaumo sumo aijo', saba' Tumpu mompotokamo mae ujan i tano' nu belemiu de tokamo na tempo'nyo salatan belemiu moko padakmo, ka' salatan tempo'nyomo na belemiu montampu'unimo motugan. Sahingga sukupmo na gandum nu belemiu, anggur ka' lanya' nu zaitun,

¹⁵tiba mule' hemput bau kaanon nu binatang nu belemiu. Iwi-iwi' na kaanon anu opalalui nu belemiu tinonsadiamo hi komiu.

¹⁶Boli belemiu mongka'oho' opojo'on hi Tumpu da monsombahmo ka' palesayamo hi to pilo-pilogot sangga'at.

¹⁷De belemiu molanggaimo palentah aijo', nutambuha'imo nu Tumpu na belemiu. Ia madi'mo mompodaagi' mae ujan; tano' miu timbalimo mapeges hondo, sahingga anu osu'an madi'mo ko hasinnyo. Sahingga ola sakinihap belemiu silakamo i tano' anu ma'omuk anu binee'mo nu Tumpu hi belemiu.

¹⁸ Saja' o inau' ka' saja' ahi opalahatikan na palentah haha aijo'. Posegot i botokon nu beleyum ka' i siakan nu beleyum da saja' o inau'.

¹⁹Opotinganakon hi to ana-anak nu belemiu. Osisikakon i uno nu laigan, i sambiha'nyo nu laigan tempo'nyo milawe, ka' tempo'nyo mokalaja.

²⁰Opotulis i ohi' nu tumban nu laigan miu ka' i sabatan daka' nu kota miu.

²¹Sahingga belemiu ka' to ana-anak nu belemiu pin na tumuu' i lipu' anu jinanji'mo nu Tumpu Allah nu belemiu hi mompolee' nu belemiu. De daagi' ko langit aita' i buannyo nu tano' sumo aitu mule' na kopinnyo na belemiu jojoong i tano' aijo'.

²²Otuluti ima-ima' na palentah aijo' iwi-iwi' anu pinoto'ingkumo hi belemiu. Okanonongi na Tumpu Allah nu belemiu, obau iwi-iwi' na anu pinalentahkon-Nyomo hi belemiu, ka' tionyo ahi' belemiu sabole-bole saja' montuluti Ia.

²³Sahingga nulaa'je nu Tumpu na bansa haha aijo' iwi-iwi' ka' mompala'imo belemiu, ka' ojojoongije nu belemiu na tano' nu bansa haha aijo' anu lebe manjoo' ka' mahoson molingkudui belemiu.

²⁴ Batu-batu da'erah anu olajangi nu belemiu, timbalimo anu miu. Da'erah nu belemiu lengkat pe'e mae i padang bola i sasu selatan toka-toka i Bungkutnyo nu Libanon i sasu utara ka' lengkat mae i Kaunyo nu Efrat i sasu kabete'an toka-toka i Ambai anu Totonga'nyo i sasu kinsoban.

²⁵Songko-songko na lipu' haha aijo' nupotimbalije nu Tumpu Allah nu belemiu na to mia-mian mabuhuk hi belemiu susumo anu jinanji'-Nyomo hi belemiu, sahingga madi' ko samian pe'e na moko ala mompoliwa' belemiu.

²⁶Sinaa aiya belemiu mompile'imo pa' mongka'ima'i balakat kabai okutuki.

²⁷Belemiu mohumpak balakat de belemiu tulu-tulutan hi iwi-iwi' na palentah nu Tumpu Allah nu belemiu, anu pinoto'ingkumo sinaa aiya hi belemiu.

²⁸Panyo belemiu mohumpak kutuk de madi' tulu-tulutan hi palentah haha aijo' anu binee' mae nu Tumpu Allah nu belemiu, ka' ola mule' monsombah to pilo-pilogot sangga'at anu madi' toho' osombah nu belemiu.

²⁹ De nuboamo nu Tumpu Allah nu belemiu na belemiu minsoop i lipu' anu saidi' mae ojojoongimo nu belemiu, balakat aijo' tionyo aha otaloakon nu belemiu aita' mae i Bungkutnyo nu Gerizim ka' kutuk aijo' aita' mae i Bungkutnyo nu Ebal. (

³⁰Bungkutnyo aijo' ohu-ohua' kiijo' i sasu kinsoban Kaunyo nu Yordan, i da'erah nu aha mian Kana'an anu jojoong i Bangka'nyo nu Yordan mo'ahop i sasu kinsoban madi' majo'on i kau' haha kiijo' tampat bau ponsomban kiijo' i More koko kota Gilgal.)

³¹Madi'mo pin belemiu motaapmo i Kaunyo nu Yordan ka' monjojoongimo tano' anu binee'mo nu Tumpu Allah nu belemiu hi belemiu. De o alamo nu belemiu na tano' aijo' ka' jojoongmo ikiijo',

³²belemiu tionyo ahi' tulu-tulutan hi atulan iwi-iwi' anu pinotokakonmo hi belemiu sinaa aiya.”