Read Saluan PO'ULE' INGULIT 12 Bible Online

PO'ULE' INGULIT 12 - Saluan bible

PO'ULE' INGULIT 12

¹“Aiyamo na to atu-atulan anu tionyo ahi' otuluti nu belemiu i uno nu kantumuu'an nu belemiu, i lipu' anu binee'mo nu Tumpu hi belemiu Tumpu Allah nu mompolee'miu.

²De belemiu ninsoopmo i lipu' aijo' belemiu tionyo ahi' mongidei tampa-tampat ponsomban aita' i bungkutnyo anu to tangka-tangkas ka' i puge'nyo iwi-iwi' ka' i patu nu kau' anu toto hohopo' na honnyo, tampat nu bansa anu jojoong ikiijo' monsombah to pilo-pilogot nu aha.

³ Hobo'akon na mezbah nu aha haha aijo' ka' pahantutukakon na ohi' batu haha aijo' anu nusangka nu aha ko balakatnyo. Papui na anu bau pontandai Asyera ka' hansuni na to pato-patong bapilogotan nu aha, sahingga pilogot haha aijo' madi'mo osombah i tampat nu aha haha aijo'.

⁴De belemiu monsombahmo Tumpu Allah nu belemiu boli montiho susumo apaa na anu nubau nu mian haha aijo' monsombah to pilo-pilogot nu aha.

⁵Songko-songko na da'erah nu to tulu-tulunan nu aha Israel Tumpu Allah nu belemiu mompile'ije sa'angu' na tampat da bansanto moko ala toka i ahop-Nyo ka' monsombah Ia.

⁶I tampatmo aijo' na tionyo ahi' pomboan nu belemiu to kolo-koloban anu opotunu ka' to kolo-koloban sangga'at, anu osombahkon nu belemiu sambagian o ala i anu sampulu' na bagian tiba iwi-iwi' na anu osombahkon sangga'at, koloban bau pombayan anu jinanji'mo nu belemiu, koloban kasanangan nu kinyonyoa miu ka' anak nu sapi' ka' mee' ka' domba nu belemiu anu momona pino'anaknyo.

⁷Ikiijo' suele i ahop nu Tumpu Allah nu belemiu, belemiu hingga-hinggat tiba to ana-anak nu belemiu tionyo ahi' mongkaan ka' mongkalame'i usaha miu iwi-iwi' anu kino hasinnyomo kalana binalakatanmo nu Tumpu Allah nu belemiu.

⁸De tokamo na tempo'nyo aijo', belemiu bolimo mombau susumo uuka aiya. Sampe tempo' uuka aiya belemiu monsombah yayamo na anu nuka'ima'i nu kinyonyoa miu,

⁹kalana belemiu ma'isa ninsoop i lipu' anu binee'mo nu Tumpu Allah nu belemiu hi belemiu, tampat anu tataapmo na kajojoongan nu belemiu, ka' madi'mo ko anu mompoposia.

¹⁰De opoko taapmo miu na Kaunyo nu Yordan Tumpu Allah nu belemiu montulungimo belemiu monjojoongi ka' tataapmo i tano' anu i santoanyo nu kaunyo aijo'. Ia na monjagai belemiu da boli nupoposia nu aha anu monsampobali' belemiu, ka' belemiu sanangmo na tumuu' madi' ko anu mompoposia.

¹¹Lapas aijo' Tumpu Allah nu belemiu mompile'imo sa'angu' na tampat da tionyo ahi' ponsomban Ia. Ikiijo' na tionyo ahi' kalambanan nu belemiu momboa iwi-iwi' apaa na anu pinalentahkonmo, aijo'mo koloban anu opotunu ka' to kolo-koloban sangga'at, palasombahan sambagian anu o ala i anu sampulu' na bagian ka' palasombahan bau samata-mata bagi nu Tumpu anu jinanji'mo miu.

¹²Okalame'i i ahop nu Tumpu Allah nu belemiu, hingga-hinggat tiba to ana-anak nu belemiu, to posa-posaihon nu belemiu ka' to mia-mian nu aha Lewi anu jojoong i iwi-iwi' na kota nu belemiu, kalana mian nu aha Lewi madi' binagian tano' i lipu' nu belemiu.

¹³Belemiu madi' timbali monsombahkon koloban nu belemiu iyayamo na tampat anu oposi pile'i nu belemiu,

¹⁴panyo ola i tampat anu pinile'anmo nu Tumpu i da'erah nu sala'sa'angu' na tulunan nu bansa miu. Ola ikiijo' na belemiu tionyo ahi monsombahkon koloban anu opotunu ka' pombauan han sangga'at anu ku palentahkon hi belemiu.

¹⁵Panyo belemiu bebas na mongkolot potuu'on nu belemiu ka' mongkaan antoknyo mau mule' pa' iya mae na kajojoongan nu belemiu. Belemiu timbali mongkaan yayamo na konjoo'nyo, na anu nubee' nu Tumpu Allah nu belemiu hi belemiu. Batu-batu mian mau anu belesi' kabai anu mahumimi' timbali mongkaan antoknyo aijo', sumo antoknyo nu kijang kabai jonga timbali okaan nu belemiu.

¹⁶ Ola baso'nyo na madi' timbali okaan, panyo tionyo ahi' obubusakon i tano' susumo uee.

¹⁷I tampat kajojoongan nu belemiu, belemiu madi' timbali mongkaan anu osombahkon sambagian o ala i anu sampulu' na bagian na gandum nu belemiu, anggur nu belemiu, lanya' nu zaitun miu, sapi' kabai mee' kabai domba nu belemiu anu momona pino'anaknyo, koloban bau pombayan anu jinanji'mo nu belemiu, koloban kasanangan nu kinyonyoa nu belemiu kabai palasombahan sangga'at.

¹⁸Belemiu tiba to ana-anak nu belemiu hingga-hinggat tiba to posa-posaihon nu belemiu tiba to mia-mian nu aha Lewi anu jojoong i kota nu belemiu tionyo ahi' mongkaan palasombahan aijo' i ahop nu Tumpu Allah nu belemiu, i tampat anu pinile'anmo nu Tumpu Allah nu belemiu. Ka' i tampat aijo' tionyo ahi' belemiu mongkalame'i kalana iwi-iwi' apaa na anu binaumo nu belemiu.

¹⁹Ojaga boli sampe belemiu mompojohok aha sa'anakan mian nu Lewi mohumpak kasusa'an hau-haunyo belemiu jojoongmo i lipu' aijo'.

²⁰Salatan Tumpu Allah nu belemiu nompo'ewamo potempasan nu lipu' miu susumo anu jinanji'-Nyomo belemiu timbalimo mongkaan antoknyo nu binatang yayamo apaa na anu oka'ima'i nu belemiu.

²¹Kalana tampat anu pinile'anmo nu Tumpu Allah nu belemiu, talalo majo'on lengkat i tampat nu belemiu, belemiu timbali mongkolot sa'angu' na sapi', domba kabai mee' anu binee'mo nu Tumpu hi belemiu, ka' okaan na antoknyo i tampat nu belemiu yayamo pa' iya na anu oka'ima'i nu belemiu, susumo anu pinoto'ingkumo hi belemiu.

²²Batu-batu mian, mau anu belesi' kabai anu mahumimi' timbali mongkaan antoknyo aijo' susumo belemiu timbali mongkaan antoknyo nu jonga kabai antoknyo nu kijang.

²³ Panyo antoknyo anu daagi' ko baso'nyo madi' timbali okaan, kalana nyawanyo kiijo' i uno nu baso'nyo ka' belemiu madi' timbali mongkaan nyawanyo tiba antoknyo.

²⁴Baso'nyo madi' timbali okaan, panyo tionyo ahi' obubusakon i tano' susumo uee.

²⁵De otuluti nu belemiu na palentah aijo' Tumpu sanangmo ka' belemiu tiba lee' nu belemiu mohumpakmo ka'ima'an.

²⁶Iwi-iwi' na koloban ka' palasombahan anu jinanji'mo nu belemiu hi Tumpu, tionyo ahi' oboa nu belemiu i tampat anu pinile'anmo nu Tumpu.

²⁷Koloban anu opotunu ka' koloban anu okaan na antoknyo tionyo ahi' osombahkon i mezbah nu Tumpu Allah nu belemiu ka' baso'nyo obubusakon i mezbah aijo'.

²⁸Opalahatikan ima-ima' iwi-iwi' apaa na anu pinalentahkonkumo hi belemiu sahingga belemiu mombaumo anu ma'ima' ka' nusitujui nu Tumpu Allah nu belemiu sahingga belemiu ka' lee' miu mohumpak kasalamatan ka' ka'ima'an sampe toka sidu-sidutu'.”

²⁹“Tumpu Allah nu belemiu mompateimo bansa haha aijo' anu jojoong i lipu' aijo', sahingga belemiu timbalimo monjojoongi ka' mongkuasai.

³⁰De bansa haha aijo' opateimo obala'ingati boli mule' belemiu montiho aha monsombah to pilo-pilogot sangga'at kalana kalakuan aijo' mompotoka balaa'.

³¹Mosia na bansa haha aijo' monsombah to pilo-pilogot nu aha, boli otiho nu belemiu, na aijo' sahingga belemiu mombaumo sumo aijo' na monsombah Tumpu Allah nu belemiu, kalana de aha monsombahmo saba' mombaumo palabuatan anu toto ide-idek anu nunuka'ideki nu Tumpu. To ana-anak pe'e nu aha nopotunu nu aha i mezbah salaku bau koloban hi to pilo-pilogot nu aha.

³² Obau iwi-iwi' apaa na anu pinalentahkonkumo hi belemiu boli otuangi kabai oga'ai.