Read Saluan PO'ULE' INGULIT 14 Bible Online

PO'ULE' INGULIT 14 - Saluan bible

PO'ULE' INGULIT 14

¹ “Belemiu mian anu pinalesayamo hi Tumpu Allah nu belemiu. Jadi de belemiu ko anumo sinilaka, ka' mombaumo adatnyo kona hi mian anu sinilakamo, boli mombelai butong miu kabai mongkis siakan nu belemiu susumo anu nubau nu aha bansa sangga'at.

² Belemiu anumo nu Tumpu Allah nu belemiu; iwi-iwi' na bansa i dunia aiya, belemiumo na pinile'an nu Tumpu Allah da timbalimo mian anu palesayamo hi Ia.”

³“Boli mongkaan binatang anu pinoto'imo nu Tumpu madi' toho' okaan.

⁴Anu timbali okaan nu belemiu binatang haha aiya: sapi', domba, mee',

⁵jonga, domba anu madi' opotuu', mee' anu madi' opotuu', kijang,

⁶ka' iwi-iwi' na binatang anu konukunyo mobiha' ohua', ka' kaanonnyo anu nu otot nu lonyom lapas mae po'ule' nu ama'.

⁷Belemiu madi' timbali mongkaan binatang anu konukunyo madi' mobiha' ohua' ka' kaanonnyo anu nu otot nu lonyom lapas mae madi po'ule' nu ama'. Boli mongkaan unta, kelenci kabai marmot. Binatang haha aijo' madi' timbali okaan kalana mau mule' kaanonnyo anu nu otot nu lonyom lapas mae po'ule' nu ama' panyo konukunyo madi' mobiha' ohua'.

⁸Boli' mongkaan bau'. Binatang aijo' madi' timbali okaan, kalana mau mule' konukunyo mobiha' ohua', panyo kaanonnyo anu nu kaan nu lonyom lantas madi' po'ule' nu ama'. Antoknyo madi' timbali okaan, anu nosi pate na binatang aijo' madi' timbali o kanyang.

⁹Belemiu timbali mongkaan iwi-iwi' na ngahan nu ikan anu ko sonukunyo, ka' anu ko sisi'nyo.

¹⁰Binatang anu tumuu' i uee, panyo madi' ko sonukunyo ka' madi' ko sisi'nyo atina' madi' toho' okaan, jadi madi' timbali okaan.

¹¹Belemiu timbali mongkaan iwi-iwi' na ngahan nu tomonsi' asan anu timbali okaan.

¹²Panyo daagi' ko ngangahan nu tomonsi' sangga'at anu madi' timbali okaan, aijo'mo: bonyia', mongkoek, iwi-iwi' na ngahan nu bonyia', nasar, papaa', tomonsi' unta, camar, blekok ka' iwi-iwi' na ngahan nu kohong, undan, tomonsi' kasa ka' poniki'.

¹⁹Iwi-iwi' na sipuyu anu ko polipiknyo opoliwa' na okaan, jadi madi' timbali okaan.

²⁰Binatang anu ko polipiknyo anu madi' opoliwa' timbali okaan.

²¹ Binatang anu mosi pate madi' timbali okaan nu belemiu, panyo mian anu lengkat mae i salipu'an anu jojoong atina' hi belemiu timbali mongkaan kabai opobaluk hi bansa anu lengkat mae i salipu'an. Belemiu mian anu pinosi pogala'mo nu Tumpu Allah da mombau anu Nu pokauhakon. Antoknyo nu anak nu domba kabai anaknyo nu mee' madi' timbali o kola' tiba susu nu tinanyo.”

²² “Sataun toka sataun belemiu tionyo ahi momposi po'iwi' anu sampulu' na bagian, sambagian na o ala i hasinnyo nu tano' miu iwi-iwi'.

²³I Ahop nu Tumpu Allah nu belemiu i tampat anu pinile'an-Nyomo bau tampat ponsomban nu belemiu na tionyo ahi' pongkaanan nu belemiu palasombahan anu sampulu' na bagian aijo' sambagian na o ala na gandum, anggur, lanya' nu zaitun tiba anak nu sapi' ka' mee' ka' domba nu belemiu anu momona pino'anaknyo. Bau na han aijo' da sampe toka sidu-sidutu' belemiu saja' mompakalioi mongadati Tumpu Allah nu belemiu.

²⁴De tampat anu pinile'anmo nu Tumpu Allah nu belemiu talalo majo'on i laigan nu belemiu sahingga anu sampulu' na bagian, sambagian na o ala i hasin nu tano' miu anu binee'mo nu Tumpu Allah nu belemiu hi belemiu, madi' opoko ala oboa nu belemiu mokiijo',

²⁵jadi pobalukmo na pombagian nu hasin nu tano' miu aijo' ka' boa na doinyo i tampat anu pinile'anmo nu Tumpu Allah nu belemiu.

²⁶Balanjakonmo na doi aijo' yayamo pa' apaa na anu opalalui nu belemiu — sapi' kabai mee', domba, anggur kabai inumon anu bisa molangui — lantas i tampat aijo', i ahop nu Tumpu Allah nu belemiu, belemiu ka' to ana-anak nu belemiu tionyo ahi' mongkaan hingga-hinggat ka' balasana-sanang.

²⁷Boli ola opojohok na mian nu aha Lewi anu jojoong i iwi-iwi' na kota; o inau' ahi' na aha aijo' madi' ko posi tano'.

²⁸De kapupusannyomo nu taun anu ko totolu'nyomo belemiu tionyo ahi' momboa anu sampulu' na bagian, sambagian na oboa na hasin nu tano' miu ka' oposa'angu' i kota-kota nu belemiu.

²⁹Anu okaan aijo' bagi nu aha mian nu Lewi kalana aha madi' ko tano', ka' bagi nu mian anu lengkat mae i salipu'an, anak anu madi' ko tuuma ka' tinanyo ka' to balu-balu anu jojoong i kota-kota nu belemiu. Aha timbali toka mae ka' mongala apa-apaa na anu opalalui nu aha. De belemiu mombaumo sumo aijo' saba' Tumpu Allah nu belemiu mombalakatije iwi-iwi' na anu obau nu belemiu.”