Read Saluan PO'ULE' INGULIT 16 Bible Online

PO'ULE' INGULIT 16 - Saluan bible

PO'ULE' INGULIT 16

¹ “Lame'akon na Paskah i bitu'on Abib bau pongadati Tumpu Allah nu belemiu kalana i bitu'onmo aijo', pihi-pihi pinobebas-Nyomo na belemiu nompala'i mae Mesir.

²Lako'mo i tampat anu pinile'anmo nu Tumpu ka' kolot na mee' ka' domba sa'angu' kabai sapi' nu belemiu salaku palasombahan i Paskah bau pongadati Tumpu Allah nu belemiu.

³Palasombahan i Paskah aijo' tionyo ahi' okaan tiba roti anu madi' ko raginyo. Pitun sinaa na kopinnyo na belemiu tionyo ahi' mongkaan roti anu madi' ko raginyo susumo tempo'nyo belemiu nompala'imo mae tano' nu Mesir anu nolosia'mo mae hondo. Kaanmo na roti aijo', roti anu osanggohi roti nu kasansala'an, da i uno nu kantumuu'an nu belemiu, saja' belemiu tonginau' i sinaa tempo'nyo belemiu nompala'imo mae Mesir, tampat miu nongoa'i kasansala'an.

⁴Pitun sinaa na kopinnyo songko-songko na lipu' nu belemiu madi' ko samian pe'e na timbali monguna' ragi i laigannyo. Antoknyo nu potuu'on anu kinolot pihi-pihi palatamanyo aijo' tionyo ahi' okaan sahingga mingkot pihi aijo'.

⁵Potuu'on anu okolot Molame'akon Paskah tionyo ahi' okolot i tampat anu pinile'anmo nu Tumpu Allah nu belemiu, ka' madi' timbali i tampat sangga'at anu i uno nu lipu' iwi-iwi' anu binee'-Nyomo hi belemiu. Han aijo' tionyo ahi' obau miu salatan sinaa makakinsapmo, susumo belemiu tempo'nyo nompala'imo mae tano' nu Mesir.

⁷Kola' na antoknyo aijo' ka' okaan i tampat anu pinile'anmo nu Tumpu Allah nu belemiu lantas pinsusule'mo i laigan nu belemiu dodop subu-subu.

⁸Daagi' anon sinaa na kopinnyo na belemiu tionyo ahi' mongkaan roti anu madi' ko raginyo. I sinaa ko ipitunnyo belemiu sihukmo da monsombahmo Tumpu Allah nu belemiu. Boli mombau apa-apaa i sinaa aijo'.”

⁹ “Obilang popitu' na duminggu mulai i sinaa momona belemiu nompadakmo bua'nyo nu gandum,

¹⁰lantas lame'akonmo na Lamean nu Monsawe' bau pongadati Tumpu Allah nu belemiu. Sinaa aijo' boamo na palasombahan kalana kasanangan nu kinyonyoa hi Ia, anu oboa o unggali ahi' da sabanding na konjoo'nyo tiba anu i humpak na gandum anu binee'-Nyomo hi belemiu.

¹¹I ahop nu Tumpu Allah nu belemiu i tampat anu pinile'an-Nyomo, belemiu tionyo ahi' bilahi hingga-hinggat tiba to ana-anak nu belemiu, to posa-posaihon nu belemiu ka' aha mian nu Lewi, mian anu lengkat mae i salipu'an, anak anu madi'mo ko tuuma ka' tinanyo, ka' to balu-balu anu jojoong i songko-songko na kota nu belemiu.

¹²Otuluti na palentah-Nyo iwi-iwi' ka' opajuli ahi', ka' boli okolilimi na belemiu naipuan mae binotuanan i Mesir.”

¹³ “Salatan iwi-iwi' na gandum nu belemiu opoko ututmo ka' iwi-iwi' na bua'nyo opoko tapimo nu belemiu, belemiu tionyo ahi' molame'akonmo Lamean Tahon o atopi nu Hon nu kau' pitun sinaa na kopinnyo.

¹⁴Balasana-sanang hingga-hinggat tiba to ana-anak nu belemiu, to posa-posaihon miu, aha mian nu Lewi, mian anu lengkat mae i salipu'an, anak anu madi'mo ko tuuma ka' tinanyo ka' to balu-balu anu jojoong i songko-songko na kota nu belemiu iwi-iwi'.

¹⁵Pitun sinaa na kopinnyo belemiu tionyo ahi' molame'akon lamean aijo' bau pongadati Tumpu Allah nu belemiu i tampat anu pinile'anmo nu Tumpu. Bau bila-bilahi kalana Tumpu Allah nu belemiu nombalakatimo hasin nu tano' tiba kalaja nu belemiu.

¹⁶Iwi-iwi' na to momo'ane nu aha Israel tionyo ahi' toka mae monsombah Tumpu Allah nu belemiu i tampat anu pinile'an-Nyomo sataun pintolun aijo'mo i Sinaa Lamean nu Paskah, i Lamean Monsawe' gandum, tiba Lamean Tahop o atopi nu Hon nu kau'. Batu-batu mian tionyo ahi' momboa palasombahan.

¹⁷Iyamo ahi' kamampuannyo sabanding tiba apaa na anu i humpaknyomo anu binee'mo nu Tumpu Allah nu belemiu hi ia.”

¹⁸“I toto sa'angu' na kota anu binee'mo nu Tumpu Allah nu belemiu hi belemiu, tionyo ahi' mohangkat to mia-mian kopian ka' to pangka-pangkat sangga'at da adin na momputusi palakala nu layat.

¹⁹ De mongalamo sa'angu' na kaputusan, aha madi' timbali suka-suka na momputusi, kabai mompiboati sangga'at. Aha madi' timbali suele mongala pontamboi palakala, kalana pontamboi aijo' monsaduakonmo mian paha na matanyo, sahingga mian pande ka' mian anu hodi' na kinyonyoanyo suele sumo aijo'mo, mombau kaputusan anu madi' adin.

²⁰Belemiu tionyo ahi' saja' adin, da timbali tumuu' tataap ka' mohumpak ka'ima'an i tano' anu binee'mo nu Tumpu Allah nu belemiu hi belemiu.

²¹ De belemiu mombau mezbah nu Tumpu Allah nu belemiu, boli mompokonai patong kau' bau bapilogotan salaku bau pontandai Asyera i sambiha'nyo,

²² ka' boli mompotinjo ohi', bau ponsomban pilogot, kalana Tumpu Allah nu belemiu mongka'ideki palabuatan aijo'.