Read Saluan PO'ULE' INGULIT 17 Bible Online

PO'ULE' INGULIT 17 - Saluan bible

PO'ULE' INGULIT 17

¹Boli monsombahkon sapi' kabai domba anu ko ponyakitnyo hi Tumpu Allah nu belemiu, kalana Nu ka'ideki.

²De belemiu mohongo daagi' ko sala'sa'angu' na kota nu belemiu daagi' ko mian binaladosa'mo hi Tumpu Allah nu belemiu kalana nolanggaimo palajanjian

³ tiba palentah-Nyo kalana nonsombahmo ka' pinalesayamo hi to pilo-pilogot sangga'at kabai hi batu nu sinaa, bitu'on kabai to manda-mandala',

⁴saba' tionyo ahi' opalesa miu ima-ima'. De totu-totu'u anu ma'idek aijo' binaumo nu mian Israel,

⁵mian anu sinala'mo aijo' tionyo ahi' oboamo i sambiha' nu kota ka' opahambunu'akon nu batu sampe mate.

⁶ Panyo ola ia obee'i hukuman mate de daagi' ko sakisi ua'aha kabai molabi; batu-batu mian madi' timbali o hukum mate de ola katalangan nu samian na sakisi.

⁷ To saki-sakisi na tionyo ahi' mompahambunu'akon nu batu momona hi mian aijo' lapas aijo' hingga-hinggatje tiba mian da'isan. Sumo aijo' na belemiu montewa' da bolimo saja' mobau anu ma'idek aijo'.

⁸De daagi' ko palakala anu madi' opoko putusi nu to mia-mian kopian i sa'angu' na lipu' kalana talalo mahan, umpamanyo palakala nompateimo anu tinotonggolakon kabai madi' tinotonggolakon, pahantuda'an mongkona halata' kabai mompaha bela-belaimo butong nu samian, belemiu tionyo ahi' mambamo i tampat anu pinile'anmo nu Tumpu Allah nu belemiu.

⁹Lako'mo kalak na palakala nu belemiu aijo' hi to ima-imam Lewi ka' hi mian kopian anu montoongi kalaja, lantas bee' da ahaje na momputusi ia.

¹⁰Ahaje na mombee'i kaputusan ka' belemiu tionyo ahi' montuluti ima-ima' apaa na anu nupoto'i nu aha hi belemiu.

¹¹Otalima na kaputusan nu aha ka' obau apaa na anu pinoto'imo nu aha, maumo han anu ola toto ise-ise'.

¹²Mau mule' ihe na baani' monggagakon mian kopian kabai imam anu montoongi kalaja, tionyo ahi' o hukum mate; sumo aijo' na belemiu montewa' da bolimo saja' mombau anu ma'idek aijo' hi aha Israel.

¹³Iwi-iwi' na mian mohongomo apaa na anu jinadimo aijo' ka' mabuhukmo, sahingga madi'mo daagi' ko anu baani mombau sumo aijo'.”

¹⁴ “De tano' anu nubee' nu Tumpu Allah nu belemiu hi belemiu timbalimo anu nu belemiu ka' belemiu jojoongmo ikiijo' mae, ka' ihe na monsumbu' belemiu mongka'ima'imo da daagi' ko tomundo samian susumo hi to bansa-bansa anu itina' montikubi belemiu.

¹⁵Otoa ahi' ima-ima' da mian anu o hangkat nu belemiu timbali tomundo nu belemiu mian ahi' nu pinile'anmo nu Tumpu Allah nu belemiu. Ia tionyo ahi' mian anu posi bansa miu; boli mohangkat mian anu lengkat mae i salipu'an na timbali tomundo nu belemiu.

¹⁶ Tomundo madi' timbali ko ajahan manjoo' anu nusake'i nu suludadunyo ka' madi' timbali mompalentah bansa aiya minsusule' i Mesir mamba mongoli ajahan kalana Tumpu notataemo tukoo-Nyo mian anu pinalesayamo hi Ia madi'mo timbali minsusule' i lipu' aijo'.

¹⁷ Tomundo madi' timbali manjoo' na bengkele'nyo, da ia madi' mohiku Tumpu. Ia suele madi' timbali bala'usaha da kaya na posi butongnyo nu salaka tiba mosoni'.

¹⁸De samian o hangkatmo timbali tomundo, ia tionyo ahi' obee'imo sa'angu' na kitab nu to atu-atulan nu Tumpu Allah anu sinalin lengkat i kitab anu momonanyo hondo anu pino'una' nu to ima-imam Lewi.

¹⁹Kitab aijo' tionyo ahi' saja' ohani hi ia, ka' tionyo ahi' saja' nu basa' da balagulu' mongadati Tumpu Allahnyo ka' saja' montuluti iwi-iwi' na palentah anu tinulis i unonyo.

²⁰De ia saja' mombasa' saba ia madi' monsangka butongnyo na lebe ma'ima' molingkudui to mia-mian sangko bansanyo, ka' madi' molanggai palentah nu Tumpu mau mule' pa' mosiamo. Lantas ia ka' lee'nyo mompalentahmo bansanyo opotulu-tulunakon.”