Read Saluan PO'ULE' INGULIT 2 Bible Online

PO'ULE' INGULIT 2 - Saluan bible

PO'ULE' INGULIT 2

¹ Ahennyo kita po'ule'mo ninsusule' i padang bola nontulu jalan anu mokiijo' i Luoknyo nu Akaba, susumo anu pinalentahkonmo nu Tumpu. Pinin na kita lewa' nonsongkohi da'erah nu bungkutnyo nu Edom.

²Lantas Tumpu notataemo hi belengku tukoo-Nyo

³sukupmo na kopinnyo kita lewa' nonsongkohi da'erah aijo'. Jadi kita tionyo ahi' mambamo mokiita' i sasu utara.

⁴ Lapas aijo' pinokaumo nu Tumpu na aku mompokinde'i belemiu sumo uuka, ‘Madi'mo daagi' pin belemiu minsoopmo i lipu' nu Edom, da'erah nu to utu-utus miu lee' mae i Esau. Aha mongkabuhuk belemiu,

⁵panyo belemiu madi' timbali montumbuhi aha, kalana tano' nu aha mau pe'e ola sangkiding madi' Ku bee' hi belemiu, kalana da'erah nu Edom binee'Kumo hi lee' i Esau.

⁶Belemiu tiba mongoli anu okaan tiba anu o inum hi aha.’

⁷O'inau' mosia na Tumpu Allah nu belemiu nombalakatimo belemiu i han iwi-iwi' anu binaumo nu belemiu. Ia nompotuu'mo belemiu tempo'nyo belemiu lewa' nonsongkohi padang bola anu ewa aiya. Ia nonjagai belemiu pinatompulu' na taun ka' nombee'imo belemiu iwi-iwi' na anu opalalui.

⁸Lapas aijo' kita po'ule'mo i lumajang, nompala'imo jalan anu motulu i kota Elat ka' Ezion-Geber mokiijo'mo i Ambai Mate, lantas nonsiopo'akonmo nokiijo' i ambai sasu kabete'an nokiijo'mo i Padang bola Moab.

⁹ Tumpu notataemo hi belengku, ‘Mian nu aha Moab, lee' mae i Lot, madi' timbali opoposia nu belemiu. Ka' mule' boli montumbuhi aha. Lipu' Ar binee'-Kumo hi aha ka' tano' nu aha mau pe'e ola sangkiding madi Ku bee' hi belemiu.’ ” (

¹⁰Naipuan mae Ar nujojoongi nu aha mian Emim. Butong nu aha to daka-daka', pokakana mian nu aha Enak, suele bansa anu to daka-daka'.

¹¹Susumo mian nu aha Enak aha suele osanggohi mian nu Refaim, panyo mian nu aha Moab monsanggohi aha mian nu Emim.

¹²Naipuan mae mian nu aha Hori jojoong i Edom, panyo i laa'mo ka' pinateanmo nu lee' i Esau, anu lapas aijo' nonjojoongi tano' nu aha; sumo aitumo suele na bansa Israel i mihinyo mae nolaa'mo sampobali'nyo i tano' anu binee'mo nu Tumpu hi aha.)

¹³“Lapas aijo' kita notaapmo i Kaunyo nu Zered susumo anu pinalentahkonmo nu Tumpu hi kita.

¹⁴ Aijo' jinadi kinopinnyo tinolumpulu' ka' ualu' na taun salatan kita nompala'imo mae Kades-Barnea. Iwi-iwi' na Suludadu anu i hangkat tempo'nyo aitu sinilakamo susumo anu tinaloakonmo nu Tumpu.

¹⁵Tumpu saja'mo nongewa aha sampe ahennyo aha iwi-iwi' sinilakamo.

¹⁶Salatan aha iwi-iwi' sinilakamo,

¹⁷Tumpu notataemo hi kita.

¹⁸‘Sinaa aiya belemiu motulumo i da'erah Moab molowo' i lipu' nu aha Ar.

¹⁹ Jadi belemiu tokamo kiijo' koko tano' nu aha mian Amon, lee' mae i Lot. Boli mompoposia kabai montumbuhi aha, kalana tano' anu binee'-Kumo hi aha mau pe'e ola sangkiding madi' Ku bee' hi belemiu.’ ” (

²⁰Da'erah aijo' suele talasanggo salaku lipu' nu aha Refaim, sanggo nu bansa anu naipuan mae toho' jinojoong ikiijo', aha mian nu Amon monsanggohi aha koonyo mian nu Zamzumim.

²¹Susumo mian nu aha Enak, aha suele to daka-daka' na butongnyo. Aha suele mahoson hondo, ka' manjoo' panyo Tumpu nompateimo aha, sahingga mian nu aha Amon nongalamo tano' aijo' lantas jinojoongmo ikiijo'.

²²Sumo aitumo suele na Tumpu nombau mian nu Aha Edom, lee' mae i Esau, anu jojoong i da'erah bungkutnyo nu Edom. Tumpu nompateimo mian nu aha Hori sahingga mian nu Edom nongalamo tano' aijo' ka' nonjojoongimo, lantas tinataapmo ikiijo' sampe tempo' uuka aiya.

²³Tano' anu montuus biwi nu Ambai anu Totonga'nyo jinojoonganmo nu aha mian anu nolengkat mae i togong Kreta. Aha nompateimo mian nu Awi tumpu nu tano' aijo', lantas nonjojoongi da'erah aijo' toka-toka mokiijo' i sasu selatan na kojo'onnyo sampe tinoka i kota Gaza.)

²⁴“Salatan kita noliu-liumo da'erah nu aha Moab, Tumpu notataemo hi kita, ‘Lako'mo uuka aiya potaapmo i Kaunyo nu Arnon. Ku bee'mo hi belemiu na i Sihon, tomundo nu Amori anu mompalentah kiijo' i Hesybon, hingga-hinggat tiba lipu'nyo. Tumbuhimo na ia lantas jojoongimo na tano'nyo.

²⁵Otampu'uni i sinaa aiya Ku potimbalimo na to bansa-bansa da mongkabuhukmo belemiu, maumo pa' iya mae. Toto samian nulakatmo kalana mabuhukmo de mohongomo belemiu.’ ”

²⁶“Lapas aijo' aku nonsaimo tinopia-piangkuka na mian anu lengkat mae i padang bola Kedemot namba hi Tomundo Sihon anu lengkat mae i Hesybon da mompotoka poitaon kahanda' da mompaha ima'mo, sumo uuka.

²⁷‘Pobee' mae na kami motulu i lipu' nu kita Tuanku. Kami lumajang lau-laus i jalan daka' ka' madi' mosele.

²⁸Anu okaan de ola kami o bayan mami ka' uee de o inum mami o bayan mami. Kami ola palalu motulu i lipu' aiya,

²⁹sampe kami motaapmo i Kaunyo nu Yordan da minsoopmo i lipu' anu binee'mo nu Tumpu Allah mami hi kami. Lee' i Esau anu jojoong i Edom ka' mian nu aha Moab anu jojoong i Ar nompobee'mo suele kami motulu i da'erah nu aha.’

³⁰Panyo i Tomundo Sihon madi' nompobee' kita motulu i lipu' nu aha aijo'. Tumpu Allah nu belemiu nompotimbalimo ia da panggaga ka' mompagala da kita timbali mompatundu' ia. Da'erahnyo daagi' o jojoonginto sampe uuka aiya.

³¹Lapas aijo' Tumpu notataemo hi belengku, ‘i Tomundo Syhon ka' lipu'nyo Ku bee'mo hi belemiu; alamo ka' jojoongimo na lipu' aijo'.’

³²Sahingga tinokamo na i Sihon tiba iwi-iwi' na suludadunyo, da mompahampateakonmo kita koko kota Yahas.

³³Panyo Tumpu Allah-nto nombee'mo ia hi kita lantas kita nompatundu'mo ia tiba to ana-anaknyo tiba iwi-iwi' na Suludadunyo.

³⁴Tempo'nyo aitu mule' kita nongalamo ka' nongideimo toto sa'angu' na kota, ka' nompateimo iwi-iwi' na miannyo, to momo'ane tiba to bou-boune tiba to ana-anak. Madi' ko anu pinobee' tumuu'!

³⁵Potuu'on nu aha ingalantomo ka' to kota-kota'nyo ingagoantomo.

³⁶Tumpu Allah-nto nontulungimo kita sahingga kita noko alamo kota aijo' iwi-iwi', lengkat pe'e i Aroër i puusnyo nu Bangka'nyo Arnon tiba kota i totonga' nu bangka'nyo aijo' toka-toka i da'erah Gilead. Madi' ko sa'angu' na kota anu ko pagannyo mesen anu noko ala nongompo' kita.

³⁷Panyo kita madi' mongohani da'erah nu aha mian Amon kabai sohipi'nyo nu Kaunyo Yabok kabai kota-kota anu i da'erah nu bungkutnyo kabai tampat sangga'at mau pa' iya mae nupoliwa' nu Tumpu Allah-nto.”