Read Saluan PO'ULE' INGULIT 21 Bible Online

PO'ULE' INGULIT 21 - Saluan bible

PO'ULE' INGULIT 21

¹“De ikiijo' i lipu' anu binee'mo nu Tumpu Allah nu belemiu hi belemiu daagi' ko anu i humpak sinilaka pinatean kiijo' mae i ale' ka' madi' sinumbu' pa' ihe na nompatei ia,

²saba' polaya' ka' mian kopian nu belemiu tionyo ahi' mamba mongukun kojo'onnyo lengkat i tampat nu anu sinilaka aijo' i humpak mokiijo' i toto sa'angu' nakota anu ohani.

³Lantas to pola-polaya' nu kota anu ohani hondo tionyo ahi' mompile'i sa'angu' na sapi' anu daagi' bata'nyo anu ma'isa toho' pinake nokalaja.

⁴Sapi' aijo' tionyo ahi' oboa nu aha i sa'angu' na tampat anu koko kaunyo anu madi' toho' mo'oti ka' tano'nyo ma'isa toho' pinajeko ka' sinu'anan. Ikiijo' aha tionyo ahi' mompato'akon gogohong nu binatang aijo'.

⁵To ima-imam Lewi suele ahi' mamba mokiijo', kalana aha tionyo ahi' mombee'i kaputusan toto sa'angu' na palakala. Aha pinile'anmo nu Tumpu Allah nu belemiu da montuluti apaa na anu pinalentahkon-Nyomo ka' mompotokakon balakat lengkat mae hi Tumpu.

⁶Lantas iwi-iwi' na polaya' anu lengkat mae i kota anu ohani hondo tionyo ahi' mombaso'i lima nu aha aita' i sapi' aijo',

⁷ka' montaloakon, ‘Misa' kami na nompatei mian aijo', ka' kami madi' monsumbu' pa' ihe na nompatei ia.

⁸Tumpu, ampuniakon mae na Israel mian anu pinalesayamo hi belento anu pinobebasmo nu belento lengkat mae i Mesir. Ampuniakon mae na kami ka' boli kami na montanggungi kasala'an nu anu nompateimo mian anu madi' ko sala'nyo aijo'.’

⁹Jadi kalana nombaumo apaa na anu pinoitamo nu Tumpu, belemiu madi'mo montanggungi kasala'an nu mian anu nompateimo aijo'.”

¹⁰“De belemiu mahampate ka' Tumpu Allah nu belemiu mombee'imo belemiu ka'untungan nahampate, lantas belemiu nongalamo anu i hakop nahampate,

¹¹ihe na monsumbu' boune haha aijo' daagi' ko anu handa ka' oka'ima'imo nu belemiu da o osoaimo.

¹²Boamo na boune aijo' i laigan nu belemiu. Ikiijo' ia tionyo ahi' monggunting ubaknyo, montaibi konukunyo,

¹³ka' mombolosi baju'nyo. Ia tionyo ahi' jojoong i laigan nu belemiu ka' lewa' mohangi tu'anyonyo anu sinilakamo kopinnyo sambitu'on. Lapas aijo' timbalimo nu nika'i na ia.

¹⁴De saidi' mae beleyum madi'mo mongka'ima'i ia, beleyum timbali monsai ia mamba yayamo pa' moya na kalambanannyo. Ia madi' timbali nu bau susumo posaihon kabai nu pobalukmo kalana pinakisamo nu beleyum na ia noduhus tiba beleyum.”

¹⁵“Bisuannyo samian na ko bengkele'nyo ua'aha ka' ua-ua'aha mohumpak anak mo'ane, panyo anak anu i hampeakon momona misa' anak i bengkele' anu nu kanonongi hondo.

¹⁶De mian aijo' kahanda'mo montantukan mosia na ia mombagi kakaya'annyo hi to ana-anaknyo, ia madi' timbali monggihanakon anak nu bengkele'nyo anu nu kanonongi hondo aijo' ka' mombee'mo bagi hi anaknyo aijo' bagi nu anu tinimbalimo hak nu anak tumpe.

¹⁷Ia tionyo ahi' mombee'i bagi pinduan lipat na halata'nyo hi anak mo'ane anu tumpe, mau mule' anak aijo' misa' anak nu bengkele'nyo anu nu kanonongi hondo. Hak nu anak anu tumpenyo tionyo ahi' nu akui nu tuumanyo ka' hi anak aijo' tionyo ahi' obee'i halata' anu timbalimo haknyo susumo katantuan nu atulan.”

¹⁸“Bisuannyo ko anak mo'ane anu panggaga saja' moto'idek, ka' madi' mombatuki pongka'oho' nu tu'anyonyo maumo binee'anmo hukuman na ia.

¹⁹Saba' tu'anyonyo tionyo ahi' momboa ia hi to pola-polaya' nu kota anu kajojoongan nu aha ka' opoita da anak aijo' obee'i hukuman.

²⁰Aha tionyo ahi' mompoto'i hi to pola-polaya' nu kota aijo', ‘Anak mami panggaga hondo saja' moto'idek ka' madi' mongka' oho' mohongo-hongo kami; ia mongoli apa-apaa anu madi' kogunanyo ka' saja' malangu.’

²¹Lantas to momo'ane nu kota aijo' tionyo ahi' mompahambunu'akon anak aijo' nu batu sampe mate. Sumo aijo' na belemiu mombau da bolimo ko anu ma'idek sumo aijo'. Iwi-iwi' na aha mian nu Israel aijo' mohongo apaa na anu binaumo aijo' sahingga mabuhukmo.”

²²“De daagi' ko samian anu binee'anmo hukuman mate kalana nombaumo anu ma'idek ka' butongnyo anu sinilakamo aijo' pinokalayo'mo i kau' anu pinototon,

²³ anu sinilakamo aijo' madi' timbali opojohok ikiijo' sampahu, panyo tionyo ahi' o lamunmo i sinaa aijo'. Anu sinilakamo aijo' kala-kalayo' i kau' anu pinototon, timbali monsaduakon lipu' nukutuki nu Tumpu Allah. Jadi lamunmo ahi' na anu sinilakamo aijo' da boli mohumimi'i lipu' anu binee'mo nu Tumpu Allah nu belemiu hi belemiu.