Read Saluan PO'ULE' INGULIT 24 Bible Online

PO'ULE' INGULIT 24 - Saluan bible

PO'ULE' INGULIT 24

¹ “Bisuannyo samian na mo'ane mo'osoamo tiba samian na langkoyang, ka' lapas aijo' saidi' mae madi'mo nu ka'ima'i kalana i humpaknyomo na apa-apaa anu moko ambang ia. Lantas mo'ane aijo' nombee'mo sulat poga'atan hi ia ka' nolaa'mo ia da bolimo jojoong i laigannyo.

²Lapas aijo' boune aijo' no'osoamo mule' tiba samian na mo'ane sangga'at.

³Panyo madi' pinin mo'ane aijo' madi'mo nongka'ima'i ia, lantas nombee'imo sulat poga'atan hi ia ka' nolaa'mo ia. Kabai ugaat langkai'nyo anu ko ohua'nyo aijo' nompala'imo.

⁴Han anu kopinduannyomo aijo' langkai'nyo anu momona madi'mo timbali po'ule' mongosoai boune aijo'; tionyo ahi' nu toa na boune aijo' salaku boune anu nahumimi'mo. De ia pu'ule' mongosoai, saba' kalakuannyo aijo' sumomo anu mongambangi Tumpu Allah nu belemiu. Belemiu madi' timbali mombau dosa' anu sumo aijo' na ko ideknyo i lipu' anu binee'mo nu Tumpu Allah hi belemiu.”

⁵“Samian na mo'ane anu sala'je no'osoa madi' timbali osai minsoop suludadu ka' mamba mahampate kabai mombau kalaja bau kapentingan nu mian da'isan sangga'at. Ia tionyo ahi' opobebas i kalaja sataun na kopinnyo da mongulus auwannyo ka' momposanang kinyonyoa nu bengkele'nyo.

⁶De belemiu momposabon apa-apaa hi mian sangga'at boli mongala batu anu opake ponggiling gandumnyo salaku bau ponggadei. De mongalamo batu aijo, belemiu mongagoimo pakakas anu opake nu auwannyo bau kantumuu'an nu aha.

⁷ Mian anu mohakop bubuu' bansanyo ka' opalaihakonmo ka' opotimbalimo na ia susumo posaihon kabai mompobalukmo ia, tionyo ahi' o hukum mate. Tiba jalan anu sumo aijo' belemiu ko usahamo da bolimo ko anu ma'idek susumo aijo'.

⁸ De daagi' ko panyakit kilit anu monsilakai, bau ima-ima' apaa na anu pinalentahkonmo nu to ima-imam Lewi hi belemiu; obatuki na pokinde' iwi-iwi' anu binee'kumo hi aha.

⁹ O inau' apaa na anu binaumo nu Tumpu Allah hi Miryam tempo'nyo belemiu i lumajangmo nosabat lengkat mae i Mesir.

¹⁰ De belemiu momposabon apa-apaa hi bubuu' belemiu boli minsoop i laigannyo kahanda' mongala baju'nyo da bau ponggadeinyo mae.

¹¹Tanda'i i sambiha'nyo ka' pobakas da posi iaje na momboa hi beleyum.

¹²De mian aijo' kasiasi, baju'nyo aijo' madi' timbali nu po'una' sampahu,

¹³panyo tionyo ahi' osule'akonmo hi ia, de malomo, da Tumpu Allah nu belemiu sanang hi belemiu.

¹⁴ Boli ola mongakali mian anu kasiasi ka' madi' ko apa-apaa anu mongala tambo, maumo bubuu' bansa nu belemiu, kabai mian anu lengkat mae i salipu'an anu jojoong i sala'sa'angu' na kota nu belemiu.

¹⁵Sansina-sinaa ma'isa pe'e batu nu sinaa makakinsap tionyo ahi' o bayanmo miu na tambonyo nu anu kinalaja'nyomo sinaa aitu; ia montaha'imanimo doi aijo' kalana palalumo hondo na ia. De belemiu madi' mombayan tambonyo, ia momoitamo tulung hi Tumpu da Nu toa mae na belemiu sahingga belemiu Nu poto'i baladosa'mo.

¹⁶ Boli mombee'i hukuman mate tu'anyo nu belemiu kalana palabuatan ma'idek anu binaumo nu anaknyo, ka' boli mohukum mate anak nu belemiu kalana palabuatan ma'idek anu nubau nu tu'anyonyo. Batu-batu mian ola timbali o hukum mate kalana palabuatan ma'idek anu pinosi baunyomo.

¹⁷ Boli mongagoi hak nu mian anu lengkat mae i salipu'an ka' anak anu madi'mo ko tuuma ka' tinanyo, ka' boli mongala baju' nu mian anu binalumo bau ponggadei.

¹⁸O inau' saba' belemiu toho'mo suele binotuanan i Mesir ka' pinobebasmo nu Tumpu Allah nu belemiu; mokonyo aijo' binee'ankumo na belemiu atulan aiya.

¹⁹ De belemiu mongalamo hasinnyo nu ale' miu, boli mompinsusule'i mongala gandum anu kinolilimanmo. Pojohokmo ahi' na timpannyo nu gandum aijo' baumo bagi nu mian anu lengkat mae i salipu'an, anak madi'mo ko tuumanyo tinanyo, ka' to balu-balu, da belemiu nubalakati nu Tumpu Allah nu belemiu i han iwi-iwi' anu obau nu belemiu.

²⁰De komiu ninsanmo na mongala bua'nyo nu zaitun ka' bua' nu anggur miu, bolimo po'ule' mompinsusule'i mongala bu'anyo haha aijo' anu daagi' tinontuha'. Aijo' opojohokmo ahi' nu belemiu da baumo bagi' nu mian anu lengkat mae i salipu'an, anak anu madi'mo ko tuumanyo ka' tinanyo, ka' to balu-balu.

²²O inau' saba' belemiu toho'mo binotuanan i Mesir mokonyo aijo' binee'ankumo na belemiu atulan aiya.