Read Saluan PO'ULE' INGULIT 27 Bible Online

PO'ULE' INGULIT 27 - Saluan bible

PO'ULE' INGULIT 27

¹Lapas aijo' tiba to pola-polaya' nu aha Israel, i Musa nompoto'imo potuunon aiya hi bansa aijo', “Otuluti na palentah iwi-iwi' anu binee'kumo sinaa aiya hi belemiu.

² I sinaa belemiu motaapmo i Kaunyo nu Yordan minsoopmo mokiijo' i lipu' anu binee'mo nu Tumpu Allah nu belemiu hi belemiu, belemiu tionyo ahi' mompotinjo to pia-piangkuka na batu anu daka' lantas o setmo nu tiilon.

³O tulis i batu haha aijo' apaa na anu pinoto'imo nu atulan haha aiya. De belemiu kiijo'mo i unonyo nu lipu' anu kaya ka' anu ma'omuk anu jinanji'mo nu Tumpu, Tumpu Allah nu mompolee' miu hi belemiu,

⁴ka' belemiu kiijo'mo i santoa nu Kaunyo nu Yordan, belemiu tionyo ahi' mokiita' i Bungkutnyo nu Ebal. Ikiijo' belemiu tionyo ahi' mompotinjo ka' monset nu tiilon batu haha aijo' susumo anu pinalentahkonkumo hi belemiu sinaa aiya.

⁵ I tampat aijo' tionyo ahi' suele belemiu mompotinjo sa'angu' na mezbah bau ponsomban Tumpu Allah nu belemiu, batu anu o ala anu ma'isa toho' tinetegan nu pakakas besak,

⁶kalana mezbah anu opotinjo bau ponsomban Tumpu Allah nu belemiu tionyo batu anu daagi' ti'a-ti'angu' na obau. Aita' i batu aijo' tionyo ahi' ponsombahkonan nu belemiu koloban anu opotunu.

⁷Osombahkon suele na koloban bau pompodame belemiu ka' kaanmo ikiijo' ka' balame-lame'mo i ahop nu Tumpu Allah nu belemiu.

⁸Aita' i batu anu sinetmo nu tiilon aijo' tionyo ahi' o tulis miu nasa-nasa na onyi'nyo nu to atu-atulan nu Tumpu Allah.”

⁹Lapas aijo' tiba to ima-imam aha mian Lewi, i Musa notataemo hi iwi-iwi' bansa Israel, “To utu-utus, o'intoomakon ka' opotombihing mae! Sinaa aiya belemiu tinimbalimo mian anu pinalesayamo hi Tumpu Allah nu belemiu.

¹⁰Kalana aijo' otuluti na Tumpu Allah nu belemiu ka' bau iwi-iwi' na palentah-Nyo anu binee'kumo hi belemiu sinaa aiya.”

¹¹Lantas i Musa notataemo hi bansa Israel,

¹² “De belemiu moko potaapmo i Kaunyo nu Yordan, tulunan nu bansa Simeon, Lewi, Yehuda, Isakhar, Yusuf ka' Benyamin tionyo ahi' tuminjo aita' i Bungkutnyo nu Gerizim de otaloakonmo na balakat hi bansa aiya.

¹³De otaloakonmo na kutuk, tulunan nu bansa Ruben, Gad, Asyer, Zebulon, Dan tiba Naftali tionyo ahi' tuminjo aita' i Bungkutnyo nu Ebal.

¹⁴Aha mian nu Lewi tionyo ahi' montaloakon hoso-hoson potatae sumo uuka, ka' mian nu aha Israel tionyo ahi' montaami; ‘Amin.’

¹⁵ Aha mian nu Lewi montaloakon: ‘Kutukiakon na mian anu mombau batu opotimbali patong, kau', kabai logam, ka' mule' oposuluk na monsombah ia; Nuka'ideki nu Tumpu na monsombah pilogot!’ Iwi-iwi' na mian da'isan montaami: ‘Amin!’

¹⁶ ‘Kinutukan na mian anu madi' mongadati tu'anyo nu aha ka' mompojohokmo aha madi'mo opalakai.’ ‘Amin!’

¹⁷ ‘Kinutukan na mian anu mondensu'akon tempas nu tano' nu sangalunyo anu mompaha tempas.’ ‘Amin!’

¹⁸ ‘Kinutukan na mian anu mompotalas mian anu mapisok.’ ‘Amin!’

¹⁹ ‘Kinutukan na mian anu mongagoi halata' nu mian anu lengkat mae i salipu'an, anak anu madi'mo ko tuuma ka' tinanyo ka' anu balu.’ ‘Amin!’

²⁰ ‘Kinutukan na mian anu mongambangimo tuumanyo kalana moduhusmo tiba sala'samian na bengkele' nu tuumanyo.’ ‘Amin!’

²¹ ‘Kinutukan na mian anu masala'mo tiba binatang.’ ‘Amin!’

²² ‘Kinutukan na mian anu masala'mo tiba utusnyo boune anu sa'a-sa'angu'mo na tina nu aha, kabai utusnyo anu sa'a-sa'angu'mo na na tuuma, kabai tina nu aha.’ ‘Amin!’

²³ ‘Kinutukan na mian anu masala' tiba moniannyo boune.’ ‘Amin!’

²⁴‘Kinutukan na mian anu mompatei mau mule' madi' nusumbu' nu mian.’ ‘Amin!’

²⁵‘Kinutukan na mian anu mongala tambo mompatei mian anu madi' ko sala'nyo.’ ‘Amin!’

²⁶ ‘Kinutukan na mian anu madi' montuluti sahondo-hondonyo atulan ka' pangajalan nu Tumpu Allah i uno nu palabuatan.’ ‘Amin!’ ”