Read Saluan PO'ULE' INGULIT 31 Bible Online

PO'ULE' INGULIT 31 - Saluan bible

PO'ULE' INGULIT 31

¹I Musa po'ule' mule' notatae hi Bansa Israel,

² ia notatae, “Uuka aiya umunku sa'atumo ka' uampulu' na taun ka' aku madi'mo moko ala timbali polaya' nu belemiu. Ka' mule' Tumpu notataemo hi belengku tukoonyo Aku madi' timbali motaap mokiijo' i santoa nu Kaunyo nu Yordan.

³Posi Tumpu Allah-mo nu belemiu na lumajang mamba i momona ka' mompatei to bansa-bansa anu jojoong ikiijo' mae, sahingga belemiu timbalimo jojoong i tano' nu aha. I Yosuamo na timbali bau polaya' nu belemiu susumo anu tinaloakonmo nu Tumpu.

⁴ Tumpumo na mompatei bansa haha aijo' susumo Ia nompatundu'mo Sihon ka' Og tomundo nu aha mian Amori ka' mule' nongideimo lipu' nu aha.

⁵Tumpu na mombee'i belemiu ka'untungan de mahampatemo tiba aha, lantas tionyo ahi' obau miu na aha susumo anu pinoto'ingkumo hi belemiu.

⁶Tionyo ahi' kinyonyoa nu belemiu opohoson ka' tionyo ahi' baani. Boli okabuhuk na aha kalana nutulungije nu Tumpu Allah nu belemiu na belemiu. Ia madi' ola mompojohok belemiu sahingga belemiu mompele-pele'mo, kabai mompala'i belemiu.”

⁷Lantas i Musa nolagamo i Yosua, ka' i ahop nu bansa Israel iwi-iwi' ia notataemo hi Yosua, “Tionyo ahi' opohoson na kinyonyoa nu beleyum ka' tionyo ahi' baani, Yosua! Beleyummo na molaya' bansa aiya da jojoongmo i lipu' anu jinanji'mo nu Tumpu hi mompolee' nu aha.

⁸ Tumpu na momboa ka' montulungi beleyum. Ia madi' ola mompojohok belemiu sahingga belemiu mompele-pele'mo kabai mompala'i beleyum. Kalana aijo' boli mabuhuk kabai bata-bata.”

⁹Lantas i Musa nontulismo atulan nu Tumpu Allah ka' binee'nyomo hi to ima-imam nu aha Lewi anu binee'anmo kalaja da mongka'lesang Peti' Palajanjian, ka' hi to pola-polaya' nu aha Israel.

¹⁰ Ia nombee'imo palentah hi aha, “De kamingkotannyomo nu taun anu ko popitu'nyomo, i taun samaya' madi'mo po'ule' opoita kakonamo i lamean anu aha Montahopmo ka' o atopimo nu Hon nu Kau',

¹¹belemiu tionyo ahi' mombasa'akonmo daka-daka' atulan haha aijo' hi to mia-mian nu aha Israel anu toka mae monsombah Tumpu Allah nu belemiu i tampat anu pinile'an-Nyomo.

¹²Pokau na to momo'ane iwi-iwi', to bou-boune, ka' to ana-anak tiba mian anu lengkat mae i salipu'an anu jojoong i kota miu iwi-iwi' da sihuk mohongo anu obasa'akon aijo', da aha balagulu' lewa' mongadati Tumpu Allah nu belemiu ka' saja' montuluti palentah-Nyo.

¹³Tiba jalan anu sumo aijo' to ana-anak miu anu ma'isa toho' nohongo atulan nu Tumpu Allah nu belemiu, timbali mohongo ka' balagulu' mongadati Tumpu de daagi' aha tutuu' i lipu' anu madi'mo daagi' pin ojojoongimo nu belemiu aijo' mae i santoa nu Kaunyo nu Yordan.”

¹⁴Lapas aijo' Tumpu notataemo hi Musa, “Beleyum tumuu' madi'mo daagi' pin. Jadi lagamo mae na i Yosua ka' boa mae na ia i Kemah-Ku, da Ku bee'i pokinde' na ia.” Sahingga nambamo na i Musa ka' i Yosua nokiijo' i Kemah nu Tumpu,

¹⁵ka' Tumpu nanintoamo hi aha aijo' i totonga' nu kundom koko sabatan nu Kemah.

¹⁶Tumpu notataemo hi Musa, “Madi'mo pin beleyum silakamo. De beleyum silakamo, bansa Israel madi'mo daagi' mohongo-hongo Aku ka' mompojalomo apaa na anu jinanji'Kumo hi aha. Aha mompala'imo Aku da monsombahmo to pilo-pilogot anu nusombah nu lipu' anu madi'mo pin nupinsoopimo nu aha.

¹⁷De aijo' obaumo, Ku tambuha'imo hondo-hondo na aha. Aha Ku pala'imo ka' Ku pateimo. Manjoo' na balaa' anu okabuhuk, montokaimo aha, lantas aha sinsumbu'je, ka' motatae taalu' anu jinadimo aijo' kalana Aku, Tumpu Allah nu aha madi'mo daagi' monsangaja'i aha.

¹⁸Tempo'nyo aijo' Aku madi'mo mongka'oho' montulungi aha, kalana aha nonsombahmo to pilo-pilogot sangga'at ka' nombaumo anu ma'idek.

¹⁹Uuka aiya tulismo na nyanyian aiya ka' opotinganakon hi bansa Israel da bau pomponyata' hi aha.

²⁰Aha Ku boamo mamba i lipu' anu kaya ka' ma'omuk susumo anu jinanji'-Kumo hi mompolee' nu aha. Ikiijo' mae na aha tumuu'mo sanang ka' mohumpakmo ngangahan nu anu okaan apaa na anu nupalalui nu aha. Panyo lapas aijo' aha tolosule'mo ka' monsombahmo to pilo-pilogot sangga'at. Aha madi'mo mongala Aku ka' mompojalomo palajanjian-Ku,

²¹ka' manjoo'mo na balaa' anu okabuhuk montokaimo aha. Panyo nyanyian aiya saja' onyanyiakon ka' opake salaku bau pomponyata' hi aha. Ka' mule' uuka aiya ma'isa pe'e binoang-Ku namba i lipu' anu jinanji'-Kumo, pikilan nu aha sinumbu'-Kumo.”

²²I sinaamo aijo' na i Musa nontulismo nyanyian aijo', lantas nompotinganmo hi bansa Israel.

²³ Lapas aijo' Tumpu notataemo hi Yosua anak i Nun, Ia notatae, “Tionyo ahi' beleyum mompohoson kinyonyoa ka' baani, Yosua! Beleyummo na molaya' bansa Israel mompinsoopi lipu' anu jinanji'-Kumo hi aha ka' Ku tulungije na aha.”

²⁴Lantas tinulismo i Musa na atulan nu Tumpu Allah i sa'angu' na kitab. Tinulisnyo hondo ima-ima' da boli ko anu sala' lengkat pe'e i tampu'unannyo sampe tinoka i kapupuusannyomo.

²⁵Salatan pinoko tulisnyomo ia notataemo hi to ima-imam nu aha Lewi anu binee'anmo kalaja mongkalesang Peti' Palajanjian,

²⁶“Alamo na kitab nu Atulan nu Tumpu Allah aiya, ka' po'una' i sohipi'nyo nu Peti' Palajanjian nu Tumpu Allah nu belemiu, da saja' sabole-bole ikiijo' bau salaku pomponyata' hi bansa aijo',

²⁷Ku sumbu' na aha talalo hondo panggaga ka' saja' moto'idek. Tempo'nyo aku daagi' tutuu' aha noto'idekmo hi Tumpu; apaa mule' saidi' mae, de aku silakamo!

²⁸Uuka aiya pokaumo mae na polaya' nu aha bansa Israel iwi-iwi' ka' to kapa-kapala nu suludadu sihuk mae i ahopku da ku potokamo na hahan aiya hi aha. Langit ka' tano' na ku laga salaku monsakisi aha.

²⁹Ku sumbu' saba' de aku silakamo mian haha aijo' timbalimo ma'idek ka' madi'mo mongala apaa na anu pinotingankumo hi aha. Ka' aha saidi' mae nutokaimo nu balaa' kalana nonsaduakonmo da Tumpu notambuha' kalana nombaumo apaa na anu tinewa'-Nyomo.”

³⁰Lapas aijo' i Musa nombasa'mo nyanyian aijo' sampe iningkot, hau-haunyo aijo' aha Israel iwi-iwi' mompotombihing.