Read Saluan PO'ULE' INGULIT 33 Bible Online

PO'ULE' INGULIT 33 - Saluan bible

PO'ULE' INGULIT 33

¹Ma'isa pe'e sinilaka na i Musa, anu sinai mae nu Tumpu Allah, ia nombalakatimo bansa Israel, ia notatae sumo uuka:

²“Tumpu tinoka lengkat mae i Bungkut nu Sinai; Ia binete' mae aita' i Edom susumo batu nu sinaa ka' lengkat mae i Bungkutnyo nu Paran Ia nonjingkaimo mian anu pinalesayamo hi Ia. Ia sinangaluan mae nu malaekat aha sampulu' na madala; ka' apu moak i sasu koanan-Nyo.

³Totu-totu'u, Tumpu mongkalibosi bansa-Nyo. Nu jagai na mian iwi-iwi' anu tinimbalimo anu-Nyo. Imbo' da kita tolodadupu i ahop nu tengke-Nyo ka' montuluti iwi-iwi' apaa na anu pinalentahkon-Nyomo.

⁴Atulan anu binee'mo i Musa tionyo ahi' otulutinto aijo'mo na halata' anu talalo hondo ko angga'nyo hi bansa aiya.

⁵Salatan Israel sinihukmo tiba to pola-polaya'nyo, Tumpu tinimbalimo Tomundo hi mian anu pinalesayamo hi Ia.”

⁶Mongkona tulunan i Ruben, i Musa notatae, “O' amalakon da tulunan i Ruben madi' ko anu silaka, maumo aha ola sangkiding na miannyo.”

⁷Mongkona tulunan i Yehuda, ia notatae: “Tumpu, potombihingakon mae apaa na koonyo nu aha Yehuda; po'ule' posa'angu'akon na bansa nu aha. Osangaja'i na aha mahampate nu belento Tumpu, otulungi na aha mongahopi sampobali'nyo.”

⁸ Mongkona tulunan nu bansa Lewi, ia notatae: “Tiba Urim ka' Tumim poto'imo apaa na anu okahanda'i nu Belento poto'i hi mian nu Lewi, posaihon nu Belento anu tulu-tulutan. Kita nonsobaimo aha kiijo' mae i Masa, ka' pinainggagamo tiba aha i mata nu uee Meriba.

⁹Aha nontulutimo Belento, nolabimo han iwi-iwi', molabi tu'anyo nu aha ka' to utu-utus nu aha. Iwi-iwi' na palentah nu Belento tinulutanmo nu aha, palajanjian nu Belento binaumo nu aha.

¹⁰Aha nompotinganmo mian anu pinalesayamo hi Belento da sabole-bole montuluti iwi-iwi' na palentah nu Belento ka' nonsombahkonmo koloban i mezbah nu Belento.

¹¹Tumpu, tulungiakon na tulunan nu bansa aiya da aha mahoson, de timbali da kita sanang na montoa kalaja nu aha. Pateiakon iwi-iwi' na sampobali' nu aha sahingga aha madi'mo daagi mongewa mae.”

¹²Mongkona tulunan i Benyamin, ia notatae: “Aiyamo na tulunan nu bansa anu nukalibosi nu Tumpu. Ia monjagai aha pihi ka' malom ka' jinojoongmo hi aha.”

¹³Mongkona lee' i Yusuf, ia notatae: “O'amalakon da tano' nu aha nubalakati nu Tumpu obee'i ujan, ka' tiba uee i uno nu tano'.

¹⁴O'amalakon da de tokamo na lonunyo nu kau' mimbua' saja' mahampe bua'nyo iwi-iwi' to ima-ima' hondo maha i pu'unnyo.

¹⁵O'amalakon da bungkutnyo iwi-iwi' anu naipuan pe'e mae mobuke' nu isinyo anu toto ima-ima'.

¹⁶O'amalakon da tano'nyo nupobuke'i nu anu toto ima-ima' hondo, ka' kalana manonong na Tumpu sahingga nohumpak balakat anu notatae aijo' mae i hemput anu i noakmo. O'amalakon da balakat aijo' tudun mae kona hi tulunan i Yusuf, kalana iamo na polaya' nu to utu-utusnyo.

¹⁷I Yusuf daagi' ko sa'angu' na sapi' anu bau kahosonannyo, ka' tanduk nu sapi' lakinyo anu ma'ela' aijo'mo momada-madala na aha mian nu Manasye ka' pulu-pulu'annyo na madala na mian nu Efraim. Iwi-iwi' na bansa tinanduknyo ka' sinalakonnyomo tinoka-toka i puusnyo nu tano'.”

¹⁸Mongkona to tulu-tulunan nu bansa Zebulon ka' i Isakhar ia notatae: “O'amalakon da i Zebulon mohumpak kasanangan, kalana ia saja' mamba iyaya mae ka' i Isakhar mohumpak ka'ima'an i kemah-kemah nu aha.

¹⁹Aha nolagamo iwi-iwi' na bansa mamba i bungkutnyo nu aha ka' nonsombahkonmo koloban anu sahondo-hondonyo kiita' mae. Aha nohumpakmo kakaya'an i ambai, ka' i bone' tutuus sonibi nu ambai.”

²⁰Mongkona tulunan i Gad ia notatae: “Opuji' na Tumpu Allah anu nompodaka'mo da'erah i Gad. I Gad nontanda'imo sumomo sa'angu' na singa kahanda'mo mombeak kilit nu botokon kabai kilit nu ubak.

²¹Tano' anu lebe ma'ima' ingalanyomo hi ia anu mompalentah binee'mo hi aha. Aha nompojalanmo iwi-iwi' na palentah ka' atulan nu Tumpu tempo'nyo to pola-polaya' nu Israel bubuu'mo sinihuk.”

²²Mongkona tulunan i Dan ia notatae: “Ka' susumo sa'angu' na singa bata'nyo anu nalalumpatmo nosabat mae lengkat i Basan.”

²³Mongkona tulunan i Naftali ia notatae: “I Naftali binee'anmo balakat manjoo' hondo ka' kinalibosanmo nu Tumpu: da'erahnyo lengkat mae i Dowiwi nu Galilea toka-toka i sasu selatan.”

²⁴Mongkona tulunan i Asyer ia notatae: “I Asyer nohumpakmo balakat manjoo' hondo molingkudui tulunan nu bansa sangga'at; o amalakaon da ia nukalibosi nu to utu-utusnyo, ka' kau' zaitun tumuu' molumba' i tano' nu aha.

²⁵O amalakon da iwi-iwi' na sabatan daka' anu tambaga ka' besak na binau bau kahosonan nu aha, da kantumuu'an nu aha madi' ko anu mompoposia.”

²⁶“O Israel! Tumpu Allah nu belemiu madi' sumo pilogot; Talasanggo na Ia nontuluimo langit ka' nonsoopmo mae kundom kahanda' montulungi belemiu.

²⁷Tumpu Allah saja' monjagai belemiu, botokonnyo sampe toka sidu-sidutu' monsakan belemiu. Ia na molaa' sampobali' nu belemiu anu atina' i ahop nu belemiu ka' mompokau belemiu mompatei aha.

²⁸Aha lee' mae i Yakub tumuu' madi' ko anu mompoposia i lipu' anu manjoo' hondo na gandum ka' anggurnyo, ka' nuhumpisi nu dondu'ok lengkat mae i langit.

²⁹Mohumpak kabilahian na beleyum, o Israel! Madi' ko bansa anu sumo beleyum nuposalamat nu Tumpu. Tumpu sumomo bajak ka' kantah atina' hi belemiu; monsangaja'i beleyum ka' mombee'i ka'untungan de mahampate na belemiu. Sampobali' nu belemiu iwi-iwi' tokamo mongkakase da okalibosi, panyo beleyum mompahampeja'akonmo aha.”