Read Saluan PO'ULE' INGULIT 5 Bible Online

PO'ULE' INGULIT 5 - Saluan bible

PO'ULE' INGULIT 5

¹I Musa nomposihukmo iwi-iwi' na aha bansa Israel, lantas notataemo hi aha, “To Utu-utus, potombihing mae na atulan haha aiya anu ku bee' hi belemiu sinaa aiya. Opakalioi na atulan haha aijo' ka' otuluti boli okolilimi.

²I Bungkutnyo nu Sinai Tumpu Allah-nto nonjanji'mo misa' ola hi mompolee'to,

³panyo tiba hi kita iwi-iwi' anu i aiya.

⁴Lengkat mae i apu aita' i bungkutnyo aijo' Tumpu kahanda'mo motatae hi belemiu.

⁵Panyo kalana belemiu nabuhukmo i apu ka' madi'mo binaani na nindako i bungkutnyo, sahingga aku, tempo'nyo aitu tinuminjomo i olotnyo nu belemiu tiba Tumpu da nompotoka potatae nu Tumpu hi belemiu. Tumpu nompoto'i,

⁶‘Akumo na Tumpu Allah nu belemiu anu nomboamo mae belemiu nosabat lengkat i Mesir, tampat nu belemiu binotuanan.

⁷Boli monsombah pilogot haha aijo' sangga'at. Ola Aku na osombah.

⁸ Boli mombau na belemiu patong maumo pa' sumo apaa i langit, i tano' kabai i uno nu uee i aluk nu tano'.

⁹ Boli monsombah patong anu sumo aijo' kalana Akumo na Tumpu Allah nu belemiu ka' madi' mongka'oho' opokakanakon tiba maumo pa' apaa. To mia-mian anu mongka'ideki Aku Ku hukum toka-toka i lee' anu ko totolu'nyo ka' ko opatnyo.

¹⁰Panyo Aku mompotoa kalibosan-Ku hi momada-madala na lee' nu to mia-mian anu mongkanonongi Aku ka' tulu-tulutan hi palentah-ngKu.

¹¹ Boli ola bau kasanggoan na monsanggo, sanggong-Ku kalana Aku Tumpu Allah nu belemiu mohukum maumo pa' ihe na anu monsanggo-sanggong-Ku anu madi' mingkona hi pongka'oho'-Ku.

¹² Olame'akon na sinaa nu Sabat ka' o adati salaku sinaa anu susi' kalana Akumo na Tumpu Allah nu belemiu anu nompalentahkonmo hi belemiu.

¹³ Belemiu Ku bee'i anon sinaa na mokalaja,

¹⁴panyo sinaa anu ko ipitunnyo aijo'mo na sinaa pilawean samata-mata monsombahmo Aku, Tumpu Allah nu belemiu. I sinaa aijo' madi' ko samian pe'e na anu timbali mokalaja mau belemiu, to ana-anak nu belemiu, to posa-posaihon nu belemiu, potuu'on nu belemiu kabai mian anu lengkat mae i salipu'an anu jinojoongmo i lipu' miu. Posaihon nu belemiu haha aijo', tionyo ahi' milawe susumo belemiu suele.

¹⁵O inau' ahi' saba' belemiu suele naipuan mae binotuanan i Mesir, lantas pinobebasmo nu Tumpu Allah nu belemiu nu kasusa'an-Nyo anu daka' hondo. Kalana aijo' Ku palentah na belemiu da molame'akon sinaa nu Sabat.

¹⁶ O'adati ka' opalakai na tuuma ka' tina nu belemiu, aijo'mo na palentah-ngKu, Tumpu Allah nu belemiu, da belemiu mohumpak ka'ima'an ka' mantan na umun i lipu' anu Ku bee'mo hi belemiu.

¹⁷ Boli mompatei.

¹⁸ Boli masala'.

¹⁹ Boli montomang.

²⁰ Boli timbali sakisi anu baleko' kona hi mian sangga'at.

²¹ Boli mongkamilui anu nu mian sangga'at, laigannyo, tano'nyo, bengkele'nyo, to posa-posaihonnyo, potuu'onnyo, keledainyo kabai maumo pa' apaa na anu daagi' hi ia.’

²² Aijo'mo na palentah-Nyo iwi-iwi' anu binee'mo nu Tumpu hi belemiu tempo'nyo belemiu sinihukmo i bungkutnyo. Tempo'nyo Ia notatae daka-daka' hondo aijo' mae i uno nu apu ka' i kundom anu butolu hondo, Ia nombee'i palentah haha aijo' ka' misa' anu sangga'at. Lantas tinulisnyo i ohua' na batu pinontulisan ka' binee'mo mae hi belengku.”

²³“Salatan songko-songko na bungkutnyo i noakmo ka' belemiu nohongomo potatae lengkat mae i unonyo nu pintung iwi-iwi' na polaya' nu tulunan nu bansa miu tiba to tu'a-tu'anyo nu belemiu tinokamo mae hi belengku.

²⁴Aha notatae, ‘Tumpu Allah-nto nompotoamo kakuasa'an-Nyo ka' katalasanggoan-Nyo tempo'nyo kami nohongomo Ia notatae i uno nu apu. Sinaa aiya kami nonsakisimo taalu' memang timbali na manusia tataap tumuu', maumo Tumpu Allah notataemo hi ia.

²⁵Panyo kadaka' kami momboto'akon mule' ahi' nyawa mami? Apu anu okabuhuk aijo' mompateimo mae kami! O akuimo mami totu-totu'u taalu' kami matemo de mohongomo Tumpu Allah pu'ule' mule' motatae.

²⁶Te toho' daagi' ko manusia anu tataap tumuu' salatan mohongomo Tumpu Allah anu tumuu' motatae i uno nu apu?

²⁷Kalana aijo' lako'mo Musa, ka' hongo mae iwi-iwi' apaa na anu nu poto'i nu Tumpu Allah-nto lantas poto'i mae hi kami apaa na anu Nu poto'i hi beleyum. Kami mohongoje ka' tulu-tulutanmo.’

²⁸Nohongo aijo', Tumpu notataemo hi belengku, ‘I hongong-Kumo apaa na anu pinoto'imo nu bansa aijo', ka' memang totu'umo na potatae nu aha.

²⁹Soba de aha saja' ko pikilan sumo aijo'! Soba de aha saja' mongadati Aku ka' montuluti palentah-ngKu iwi-iwi', sahingga aha ka' lee' nu aha mohumpak ka'ima'an sampe toka sidu-sidutu'!

³⁰Lako'mo uuka aiya ka' saimo na bansa aijo' minsusule' i kemah nu aha toto samian.

³¹Panyo beleyum, Musa po'ule' pinsusule' mae ka' jojoongmo i aiya tiba Aku; beleyum Ku bee'imo iwi-iwi' na atulan ka' palentang-Ku. Pogulu'akon hi aha, da aha montuluti de tokamo i lipu' anu Ku bee'mo hi aha.’

³²To utu-utus tuluti ima-ima', iwi-iwi' na anu pinalentahkonmo nu Tumpu nu belemiu hi belemiu. Boli molanggai mau pe'e ola sa'angu' na palentah haha aijo'.

³³Bau iwi-iwi' apaa na anu pinalentahkonmo nu Tumpu Allah nu belemiu hi belemiu da belemiu mohumpak ka'ima'an ka' moko ala tataap i lipu' anu saidi' mae o jojoongimo nu belemiu.”