Read Saluan YOHANES 11 Bible Online

YOHANES 11 - Saluan bible

YOHANES 11

¹ Samian anu sanggonyo i Lazarus jojoong i Betania tiba utusnyo i Maria ka' i Marta.

² I Maria aijo'mo boune anu nondudu'akon minya-minya' manohong i tengke i Tumpu ka' nonsapui nu ubaknyo. Daagi' kino santempo'an i Lazarus nasakitmo.

³Ua-ua'aha na utusnyo nompolelemo hi Yesus, “Tumpu, utus kami anu oka-okalibosi nu kita Tumpu aijo' nasakitmo.”

⁴Salatan i Yesus nohongo lele aijo', Ia notatae, “Panyakit aiya madi' mule' monsaduakon kasilaka'an. Aiya timbali da Tumpu Allah opopodaka', da kalana jalan anu sumo aijo' Anak nu Tumpu Allah singkona opopodaka'.”

⁵I Yesus mongkalibosi i Marta, i Maria ka' i Lazarus.

⁶Panyo salatan i Yesus nohongo lele i Lazarus masakit, Ia nontotonggolakon jinojoong i kajojoongan-Nyo daagi' inguansinaa.

⁷Lapas aijo' Ia notataeje hi anu saja' mombatuki Ia, “Imbo' kita minsusule'mo mamba i Yudea.”

⁸Aha nontaami, “Kita Tuumangku Gulu', sala'je na to mia-mian nu Yahudi kahanda' mompahambunu'akon Kita Tuuma nu batu, ka' aiya Kita Tuuma mongka'oho' mule' minsusule' mokiijo' mae?”

⁹“Te misa'o sinaa kopiinnyo sampulu' ka' ohua' na jam?” na koonyo i Yesus. “Mian anu lumajang sinaa, madi' tosumpun kalana nutoa na jingka nu dunia aiya.

¹⁰Panyo mian anu lumajang i pihi, tosumpun, kalana madi' ko jingka hi ia.”

¹¹Sumo aijo' na koonyo i Yesus. Lapas aijo' Ia notatae mule', “Bela'to i Lazarus i hoyotmo, panyo mambaje Ku bulaakon na ia.”

¹²Anu saja' mombatuki Yesus notatae, “Tumpu, de i Lazarus hoyot, saidi' ia tionyo ma'alin.”

¹³Pato' nu potatae i Yesus aijo', i Lazarus natemo. Panyo aha monsangka pato' nu potatae i Yesus aijo' i Lazarus ola i hoyot.

¹⁴Kalana aijo' i Yesus notatae hi aha sahondo-hondonyo, “I Lazarus i natemo.

¹⁵Panyo Aku mule' sanang, kalana madi' kino Akunyo kiijo' mae, kalana lebee ma'ima' hi komiu da komiu timbali palesaya. Imbo'mo da kita mamba uuka hi Lazarus.”

¹⁶I Tomas anu osa-osanggohi “Hapi” notatae hi to sanga-sangalu nu anu mombatuki Yesus, “Imbo' da obatukinto, pojohokmo da kita mate hingga-hinggat tiba Ia!”

¹⁷Salatan i Yesus tinokamo i tampat aijo', i Lazarus patonsinaamo na kopiinnyo i lamun.

¹⁸Betania madi' majo'on lengkat i Yerusalem kila-kila totolu' na kilometen na kojo'onnyo.

¹⁹Da'isan na mian nu Yahudi tinoka hi Marta ka' hi Maria mongindeko' aha, kalana utus nu aha sinilakamo.

²⁰Salatan i Marta nohongo i Yesus tinokamo, ia nosabat nompolabot i Yesus, panyo i Maria jinojoong i laigan.

²¹Koonyo i Marta hi Yesus, “Tumpu, de kita Tumpu daagi' i uuka tempo'nyo aitu, tantu utusku madi' sinilaka.

²²Mau mule' sumo aitu kusumbu', uuka aiya Tumpu mombee' mau mule' pa' apaa na opoita nu kita Tumpu hi Ia.”

²³“Utusum po'ule' tumuu',” koo-Nyo i Yesus hi Marta.

²⁴I Marta nontaami, “Kusumbu' i Lazarus po'ule'je tumuu' de mian mate po'ule'mo opotumuu' i Sinaa Kakiamatan.”

²⁵“Akumo na mombee'i kantumuu'an ka' po'ule' mompotumuu' mian mate,” koo-Nyo i Yesus hi Marta, “Mian anu palesaya hi beleng-Ku po'ule' tumuu' mau mule' ia natemo.

²⁶Ka' mian tumuu' anu palesaya hi beleng-Ku sidu-sidutu' madi' mate. Nupalesaya na anu sumo aijo'?”

²⁷“Tumpu,” tinaaman i Marta, “Ku palesaya, i Tumpu Anak nu Tumpu, Tomundo' anu Momposalamat anu saidi' mae toka i dunia aiya.”

²⁸Noko potatae na i Marta sumo aijo', ia inamba nolaga i Maria utusnyo ka' no'oyong hi ia, “Tuumanto i Gulu' daagi' ko anu uutu; Ia nompokilawa beleyum.”

²⁹Nohongo aijo', i Maria lia-lia' nobula, lantas namba nonsingkaboti Yesus.

³⁰Tempo'nyo aitu i Yesus ma'isa ninsoop i kampung. Ia daagi' i tampat hai Marta nononsingkaboti.

³¹To mia-mian nu Yahudi hau-haunyo mongindeko' i Maria kiijo' i laigan, nontoa i Maria nobula ka' lia-lia' nosabat; saba' aha nambamo nombatuki ia, kalana aha monsangka ia mamba i kubun humaang.

³²Salatan i Maria tinoka i tampat i Yesus ka' nontoa Ia, dinumaladupumo na i Maria i ahop-Nyo ka' notatae, “Tumpu, de kita Tumpu daagi' i uuka tempo'nyo aitu, tantu utusku madi' sinilaka.”

³³Salatan i Yesus nontoa i Maria humaang, ka' to mia-mian nu Yahudi anu nojajaalan mae tiba i Maria aijo' singkona humaang, kinyonyoa-Nyo noliibosmo, ka' Ia tinongkoliibosonmo hondo na tinoa.

³⁴Lantas pinokilawa-Nyo hi aha, “Iyamae na pinolamunan miu ia?” “Imbo', toa Tumpu,” tinaaman nu aha.

³⁵Lantas i Yesus i humangmo.

³⁶Sahingga to mia-mian nu Yahudi aijo' notatae, “Toa, paya'ii' na liibos-Nyo hi Lazarus!”

³⁷Panyo daagi' ko anu aijo' hi aha notatae, “Ia nompotimbali momian mapisok nontoa, kadaka' Ia madi' noko ala nontewa' da i Lazarus boli sinilaka.”

³⁸I Yesus po'ule' mule' tinongkoliboson, lantas namba i pinolamunan. Lamunan aitu sa'angu' na liang anu okulubi nu batu daka'.

³⁹“Hangkat na batu aijo',” koo-Nyo i Yesus. I Marta, utus nu mian anu sinilaka aijo' nontaami, “Panyo Tumpu, ia patonsinaamo na i lamun. Tantu nabusikmo!”

⁴⁰I Yesus notatae hi Marta, “Te misa' tinaloakon-Kumo hi beleyum: De beleyum palesaya, nu toaje palias na kodaka'nyo na kuasa nu Tumpu!”

⁴¹Sahingga i hangkat nu aha na batu aijo'. Lapas aijo' i Yesus nontihanga langit ka' notatae, “Talima kaseh Tuuma, kalana kita nohongomo Aku.

⁴²Kusumbu' Kita saja' mohongo Aku, panyo Ku taloakon na aiya kona hi to mia-mian anu aiya; da aha palesaya saba' Kitamo na nonsai mae Aku.”

⁴³Noko taloakon aijo', i Yesus notataemo daka-daka', “Lazarus, posabat!”

⁴⁴Lantas nosabat na mian anu sinilakamo aijo'. Lima ka' tengkenyo daagi' hau-haunyo binalunan nu hude pinonsaput, ka' i ohupnyo kuku-kukub na hude pinongkukubi ohup. “Bukai na hude pinonsaput da ia moko ala lumajang,” koo-Nyo i Yesus hi to mia-mian anu i kiijo'.

⁴⁵Da'isan na to mia-mian nu Yahudi anu toka mompaha pia i Maria, pinalesayamo hi Yesus salatan aha nontoa apaa na anu tinimbali aijo'.

⁴⁶Panyo to pia-piangkuka na aha i kiijo' i namba hi mian nu Farisi mompoto'i apaa na anu binaumo i Yesus.

⁴⁷Kalana aijo' to mia-mian nu Farisi tiba to Kapala-kapala nu imam nombau sale' tiba Mian Kopian Daka' nu Agama. Aha notatae, “Apaa na tionyo obaunto? Mian aijo' mombau manjoo' na anu okabangangi!

⁴⁸De kita ola mompopilaya saja' sumo aitu-Nyo, iwi-iwi' na mian palesayamo hi Ia. Ka' ahennyo anu mongkuasai Roma toka mongidei Laigan nu Tumpu ka' iwi-iwi' na bansanto!”

⁴⁹Samian anu kiijo' hi aha sanggonyo i Kayafas, imam daka' i taun aijo' notatae, “Komiu madi' ko anu opisumbu-sumbu'.

⁵⁰Te komiu madi' sinsumbu', monginau' kapentingan nu mian daisan, sahanyo samian na mate ka' de mule' iwi-iwi' na bansa mohopu'?”

⁵¹Sabenannyo i Kayafas nontaloakon sumo aijo' misa' kalana posi pikilannyo. Panyo salaku imam daka' i taun aitu ia nompoto'imo anu saidi' mae timbali, aijo'mo i Yesus silaka bau kapentingan nu bansa Yahudi.

⁵²Ka' misa' ola bau kapentingan nu bansa Yahudi, panyo mule' da molimu' ka' momposa'angu' ana-anak nu Tumpu anu noga'aga'atmo.

⁵³Sinaa aitu na nontampu'uni, aha anu mongkuasai Yahudi sinangaja'mo mompatei Yesus.

⁵⁴Kalana aijo' i Yesus madi'mo lewa' manintoa hi mian da'isan nu aha mian Yahudi. Pinala'iannyo na Yudea ka' i namba i kota' sanggonyo Efraim koko pandang bolaa. I kiijo' mae Ia jinojoongmo hingga-hinggat tiba anu aja' mombatuki Ia.

⁵⁵Tempo'nyo aitu ohanimo na Sinaa Daka' Paskah Yahudi. Da'isan na mian nolengkat mae i kampung ise' nambamo i Yerusalem mombau adat mombaso'i butong da ma'isa pe'e lamean aijo' toka.

⁵⁶Aha nolio i Yesus, ka' tempo'nyo sinilimu' i Laigan nu Tumpu, aha notatae samian ka' samian, “Mosia na pikilan miu? Ugaat Ia madi' toka i lamean aiya.”

⁵⁷Aha nontaloakon sumo aijo' kalana to kapala-kapala nu imam tiba to mia-mian nu Farisi nompalentahkonmo da ihe na mian anu monsumbu' iyana kajojoongan i Yesus, tionyo mompoto'i mae da Ia o hakopmo.