Read Saluan YOHANES 13 Bible Online

YOHANES 13 - Saluan bible

YOHANES 13

¹Daagi' sansinaa tokaje na Sinaa Daka' nu Paskah, sinumbu'mo i Yesus taalu' tempo'nyo tokamo Ia mompala'imo dunia aiya minsusule'mo hi Tuuma-Nyo. Ia mongkalibosi to mia-mian anu tinimbalimo anu-Nyo i dunia, ka' Ia saja' mongkalibosi aha toka-toka i ka'ahenan-Nyo.

²I Yesus tiba anu saja' mombatuki Ia hau-haunyo mongkaan malom. Ibilis nomposoopmo tanga'an i uno nu kinyonyoa i Yudas anak i Simon Iskariot da monguwesani Yesus.

³Sinumbu'mo i Yesus na Tuumanyo nombee'mo iwi-iwi' na kuasa hi Ia. Nusumbu' suele na Ia, lengkat mae hi Tumpu, ka' po'ule' minsusule' hi Tumpu.

⁴Mokonyo aijo' Ia tinuminjo nongukat jubah-Nyo ka' nompobutu' handu i kompong-Nyo.

⁵Lapas aijo' Ia nolana' uee i loyang, ka' nontampu'uni nombaso'i tengke nu anu saja' mombatuki Ia, ka' nongambu'i nu handuk anu butu-butu i kompong-Nyo.

⁶Salatan tinoka na Ia hi Simon Petrus anu notatae, “Tumpu, te toho' kita Tumpu na mombaso'i tengkengku?”

⁷I Yesus nontaami, “Uuka aiya beleyum madi' monsumbu' apaa na Kubau aiya, panyo beleyum mangalati'je saidi' mae.”

⁸“Boli, Tumpu,” na koonyo i Petrus hi Yesus, “Boli hondo-hondo kita Tumpu mombaso'i tengkengku!” Panyo i Yesus nontaami, “De Aku madi' mombaso'i beleyum, beleyum madi' mompahasumbu' tiba Aku.”

⁹I Simon Petrus notatae, “Desumo aitu, kita Tumpu, boli ola tengkengku, panyo lima tiba ubaku suele!”

¹⁰“Mian anu nindi'mo binalasinmo songko-songko,” koonyo i Yesus hi Petrus. “Ia madi'mo palalu po'ule' obaso'i; boli mompiakon tengkenyo. Aha binalasinmo, panyo madi' iwi-iwi'mo.” (

¹¹Sinumbu'mo i Yesus ihena monguwesani Ia. Mokonyo aijo' Ia notatae, “Komiu aiya binalasinmo, panyo madi' iwi-iwi'mo.”)

¹² Noko baso'i na i Yesus tengke nu aha, Ia po'ule'mo nompusok jubah-Nyo ka' po'ule'mo sinumuhang. Lantas Ia notataemo hi aha, “Osumbu' miu pa' apaa na anu sala'je binaung-Ku hi komiu?

¹³Komiu molaga Aku Gulu' ka' Tumpu. Memang ahi' sumo aijo'.

¹⁴De Aku sumo Tumpu ka' Gulu'um mombaso'i tengke miu, komiu suele ahi' mompaha baso-baso'i tengke.

¹⁵Aku mombee'i sonto' aiya hi komiu, da komiu suele mombau apaa na anu binaung-Kumo hi komiu.

¹⁶ Totu-totu'u hondo na potataeng-Ku aiya: Samian na posaihon madi' lebe daka' molingkudui tuannyo, ka' samian na posaihon madi' lebe daka' molingkudui anu nonsai.

¹⁷De osumbu'mo miu iwi-iwi' aiya, bilahi na komiu de mombau.

¹⁸ Apaa na anu Kutaloakon aiya misa' mongkona komiu iwi-iwi'. Kusumbu' ihe-he na anu pinile'an-Kumo. Panyo apaa na anu tinulismo i uno nu Kitab nu Tumpu tionyo timbali, aijo'mo, ‘Mian anu mongkaan hingga-hinggat tiba Aku na saidi' mae mongewa Aku.’

¹⁹Han aijo' Ku poto'i hi komiu uuka aiya da ma'isa pe'e timbali, da de han aijo' timbalimo saidi' mae, komiu palesayaje taalu' Akumo na Ia anu osa-osanggohi AKU DAAGI'.

²⁰Totu-totu'u hondo na potataeng-Ku aiya: Ihena montalima mian anu Kusa-kusai, montalima Aku. Ka' ihe na montalima Aku, montalima Ia anu nonsai mae Aku.”

²¹Noko taloakon na i Yesus sumo aijo', Ia tinongkoliibosonmo hondo, lantas tinaloakon-Nyo, “Totu'u hondo na potataeng-Ku aiya: Sala'samian aiya hi komiu na monguwesani Aku.”

²²Anu saja' mombatuki Ia nompaha didinmo samian ka' samian ka' binangang hondo kalana madi' osumbu' pa' ihe na anu kokoonyo aijo'.

²³Anu saja' mombatuki nunu kalibosi Yesus suha-suhang i sohipi' i Yesus.

²⁴I Simon Petrus nongkija-kijapi ia, da nu pokilawa hi Yesus pa' ihe na anu kokoonyo aijo'.

²⁵Saba' anu saja' mombatuki aijo' ningkikiijo' hi Yesus, ka' nompokilawa, “Ihe na ia, Tumpu?”

²⁶I Yesus nontaami, “Mian anu Kubee'i roti anu Kulo-kulobong i mangko', aijo'mo na ia.” Lantas i Yesus nongala sampuge na roti i lobongnyo i mangko'; lantas nombee' hi Yudas anak i Simon Iskariot.

²⁷Lia-lia' salatan i Yudas nontalimamo roti aijo', Ibilis ninsoopmo i kinyonyoanyo. Lantas i Yesus notatae hi ia, “Donganmo bau pa' apaa na anu kahanda' nu bau.”

²⁸Madi' ko samian pe'e hi aha anu suha-suhang mongkaan i kiijo' nonsumbu' kadaka' i Yesus nontaeakon sumo aijo' hi Yudas.

²⁹Daagi' ko anu monsangka i Yesus nompokau i Yudas mongoli apa-apaa anu opalalui i bau-bauon aitu, kabai mombee'i doi sangkiding hi mian kasiasi — kalana i Yudas pontoongi doi anu nulimu' nu aha.

³⁰Salatan i Yudas nontalima roti aijo', ia lau-laus nosabat. Sinaa i nalomo.

³¹Pinalus na i Yudas, i Yesus notatae, “Uuka Anak nu Mian opopodaka'mo, ka' suele Tumpu opopodaka' kalana Ia.

³²De Tumpu opopodaka' kalana Ia, Ia suele opopodaka' nu Tumpu kalana apaa na anu timbalimo i butong-Nyo. Ka' memang Tumpu malia-lia'mo na mompopodaka' Ia.

³³ To ana-anak-Ku, Aku madi'mo daagi' piin na jojoong tiba miu. Olioje komiu na Aku, panyo sumo anu tinaloakon-Kumo hi anu mongkuasai Yahudi, sumo aitu suele na Ku taloakon hi komiu; i tampat kalambanan-Ku madi' opoko toka miu.

³⁴ Palentah bu'ou Kubee' hi komiu: Pompaha kali-kalibosi samian ka' samian. Sumo Aku mongkalibosi komiu, sumo aijo' suele na komiu tionyo mompaha kali-kalibosi.

³⁵De komiu mompaha kali-kalibosi, atina'je ka' nusumbu' nu mian iwi-iwi', taalu' komiu anu saja' mombatuki Aku.”

³⁶“Tumpu, Tumpu moyamo?” pinokilawa i Simon Petrus hi Yesus. Tinaaman i Yesus, “Iyaa na kalamabanan-Ku madi' nu poko batuki uuka aiya. Saidi' mae nubatukije na Aku.”

³⁷“Tumpu, kadaka' aku madi' moko batuki kita Tumpu uuka aiya?” po'ule' pinokilawa i Petrus mule'. “Aku sanang na mate kalana kita Tumpu!”

³⁸Tinaaman i Yesus, “Totu-totu'u sanang na beleyum mate kalana Aku? Da nusumbu', ma'isa pe'e manuk mintutuhu' saidi' beleyum polo'mo pintolun na motatae tukooyum, beleyum madi' monsumbu' Aku!”