Read Saluan YOHANES 17 Bible Online

YOHANES 17 - Saluan bible

YOHANES 17

¹Noko potatae sumo aijo', i Yesus nontihanga langit ka' notatae, “Kita Tuuma, u'uka aiya tinokamo na tempo'nyo. Popodaka'mo na Anak-To, da Anak-To suele mompodaka' kita Tuuma.

²Kita Tuuma nombee'mo kuasa mompalentah iwi-iwi' na mian hi Anak, da Ia mombee'i kantumuu'an kopian ka' toka sidu-sidutu' hi iwi-iwi' na mian anu binee'mo nu Tuuma hi Ia.

³Aiyamo na kantumuu'an kopian ka' toka sidu-sidutu'; da mian monsumbu' kita Tuuma, ola sa'a-sa'angu'nyomo na Tumpu anu totu'u, ka' monsumbu' i Yesus Kristus anu sinai mae nu kita Tuuma.

⁴Aku nompopodaka'mo kita Tuuma i bawo nu dunia aiya, kalana nompotimbalimo hia nu kita Tuuma anu pinokauhakonto hi beleng-Ku.

⁵Kita Tuuma! Popodaka'mo na Aku u'uka aiya hi kita Tuuma nu kadaka'an anu daagi' hi beleng-Ku, ka' hi kita Tuuma, ma'isa pe'e dunia aiya pinotimbali.

⁶Aku nomposumbu'mo kita Tuuma hi to mia-mian i dunia aiya anu binee'mo nu kita Tuuma hi beleng-Ku. Aha, kita Tuuma na tumpunyo, ka' kita Tuuma nombee'mo aha hi beleng-Ku. Aha nohongo-hongomo potatae nu kita Tuuma.

⁷Uuka aiya nusumbu' nu aha, taalu' iwi-iwi' anu binee' nu kita Tuuma hi beleng-Ku no lengkat mae hi kita Tuuma.

⁸Pinoto'ingkumo hi aha na potatae nu kita Tuuma anu binee'mo hi beleng-Ku; ka' tinalimanyomo nu aha. Sinumbu'mo nu aha taalu' Aku tinoka mae totu-totu'u lengkat hi kita Tuuma ka' aha nompalesayamo taalu' kita Tuuma na nonsai mae Aku.

⁹Aku mondo'akon aha. Aku madi' mondo'akon dunia, panyo ola to mia-mian anu binee'mo nu kita Tuuma hi beleng-Ku, kalana aha i Tuuma na tumpunyo.

¹⁰Iwi-iwi' na anung-Ku, i Tuuma suele na tumpunyo; ka' iwi-iwi' na anu nu kita Tuuma, Aku suele na tumpunyo. Aku opopodaka' aijo' hi aha.

¹¹Uuka aiya Aku toka hi kita Tuuma. Aku madi'mo daagi' jojoong i dunia; panyo aha daagi' i dunia. Kita Tuuma anu Susi'! Potuu'akon na aha nu kuasa, nu sanggonto Tuuma, aijo'mo sanggo anu binee'mo nu kita Tuuma hi beleng-Ku — da aha timbali mosa'angu', pokakana sumo kita Tuuma ka' Aku suele sa'a-sa'angu'.

¹² Tempo'nyo Aku daagi' tiba aha, pinotuu'kumo na aha nu kuasa nu sanggonto Tuuma — sanggo anu binee' nu kita Tuuma hi beleng-Ku. Aku nompotuu'mo aha, ka' madi' ko samian pe'e nolapus, boli mompiakon ia anu memang nukonamo na molapus; da kalana aijo' ganaapmo na anu tinulis i Kitab nu Tumpu.

¹³Uuka aiya Aku toka hi Tuuma. Iwi-iwi' aiya Ku taloakon hau-haunyo Aku daagi' i dunia; da aha mongoa'i totu-totu'u kalame'an-Ku.

¹⁴Aku nompoto'iakonmo hi aha potatae nu kita Tuuma, ka' dunia nongka'idekimo aha, kalana aha misa' anu nu dunia, pokakana sumo Aku suele misa' anu nu dunia.

¹⁵Madi' Ku poita da kita Tuuma mongala aha i dunia aiya, panyo Ku poita da kita Tuuma mompimpaliakon aha i Anu Ma'idek.

¹⁶Sumo lapangnyo Aku misa' anu nu dunia aha mule' suele misa anu nu Dunia.

¹⁷Potimbali na aha matungka' kita Tuuma na tumpunyo, aijo' nyata' i kahondoan; potatae nu kita Tuuma aijo'mo na kahondoan.

¹⁸Sumo kita Tuuma nonsaimo Aku mamba i dunia, sumo aitumo suele na aku monsai aha mamba i dunia.

¹⁹Bau kapalaluan nu aha, Aku mombee' butong-Ku da osumbu' ahi', taalu' kita Tuuma na tumpunyo, da aha suele timbali matungka' kita Tuuma na tumpunyo, aijo' nyata' i hahan anu hondo.

²⁰Misa' ola aha aiya na Kudo'akon. Aku suele mondo'akon to mia-mian anu saidi' mae palesaya hi beleng-Ku, kalana montoamo hahan anu aiya hi aha.

²¹Ku poita kita Tuuma, da aha iwi-iwi' timbali mosa'angu', susumo kita Tuuma mosa'angu' tiba Aku, ka' Aku tiba kita Tuuma. O'amalakon da aha timbali mosa'angu' tiba Kita, da dunia palesaya taalu' kita Tuuma na nonsai mae Aku.

²²Aku nombee'imo aha kadaka'an anu binee' nu kita Tuuma hi beleng-Ku, da aha timbali mosa'angu' pokakana sumo kita suele sa'a-sa'angu'.

²³Aku tiba aha, ka' kita Tuuma tiba Aku, da aha totu-totu'u sa'a-sa'angu'. Sahingga dunia monsumbu' taalu' kita Tuuma na nonsai mae Aku, ka' taalu' kita Tuuma mongkalibosi aha, sumo kita Tuuma mongkalibosi Aku.

²⁴Kita Tuuma, Ku kahanda'i da aha anu binee'mo nu kita Tuuma hi beleng-Ku mogalum ka' Aku i tampat kajojoongan-Ku, da aha montoa kadaka'an-Ku; aijo'mo kadaka'an anu binee' nu kita Tuuma hi beleng-Ku, kalana kita Tuuma mongkalibosi Aku ma'isa pe'e dunia aiya pinotimbali.

²⁵Kita Tuuma anu adin! Dunia madi' monsumbu' kita Tuuma, panyo Aku monsumbu' kita Tuuma; ka' mian haha aiya monsumbu' taalu' kita Tuuma na nonsai mae Aku.

²⁶Aku nompoto'imo sanggo nu kita Tuuma hi aha; ka' saja' Kubau sumo aitu, da liibos nu kita Tuuma hi beleng-Ku tataap i uno nu kinyonyoa nu aha, ka' Aku mosa'angu' tiba aha.”