Read Saluan YOHANES 18 Bible Online

YOHANES 18 - Saluan bible

YOHANES 18

¹Noko binalado'a na i Yesus sumo aijo', Ia tiba anu saja' mombatuki Ia nambamo nokiijo' i santoa nu Kaunyo Kidron. I kiijo' daagi' ko sa'angu' na taman. Ka' i Yesus tiba anu saja' mombatuki Ia ninsoopmo i tampat aijo'.

²I Yudas anu uwe-uwesan aijo' monsumbu' tampat aijo'; kalana i Yesus toho'mo sinilimu' i kiijo' tiba anu saja' mombatuki Ia.

³Saba' i Yudas namba i tampat aijo' nomboa sanggombu na suludadu Romawi tiba to pia-piangkuka na ponjaga Laigan nu Tumpu anu pinokau nu kapala nu ima-imam tiba to mia-mian Farisi. Aha nomboa toongon pimuhuk, sulu', tiba potong.

⁴Sinumbu'mo i Yesus iwi-iwi' apaa na anu timbali saidi' mae i butong-Nyo. Jadi Ia nongohani mian haha aijo' ka' nompokilawa, “Komiu molio ihe?”

⁵“I Yesus, mian nu Nazaret,” na koonyo nu aha. “Akumo na Ia,” koonyo i Yesus. I Yudas uwe-uwesan tinjo-tinjo i kiijo' tiba aha.

⁶Tempo'nyo i Yesus notatae hi aha, “Akumo na Ia,” aha iwi-iwi' nambasule'mo ka' tinolubuk i tano'.

⁷Po'ule' mule' pinokilawa i Yesus hi aha, “Ihe na olio miu?” “I Yesus, mian nu Nazaret,” na koonyo nu aha.

⁸“Tinaloakonkumo, Akumo na Ia,” na koonyo i Yesus. “Ka' de Aku na memang olio miu, yo bakas da sangga'at aiya mambamo.” (

⁹Salatan tinaloakon sumo aijo', tinimbalimo apaa na anu tinaloakonmo i Yesus u'utu mae: “Kita Tuuma, to mia-mian anu binee'mo nu kita Tuuma hi beleng-Ku, madi' ko samian pe'e na nolapus.”)

¹⁰I Simon Petrus anu nomboa mae samata na bajak, nongkeatmo ka' nontabasmo samian na posaihon nu imam daka', sahingga nosamping na bihingnyo koanan. Sanggo nu posaihon aijo' i Malkus.

¹¹ Sahingga i Yesus notatae hi Petrus, “Po'ule' posalung na bajakum i guma'nyo! Pa' koyum o Aku madi' sida monginum galas kasansala'an anu binee' nu aha Tuuma hi beleng-Ku?”

¹²Lantas to sulu-suludadu Romawi tiba kamundannyo, ka' ponjaga-ponjaga nu Yahudi nohakopmo ka' nompungu i Yesus.

¹³Momoona binoa nu aha na i Yesus mangadap hi Hanas monian i Kayafas. I Kayafas aijo' imam daka' i taun aijo'.

¹⁴ Ka' iamo na nompokinde'i anu mongkuasai Yahudi, tukoonyo lebee ma'ima' samian na mate bau pontokong iwi-iwi' na bansa.

¹⁵I Simon Petrus tiba samian na anu saja' mombatuki sangga'at nombatukimo i Yesus. Anu saja' mombatuki sangga'at aiya nusumbu' i imam daka'; jadi ia ninsoop hingga-hinggat tiba i Yesus i popasan nu laigan imam daka,

¹⁶panyo i Petrus nontanda'i i sambiha'nyo nu tumban. Lantas anu saja' mombatuki ia sangga'at nosabat ka' binasisik tiba posaihon boune anu montaamongi sabatan, lantas nomboa i Petrus ninsoop i unonyo.

¹⁷Posaihon boune pontaamongi sabatan aijo' notatae hi Petrus, “Hee, te misa' beleyum suele sala'samian anu saja' mombatuki mian aijo'?” “Misa',” na koonyo i Petrus.

¹⁸Tempo'nyo aitu tempo' nu bakin, sahingga to posa-posaihon ka' ponjaga-ponjaga nomposuunimo apu da mingoba ka' aha minjohu i kiijo'. I Petrus nokiijo' ka' tinuminjo, minjohu hingga-hinggat tiba aha.

¹⁹Imam daka' nompokilawa hi Yesus mongkona anu saja' mombatuki Ia, ka' mongkona pangajalan-Nyo.

²⁰I Yesus nontaami, “Aku saja' basisik sahondo-hondonyo i ahop nu mian da'isan. Aku saja' mompogulu' i to lai-laigan Pogalejaan ka' i Laigan nu Tumpu, tampat nu mian Yahudi biasanyo silimu'. Madi' toho' Aku montaloakon apa-apaa maninsuluk.

²¹Jadi kadaka' kita Tuan mompokilawa Aku? Pokilawa hi aha anu nohongomo Aku nompogulu'. Tantu nusumbu' nu aha apaa na anu tinaloakon-Ku.”

²²Salatan i Yesus nontaloakonmo sumo aijo', sala'samian ponjaga i kiijo' nohapa'mo Ia ka' notatae, “Baani hondo na Oko notatae sumo atina' hi imam daka'!”

²³I Yesus nontaami, “De Aku nontaloakon apa-apaa anu madi' totu'u, poto'i mae aiya apaa na anu sinala'! Panyo de anu Ku taloakon aijo' memang totu'u, kadaka' beleyum mohapa' Aku?”

²⁴Lapas aijo' i Hanas nompokaumo mian momboa i Yesus hau-haunyo pinungu nu lante' nokiijo' hi Imam Daka' i Kayafas.

²⁵I Simon Petrus daagi' aijo' tinjo-tinjo minjohu. To mia-mian notatae hi ia, “Te misa' beleyum suele anu saja' mombatuki mian aijo'?” Panyo i Petrus nombahakon, koonyo, “Misa'!”

²⁶Samian na posaihon nu imam daka', aijo'mo julu mae nu mian anu bihingnyo sinandingakon i Petrus notatae, “Te misa' aku nontoa beleyum i tampat sisinu'anan kau' bunga-bunga anu lewa-lewa' basanaangan no'imboa tiba Ia?”

²⁷Lantas i Petrus po'ule' nombahakon, “Madi',” — ka' madi' sala' tempo'nyo aitu manuk nintutuhu'mo.

²⁸Subu-subu hondo aha nomboa i Yesus lengkat mae laigan i Kayafas namba i laigan nu gubernur. To mia-mian nu Yahudi madi' ninsoop i uno nu laigan daka', da aha madi' mahenyu susumo koonyo nu agama, kalana aha kahanda'mo mongkaan kaanon nu Paskah.

²⁹Kalana aitu i Pilatus nosabat nokiijo' hi aha ka' nompokilawa, “Apaa na kasala'annyo sahingga komiu mongkalakmo mae mian aiya?”

³⁰Aha nontaami, “De Ia madi' ko sala'nyo, kami madi' nomboa mae Ia hi kita Tuumangku Gubernur.”

³¹I Pilatus notatae hi aha, “Alamo na Ia ka' putusimo na palakala-Nyo, susumo koonyo nu posi atulan miu!” Panyo to mia-mian nu Yahudi aijo' nontaami, “Kami madi' timbali mohukum mate mian.” (

³² Aiya timbali da ganapmo apaa na anu tinaloakon i Yesus mongkona bau-baunyo Ia silaka.)

³³I Pilatus po'ule' ninsoop i laigan ka' nolaga i Yesus, lantas nompokilawa, “Pa' totu'u Beleyum Tomundo' nu mian Yahudi?”

³⁴I Yesus nontaami, “Pa' posi pikilanum na mompokilawa aiya kabai mian sangga'at anu nompoto'imo hi beleyum mongkona Aku?”

³⁵I Pilatus nontaami, “Te aku aiya mian nu Yahudi? Anu nomboa mae Beleyum hi belengku, posi sangko bansa-Um tiba to kapa-kapala nu imam. Apa na anu binaumo nu Beleyum?”

³⁶I Yesus notatae, “Kalaja'an-Ku misa' lengkat i dunia aiya. Maluannyo kalaja'an-Ku lengkat i dunia aiya, to mia-mian-Ku tantu tionyo montinjohi da Aku boli obee' hi anu mongkuasai Yahudi. Panyo memang kalaja'an-Ku misa' lengkat i dunia aiya!”

³⁷Lantas i Pilatus nompokilawamo hi Ia, “Desumo aitu Beleyum tomundo'?” I Yesus nontaami, “Beleyum notatae, Aku aiya tomundo'! Aku i hampe ka' tinoka i dunia daagi' ko sa'angu' na kahanda' aijo'mo mombee'i katalangan mongkona kahondoan. Mian anu lengkat mae i kahondoan aijo' mohongo Aku.”

³⁸I Pilatus nompokilawa hi Ia, “Apaa na poso'nyo nu kahondoan?” Lantas i Pilatus po'ule' nosabat lengkat i laigan aijo' ka' notatae hi to mia-mian nu Yahudi, “Aku madi' nohumpak sa'angu' pe'e na kasala'an hi Ia.

³⁹Panyo anu biasa hi komiu, aku saja' molapasakon samian na anu o talungku' i Sinaa Daka' Paskah. Mongka'oho' na komiu da ku polapasmo na tomundo' nu Yahudi da komiu sanangmo?”

⁴⁰Aha nontaami molo-moloboo', “Madi', boli na Ia, panyo i Barabas!” (I Barabas mian anu saja' batololang.)