Read Saluan YOHANES 21 Bible Online

YOHANES 21 - Saluan bible

YOHANES 21

¹Lapas aijo' i Yesus po'ule' mule' nompotoa butongnyo i Dowiwi Tiberias hi anu saja' mombatuki Ia. Sumo uuka na jinadi:

²Ko sansinaan i Simon Petrus, i Tomas anu osanggohi Hapi, i Natanael lengkat mae i Kana i tano' Galilea, ana-anak i Zebedeus, ka' ua'aha na anu saja' mombatuki Yesus sangga'at hau-haunyo sinilimu'mo.

³ Koonyo i Simon Petrus hi sangga'at, “Aku ka'oho' mamba mompagala ikan.” “Kami mombatuk,” na koonyo nu aha hi ia. Aha namba sinumake' i duangan. Panyo sinampahu aitu aha madi' nohumpak apa-apaa.

⁴Salatan sinaa nontampu'unimo mae bete', i Yesus tinuminjo i biwi nu bone', panyo madi' sinumbu' nu aha taalu' aijo' i Yesus.

⁵I Yesus notatae hi aha, “Ana-anak, pa' komiu ko ikan?” “I madi',” na koonyo nu aha.

⁶ I Yesus notatae hi aha, “Sambuangakon na buani' miu sasu koanan nu duangan da komiu mohumpak ikan.” Balo buani' aijo' sinambuangakon nu aha. Panyo madi'mo pinoko hela' nu aha kalana manjoo' hondo na ikan i unonyo.

⁷Anu saja' mombatuki nunu kalibosi i Yesus notatae hi Petrus, “Aijo'mo na Tumpu!” Salatan i Simon Petrus nohongo taalu' aijo' i Tumpu, ia nompusok baju'nyo (kalana ia madi' nimbaju') balo nalalumpat nokaiyong i uee.

⁸Anu saja' mombatuki sangga'at binabosemo nokiijo' i katano'an, ka' nohela' buani' nobuke'mo nu ikan. Aha madi' talalo majo'on lengkat i katano'an, kila-kila ola sa'atu na meten.

⁹Salatan aha nilalobosmo mae lengkat i duangan, aha nontoa daagi' ko oba nu apu kiijo' mae ka' ikan aita' i bawonyo ka' roti.

¹⁰I Yesus notatae hi aha, “Soba boamae na ikan to pia-piambatu anu sala'je binuani miu.”

¹¹I Simon Petrus nasasawe' i duangan balo nohela' buani'nyo nokiijo' i katano'an. Buani' aijo' nobuke' nu ikan to daka-daka'; iwi-iwi' sa'atu limampulu' na angu'annyo. Panyo mau mule' sumo aijo' na konjoo'nyo, buani'nyo madi' nobeak.

¹²I Yesus notatae hi aha, “Imbo' da mongkaan.” Madi' ko samian pe'e na anu saja' mombatuki Ia baani mompokilawa, “Ihe na Kita Tuuma?” Kalana nusumbu' nu aha Ia aijo' Tumpu.

¹³Lapas aijo' i Yesus nongohani aha, ingalanyo na roti aijo' ka' binee'nyo hi aha. Sumo aitu mule' na Ia nombee' ikan aijo'.

¹⁴Aiyamo na ko pintolunnyo i Yesus nompotoa butongnyo hi anu saja' mombatuki Ia, salatan Ia po'ule'mo tinumuu' lengkat i kasilakan-Nyo.

¹⁵Noko kaan na aha, i Yesus notataemo hi Simon Petrus, “Simon anak i Yona, apaa beleyum lebe mongkalibosi Aku, molingkudui pongkalibosi nu aha aiya hi beleng-Ku?” “Totu'u, Kita Tumpu,” tinaaman i Petrus. “Nu sumbu' nu Kita Tumpu na aku mongkalibosi Kita Tumpu.” I Yesus notatae hi ia, “Palakaiyakon na to ana-anak nu dombang-Ku.”

¹⁶Kopinduannyo i Yesus nompokilawa hi ia, “Simon anak i Yona, apaa beleyum mongkalibosi Aku?” “Totu'u, Kita Tumpu,” tinaaman i Petrus. “Nu sumbu' nu Kita Tumpu na aku mongkalibosi Kita Tumpu.” I Yesus notatae hi ia, “Palakaiyakon na to domba-dombang-Ku.”

¹⁷Kopintolunnyo i Yesus nompokilawa hi ia, “Simon anak i Yona, apaa beleyum mongkalibosi Aku?” I Petrus tinongkolibosonmo, kalana i Yesus nompokilawa hi ia sampe pinintolunmo. Sahingga i Petrus po'ule' nontaami, “Kita Tumpu, Kita Tumpu na monsumbu' iwi-iwi'. Nu sumbu' nu Kita Tumpu na aku mongkalibosi Kita Tumpu!” Lantas i Yesus notatae hi ia, “Palakaiyakon na domba-dombangku.

¹⁸Totu'u hondo na potataeng-Ku aiya: Tempo'nyo beleyum daagi' olitau, posi beleyum na mombutu' kompongum, ka' mamba pa' moya na nu kahanda'i. Panyo de beleyum langkai'mo, beleyum montajuakonmo limaum, ka' mian sangga'at na mompungu beleyum, ka' momboa beleyum hi anu madi' nu ka'ima'i na kalambanan.”

¹⁹(Tiba potatae aijo' i Yesus nompoto'imo mosia na i Petrus silaka saidi' mae mompopodaka' Tumpu.) Lapas aijo' i Yesus notatae hi Petrus, “Batuki mae na Aku!”

²⁰Salatan i Petrus nosiloi, ia nontoa i hikunyo anu saja' mombatuki nunu kalibosi Yesus. (Iamo na anu sinumuhang oha-ohani Yesus tempo'nyo nongkaan, ka' anu nompokilawa hi Ia, “Ihe na saidi' mae monguwesani Tumpu?”)

²¹Nontoa ia, i Petrus nompokilawa hi Yesus, “Kita Tumpu, mosia na mian aiya?”

²²I Yesus nontaami, “Maluannyo Ku kahanda'i ia satumuu'nyo sampe Aku toka, aijo' misa' ponsumbu'anum. Panyo beleyum batuki mae na Aku!”

²³Sahingga tinogilele hi anu saja' mombatuki Yesus, au' aitu anu saja' mombatuk madi' silaka. Padahan i Yesus madi' nontaloakon anu saja' mombatuki aijo' madi' silaka. Ola ahi', “Maluannyo Ku kahanda'i ia satumuu'nyo sampe Aku toka, aijo' misa' ponsumbu'anum.”

²⁴Anu saja' mombatuki aijo' na mombee'i katalangan apaa na anu tinimbalimo aiya. Iamo ahi' na nontulis. Ka' osumbu'to saba' apaa na anu tinaloakonnyomo aijo' totu'u.

²⁵Daagi' manjoo' na han sangga'at anu binau i Yesus. Maluannyo iwi-iwi' aijo' o tulis toto sa'angu', ku gantang madi' sampa' na tampat i dunia aiya anu moko ala mongisi kitab anu o tulis aijo'.