Read Saluan YOHANES 5 Bible Online

YOHANES 5 - Saluan bible

YOHANES 5

¹Lapas aijo' daagi' ko lamean nu Yahudi, sahingga i Yesus nambamo i Yerusalem.

²I Yerusalem koko “Sabatan nu Domba,” daagi' ko sa'angu' na talaga de i basa' nu Ibrani osanggohi Betesda. I kiijo' daagi' ko lambingnyo olima'.

³I lambingnyo haha aijo' da'isan na mian masakit sika-sika male'; daagi' ko anu mapisok, daagi' ko anu pengko', daagi' ko anu kapi'. [Aha iwi-iwi' montanda'i uee nu talaga aijo', mokokembong.

⁴Kalana toto minsan malaikat nu Tumpu mintatau' i talaga aijo' ka' mongkembong ueenyo. Ka' mian masakit anu momona makakiop i talaga aijo' de ueenyo mokokembongmo tionyo ma'alin mau mule' panyakit apaa na o'oa'i.]

⁵I Tampat aijo' daagi' ko samian na mo'ane anu masakit tolumpulu'mo ka' ualu' na taun na kopinnyo.

⁶I Yesus nontoa ia male-male' aijo' mae, ka' Nusumbu' ia pininmo hondo na nasakit; lantas i Yesus nompokilawa hi ia, “Beleyum mongka'oho' ma'alin?”

⁷Mian masakit aijo' nontaami, “Kita Tuumangku, madi' ko mian aiya anu montaka' aku mokiijo' mongkiobakon i talaga, de ueenyo mokokembongmo. Ka' hau-haunyo aku mokiijo' i talaga, mian sangga'at polo'mo i moona na makakiop.”

⁸Saba' i Yesus notatae hi ia, “Bulamo, hangkat na ampasum ka' lajangmo.”

⁹Tempo' aitu lajangmo na'alin na mian aijo'. I hangkatnyo na ampasnyo ka' i lumajang. Han aijo' tinimbali kakona i sinaa nu Sabat.

¹⁰ Kalana aijo' anu mongkuasai Yahudi notatae hi mian anu sala'je na'alin aijo'. “Sinaa aiya sinaa nu Sabat. Beleyum madi' timbalimo hangkat ampasum.”

¹¹Panyo mian aijo' nontaami, “Mian anu nompa'alinmo aku u'uka na nompokau aku noki hangkat ampasku ka' lumajang.”

¹²“Ihe na nompokau beleyum mohangkat ampasum ka' lumajang?” pinokilawa nu aha.

¹³Panyo mian anu na'alinmo aijo' madi' monsumbu' pa' ihe na Ia, kalana i Yesus madi'mo tinoa i totonga' nu mian da'isan aijo'.

¹⁴Lapas aijo' i Yesus siningkabotmo tiba mian aijo' i uno nu Laigan nu Tumpu, ka' notatae hi ia, “Uuka aiya beleyum ma'alinmo. Bolimo po'ule' baladosa' da boli mongoa'i anu lebe ma'idek.”

¹⁵Lantas inamba na mian aijo' ka' nompoto'i hi anu mongkuasai Yahudi, tukoonyo i Yesus na nompa'alin ia.

¹⁶Ka' kalana aijo' aha nontampu'unimo monguesani Yesus, kalana Ia nompa'alin i sinaa nu Sabat.

¹⁷Panyo i Yesus notatae hi aha, “Tuumang-Ku saja' bakalaja toka-toka tempo' uuka, ka' Aku mule' suele mokalaja.”

¹⁸Potatae aijo' nombau aha anu mongkuasai Yahudi lebe molio jalan da mompatei Ia. Aha mombau sumo aijo', misa' ola kalana Ia molanggai atulan nu agama mongkona sinaa nu Sabat, panyo mule' kalana Ia notatae tukoonyo Tumpu aijo' Tuuma-Nyo; alati'nyo Ia mompokakanakon Tumpu tiba butong-Nyo.

¹⁹I Yesus nontaami mian haha aijo' sumo uuka, “Palesayamo, Anak madi' moko ala mombau apa-apaa de ola posi kuasanyo. Ia ola mombau apaa na anu tinoa-Nyomo binau nu Tuuma-Nyo. Kalana apaa na anu binaumo nu Tuuma, aijo'mo suele na nubau nu Anak.

²⁰Kalana Tuuma mongkalibosi Anak, ka' mompotiju' hi Ia iwi-iwi' apaa na anu pinosi bau-Nyomo. Aitu pe'e Tuuma mompotiju'je hi Ia hahan anu lebe daka' mule', sahingga komiu bangang.

²¹Tuuma aijo' po'ule' mompotumuu' mian mate, ka' mombee'i aha kantumuu'an anu talakana' ka' toka sidu-sidutu'; sumo aitu mule' Anak mombee'i kantumuu'an sidu-sidutu' hi mian anu nuka'oho' Nubee'i kantumuu'an.

²²Posi Tuuma pe'e madi'mo momputusi hukuman mau mule' pa' hi he. Iwi-iwi' na kuasa momputusi hukuman binee'nyomo hi Anak-Nyo.

²³Nubau nu Tuuma sumo aijo' da iwi-iwi' na mian mongadati Anak sumo aha mongadati Tuuma. Mian anu madi' mongadati Anak, madi' suele mongadati Tuuma anu nonsai mae Anak.

²⁴Totu-totu'u hondo na anu Kutaloakon aiya; mian anu mongintomakon potataeng-Ku, ka' palesaya hi Ia anu nonsai mae Aku, ko kantumuu'an anu talakana' ka' toka sidu-sidutu'. Ia madi' o hukum, ia nolapasmo lengkat i kapatean ka' nohumpakmo kantumuu'an.

²⁵Palesayamo: Tokaje na tempo'nyo — aitu pe'e tinokamo na tempo'nyo — mian mate mohongo potatae nu Anak nu Tumpu. Ka' mian anu mohongo Ia tumuu'.

²⁶Sumo Tuuma pinolengkatan nu kantumuu'an, Ia suele mompotimbali Anak-Nyo polengkatan nu kantumuu'an.

²⁷Ia nombee'mo hi Anak-Nyo hak momputusi hukuman, kalana Ia Anak nu Mian.

²⁸Boli komiu bangang na mohongo han aiya, kalana tokaje na tempo'nyo saba' iwi-iwi' na mian anu natemo mohongo potatae-Nyo,

²⁹ lantas mosabat lengkat mae i pinolamunan. Mian anu nombaumo anu ma'ima', saidi' mae po'ule' mobula da tumuu'. Panyo mian anu nombaumo anu ma'idek, saidi' mae po'ule' tumuu' da o hukum.”

³⁰“Aku madi' moko ala mombau apa-apaa de ola posi pongka'oho'-Ku. Aku ola momputusi hukuman sumo anu pinalentahkonmo nu Tumpu. Ka' kaputusan-Ku adin, kalana Aku madi' mombatuki posi pongka'oho'-Ku, panyo o ala i pongka'oho' nu Tuuma anu nonsai mae Aku.

³¹De Aku mombee'i katalangan mongkona posi butong-Ku, katalangan aijo' madi' timbali opalesaya.

³²Panyo daagi' ko mian sangga'at anu nombee'i katalangan mongkona Aku, ka' Kusumbu' na anu tinalangkannyo aijo' totu'u.

³³ Komiu nonsaimo mian namba hi Yohanes, ka' ia nombee'imo katalangan anu totu'u mongkona Aku.

³⁴Han aijo' pinoto'ing-Ku, misa' kalana Aku mompalalui katalangan lengkat hi mian, panyo da komiu oposalamat.

³⁵I Yohanes aijo' sumo sulu' anu moak ka' monjingkai. Madi' pin na komiu sanang montalima jingkanyo aijo'.

³⁶Panyo anu tinalangkan-Ku lebe daka' molingkudui anu tinalangkan i Yohanes. Apaa na anu Kubau uuka aiya, aijo'mo na kalaja anu pinokauhakon nu Tuuma hi beleng-Ku, bau pomponyata' saba' Tuuma nompokaumo mae Aku.

³⁷ Ka' Tuuma anu nonsai mae Aku, suele mombee'imo katalangan mongkona Aku. Komiu ma'isa toho' nohongo potatae-Nyo kabai nontoa butong-Nyo.

³⁸Potatae-Nyo madi' una-una' i uno nu kinyonyoaum kalana komiu madi' palesaya hi beleng-Ku anu sinai-Nyo mae.

³⁹Komiu mompakalioi Kitab nu Tumpu kalana monsangka au'aitu desumo aijo' komiu ko kantumuu'anmo anu talakana' ka' toka sidu-sidutu'. Ka' posi Kitab nu Tumpu aijo' nombee'imo katalangan mongkona Aku.

⁴⁰Panyo komiu madi' mongka'oho' toka hi beleng-Ku da mohumpak kantumuu'an sidu-sidutu'.

⁴¹Aku madi' molio da o puji' nu mian.

⁴²Kusumbu' na komiu. Kusumbu' na komiu madi' mongkalibosi Tumpu i uno nu kinyonyoaum.

⁴³Aku tinoka kalana kuasa nu Tuumang-Ku, panyo komiu madi' montalima Aku. Panyo de mian sangga'at na toka posi kuasanyo, komiu mongka'oho' montalima ia.

⁴⁴Mosia na komiu timbali palesaya, de komiu molio da o puji' nu bubu komiu ka' madi' bala usaha molio pompuji' anu lengkat mae hi Tumpu, anu ola-olamo Ia na Tumpu?

⁴⁵Boli monsangka Aku mompisala'i komiu i ahop nu Tuuma. Ola ahi' anu mompisala'i komiu, aijo'mo i Musa, ia na anu otaha'imani miu.

⁴⁶De komiu palesaya hi Musa. Komiu tantu palesaya hi beleng-Ku. Kalana mongkonamo Aku na tinulisnyo.

⁴⁷Panyo de komiu madi' palesaya hi anu tinulis i Musa, mosia na komiu timbali palesaya hi anu Ku taloakon?”