Read Saluan YOHANES 6 Bible Online

YOHANES 6 - Saluan bible

YOHANES 6

¹Madi' pinin ilapas aijo', i Yesus nambamo i santoa nu Dowiwi Galilea, anu biasa osanggohi Dowiwi Tiberias.

²Salatan tinokamo i kiijo' da'isan na mian nombatukimo Ia, kalana aha nontoamo anu okabangangi binau-Nyo, i nompa'alin to mia-mian masakit.

³I Yesus nindako nokiita' i bungkutnyo, lantas sinumuhang i kiita' mae tiba anu saja' mombatuki Ia.

⁴Tempo'nyo aitu ohanimo na Sinaa Daka' nu Paskah Yahudi.

⁵Salatan i Yesus nontoa titikub, Ia nontoa mian nomomuyutmo mae toka hi Ia. Sahingga Ia notatae hi Filipus, “Iyamae na timbali pongolianto anu okaan da iwi-iwi' na mian aiya timbali mongkaan?” (

⁶Sinumbu'mo i Yesus apaa na anu ka'oho' Nubau, panyo Ia notatae sumo aijo' kalana Ia mongka'oho' monguji' i Filipus.)

⁷I Filipus nontaami, “Roti anu olinyo ola ua'atu na doi salaka madi' mompoosampa' obagi-bagi hi mian haha aiya, mau mule' toto samian ola mohumpak sangkiding.”

⁸Daagi' ko samian anu saja' mombatuki Yesus sangga'at, aijo'mo i Andreas, utus i Simon Petrus, notatae,

⁹“I aiya daagi' ko anak mo'ane, ko rotinyo olima' ka' uambatu na ikan. Panyo apaa na alati'nyo aijo' toka hi mian anu sumo aiya na ko da'isannyo?”

¹⁰“Pokau na mian haha aijo' sumuhang,” koonyo i Yesus. I tampat aijo' manjoo' na hemput, jadi mian haha aijo' sinumuhangmo i hemput — iwi-iwi' daagi' kila-kila olima' na madala na mian, to momo'ane.

¹¹Lapas aijo' i Yesus nongala roti aijo' lantas nompoita talima kaseh hi Tumpu. Lapas aijo' binagi-bagiakonnyomo na roti aijo' hi mian da'isan. Lapas aijo' mule' Ia nombagi-bagiakonmo ikan aijo', sampe na'osa na aha nongkaan.

¹²Salatan iwi-iwi' nobosumo na nongkaan, i Yesus notatae hi anu saja' mombatuki Ia, “Limu' na labi nu anu kinaan haha aijo'; boli sampe ola o idei.”

¹³Lantas ilimu' nu aha sampulu' ka' ohua' na kalanjang nobuke', labinyo nu anu olima' na roti kinaan nu mian da'isan aijo'.

¹⁴Salatan tinoa nu mian da'isan na anu okabangangi binau i Yesus, aha notataemo, “Totu'u aiyamo na Nabi anu ota-otanda'i toka i dunia!”

¹⁵Nusumbu' i Yesus na aha toka mompakisa Ia da timbalimo tomundo nu aha. Aijo' na sababnyo Ia inamba nompalaiyakon butong-Nyo i bungkutnyo.

¹⁶Salatan sinaa montampu'unimo malom, anu saja' mombatuki Yesus nintudunmo nokaiyong i dowiwi.

¹⁷Lantas aha sinumake'mo i duangan motaapmo i dowiwi aijo' mokiijo' i Kapernaum. Sinaa i nalomo, panyo i Yesus ma'isa pe'e tinoka hi aha.

¹⁸Hau-haunyo aijo' dowiwi montampu'unimo bokolon kalana mombun makansang hondo.

¹⁹Tonga-tonga'mo aha talabut kila-kila olima' kabai anommo na kilometen, aha nontoamo i Yesus monsolok mae duangan lumajang i bawo nu uee. Aha nabuhukmo hondo.

²⁰Panyo i Yesus notatae hi aha, “Boli mabuhuk, Aku na aiya!”

²¹Lantas sinanangmo na kinyonyoa nu aha nontalima Ia i uno nu duangan, ka' tempo'nyo aijo' mule' duangan nu aha tinokamo i tampat anu o panjolongi.

²²Dodododopnyo mian da'isan anu daagi' kiijo' i santoa nu dowiwi monsumbu' tukoonyo u'uka ola sa'angu' na duangan aijo' mae. Nusumbu' nu aha anu saja' mombatuki Yesus nambamo sinumake' i duangan aijo', padahan i Yesus madi' nombatuk.

²³Lapas aijo' daagi' ko to pia-piangkuka na duangan lengkat mae i kota Tiberias tinoka nadaduak koko tampat nu mian da'isan aijo' nongkaan roti salatan ilapas na Tumpu nompoita talima kaseh.

²⁴Salatan mian da'isan aijo' nontoa taalu' i Yesus ka' anu saja' mombatuki Ia madi' ko anu i kiijo', aha suele sinumake' i duangan haha aijo' ka' inamba i Kapernaum molio i Yesus.

²⁵Tempo'nyo mian haha aijo' siningkabotmo tiba i Yesus i santoa nu dowiwi, aha nompokilawa hi ia, “Kita Tuumangku Gulu', naipian mae na Kita Tuuma tinoka i aiya?”

²⁶I Yesus nontaami, “Totu'u, komiu molio Aku, misa' kalana komiu nonsumbu'mo alati'nyo nu anu okabangangi binaung-Ku, panyo kalana komiu nobosumo na nongkaan.

²⁷Boli mokalaja de ola da mohumpak anu okaan anu timbali mingkot ka' mawa'i. Bakalaja da pohumpakan anu okaan, anu madi' toho' mawa'i ka' anu mombee'i kantumuu'an anu talakana' ka' sampe toka sidu-sidutu'. Anu okaan aijo' nubee'je nu Anak Mian hi beleyum, kalana Ia i hangkatmo nu Tumpu, Tuuman-To.”

²⁸Lantas pinokilawa nu aha hi Ia, “Apaa na anu tionyo obau mami da montuluti pongka'oho' nu Tumpu?”

²⁹I Yesus nontaami, “Aiya na anu nukahanda'i nu Tumpu hi komiu: Palesayamo hi Ia anu sinai mae nu Tumpu.”

³⁰“Desumo aitu,” koonyo nu aha, “bukuti' apaa na anu timbali obee'to nu kita Tuuma da kami nontoa ka' palesaya hi kita Tuuma? Apaa na anu obaunto kita Tuuma?

³¹ Mompolee' mami mongkaan manna i padang bolaa sumo anu tinulis i uno nu Kitab nu Tumpu, ‘Ia nompokaan aha roti lengkat mae i suluga'.’ ”

³²Lantas i Yesus notatae hi aha, “Palesayamo: Misa' i Musa, panyo Tuumang-Kumo na anu nombee'i komiu roti anu sahondo-hondonyo lengkat mae i suluga'.

³³Kalana roti anu binee' nu Tumpu aijo'mo ia anu nintatau' lengkat mae i suluga' ka' mombee'i kantumuu'an hi mian i dunia.”

³⁴“Kita Tuuma,” na koonyo nu aha, “saja' obee'i mae na kami roti aijo'.”

³⁵“Akumo na roti anu mombee'i kantumuu'an,” tukoonyo i Yesus hi aha. “Mian anu toka hi beleng-Ku madi'mo mompo'ule' mo'ohop sidu-sidutu'. Ka' anu palesaya hi beleng-Ku madi'mo mompo'ule' megot sidu-sidutu'.

³⁶Panyo sumo anu tinaloakon-Kumo hi beleyum, mau mule' komiu nontoamo Aku, komiu madi' palesaya.

³⁷Iwi-iwi' mian anu binee'mo nu Tuuma hi beleng-Ku, toka hi beleng-Ku. Madi' Aku mongkangkang mau pe'e ihe na anu toka hi beleng-Ku.

³⁸Kalana Aku nintatau' mae lengkat i suluga', misa' mombau anu posi pongka'oho'ku, panyo pongka'oho'-Nyo nu anu nonsai mae Aku.

³⁹Ka' aiya na kahanda'-Nyo nu anu nonsai mae Aku: Da iwi-iwi' na mian anu binee'mo hi beleng-Ku, madi' ko samian pe'e na molapus; panyo da po'ule' Kupotumuu' na aha i Sinaa Kakiamatan.

⁴⁰Memang aiyamo na nuka'ima'i nu Tuumang-Ku: Da iwi-iwi' na anu montoa Anak ka' palesaya hi Ia ko kantumuu'an anu talakana' toka sidu-sidutu', ka' po'ule' Kupotumuu' i Sinaa Kakiamatan.”

⁴¹To mia-mian nu Yahudi nontampu'unimo mompisala'i Yesus, kalana Ia notatae: “Aku roti anu nintau' mae lengkat i suluga'.”

⁴²Aha notatae, “Te misa' aiya i Yesus, anak i Yusuf? Osumbu' mami na tina ka' tuuma-Nyo! Te mosia ka' Ia timbali motatae tukoonyo, Ia nintatau' mae lengkat i suluga'?”

⁴³Lantas i Yesus notatae hi aha, “Boli mompisala'i.

⁴⁴Madi' ko samian pe'e moko ala toka hi beleng-Ku, de Tuuma anu nonsai mae Aku madi' nomboa mae ia hi beleng-Ku; ka' ihe na toka po'ule' Kupotumuu' i Sinaa Kakiamatan.

⁴⁵ I Uno nu Kitab nu to Nabi-nabi tinulis sumo uuka, ‘Iwi-iwi' na mian nu pogulu' nu Tumpu.’ Jadi iwi-iwi' na mian anu mohongo Tuuma ka' balagulu' hi Ia, toka mae hi beleng-Ku.

⁴⁶Aijo' misa' alati'nyo au'aitu daagi' ko mian anu nontoamo Tuuma. Ola Ia anu tinoka lengkat mae hi Tumpu na anu nontoamo Tuuma.

⁴⁷Osumbu'mo: Mian anu palesaya na ko kantumuu'an anu talakana' toka sidu-sidutu'.

⁴⁸Akumo na roti anu mombee'i kantumuu'an.

⁴⁹Mompolee' miu nongkaan manna i padang bolaa, ka' aha i natemo ahi'.

⁵⁰Panyo madi' sumo aijo' na roti anu nintatau' mae lengkat i suluga'; mian anu mongkaan roti aijo' madi' mate.

⁵¹Akumo na roti nintatau' mae lengkat i suluga' — roti anu mombee'i kantumuu'an. Mian anu mongkaan roti aiya tumuu' sidu-sidutu'. Roti anu Kubee' da bau kantumuu'an nu mian i dunia aijo'mo butong-Ku.”

⁵²Nohongo aijo', to mia-mian nu Yahudi pinainggagamo samian ka' samian. “Mosia na mian aiya timbali mombee' butong-Nyo hi kita da okaan?” tukoonyo nu aha.

⁵³Lantas i Yesus notatae hi aha, “Palesayamo: De komiu madi' mongkaan butong Anak nu Mian ka' monginum baso'-Nyo, komiu totu-totu'u madi' tumuu'.

⁵⁴Mian anu mongkaan butong-Ku ka' monginum baso'-Ku ko kantumuu'an talakana' ka' toka sidu-sidutu', ka' po'ule' Ku potumuu' i Sinaa Kakiamatan.

⁵⁵Kalana butong-Ku totu-totu'u anu okaan, ka' baso'-Ku totu-totu'u anu o inum.

⁵⁶Mian anu mongkaan butong-Ku ka' monginum baso'-Ku tataap mosa'angu' tiba Aku, ka' Aku tiba ia.

⁵⁷Tuuma anu tumuu' aijo' nonsai mae Aku, ka' Aku mule' tinumuu' kalana i Tuuma. Sumo aitu mule' na mian anu mongkaan butong-Ku, tumuu' kalana Aku.

⁵⁸Aiyamo na roti anu nintatau' mae lengkat i suluga': misa' roti sumo anu kinaan nu mompolee' miu. Kalana noko kaan roti aijo', aha i natemo. Panyo mian anu mongkaan roti aiya, tumuu' sampe toka sidu-sidutu'.”

⁵⁹Iwi-iwi' aijo' tinaloakon i Yesus tempo'nyo Ia nompogulu' i uno nu laigan pogalejaan i Kapernaum.

⁶⁰Noko hongo potatae i Yesus aijo', da'isan na anu saja' mombatuki Ia nontaloakonmo, “Pokinde' aiya talalo maboat. Ihe na moko ala montalima!”

⁶¹Nusumbu' i Yesus na anu saja' mombatuki Ia mososon mongkona han aijo'. Sahingga Ia notatae, “Te komiu mongkakulangakonmo potataengku aijo'?

⁶²Pa' mosia na katimbaliannyo saidi' mae de komiu montoamo Anak nu Mian moliba'mo minsusule' i tampat pinolengkatan-Nyo mae?

⁶³Anu nompotimbali mian tumuu' aijo'mo Roh nu Tumpu. Kahosonan nu mian madi' ko kaliangannyo. Potatae anu Ku taloakon hi komiu aiya, aijo'mo na potatae nu Roh nu Tumpu ka' potatae anu mombee'i kantumuu'an.

⁶⁴Panyo daagi' mule' ko anu aiya hi komiu na madi' palesaya.” (Sinumbu'mo i Yesus salatanmo pe'e imoonanyo ihehe na anu madi' mongka'oho' palesaya, ka' ihe na anu mongkabisa'i Ia.)

⁶⁵Lantas i Yesus po'ule' notatae, “Aijo' na sababnyo Ku poto'i hi komiu, saba' madi' ko samian pe'e moko ala toka hi beleng-Ku de madi' nupobee' nu Tuuma.”

⁶⁶Lengkat pe'e tempo' aijo' manjoo' na anu saja' mombatuki Ia nompala'imo Ia, ka' madi'mo nongka'oho' po'ule' mombatuki Ia.

⁶⁷Lantas i Yesus nompokilawa hi sampulu' ka' ohua' na anu saja' mombatuki Ia, “Pa' komiu suele mompala'imo Aku?”

⁶⁸ “Kita Tumpu,” na koonyo i Simon Petrus hi Ia, “Hi ihe na kalambanan mami? Potatae nu Kita Tumpu mombee'i kantumuu'an anu talakana' ka' toka sidu-sidutu'.

⁶⁹Kami pinalesayamo totu-totu'u, kalana i Tumpumo na anu susi' sinai mae lengkat hi Tumpu.”

⁷⁰I Yesus nontaami, “Te misa' Aku na nompile'i komiu sampulu' ohua' na mian aiya? Panyo samian anu aiya hi komiu te roh anu ma'idek!”

⁷¹Anu nunu patui nu potatae i Yesus, aijo'mo i Yudas anak i Simon Iskariot. Kalana mau mule' i Yudas minsoop sala' samian anu sampulu' ka' ohua' na anu saja' mombatuki Yesus, ia na mongkabisa'i Yesus.