Read Saluan YOHANES 8 Bible Online

YOHANES 8 - Saluan bible

YOHANES 8

¹Panyo i Yesus nambamo nokiita' i Bungkut nu Zaitun.

²Dodododopnyo subu-subu Ia namba mule' i Laigan nu Tumpu, ka' da'isan na mian tinokamo hi Ia. I Yesus sinumuhang, lantas nontampu'unimo nompogulu' aha.

³Hau-haunyo aijo' to gulu-gulu' agama ka' to mia-mian nu Farisi nomboamo mae hi Ia samian na boune anu tinokaan masala'. Aha nonsai boune aijo' tinuminjo i totonga',

⁴lantas notatae hi Yesus, “Kita Tuumangku Gulu', boune aiya tinokaan hau-haunyo masala'.

⁵ I Uno nu Atulan i Musa daagi' ko atulan, saba' boune anu susumo aiya tionyo opahambunu'akon nu batu sampe mate. Desumo aiya mosia na pikilanto nu Kita Tuuma?”

⁶Aha nompokilawa sumo aijo' da monsobai Ia, da timbali na aha mompisala'i Ia. Panyo i Yesus ola dinumuku ka' lima-Nyo nontulis i tano'.

⁷Salatan aha saja'mo nompokau, Ia tinolo dingang, ka' notatae, hi aha, “Mian anu madi' baladosa' atina' hi komiu, ia na moona mombunu'akon batu hi boune aijo'.”

⁸Lapas aijo' i Yesus po'ule' dinumuku i tano' ka' po'ule' nontulis.

⁹Salatan nohongo i Yesus nontaloakon sumo aijo', i nambamo na aha nompala'i tampat aijo' toto samian lengkat pe'e i anu lebe motu'amo. Ahennyo i Yesus me sausa'nyo i kiijo' tiba boune anu daagi' tinjo-tinjo i katinjoannyo.

¹⁰Lantas i Yesus tinolo dingang ka' notatae hi boune aijo', “Iyamo na aha iwi-iwi'? Madi' ko anu nohukum beleyum?”

¹¹“Madi', Kita Tuuma,” na koonyo. “Ma'ima'mo,” na koonyo i Yesus, “Aku suele madi' mohukum beleyum. Uuka aiya lako'mo ka' bolimo mombau dosa' mule'.”]

¹² I Yesus binasisik mule' hi mian da'isan tukoo-Nyo, “Akumo na jingka nu dunia. Mian anu mombatuki Aku, madi' lumajang i pintung, panyo mohumpak jingka kantumuu'an.”

¹³ “Uuka Beleyum mombee'i katalangan mongkona posi butongum,” koonyo nu to mia-mian Farisi haha aijo' hi Ia, “Katalangan-Um madi' totu'u.”

¹⁴I Yesus nontaami, “Mau mule' Aku mombee'i katalangan mongkona posi butong-Ku, katalangan-Ku aijo' totu'u; kalana Ku sumbu' na pinolengkatan-Ku mae ka' moya na kalambanan-Ku. Komiu madi' monsumbu' lengkat mae iya na Aku tinoka ka' moya na Aku mamba.

¹⁵Komiu momputusi palakala nu mian sumo baunyo nu mian momputusi; Aku madi' momputusi palakala nu samian pe'e.

¹⁶Panyo de Aku momputusi palakala nu mian, pomputusing-Ku aijo' adin, kalana Aku madi' ola posi sausa': Tuuma anu nonsai mae Aku mo'imboa tiba Aku.

¹⁷I uno nu Atulan i Musa tinulis sumo uuka: Katalangan anu totu'u aijo'mo katalangan anu ua'aha na mian.

¹⁸Anu mombee'i katalangan mongkona butong-Ku ua'aha — Aku ka' Tuuma anu nonsai mae Aku.”

¹⁹“Tuuma-Um aijo' iyamae?” na koonyo nu aha. I Yesus nontaami, “Komiu madi' monsumbu' Aku, sumo aitu mule' Tuumang-Ku. De komiu monsumbu' Aku, tantu komiu suele monsumbu' Tuumang-Ku.”

²⁰Iwi-iwi' aijo' tinaloakon i Yesus tempo'nyo aitu Ia hau-haunyo nompogulu' i Laigan nu Tumpu, koko tampat nu doi anu o sombahkon. Panyo madi' ko samian pe'e na anu mohakop Ia, kalana misa' pe'e toka na tempo'nyo.

²¹I Yesus notatae mule' hi aha, “Aku mambaje, ka' komiu molioje Aku, panyo komiu mateje i uno nu dosa' miu. I tampat kalambanan-Ku madi' opoko toka miu.”

²²Saba' anu mongkuasai Yahudi notatae, “Ugaat Ia mongka'oho'mo minoo', kalana Ia nontaloakonmo, ‘I tampat kalambanan-Ku madi' opoko toka miu.’ ”

²³Lantas i Yesus notatae hi aha, “Komiu lengkat mae i aluknyo; panyo Aku lengkat mae i bawo. Komiu lengkat mae i dunia; Aku misa' lengkat mae i dunia.

²⁴Mokonyo aijo', Aku notatae hi komiu tukoong-Ku, komiu mateje i uno nu dosa-dosa' miu. Ka' memang mateje i uno nu dosa-dosa' miu, de madi' mompalesaya ‘Akumo na Ia, anu osa-osanggohi AKU DAAGI'.’ ”

²⁵“Ihe ahi' totu-totu'u na beleyum?” pinokilawa nu aha. I Yesus nontaami, “Te daagi' bau apaa na basisik tiba komiu!

²⁶Daagi' manjoo' na anu mongkona komiu, anu Ku paisisikakon ka' Ku pisala'i. Panyo Ia anu nonsai mae Aku timbali o palesaya. Ka' Aku nompoto'imo i dunia apaa na anu ihongong-Ku lengkat mae hi Ia.”

²⁷Aha madi' mangalati', saba' Ia hau-haunyomo motatae hi aha mongkona Tuuma.

²⁸Kalana aijo' i Yesus notatae hi aha, “Saidi' mae de komiu mohangkatmo tangka-tangkas Anak nu Mian, osumbu'je miu ‘Akumo aiya na Ia anu osa-osanggohi AKU DAAGI'’, ka' osumbu'je miu saba' madi' ko sa'angu' pe'e na anu Kubau lengkat i posi butong-Ku. Aku ola montaloakon apaa na anu pinogulu'mo nu Tuuma hi beleng-Ku.

²⁹Ka' Ia anu nonsai mae Aku daagi' poja-pojajalan tiba Aku. Ia madi' toho' mompojohok Aku sausa', kalana Aku saja' mombau apaa na anu momposanang kinyonyoa-Nyo.”

³⁰Pinoko taloakon i Yesus na iwi-iwi' aijo', da'isan na mian pinalesayamo hi Ia.

³¹Lapas aitu i Yesus notataemo hi to mia-mian Yahudi anu pinalesayamo hi Ia, “De komiu tumuu' mombatuki pokinde'-Ku, komiu totu-totu'u anu saja' mombatuki Aku.

³²Sahingga komiu monsumbu' Tumpu anu totu'u, ka' kalana aijo' komiu o pobebasje.”

³³ “Kami aiya lee' i Abraham,” na koonyo nu aha, “Ma'isa toho' kami binotuanan pa' ihe! Apaa na poso'nyo nu potatae-Um, ‘Komiu o pobebasje’?”

³⁴“Totu'u hondo na potataeng-Ku aiya,” koonyo i Yesus hi aha, “Mian anu mombau dosa', atina' botuan nu dosa'.

³⁵Ka' samian na botuan madi' ko tampat anu tataap i uno nu sampoto utusan, sadaang anak na ko tampat ahi' sidu-sidutu' hi sampoto utusan.

³⁶Kalana aijo', de Anak mompobebas komiu, komiu totu-totu'u bebas.

³⁷Memang Kusumbu' komiu aiya lee' i Abraham. Panyo komiu kahanda' mompatei Aku, kalana komiu madi' montalima pokinde'-Ku.

³⁸Apaa na anu tinoang-Kumo hi Tuumang-Ku, aijo'mo na anu Ku taloakon. Sadaang komiu mombau apaa na anu pinogulu'akon nu tuuma miu hi komiu.”

³⁹Aha nontaami, “Tuuma mami aijo'mo i Abraham.” “De totu-totu'u komiu anak i Abraham,” na koo-Nyo i Yesus, “tantu komiu mombau apaa na anu binau i Abraham.

⁴⁰Aku mompotokakon hi komiu kahondoan anu ihongong-Kumo lengkat mae hi Tumpu, panyo komiu kahanda'mo mompatei Aku. I Abraham madi' nombau sumo aijo'!

⁴¹Komiu mombau apaa na anu binau nu posi tuuma miu.” Tinaaman nu aha, “Kami misa' ana-anak bule. Tuuma mami ola sa'angu', aijo'mo samata-mata Tumpu.”

⁴²Lantas i Yesus notatae hi aha, “De Tumpu aijo' Tuumaum, komiu tionyo mongkalibosi Aku, kalana Aku tinoka mae lengkat hi Tumpu. Aku madi' tinoka kalana posi pongka'oho'ku, panyo Ia anu nonsai mae Aku.

⁴³Apaa na sababnyo komiu madi' mangalati' hi anu Ku taloakon? Kalana komiu madi' moko ala mombatuki ajalan-Ku.

⁴⁴Ibilis na tuuma miu, ka' komiu mongka'oho'mo mombatuki kahanda' nu tuuma miu. Lengkat pe'e imoonanyo Ibilis aijo' saja'mo nompatei. Ia madi' toho' mosambiha' i kahondoan, kalana madi' ko kahondoan hi ia. De ia baleko', aijo' pantas, kalana sumo aijo'mo na sipatnyo. Ia baleko' ka' pinolengkatan nu leko'.

⁴⁵Panyo Aku montaeakon kahondoan, ka' kalana aijo' komiu madi' palesaya hi beleng-Ku.

⁴⁶Ihe na anu atina' hi komiu moko ponyata' daagi' ko dosa' hi beleng-Ku? De Aku montaeakon kahondoan, kadaka' komiu madi' palesaya hi beleng-Ku?

⁴⁷Mian anu nolengkat mae hi Tumpu, mohongo potatae nu Tumpu. Panyo komiu misa' lengkat mae hi Tumpu, mokonyo aijo' komiu madi' mongka'oho' mohongo.”

⁴⁸To mia-mian nu Yahudi aijo' nontaami, i Yesus, “Te misa' totu'u na potatae mami, Beleyum mian nu Samaria anu pininsoopanmo nu setan?”

⁴⁹I Yesus nontaami, “Aku madi' pininsoopan nu setan. Aku mongadati Tuumang-Ku, panyo komiu mompopo'ise' Aku.

⁵⁰Aku madi' molio da o'adati na posi butong-Ku. Daagi' ko samian anu mongusahakon da o'adati na Aku, ka' Iamo na momputusi anu sala'.

⁵¹Totu'u hondo na potataeng-Ku aiya, mian anu mombatuki potataeng-Ku, sidu-sidutu' madi' mate.”

⁵²Lantas to mia-mian nu Yahudi aijo' notatae hi Yesus, “Uuka sinumbu'mo mami, Beleyum aiya totu-totu'u pininsoopanmo nu setan! I Abraham pe'e natemo, sumo aitu na nabi iwi-iwi'. Panyo Beleyum motatae, ‘Mian anu mombatuki potataeng-Ku, sidu-sidutu' madi' mate.’

⁵³De i Abraham pe'e i natemo ka' to nabi-nabi iwi-iwi' suele i natemo, Beleyum aiya ihe? Te Beleyum mule' na lebe daka'molingkudui tuuma mami i Abraham!”

⁵⁴I Yesus nontaami, “De Aku molio da o'adati na butong-Ku, pongadati aijo' madi' ko kaliangannyo! Anu mongadati Aku aijo'mo Tuumang-Ku anu osa-osanggohi Tumpu,

⁵⁵padahan komiu madi' monsumbu' Ia. Panyo Aku monsumbu' Ia. De Aku motatae Aku madi' monsumbu' Ia, tantu Aku samian na anu baleko' pokakana sumo komiu. Aku monsumbu' Ia ka' mohongo-hongo potatae-Nyo.

⁵⁶Tuumaum i Abraham sanang hondo kalana ia montoaje sinaa anu tinantukanmo hi beleng-Ku. Ia nontoamo ka' ia sinanangmo!”

⁵⁷Lantas to mia-mian nu Yahudi notatae hi Yesus, “Umun Nu Beleyum ma'isa pe'e limampulu' na taun, ka' Beleyum nontoamo i Abraham?”

⁵⁸I Yesus nontaami, “Totu'u na anu Ku taloakon hi komiu: ma'isa pe'e i hampe na i Abraham, Aku polo-polo'mo daagi'.”

⁵⁹Lantas to mia-mian nu Yahudi aijo' nontoluk batu bau pombunu'-Nyo; panyo i Yesus naninsulukmo, lantas nambamo nompala'i Laigan nu Tumpu.