Read Saluan YOHANES 9 Bible Online

YOHANES 9 - Saluan bible

YOHANES 9

¹Tempo'nyo i Yesus i lumajang, Ia nontoamo mian anu mapisok salatanmo pe'e i hampe.

²Anu saja' mombatuki Yesus nompokilawamo hi Yesus, “Kita Tuumangku Gulu', kadaka' na mian aiya i hampeakon mapisok? Ugaat kalana ia na baladosa' kabai kalana tina tuumanyo na baladosa'?”

³I Yesus nontaami, “Ia mapisok misa' kalana dosa'nyo, kabai dosa' nu tu'anyonyo, panyo da mian montoa kuasa nu Tumpu anu nokalaja i uno nu butongnyo.

⁴De daagi' ko sinaa, kita tionyo mombau hia-Nyo nu anu nonsai mae Aku. De malom tokamo, samian pe'e madi'mo moko ala mokalaja.

⁵ De Aku daagi' i dunia aiya, Akumo na jingka nu dunia aiya.”

⁶Noko potatae sumo aijo', i Yesus nintupe' i tano', ka' ginalo'-Nyo na tupe' tiba tano'. Lapas aijo' pinokelakonnyomo hi mata nu mian aijo', lantas notataemo hi Ia,

⁷“Lako'mo baso'i na ohupum i Talaga Siloam.” (Siloam alati'nyo, ‘Sinai’.) Sahingga mian aijo' inamba nompi ohupi ohupnyo. Salatan ia ninsusule'mo mae, ia noko alamo nontoa.

⁸Sampo ohani laigannyo tiba to mia-mian anu daagi' nontoa ia napisok lewa' ba'ita', iwi-iwi' notatae, “Te misa' ia aiya mian anu ola saja' sumuhang ka' lewa' ba'ita'?”

⁹Daagi' ko anu notatae, “Memang ia.” Panyo daagi' mule' ko anu notatae, “Misa' ia, ola monsasuhi sumo mian aijo'.” Panyo posi mian aijo' na notatae, “Akumo na ia.”

¹⁰“Mosia na tinimbali sampe beleyum noko ala nontoa?” na koonyo nu aha hi ia.

¹¹Ia nontaami, “Mian anu sanggonyo i Yesus aijo' na nombau ise-ise' na hensek, lantas nongkelakon i matangku ka' notatae, ‘Lako'mo pi'ohupi na ohupum i Talaga Siloam.’ Lantas aku inamba. Ka' salatan pini ohupankumo na ohupku, aku noko alamo nontoa.”

¹²“Iyamo na mian aijo'?” pinokilawa nu aha. Ia nontaami, “Beilako'.”

¹³Sinaa aijo' sinaa nu Sabat tempo'nyo i Yesus nonggalo' tano' ka' tupe'-Nyo pompotimbali mian mapisok aijo' da timbali montoa. Sahingga mian anu u'ukanyo mapisok binoa hi to mia-mian nu Farisi.

¹⁵Aha suele nompokilawa hi ia, mosia ka' ia timbali noko ala nontoa. Ia nontaami, “Ia nongkelakon hensek i matangku, lantas pini ohupanku sahingga aku noko alamo nontoa.”

¹⁶To pia-pingkuka na mian nu Farisi haha aijo' notatae, “Madi' bisa mian anu nombau aiya nolengkat mae hi Tumpu, kalana Ia madi' mompajuli sinaa nu Sabat.” Panyo mian sangga'at notatae, “Iya na timbali mian anu baladosa' mombau anu okabangangi sumo aiya?” Lantas tinimbali painggagaan hi posi-posi aha.

¹⁷Sahingga nompokilawa mule' hi mian aijo' na to mia-mian nu Farisi, “Mosia na hi beleyum pikilan mongkona Ia anu nompotimbalimo beleyum noko ala nontoa?” “Ia nabi,” na koonyo nu mian aijo'.

¹⁸Panyo to pola-polaya' nu Yahudi aijo' madi' mongka'oho' palesaya, de mian aijo' salatan pe'e imoonanyo memang mapisok, ka' uuka timbalimo noko ala nontoa. Kalana aijo' aha nolaga tu'anyonyo,

¹⁹ka' nompokilawa, “Totu'u aiya anakum anu kokooyum i hampe mae mapisok? Mosia ka' ia noko alamo nontoa uuka?”

²⁰Tina Tuuma nu mian aijo' nontaami, “Memang aiya anak mami; ka' ia memang mapisok salatanmo pe'e i hampe.

²¹Panyo nosia na ia ka' noko alamo nontoa uuka aiya, kami madi' monsumbu'. Ka' ihe na nompotimbali ia noko alamo nontoa aijo', kami mule' madi' monsumbu'. Pokilawamo hi ia, ia tu'amo; nu posi taamije.”

²²Tina Tuuma nu mian aijo' notatae sumo aijo', kalana aha mabuhuk hi to pola-polaya' nu Yahudi; kalana aha aijo' sinambukumo, tukoonyo mian anu mongakui Yesus Tomundo anu Momposalamat, madi'mo daagi' timbali minsoop i laigan pogalejaan.

²³Mokonyo aijo' tina tuuma nu mian aijo' notatae, “Ia tu'amo; pokilawamo hi ia.”

²⁴Lantas aha po'ule' nolaga mian anu u'ukanyo mapisok aijo' ka' notatae hi ia, “Basumpa' da beleyum motatae anu sahondo-hondonyo. Osumbu' mami mian aijo' mian baladosa'.”

²⁵“Pa' Ia baladosa' kabai madi',” tinaaman nu mian aijo', “aku madi' monsumbu'. Panyo sa'angu' na han kusumbu'; u'utu mae aku mapisok, uuka aiya aku nontoamo.”

²⁶Lantas aha po'ule' mule' notatae, hi ia, “Apaa na binau-Nyo hi beleyum? Mosia na Ia nompotimbali beleyum da nontoa?”

²⁷Mian aijo' nontaami, “Noko sisikkumo hi komiu, panyo komiu madi' mongka'oho' mohongo. Kadaka' komiu po'ule' mule' mongka'oho' mohongo? Ugaat komiu kahanda' suele da timbali anu saja' mombatuki Ia?”

²⁸Lantas ingudulan nu aha na ia ka' notatae, “Oko na anu saja' mombatuki Ia; kami misa'! Kami anu mombatuki i Musa.

²⁹Osumbu' mami saba' Tumpu notataemo hi Musa. Panyo mongkona mian aijo', madi' osumbu' mami pa' iyamae na pinoleng katan-Nyo.”

³⁰Mian aijo' nontaami, “Madi' minsoop i akan de madi' osumbu' miu na pinolengkatan-Nyo, sadaang Ia nompotimbalimo aku da noko ala nontoa.

³¹Osumbu'to saba' Tumpu madi' mohongo mian baladosa', panyo mian anu mongangga'i Tumpu, ka' mombau pongka'oho'-Nyo.

³²Salatanmo pe'e dunia ma'isa toha kinahongoan; daagi' ko mian nompotimbali mian anu i hampe mapisok noko ala nontoa.

³³De misa' mian aijo' lengkat mae hi Tumpu, Ia madi' moko ala mombau apa-apaa.”

³⁴Tinaaman nu aha, “Apaa? Beleyum anu nobuke'mo nu dosa' salatanmo pe'e i hampe, beleyumo na mongka'oho' mompogulu' kami?” Sahingga lengkat i aitu ia tinewa'mo minsoop i laigan pogalejaan.

³⁵I Yesus nohongo aha nonsabatakonmo mian aijo' i laigan pogalejaan. I lionyo na mian aijo' ka' notatae hi ia, “Pa' nu palesaya na Anak nu Mian?”

³⁶Mian aijo' nontaami, “Ihe na Ia, Tuan? Tulungi poto'iakon da aku palesayamo hi Ia.”

³⁷“Beleyum nontoamo Ia,” tinaaman i Yesus, “Iamo na anu u'uka aiya hau-haunyo basisik tiba beleyum.”

³⁸“Aku palesaya, Tumpu,” koonyo nu mian aijo', lantas nonsombah i ahop hi Yesus.

³⁹I Yesus notatae, “Aku toka i dunia aiya kahanda' momputusimo da mian anu mapisok timbali montoa, ka' anu moko ala montoa timbalimo mapisok.”

⁴⁰To pia-piangkuka mian nu Farisi anu daagi' kiijo' nohongomo i Yesus notatae sumo aijo', lantas aha nompokilawamo hi Ia, “Pongka'oho'-Um da kami suele aiya mapisok?”

⁴¹I Yesus nontaami, “De komiu mapisok, komiu madi' baladosa'. Panyo kalana komiu notataemo, ‘Kami nontoamo,’ aijo' alati'nyo, komiu daagi' baladosa'.”