Read Saluan SISIKON NU TO RASUL-RASUL 13 Bible Online

SISIKON NU TO RASUL-RASUL 13 - Saluan bible

SISIKON NU TO RASUL-RASUL 13

¹I uno nu jama'at Antiokhia, daagi' ko nabi-nabi ka' to gulu-gulu', aitumo i Barnabas ka' i Simeon, anu o sanggohi mule' Si Hitam, i Lukius lengkat mae i Kirene, i Menahem anu pinotuu' hingga-hinggat i Tomundo Herodes, ka' i Saulus.

²Tempo'nyo aha hau-haunyomo mogaleja hi Tumpu ka' bapuasa', Roh nu Tumpu notatae hi aha, “Pile'imo na i Barnabas ka' i Saulus, da mokalaja hi beleng-Ku da aha mokalaja anu tinantukankumo hi aha.”

³Ilapas binapuasa' ka' binalado'a aha nompotiik lima i buan nu ubak hi Barnabas ka' hi Saulus lantas nonsai aha ohu-ohua'.

⁴Kalana sinai nu Roh nu Tumpu, i Barnabas ka' i Saulus namba nokiijo' i Seleukia. Lengkat kiijo' mae aha tinalabutmo nokiijo' i togong Siprus.

⁵Salatan tinoka i Salamis, aha nompolelemo potatae nu Tumpu Allah i to lai-laigan pogalejaan nu Yahudi. I Yohanes Markus nontulungi aha i uno nu lumambanan nu aha.

⁶Songko-songko na togong aijo' i lajangan nu aha tinoka-toka i Pafos. Kiijo' mae aha nompahakabot tiba mian nu Yahudi samian sanggonyo i Bar Yesus. Ia monsumbu' ilimu' anu mongakui butongnyo nabi.

⁷I Sergius Paulus, gubernur nu togong aijo', atina'mo na mosangalu hondo tiba anu monsumbu' ilimu' aijo'. Gubernur aijo' samian anu sukup na kapandeannyo. Ia nolaga i Barnabas ka' i Saulus, kalana ia ka'oho' mohongo potatae nu Tumpu.

⁸Panyo i Barnabas ka' i Saulus ginagakon i Elimas anu monsumbu' ilimu' aijo', kalana i Elimas (aijo'mo na sanggonyo i uno nu bansa nu Yunani) bala usaha da gubernur aijo' boli sampe palesaya hi Yesus.

⁹Panyo i Saulus — anu o sanggohi mule' i Paulus — kinuasanmo nu Roh nu Tumpu, sahingga ia nontonto'i anu monsumbu' ilimu' aijo',

¹⁰lantas notatae, “He, anu talalo baleko', anu talalo ma'idek! Beleyum sampo bali' nu hahan anu ma'ima'. Kadaka' beleyum madi' mongka'oho' belenti na mongidei kahanda' nu Tumpu anu momposalamat mian?

¹¹Uuka aiya toa, Tumpu mohukummo beleyum! Beleyum timbali mapisok, sampe beleyum to pia-pian sinaa madi' moko ala montoa jingka nu sinaa.” Tempo'mo aitu na i Elimas nongoa'i daagi' ko seehu' anu mo'itom mohuhubi matanyo, sahingga ia lumajang mahakawan molio mian da montaka' ia.

¹²Salatan gubernur aijo' nontoa apaa na anu jinadimo, ia pinalesayamo hi Yesus; kalana ia bangang hondo i pangajalan mongkona Tumpu.

¹³Lengkat i Pafos, i Paulus ka' to sanga-sangalunyo tinalabutmo nokiijo' i Perga da'erah Pamfilia. I kiijo' i Yohanes, Markus nompala'imo aha, ka' ninsusule'mo i Yerusalem.

¹⁴Lengkat i Perga, aha nolausakonmo lumambanan nokiijo' i Antiokhia i Pisidia, lapas aitu i sinaa nu Sabat aha nambamo sinumuhang i uno nu laigan pogalejaan.

¹⁵Salatan Kitab i Musa ka' Kitab nu to nabi-nabi binasa'akon, to pola-polaya' i laigan pogalejaan aijo' nonsai mian mompokilawa hi Paulus ka' to sanga-sangalunyo, “To utu-utus, de kita utus ko pokinde apa-apaa hi to mia-mian aiya, ku poita da mompotokamo pokinde' aijo'.”

¹⁶I Paulus balo tinuminjo, lantas nombee'i tanda nu limanyo, lapas aijo' notataemo, “To utu-utusku bansa Israel ka' iwi-iwi' na to utu-utus sangga'atannyo i aiya anu mohongo-hongo Tumpu! Soba hongo na aku:

¹⁷ Tumpu bansa Israel nompile'imo mompolee'to, ka' nompotimbalimo bansa aiya bansa anu daka' tempo'nyo aha jinojoong i Mesir salaku mian anu isalipu'an. Lapas aitu tiba kuasa anu daka' Tumpu nomboa aha nosabat lengkat i Mesir.

¹⁸ Sinabaanakonnyo na mongkona kalakuan nu aha i padang bolaa patompulu' na taun na kopinnyo.

¹⁹ Popitu' na bansa ginalisan-Nyo i lipu' Kana'an da o bagi-bagi na lipu' aijo' hi bansa Israel da lipu' aijo' timbalimo anu nu aha.

²⁰ Iwi-iwi' aijo' pato atu limampulu' na taun na kopinnyo. Pinoko bagi na lipu' Kana'an aijo', Tumpu nombee'imo aha hakim-hakim. Hakim imihinyo aijo'mo i Nabi Samuel.

²¹ Lapas aitu aha nompoita samian na tomundo. Tumpu nombee'mo aha i Saul anak i Kis lengkat i bansa Benyamin da bau tomundo nu aha kinopinnyo patompulu' na taun.

²² Salatan Tumpu nompobelentimo ia i pangkatnyo, Tumpu Allah nongangkat mule' i Daud da timbali tomundo nu aha. Ka' aiyamo na anu tinaloakon nu Tumpu mongkona i Daud, ‘Aku nohumpakmo i Daud anak i Isai aijo' samian anu momposanang kinyonyoang-Ku. Iamo na mian anu mombau pongka'oho'-Ku.’

²³Lengkat i lee' i Daud aijo'mo na Tumpu nomposadiakon hi bansa Israel samian na Tomundo anu Momposalamat, sumo anu noko janji'-Nyomo. Ka' i Yesus aijo'mo na Tomundo anu Momposalamat.

²⁴ Ma'isa pe'e i Yesus nomulai nonjalanakon kalaja-Nyo, i Yohanes noko taeyakonmo hi to mia-mian Israel da aha balatobat bolimo mombau dosa' nu aha ka' o palamandikanmo.

²⁵ Ka' ohanimo mompomingkot kalajanyo, i Yohanes notatae hi to mia-mian, ‘De ponsumbu'an miu, ihe na aku aiya? Aku misa' Mian anu otanda-tanda'i miu. Inau', Mian aijo' tokaje lapas na aku; mombukai sapatu-Nyo pe'e aku madi' timbali.’

²⁶To Utu-utus lee' i Abraham, ka' iwi-iwi' to Utu-utus anu sangga'atannyo, i aiya anu mohongo hi Tumpu! Tumpu nompakatumo hi kita lele kasalamatan aijo';

²⁷kalana to mia-mian anu jojoong i Yerusalem ka' to pola-polaya' nu aha madi' monsumbu' saba' Iamo na anu momposalamat aijo'. Aha madi' mangalati' i sinaa nu Sabat, sahingga aha nohukum i Yesus. Panyo kalana mombau anu sumo aitu, ahamo na nonsabapi sahingga apaa na anu tinaloakon nu to nabi-nabi aijo' jinadimo.

²⁸ Maumo aha madi' nongkabot apa-apaa hi Ia anu tionyo o hukum nu hukuman mate, panyo pinoita nu aha hi Pilatus da Ia o pateimo.

²⁹ Ka' salatan ilapas na aha nombau iwi-iwi' anu noko tulismo i uno nu Kitab nu Tumpu mongkona Ia, aha nontauhakon bangke'-Nyo lengkat i kau' salib, lantas pino'una'nyomo na Ia i uno nu kubun.

³⁰Panyo Tumpu po'ule' nompotumuu' lengkat i kapatean-Nyo.

³¹ Lapas aitu sansina-sinaa na kopinnyo Ia toka mae mompotoa butongnyo hi to mia-mian anu tinokamo tiba Ia lengkat mae i Galilea mokiijo' i Yerusalem. Ahamo na anu tempo' uuka tinimbali to saki-sakisi-Nyo i bansa Israel.

³²Jadi, uuka aiya kami mompotokakon Lele Ma'ima' aijo' hi komiu: Apaa na anu jinanji'akonmo nu Tumpu hi mompolee'to,

³³ aijo' kinalaja'Nyomo hi kita tempo'nyo po'ule' nompotumuu' i Yesus lengkat i kapateannyo. Kalana i uno nu Mazmur anu ko ohua'nyo tinulismo, ‘Beleyum na Anak-Ku, i sinaa aiya Aku timbalimo Tuuma-Um.’

³⁴ Tumpu po'ule'mo nompotumuu' Ia i kapateannyo. Uuka Ia madi' daagi' mongoa'i kapatean i uno nu kubulan. Mongkona han aijo' Tumpu notataemo, ‘Aku mombee'je janji' susi' hi Belemiu anu tionyo o ganapi, anu noko janji'-Kumo hi Daud.’

³⁵ Sumo aitu mule' i uno nu ayat sangga'at tinaloakonmo, ‘Beleyum madi' mompojohok posaihonum anu tulu-tulutan aijo' mahutak i uno nu kubun.’

³⁶I Daud sinilakamo ka' kinubun mule' nohingga-hinggat tiba mompolee'nyo, noko bau na ia apaa na anu sinaiyakonmo nu Tumpu Allah. Bangke' i Daud suele nahutakmo ka' ningkotmo iwi-iwi'.

³⁷Panyo i Yesus, anu sinilakamo po'ule' pinotumuu' nu Tumpu Allah, i Yesus aijo' madi' ningkot nahutak.

³⁸Kalana aijo' to Utu-utus, tionyo ahi' komiu monsumbu', saba' hi Yesusmo aiya na lele mongkona dosa' o ampuni i leleakon hi komiu; komiu tionyo monsumbu' saba' toto samian anu palesaya hi Ia, opobebas i iwi-iwi' na dosa'nyo anu madi' opoko alini nu to pale-palentah nu Tumpu anu pinotoka i Musa.

³⁹

⁴⁰Aijo' na sababnyo komiu tionyo mompalahatikan ima-ima', boli sampe timbali hi komiu apaa na anu tinaloakon nu to nabi-nabi aiya,

⁴¹ ‘Palahatikan ima-ima', na komiu to mia-mian anu mongka'ima'i motatae anu moko kulang! Komiu bangang, lantas mate! Kalana tempo' uuka Aku hau-haunyo mombau apa-apaa anu madi' o palesaya miu, maupe'e daagi' ko mian anu monsisikakon hi komiu.’ ”

⁴²Tempo'nyo i Paulus ka' i Barnabas nompala'imo laigan pogalejaan aijo', to mia-mian i laigan pogalejaan aijo' nompoita aha po'ule' minsusule' mae i sinaa nu Sabat anu aiyamae ahop da mompaka sisikakon mongkona hahan aijo'.

⁴³Ilapas to mia-mian nosabat lengkat i laigan pogalejaan aijo', i Paulus ka' i Barnabas binatukanmo nu mian da'isan Yahudi ka' bansa sangga'at anu ninsoopmo agama Yahudi. Sahingga to rasul-rasul aijo' nompokinde'imo aha, da aha tionyo saja' montaha'imani balakat nu Tumpu.

⁴⁴Po'ule' mule' i sinaa nu Sabat iwi-iwi' na mian nu kota aijo' kinoboli' tinoka mohongo potatae nu Tumpu.

⁴⁵Salatan to mia-mian nu Yahudi nontoa mian da'isan aijo', nasakit hondo na kinyonyoa nu aha. Aha nompopo'ise'mo i Paulus ka' nonggagakonmo iwi-iwi' anu tinaloakonnyo.

⁴⁶Panyo i Paulus ka' i Barnabas nompaka baani mule' na notatae totu-totu'u. Aha notatae, “Potatae nu Tumpu memang hi komiu pe'e na tionyo pompotokan. Panyo kalana komiu madi' mongka'oho' montalima, komiu nosi tantukanmo saba' komiu madi' pantas montalima kantumuu'an kopian ka' toka sidu-sidutu'. Ka' uuka kami mompala'imo miu namba hi bansa sangga'at.

⁴⁷ Sabab aiyamo na palentah nu Tumpu hi kami; Tumpu notatae, ‘Aku nontantukanmo komiu timbali sa'angu' na jingka hi to mia-mian bansa sangga'at anu misa' Yahudi, da komiu mompotokakon kasalamatan i songko-songko na dunia.’ ”

⁴⁸Tempo'nyo to mia-mian bansa sangga'at anu misa' Yahudi nohongo aijo', aha sinanangmo hondo, lantas nompuji-puji'mo potatae nu Tumpu. Ka' to mia-mian anu tinantukanmo nu Tumpu da mohumpak kantumuu'an ma'ima' ka' sampe toka sidu-sidutu', mian haha aijo' pinalesayamo.

⁴⁹Potatae nu Tumpu mule' tinogilelemo iyayamae i songko-songko na da'erah aijo'.

⁵⁰Panyo to pangka-pangkat daka' i kota aijo', ka' to bouboune gampa nu aha to mia-mian anu ko pangkat matangkas anu mabuhuk hi Tumpu, sinale'anmo nu to mia-mian Yahudi. Aha nonsabapi da mo'uwali tiba hi Paulus ka' i Barnabas, ka' nolaa' ua-ua'aha mompala'i tano' aijo'.

⁵¹ Sahingga to rasul-rasul aijo' nonsapuimo abu' i tengke nu aha, i ahop nu to mia-mian aijo' bau tanda, lantas nambamo nokiijo' i Ikonium.

⁵²Anu saja' mombatuki kiijo' i Antiokhia i lame'mo hondo ka' kinuasanmo nu Roh nu Tumpu.