Read Saluan SISIKON NU TO RASUL-RASUL 14 Bible Online

SISIKON NU TO RASUL-RASUL 14 - Saluan bible

SISIKON NU TO RASUL-RASUL 14

¹I Paulus ka' i Barnabas nongoa'i mule' han anu pokakana i Ikonium. Aha namba mule' nokiijo' i laigan pogalejaan nu mian Yahudi ka' notatae i kiijo' na'ima' hondo sahingga da'isan na mian nu Yahudi ka' mian misa' Yahudi pinalesayamo hi Yesus.

²Panyo to mia-mian Yahudi anu madi' mongka'oho' palesaya, nonsale'imo to mia-mian misa' Yahudi, sahingga nonsabapimo aha mongka'ideki to mia-mian anu palesayamo hi Yesus.

³Kalana aijo' i Paulus ka' i Barnabas jinojoongmo pinin i kiijo'. Ka' binaanimo na aha notatae mongkona Tumpu. Sahingga Tumpu mule' nompotoamo bukuti', saba' lele anu pinotokamo nu aha mongkona liibos-Nyo aijo' memang totu'u; Ia nombee'i kuasa hi aha da mombau anu okabangangi ka' hahan anu ma'isa toho' tinimbali.

⁴Panyo to mia-mian anu jojoong i kota aijo' madi' pokakana na pikilan nu samian ka' sangga'at; daagi' ko anu mosambiha' hi to mia-mian Yahudi ka' daagi' ko anu mosambiha' hi to rasul-rasul aijo'.

⁵Lantas to mia-mian Yahudi tiba to pola-polaya'nyo no hingga-hinggat tiba mian anu misa' Yahudi nomposa'angu'mo tanga'an da monsakisa ka' mompahambunu'akonmo to rasul-rasul aijo' nu batu.

⁶Panyo to rasul-rasul aijo' nonsumbu'mo han aijo', lantas nalaimo nokiijo' i Listra ka' i Derbe, aijo'mo to kota-kota i Likaonia, ka' nokiijo'mo i da'erah anu mompaha ohani.

⁷I kiijo' mae aha nompolele mule' Lele Ma'ima' aijo'.

⁸I Listra daagi' ko samian na mo'ane anu tengkenyo kapi' salatan pe'e i hampe, sahingga ia madi' toho' moko ala lumajang, sabab tengkenyo talalo lundeng.

⁹Mian aijo', sinumuhang aijo' mae mohongo i Paulus notatae. I Paulus nontoa, mian aijo' palesaya ka' kalana aijo' ia pina'alinakon. Sahingga i Paulus nontonto'imo ia,

¹⁰ka' i Paulus notatae daka-daka', “Tinjomo hodi-hodi!” Mian aijo' nalalumpat tinuminjo lantas i lumajang.

¹¹Salatan mian da'isan nontoa apaa na anu binaumo i Paulus, aha noloboo' i uno nu basa' nu Likaonia, “To pilo-pilogot anu nintatau'mo mae i dunia ninsalungmo sumo mian.”

¹²Lantas i Barnabas sinanggohanmo nu aha i Zeus, ka' i Paulus sinanggohanmo nu aha i Hermes, sabab iamo na anu notatae.

¹³Imam nu pilogot nu Zeus anu laigan ponsombaan nu aha i ahop nu kota, tinoka nomboa mae to sapi-sapi' mo'anenyo ka' to bunga-bunga nokiijo' i sabatan daka' nu kota. Ia mongka'oho' mombatuki mian da'isan aijo' monsombahkon koloban hi to rasul-rasul aijo'.

¹⁴Salatan i Barnabas ka' i Paulus nohongomo apaa na anu ka' oho' obau nu to mia-mian aijo', aha nombea-beak baju' nu aha ka' nopadeka' nokiijo' i totonga' nu mian da'isan aijo', lantas noloboo',

¹⁵ “Ee, kadaka' komiu mombau aiya? Kami aiya mule' mian sumo-sumomo kita Utus! Kami toka aiya da mompolele Lele Ma'ima' hi komiu, da komiu mompala'i hahan anu madi' ko gunanyo aiya ka' toka hi Tumpu anu tumuu', anu nompotimbalimo langit ka' tano' ka' ambai ka' iwi-iwi' anu daagi' i unonyo.

¹⁶Tempo'nyo naipuan mae Tumpu nompojohokmo to bansa-bansa tumuu' mombatuki posi pongka'oho' nu aha.

¹⁷Panyo Ia madi' kinolilimannyo na nombee'i to buku-bukuti' mongkona butong-Nyo, aijo'mo nombau anu ma'ima'. Ia nombee'i beleyum ujan lengkat i langit ka' hasin nu tano' toka i loonunyo. Ia mombee'i kaanon hi komiu ka' momposanang kinyonyoa miu.”

¹⁸Panyo tiba potatae aijo' daagi' susa' ahi' na to rasul-rasul aijo' montewa' to mia-mian aijo' monsombahkon koloban hi aha.

¹⁹To pia-piangkuka na mian nu Yahudi anu tinoka nokiijo' i Listra lengkat mae i Antiokhia i Pisidia ka' lengkat i Ikonium monsale'i mian da'isan aijo', sahingga mian da'isan aijo' nosambiha'mo hi aha. Aha nompahambunu'akon i Paulus nu batu, lapas aijo' i hela' nu aha na ia nosabat nokiijo' i sambiha' nu kota. Aha nonsangka ia i natemo,

²⁰panyo salatan to mia-mian palesaya anu i kiijo' tinuminjo nontikubi ia, ia nobula ka' po'ule' ninsusule' nokiijo' i kota. Dodododopnyo ia nambamo nokiijo' i Derbe no hingga-hinggat tiba i Barnabas.

²¹Kiijo' i Derbe, i Paulus ka' i Barnabas nompolele Lele Ma'ima' aijo' ka' dina'isan na mian anu pinalesayamo hi Yesus. Lapas aijo' aha ninsusule'mo nokiijo' i Listra, lapas aitu nokiijo' i Ikonium, lantas nokiijo' i Antiokhia i da'erah Pisidia.

²²I kota-kota aijo' aha nompaka pohoson kinyonyoa nu anu saja' mombatuki Yesus ka' nompokinde'i anu saja' mombatuki aijo' da tataap palesaya hi Yesus. “Kita tionyo manjoo' na mongoa'i sansala i moonanyo, atina'je ka' kita mongoa'i ka'ima'an nu Dunia Bu'ou nu Tumpu,” sumo aitumo na to rasul-rasul aijo' mongajanakon hi anu saja' mombatuki Yesus i to kota-kota haha aijo'.

²³Ka' i toto sa'angu' na jama'at, i Paulus ka' i Barnabas nohangkatmo to pola-polaya' nu to jama-jama'at aijo'. Lantas binalado'a ka' binapuasa', aha nompotalima to pola-polaya' aijo' hi Tumpu anu nupalesaya nu aha aijo'.

²⁴Lapas aijo' i Paulus ka' i Barnabas nolausakonmo lajangan nu aha montulu i da'erah Pisidia ka' tinoka i Pamfilia.

²⁵Ka' noko polele na aha potatae nu Tumpu i Perga, aha nambamo nokiijo' i Atalia.

²⁶Lengkat i kiijo' aha po'ule'mo tinalabut ninsusule' nokiijo' i Antiokhia. Aijo'mo na kota tampat nu aha u'utu mae pinotalima hi balakat nu Tumpu, da aha mongkalajakon pakalaja'an anu uuka aiya pinoko kalajamo nu aha.

²⁷Salatan tinokamo i Antiokhia, aha momposihukmo to mia-mian lengkat i jama'at aijo', lantas nonsisikakonmo iwi-iwi' anu binaumo nu Tumpu anu pinotokakonmo nu aha. Aha suele nonsisikakonmo mosia na Tumpu nombaumo jalan da to mia-mian misa' Yahudi palesayamo hi Yesus.

²⁸I kota aijo' i Paulus ka' i Barnabas jinojoongmo pinin tiba to mia-mian anu palesayamo.