Read Saluan SISIKON NU TO RASUL-RASUL 15 Bible Online

SISIKON NU TO RASUL-RASUL 15 - Saluan bible

SISIKON NU TO RASUL-RASUL 15

¹ To pia-piangkuka na mian lengkat i Yudea tinoka kiijo' mae i Antiokhia ka' nongajan to mia-mian palesaya i Antiokhia aijo' tukoonyo de aha madi' o sunat susumo atulan i Musa, aha madi' timbali o posalamat.

²I Paulus ka' i Barnabas talalo hondo nonggagakon pongka'oho' nu to mia-mian aijo'. Ahennyo tinantukan da i Paulus ka' i Barnabas tiba to pia-piangkuka na mian sangga'at lengkat i Antiokhia mamba mokiijo' i Yerusalem da mombisalakon ulusan aijo' tiba to rasul-rasul ka' to pola-polaya' i kiijo' mae.

³Jama'at i Antiokhia nolaya' aha tinoka i sambiha' nu kota, lapas aijo' aha namba notulu i Fenisia ka' i Samaria. I kiijo' mae aha nonsisikakon mosia na to mia-mian anu misa' Yahudi nombee'mo butongnyo hi Tumpu. Lele aijo' talalo nompolame' to mia-mian anu palesaya i kiijo'.

⁴Salatan aha tinoka i Yerusalem, aha pinolabot ma'i-ma'ima' nu jama'at, ka' to rasul-rasul, tiba to pola-polaya'. Lantas aha nonsisikakon hi to mia-mian aijo' apaa na anu pinoto'imo nu Tumpu Allah iwi-iwi' aijo' hi aha.

⁵Panyo to pia-piangkuka na mian lengkat hi aha Farisi anu pinalesayamo, tinuminjo ka' notatae, “To mia-mian bansa sangga'at anu pinalesayamo aijo' tionyo o sunat ka' palalu mombatuki atulan i Musa.”

⁶Lantas to rasul-rasul ka' to pola-polaya' binala gombu da mombisalakon ulusan aijo'.

⁷ Pinin hondo na aha nompaha bebee'i tanga'an. I mihinyo i Petrus tinuminjo ka' notatae, “To Utu-utus! Posi komiu nonsumbu'mo saba' to pia-pia manga u'utu mae Tumpu nompile'imo aku lengkat atina' hi komiu da mompolele Lele Ma'ima' aijo' hi to mia-mian misa' Yahudi, da aha mule' mohongo ka' palesaya.

⁸ Ka' Tumpu anu monsumbu' kinyonyoa nu mian nompotiju'mo saba' ia montalima aha; Ia nombee'i Roh nu Tumpu Allah sumo anu binee'-Nyo hi kita suele da mompotiju' han aijo' hi kita.

⁹Tumpu montoa kita pokakana sumo aha. Ia nompobelesimo kinyonyoa nu aha, kalana aha palesaya.

¹⁰Yoh, apaa na sababnyo komiu mongkahanda'i mongewa Tumpu Allah tempo' uuka, kalana nombee'imo kalaja anu o bau ka' anu maboat hi anu saja' mombatuki aiya, padahan mompolee'to ka' posi kita mule' madi' moko ala mombau?

¹¹Panyo ola ahi' kita palesaya da kita nu posalamat kalana kalibosan nu Tumpu Yesus; sumo aitu mule' na aha.”

¹²Sahingga nomohokot na iwi-iwi' mian anu balagombu i kiijo'. Lapas aitu aha nompotombihingmo i Barnabas ka' i Paulus po'ule' nonsisik iwi-iwi' anu okabangangi ka' anu ma'isa toho' tinimbali anu binaumo nu Tumpu i uno nu kalaja nu aha kiijo' hi to mia-mian bansa sangga'at anu misa' Yahudi.

¹³Ilapas aha notatae, i Yakobus suele notataemo, “To utu-utus! Soba potombihing mae na aku.

¹⁴I Simon sala'je nontalangkan mosia na Tumpu momona-Nyo nompotoa, palahatian-Nyo hi to mia-mian anu misa' Yahudi, ko kahanda' mompile'i to mia-mian anu aijo' hi aha sangga'at da timbali mian anu palesayamo hi Ia.

¹⁵Aijo' kona tiba anu pinoto'imo nu to nabi-nabi. Kalana titinulis sumo uuka,

¹⁶ ‘Lapas aijo' Aku tokaje mule',’ koonyo nu Tumpu, ‘Aku po'ule'je mompotinjo laigan i Daud anu notua'mo, ka' mompokopiani anu na'idekmo, lantas po'ule' mompotinjo;

¹⁷da iwi-iwi' na mian anu tinasisa aijo' molio Tumpu, tiba iwi-iwi' bansa sangga'at anu misa' Yahudi anu i lagang-Kumo da timbalimo Aku na tumpunyo.’

¹⁸Sumo aitumo na koo-Nyo nu Tumpu, anu nompoto'imo han aijo' naipuan pe'e mae.”

¹⁹“Jadi de o ala i pongka'oho'ku,” koonyo i Yakobus, “kita madi' timbali monsusa'i to mia-mian misa' Yahudi aijo', anu mombee'mo butongnyo hi Tumpu.

²⁰ Panyo kita tionyo montulis sulat toka hi aha ka' mompokinde'i aha, da aha boli mongkaan kaanon anu mahenyu, anu sinombahkonmo hi pilogot, kabai mongkaan ponoha' anu natemo tinekok, kabai mongkaan baso'. Ka' mule' da aha mompojo'on butong lengkat i kalakuan-kalakuan anu ma'idek.

²¹Kalana atulan i Musa daagi' pe'e naipuan mae saja' o basa'akon toka i sinaa nu Sabat, i to lai-laigan pogalejaan, ka' pinolelemo i iwi-iwi' na kota.”

²²To rasul-rasul ka' to pola-polaya', nohingga-hinggat tiba iwi-iwi' mian anu ninsoopmo jama'at aijo' nomputusimo da mompile'imo to pia-piangkuka na mian anu kiijo' hi aha anu osai mamba mokiijo' i Antiokhia mohingga-hinggat tiba i Paulus ka' i Barnabas. Sahingga aha nompile'imo i Silas ka' i Yudas anu o sanggohi i Barsabas. Ua'aha na mian aiya, aitumo to mia-mian anu talasanggo ka' mian anu palesayamo kiijo' i Yerusalem.

²³Hingga-hinggat tiba anu sinai aijo', aha mule' nompakatumo sa'angu' na sulat anu onyi'nyo sumo uuka, “Toka hi iwi-iwi' na to utu-utus anu nolengkat mae i to bansa-bansa sangga'at anu misa' Yahudi, anu jojoong i Antiokhia, i Siria ka' i Kilikia. Salan do'a mami, to rasul-rasul, ka' to pola-polaya', aijo'mo to utu-utus miu.

²⁴Kami nohongo daagi' ko to pia-piangkuka na mian lengkat aiya hi kami anu nambamo hi komiu ka' nompotasiaga tiba nompobingungmo komiu nu to panga-pangajalan nu aha. Padahan kami madi' nonsai aha mombau aijo'.

²⁵Mokonyo aijo' kami binasale'mo ka' iwi-iwi' nonsetujuimo da mompile'i to pia-piangkuka na mian ka' nonsai aha mamba hi komiu. Aha mambaje mojajaalan tiba Utusto i Barnabas ka' i Paulus anu okalibosi kami.

²⁶Ua-ua'aha na mian aiya aitumo to mia-mian anu nomboto'akonmo nyawa nu aha kalana Tumpunto i Yesus Kristus.

²⁷Jadi, kami monsai i Yudas ka' i Silas mamba hi to Utu-utus. Posi ahamo na mompotokakon lele hi komiu anu suele tinulis i uno nu sulat aiya.

²⁸Roh nu Tumpu nonsetujuimo — ka' kami mule' suele setujumo — da komiu boli opokonai poitaon anu talalo maboat, molingkuduimo poitaon anu saimbanggan aiya:

²⁹Boli mongkaan kaanon anu pinosombahkonmo hi pilogot; boli mongkaan baso', boli mongkaan ponoha' anu tinekok, ka' patikojo'oni na to pala-palabuatan anu masala'. De komiu mompojo'on butong lengkat i hahan aijo', komiu nombaumo anu ma'ima'. Olamo pe'e sumo uuka, higahi mae!”

³⁰Salatan siniloloamo, aha anu sinai aijo' nambamo nokiijo' i Antiokhia. I kiijo' mae aha nolagamo iwi-iwi' na mian anu ninsoopmo i jama'at binala gombu lantas nompotokakon sulat aijo'.

³¹Salatan to mia-mian anu ninsoopmo i jama'at aijo' nombasa' sulat aijo', aha sinanang hondo i isi nu sulat aijo' anu nomposanangmo kinyonyoa nu aha.

³²I Yudas ka' i Silas anu suele nabi, pinin na notatae tiba to Utu-utus anu palesayamo kiijo' i Antiokhia kalana mongkakeha'i da baani na aha.

³³Salatan i Yudas ka' i Silas jinojoong kiijo' mae tino pia-pia manga na kopinnyo, to mia-mian anu palesayamo kiijo' i Antiokhia nonsaimo aha da minsusule'mo ka' mompokau aha da mompotokakon salan do'a hi to mia-mian anu nonsai mae aha. (

³⁴Panyo i Silas nomputusimo da tataapmo jojoong i Antiokhia.)

³⁵I Paulus ka' i Barnabas suele jinojoong tino pia-pia manga na kopinnyo i Antiokhia. I kiijo' mae aha nongajan ka' nompolele potatae nu Tumpu nohingga-hinggat tiba mian da'isan sangga'at.

³⁶Madi' pinin lapas aitu, i Paulus notataemo hi Barnabas, “Imbo' da kita po'ule' minsusule' mamba molenga to utu-utus anu pinalesayamo hi Yesus i songko-songko na kota anu pinompolelekantomo potatae nu Tumpu; da otoanto mosia na bau-baunyo nu aha.”

³⁷I Barnabas mongka'oho' momboa i Yohanes Markus,

³⁸ panyo i Paulus mongoa'i madi' ma'ima' na momboa i Markus, anu madi' mongka'oho' mokalaja hingga-hinggat tiba aha ka' nompala'imo aha kiijo' mae i Pamfilia.

³⁹Sahingga i Paulus ka' i Barnabas pinainggaga tala-talalomo hondo, sahingga i mihinyo aha noga'a-ga'atmo: I Barnabas nongala i Markus ka' tinalabut tiba ia nokiijo' i Siprus.

⁴⁰I Paulus nompile'imo i Silas lantas nambamo tiba ia, noko lapas na to Utu-utus anu i Antiokhia aijo' nompotalima aha i balakat nu Tumpu.

⁴¹Aha nontikubi Siria ka' Kilikia; i kiijo' mae aha nompokododomo to jama-jama'at.