Read Saluan SISIKON NU TO RASUL-RASUL 17 Bible Online

SISIKON NU TO RASUL-RASUL 17 - Saluan bible

SISIKON NU TO RASUL-RASUL 17

¹I Paulus ka' i Silas nolausakonmo lajang nu aha montulu i Amfipolis ka' i Apolonia lantas tinoka i Tesalonika. I kiijo' mae daagi' ko laigan pogalejaan nu mian Yahudi.

²Sahingga i Paulus suele namba nokiijo' i laigan pogalejaan aijo' — sumo anu biasa nubau de daagi' ko sa'angu' na laigan pogalejaan nu mian Yahudi — lantas nompaha buka-buka' pikilan tiba to mia-mian i kiijo' mongkona to aya-ayat Kitab nu Tumpu Allah. Ia nombau aijo' tolun sinaa i sinaa nu Sabat, madi' ko olotnyo.

³Mintoong i aya-ayat nu Kitab nu Tumpu, ia nompotalangakon ka' momponyata' saba' Tomundo' anu Momposalamat anu jinaji nu Tumpu palalu pe'e sansala ka' po'ule' tumuu' lengkat i kapatean. “I Yesus anu pinolelengku hi komiu aijo', Iamo na Tomundo' anu Momposalamat anu jinanji'akonmo,” koonyo i Paulus.

⁴To pia-piangkuka na mian pinalesayamo lantas mombatukimo i Paulus ka' i Silas; sumo aitu mule' manjoo' hondo na to mia-mian Yunani anu mabuhuk hi Tumpu, ka' da'isan suele na to bouboune anu talasanggo.

⁵Panyo to mia-mian Yahudi madi' sanang na kinyonyoa. Aha nolaga to mia-mian anu mahalajangan i jalan-jalan ka' nongatun posa'angu'an kalakuan anu ma'idek. Lantas aha nompokalangkabutmo songko-songko na kota aijo' ka' nompinsoopi laigan nu samian anu palesaya sanggonyo i Yason molio i Paulus, ka' i Silas, kalana aha ka'oho' momboa i Paulus ka' i Silas mosabat mangadap hi mian da'isan.

⁶Panyo salatan aha madi' nompahakabot i Paulus ka' i Silas, aha nohela' i Yason ka' to pia-piangkuka na mian palesaya sangga'atannyo nokiijo' i ahop nu to pangka-pangkat anu mongkuasai kota aijo'. Aha noloboo', “To mia-mian aiya mompokalangkabut iyaya mae! Uuka aiya kota'to suele i lambananmo mae nu aha,

⁷ka' i Yason nontalimamo aha i laigannyo. Aha iwi-iwi' nolanggaimo katantuan-katantuan i Kaisar nu Roma, kalana aha nontaloakon, koonyo daagi' ko tomundo' sangga'at anu sanggonyo i Yesus.”

⁸Tiba potatae haha aijo', aha nonsaduakonmo mian da'isan ka' anu mongkuasai kota' aijo' tinimbali i hengge' hondo.

⁹Lantas anu mongkuasai aijo' nompalentahmo i Yason ka' to mia-mian palesaya sangga'atannyo aijo' mombayan nu doi bau polugi'i. Ilapas aijo' atina'je ka' aha pinolapas.

¹⁰Pihi-pihi aitu to mia-mian palesaya i kota aijo' nompokaumo i Paulus ka' i Silas namba nokiijo' i Berea. Sinaintoka i kiijo', mae i Paulus ka' i Silas nambamo i laigan pogalejaan nu Yahudi.

¹¹To mia-mian i Berea madi' mompohowini apaa na anu i uno nu kinyonyoanyo, madi' pokakana to mia-mian i Tesalonika. Sanang hondo na kinyonyoa nu aha mohongo lele mongkona i Yesus, ka' toka nu sansina-sinaa aha monselidiki Kitab nu Tumpu, da nusumbu' nu aha pa' totu'u na pangajalan i Paulus aijo'.

¹²Da'isan na anu kiijo' hi aha pinalesayamo hi Yesus, ka' madi' sangkiding mule' na to mia-mian nu Yunani anu talasanggo pinalesayamo; mau boune, mau pe'e mo'ane.

¹³Salatan to mia-mian Yahudi i Tesalonika nohongomo saba' i Paulus nompolelemo suele potatae nu Tumpu i Berea, aha suele tinokamo i Berea monsale'i ka' nongkakeha'i to mia-mian i kiijo' da madi' sinanang.

¹⁴Lia-lia' na to utu-utus i Berea aijo' nomboa i Paulus nokiijo' i biwi nu bone', panyo i Silas ka' i Timotius tataap jinojoongmo i kota aijo'.

¹⁵Pinoko boa na i Paulus tinoka i Atena, to utu-utus aijo' po'ule'mo ninsusule' mae nokiijo' i Berea ka' nomboa potuunon i Paulus da i Silas ka' i Timotius mololoi'je mae ia lia-lia'.

¹⁶Hau-haunyo i Paulus montanda'i i Silas ka' i Timotius kiijo' i Atena, kinyonyoanyo molibos na montoa kota aijo' nobuke'mo nu to pilo-pilogot.

¹⁷Mokonyo aijo' i laigan pogalejaan, i Paulus nompaha buka-buka pikilan tiba to mia-mian nu Yahudi ka' to mia-mian sangga'atannyo anu monsombah Tumpu i kiijo'. Sumo aitu mule' i to pasar-pasar toka nu sansina-sinaa ia mompaha buka-buka' pikilan tiba batu-batu mian anu i kiijo'.

¹⁸To gulu-gulu' anu mombatuki pangajalan i Epikuros ka' mombatuki pangajalan i Stoa pinainggaga suele tiba ia. To pia-piangkuka lengkat hi aha notatae, “Apaa na nusumbu' nu mian aiya? Kapandeannyo ola sangkiding, panyo ia manjoo' na potatae!” To pia-piangkuka anu sangga'atannyo notatae, “Kugantang ia mompolele mongkona to pilo-pilogot nu bansa sangga'at.” Aha notatae sumo aitu, kalana i Paulus monsisik mongkona i Yesus ka' mongkona anu mate po'ule' tumuu'.

¹⁹Lantas aha nomboa i Paulus nokiijo' i pogombuan i Bungkut nu Areopagus. I kiijo' mae aha notatae hi ia, “Kami kahanda' monsumbu' pangajalan anu bu'ou anu pinolele nu beleyum aijo'.

²⁰Kalana beleyum montalangkan hahan anu o hongo madi' minsoop i akan i bihing mami. Mokonyo aijo', kami kahanda' monsumbu' alati'nyo.” (

²¹Kalana iwi-iwi' mian nu Atena ka' to mia-mian salipu'an anu jojoong i kiijo' mongka'ima'i hondo mongingkoti tempo' anu madi' ko anu obau nu aha da mohongo ka' motatae mongkona hahan anu daagi' bu'ou.)

²²Tempo'nyo i Paulus tinuminjo i ahop nu to mia-mian anu binala gombu i Areopagus aijo', i Paulus notatae, “O, to mia-mian Atena! Aku nontoa saba' i uno nu iwi-iwi' na han komiu talalo bala agama.

²³Kalana tempo'nyo aku kinolalajang nonsongkohi kota miu ka' mompalahatikan tampat-tampat ponsombaan miu, aku nontoa mule' sa'angu' na tampat ponsombahkonan koloban; i tampat aijo' tinulis, ‘Toka hi Tumpu Anu Madi' Osumbu'.’ Jadi, Tumpu Allah anu osombah miu, panyo madi' osumbu' miu, Iamo na anu ku polele hi komiu.

²⁴ Tumpu anu nompotimbali dunia aiya tiba isinyo iwi-iwi', aijo'mo na tumpu nu langit ka' tano'. Ia madi' jojoong i uno nu to lai-laigan nu pilogot anu nubau nu mian.

²⁵Ia mule' madi' mompalalui pontulungi nu mian, kalana Iamo na anu mombee'i kantumuu'an ka' santuu' ka' iwi-iwi' na apaa hi mian.

²⁶Lengkat i samian na mian Ia nombau iwi-iwi' na bansa ka' nompokau aha monjoongi songko-songko na dunia. Iamo suele na anu montantukan salatanmo pe'e i moonanyo, hipian ka' iya mae na aha timbali tumuu'.

²⁷Tumpu nombau aijo' da aha molio Ia. Opai-pai lio da aha singkabot tiba Ia tempo'nyo aha molio Ia. Panyo sabenannyo Tumpu Allah madi' majo'on lengkat hi kita toto samian.

²⁸Sumo anu tinaloakon nu mian, ‘Kita tumuu' ka' kolalaajang ka' jojoong i dunia aiya, kalana kakuasa'an-Nyo'.’ Pokakana suele tiba anu tinaloakonmo nu to pia-piangkuka na mian anu nontulis pantun miu. Aha notatae, ‘Kita iwi-iwi' te to ana-anak-Nyo.’

²⁹Jadi, kalana kita to ana-anak-Nyo, kita madi' timbali monsangka Tumpu pokakana sumo patong mosoni' na binau kabai salaka kabai batu anu binau pokakana sumo kapandean nu mian.

³⁰Jadi kaponga'anto aijo' kinolilimanmo nu Tumpu, panyo tempo' uuka Ia nompokaumo iwi-iwi' mian i songko-songko na dunia da bolimo mombau to dosa-dosa' nu aha.

³¹Kalana Ia nontantukanmo sa'angu' na tempo' da momputusi adi-adin songko-songko na dunia aiya. Kalaja aijo' nubauje nu samian anu noko pile'anmo nu Tumpu na mombau aijo'. Ka' da iwi-iwi' na mian palesaya totu-totu'u i han aijo', sahingga mian anu sinilakamo po'ule'mo pinotumuu' nu Tumpu!”

³²Salatan to mia-mian aijo' nohongo mongkona anu natemo po'ule' tinumuu', daagi' ko anu lengkat aijo' hi aha nongkokojoimo i Paulus. Daagi' mule' ko anu notatae, “Kami ka'oho' mohongo kita Utus motatae mule' mongkona han uuka.”

³³Lantas i Paulus nompala'i gombu-gombuan aijo'.

³⁴Panyo daagi' ko anu aijo' hi aha na mosambiha' hi Paulus ka' palesaya hi Yesus, aijo' hi aha: I Dionisius mian anu ko pangkat mokalaja i Areopagus, ka' samian na boune sanggonyo i Damaris, ka' to pia-piangkuka mule' na mian.