Read Saluan SISIKON NU TO RASUL-RASUL 21 Bible Online

SISIKON NU TO RASUL-RASUL 21 - Saluan bible

SISIKON NU TO RASUL-RASUL 21

¹Kami siniloloamo hi to pola-polaya' nu jama'at anu lengkat mae i Efesus aijo', lapas aijo' nompala'imo aha. Lantas kami tinalabutmo lau-laus nokiijo' i togong Kos; ka' dodododopnyo kami tinokamo i togong Rodos. Lengkat i kiijo' kami tinalabutmo nokiijo' i labuan Patara.

²Kiijo' i Patara kami nonsingkabotimo kapan anu mongka'oho' mokiijo' i Fenisia. Sahingga kami sinumake'mo i kapan aijo' ka' i nambamo

³ka' tinalabutmo sampe kami nontoa togong Siprus i sasu kowi mami; panyo kami tinalabutmo lau-laus nompatui Siria. Kami i lumajang tano' nokiijo' i Tirus, kalana i kiijo' kapan anu kinasake'an mami mae aijo' daagi' molobosakon anu sinake'nyo mae.

⁴I tampat aijo' kami namba nolenga to mia-mian anu pinalesayamo hi Yesus, lantas jinojoong tiba aha kinopinnyo sina'angu' na duminggu. Roh nu Tumpu na nompoto'i hi Paulus da boli mamba mokiijo' i Yerusalem.

⁵Panyo salatan ilapasmo na tempo'nyo kami jinojoong i kiijo', kami nompala'imo aha ka' nolausakon lajang kami. Aha iwi-iwi' hingga-hinggat tiba anak ka' bengkele' nu aha nomboa kami tinoka i sambiha' nu kota'. I kiijo' mae i biwi nu bone', kami iwi-iwi' dinumaladupumo ka' binalado'a.

⁶Ilapas aitu kami nompaha poi-poitamo siloloa, lantas kami sinumakemo i kapan, ka' aha mule' ninsusule'mo i laigan.

⁷Kami tinalabutmo nokiijo'mo lengkat mae i Tirus tinoka i Ptolemais. I kiijo' mae kami nambamo nolenga to Utu-utus anu pinalesayamo da montabea'i aha, lantas jinojoong sinaa tiba aha.

⁸ Dodododopnyo kami namba mule', lantas tinokamo i Kaisarea. I kiijo' kami namba hi Gulu Injin sanggonyo i Filipus, lantas jinojoong i laigannyo. Ia sala'samian aha anu popitu' na mian anu pinile'an kiijo' i Yerusalem.

⁹Opat na to ana-anak langkoyangnyo binee'anmo kahosonan nu Tumpu Allah da mompolele lele lengkat mae hi Tumpu.

¹⁰ Salatan tino pia-pia manga na ko pinnyo kami kiijo' mae, tinokamo lengkat mae i Yudea samian na nabi sanggonyo i Agabus.

¹¹Ia tinoka hi kami lantas nongala pombutu' i Paulus. Tiba pombutu' aijo' ia nonsegoti tengke ka' limanyo lantas notatae, “Aiyamo na anu tinaloakon nu Roh nu Tumpu: Tumpunyo nu pombutu' aiya o puuti sumo aiya i Yerusalem nu to mia-mian Yahudi, ka' o bee' hi to mia-mian anu misa' Yahudi.”

¹²Salatan kami nohongo aijo', kami ka' iwi-iwi' na Utus anu jojoong i Kaisarea aijo' nomoita totu-totu'u hi Paulus da ia boli mamba mokiijo' i Yerusalem.

¹³Panyo tinaamannyo, “Apaa na gunanyo kita Utus humaang sumo aiya sahingga monsaduakon kinyonyoangku ma'idekan? Aku noko sadiamo misa' ola da o hakop i kiijo' mae, panyo maumo o patei pe'e kalana i Tumpu Yesus.”

¹⁴I Paulus madi' mongka'oho' mohongo kami, sahingga kami madi'mo nontewa' ia, “Bakas kahanda'mo nu Tumpu na timbali,” nakoonyo mami.

¹⁵Salatan jinojoong i kiijo' tino pia-pia mangamo na ko pinnyo, kami nomposadiamo boaon kami, lantas namba nokiijo' i Yerusalem.

¹⁶To pia-piangkuka na aha utus lengkat i Kaisarea namba suele nohingga-hinggat tiba kami da molaya' kami mokiijo' i laigan hi Manason, kalana i laigannyo na kasonso'an mami. (I Manason atina'mo na mian nu Siprus anu pininmo na tinimbali anu saja' mombatuki Yesus.)

¹⁷Tempo'nyo kami tinokamo i Yerusalem, to Utu-utus i kiijo' mae nolabot kami sinanangmo na kinyonyoa nu aha.

¹⁸Dodododopnyo i Paulus namba hingga-hinggat tiba kami nolenga i Yakobus; iwi-iwi' to pola-polaya' nu jama'at daagi' i kiijo' suele.

¹⁹Noko tabea'i aha, i Paulus nonsisikakonmo hi aha iwi-iwi' na apaa anu binaunyomo nolengkat mae hi Tumpu toka hi to mia-mian anu misa' Yahudi.

²⁰Noko hongo sisik i Paulus aijo', aha iwi-iwi' nompuji'mo Tumpu. Lapas aijo' aha notatae hi Paulus, “Utusku Paulus! Kita utus tionyo monsumbu' saba' nomada-madalamo na to mia-mian Yahudi anu pinalesayamo hi Yesus. Aha iwi-iwi' aijo'mo, na to mia-mian anu saja'mo nombatuki atulan i Musa.

²¹Ka' uuka aha nohongomo taalu' kita Utus nongajanmo iwi-iwi' mian nu Yahudi anu jojoong hi aha i bansa sangga'at, da madi'mo mohongo atulan i Musa. Kita Utus nompokinde'imo aha, da aha madi'mo monsunat te to ana-anak nu aha kabai mombatuki adat kabiasa'an nu Yahudi.

²²Uuka to mia-mian Yahudi anu pinalesayamo aijo' tantu mohongoje taalu' kita Utus tinokamo i aiya. Jadi, mosia uuka?

²³ Ka'ima'annyo batukimo na pokinde' mami. Daagi' ko aha opat na mian i aiya anu noko bajanji'mo hi Tumpu.

²⁴Jadi, mambamo ahi' na kita Utus mombau baunyo nu adat momposusi' butong hingga-hinggat tiba aha, ka' bayan nakon na ongkos nu aha da ubak nu aha timbali o kis. Tiba anu sumo aitu nu nyata'je nu iwi-iwi' mian saba' apaa na anu i hongo nu aha mongkona kita Utus madi' totu'u, kalana posi kita Utus suele monjalanakon ahi' atulan i Musa.

²⁵ Panyo mongkona misa' mian nu Yahudi anu pinalesayamo hi Yesus, kami mompakatumo sulat hi aha mongkona kaputusan mami saba' aha madi' timbali mongkaan kaanon anu sinombahkonmo hi pilogot, madi' timbali mongkaan baso' kabai mongkaan binatang anu mate tinekok; ka' madi' timbali mombau to kala-kalakuan anu ma'idek.”

²⁶Sahingga i Paulus namba tiba aha opat na mian aijo' lantas nombau adat momposusi' butong nohingga-hinggat tiba aha dodododopnyo. Lapas aijo' aha ninsoop nokiijo' i Laigan nu Tumpu da mompoto'i saba' daagi' to pia-pian sinaa atina'je ka' adat momposusi' aijo' mingkotmo ka' koloban nu aha toto samian o sombahkonmo.

²⁷Salatan tempo'nyo ipitunmo na sinaa aijo' malia'mo pupus, to pia-piangkuka na mian nu Yahudi lengkat mae i Asia nontoa i Paulus i uno nu Laigan nu Tumpu. Lantas aha nonsale'imo mian da'isan, lapas aijo' nontoongimo i Paulus,

²⁸ka' lewa' noloboo', “O, to mia-mian nu Israel, tulung! Aiyamo na miannyo anu mamba iyaya mae mongajan iwi-iwi' na mian nu to aja-ajalan anu mompisala'i bansa Israel, mompisala'i atulan i Musa ka' mompisala'i Laigan nu Tumpu aiya. Ka' uuka ia ola' o mule' momboa to mia-mian anu misa' Yahudi ninsoop i uno nu Laigan nu Tumpu ka' nombau anu moko pahenggas i tampat anu susi' aiya!” (

²⁹ Aha notatae sumo aitu kalana aha nontoamo i Trofimus mian nu Efesus aijo' i kota' nohingga-hinggat i Paulus; ka' aha monsangka i Paulus nomboamo ia i uno nu Laigan nu Tumpu.)

³⁰Songko-songko na kota kinalangkabutmo ka' iwi-iwi' na mian nopadeka'mo mae ka' sinihukmo. Aha nohakopmo i Paulus ka' nohela'mo ia nosabat lengkat mae i Laigan nu Tumpu. Tempo'nyo aitu mule' tumban nu Laigan nu Tumpu pinotumbanmo.

³¹Hau-haunyo anu mompokalangkabut aijo' mompagalamo mompatei i Paulus, mian nompoto'imo hi kapala nu suludadu nu Roma, tukoonyo songko-songko na Yerusalem kinalangkabutmo.

³²Balo kapala nu suludadu aijo' nongala to pia-piangkuka na suludadu ka' to sulu-suludadu anu nu palentah lantas lia-lia' i namba tiba aha nokiijo' i tampat kahengge'an aijo'. Salatan mian da'isan aijo' nontoa kapala nu suludadu aijo' tiba suludadunyo, aha madi'mo nomboboti i Paulus.

³³Kapala nu suludadu aijo' namba hi Paulus lantas i hakopnyo ka' nompokau mian mompungu ia. Lapas aijo' kapala nu suludadu nompokilawamo pa'ihe na i Paulus aijo', ka' apaa na anu binaunyomo.

³⁴Sambagian na mian da'isan aijo' nontaami sumo uuka, ka' sambagian mule' nontaami sumo aijo'. Bau-baunyo anu kinalangkabutmo sumo aijo', sahingga kapala nu suludadu aijo' madi' noko ala nonsumbu' pa' apaa na anu tinimbali. Mokonyo aijo' pinalentahkonnyo da i Paulus o boa mokiijo' i tampat jojoongan nu suludadu.

³⁵Salatan aha nomboa ia tinokamo kiijo' i ojan, anu mompokalangkabut aijo' noto idek'mo hondo, sahingga i Paulus jinagaanmo nu to sulu-suludadu na mamba momoya.

³⁶Aha obatuki aitu mae i hiku nu anu mombau kahengge'an aijo' anu lewa' moloboo', “Pateimo na ia!”

³⁷Salatan mongka'oho'mo minsoop i uno nu tampat kajojoongan nu suludadu, i Paulus notataemo hi kapala nu suludadu aijo', “Pa' timbali na aku basisik sasaingoni' tiba kita Tuan?” “Apaa beleyum timbali mobasa' Yunani?” pinokilawa nu kapala nu suludadu aijo'.

³⁸“Desumo aitu, beleyum misa' mian nu Mesir anu u'utu mae nombaumo kahengge'an lantas nompalaiyakonmo opat na madala na mian anu mompokalangkabut nomboa bau pimuhuk ninsoop i padang bolaa?”

³⁹Tinaaman i Paulus, “Aku mian nu Yahudi; aku layat nu kota' Tarsus, kota' anu talasanggo i Kilikia. Tulungi pobee' mae na aku motatae hi mian haha aijo'.”

⁴⁰Sahingga salatan i Paulus pinoloasmo na motatae, i Paulus tinuminjomo i ojan, lantas nombee'i tanda nu limanyo. Iwi-iwi' mian nomohokot. Lapas aijo' i Paulus notataemo hi aha i uno nu basa' Ibrani. Koonyo i Paulus,