Read Saluan SISIKON NU TO RASUL-RASUL 24 Bible Online

SISIKON NU TO RASUL-RASUL 24 - Saluan bible

SISIKON NU TO RASUL-RASUL 24

¹Kino liman sinaanyomo, i Imam Daka' Ananias ka' to pola-polaya' nu Yahudi nambamo i Kaisarea tiba samian pabisala sanggonyo i Tertulus. Aha nangadap hi Gubernur Feliks ka' nompotoka palakala mongkona i Paulus.

²Salatan i Tertulus i laga nokiita' i ahopnyo, ia nontuuk i Paulus sumo uuka, “Kita Tuan Gubernur Anu Opopodaka'! I uno nu pamalentahanto Tuan, lipu' mami aman. Ka' i uno nu kapandeanto Tuan mule' manjoo'mo na pinokopianan anu binau da bau kapentingan nu bansa mami.

³Iwi-iwi' aijo' saja' otaloakon mami na mompoita talima kase, ka' mule' pongangga'i daka-daka' mau pe'e iyaya mae.

⁴Panyo da boli mongidei manjoo' na tempo' nu kita Tuan, ku poita sanang pe'e na kita Tuan mohongoakon pongkalaak mami anu kodo-kodo' aiya.

⁵I humpakmo mami na mian aiya mompokalangkabut anu moko bahaya. Iyaya mae ia mompolubat kahengge'an, aijo' hi aha to mia-mian nu Yahudi ka' ia tinimbalimo polaya' posa'angu'an nu to mia-mian nu Nazaret.

⁶Pakalaus ia nonsobamo nombau anu moko pahenyu Laigan nu Tumpu, panyo i hakopmo mami na ia. [Kami ko kahanda' mongulus ia mombatuki posi atulan nu agama kami.

⁷Panyo i Lisias kapala nu suludadu nongagoi ia hi kami,

⁸ka' nompalentahkon da batu-batu anu mongkalaak ia, mangadap hi Tuan.] De kita Tuan mompalesa mian aiya, oposi hongoje nu kita Tuan lengkat hi ia na kahondoan iwi-iwi' aijo' anu pinongkalaakan mami mongkona ia.”

⁹To mia-mian Yahudi anu i kiijo' suele nontuukmo i Paulus ka' mompototu'u iwi-iwi' anu tinaloakon i Tertulus.

¹⁰Lantas i gubernur aijo' nombee'i tanda hi Paulus, da ia timbali motatae. Sahingga i Paulus notatae, “Kusumbu' na kita Tuan tinimbalimo mian kopian nu lipu' aiya binataun-taunmo na ko pinnyo. Mokonyo aijo' aku mongoa'i sanang na mombee' katalanganku aijo' i ahop nu kita Tuan.

¹¹Kita Tuan timbali mosi selidiki, saba' madi' nolabih i sampulu' ohua' na sinaa anu i hikuhakonmo, aku namba nokiijo' i Yerusalem da balado'a.

¹²Ka' madi' toho' to mia-mian nu Yahudi aijo' montokai aku painggaga tiba samian pe'e, kabai molimu' mian da mombau kahengge'an i Laigan nu Tumpu kabai i to lai-laigan pogalejaan, kabai iyaya mae i uno nu kota'.

¹³Aha pe'e madi' noko ala nompotoa bukuti' nu anu pinotoka nu aha hi kita Tuan mongkona aku.

¹⁴Hondo-hondomo tionyo ku akui hi kita Tuan, saba' aku monsombah Tumpu mompolee' mami mombatuki pangajalan i Yesus anu nusangka nu aha sala'. Panyo daagi' ku palesaya na iwi-iwi' anu tinulis i uno nu Kitab i Musa ka' i Kitab nu to Nabi-nabi.

¹⁵Pokakana sumo aha, aku suele montaha'imani hi Tumpu, saba' iwi-iwi' na mian mompo'ule' tumuu' de silakamo — to mia-mian anu ma'ima', mau pe'e to mia-mian anu ma'idek!

¹⁶Mokonyo aijo' aku saja' bala usaha ima-ima', da kinyonyoangku belesi hi Tumpu, ka' belesi hi sangko mian.

¹⁷ Salatan tino pia-piangkukamo ahi' na taun madi' jinojoong i Yerusalem, aku ninsusule'mo nokiijo' da momboa doi pontulungi hi bansangku, ka' monsombakon koloban hi Tumpu.

¹⁸Tempo'nyo aku hau-haunyo monjalanakon aijo', aha nontokai aku i Laigan nu Tumpu, salatan aku ilapasmo nombau adat pomposusi' butong. Madi' ko mian da'isan hingga-hinggat aku, ka' madi' mule' ko kahengge'an i kiijo' tempo'nyo aitu.

¹⁹Ola aha to pia-piangkuka na mian nu Yahudi i kiijo' mae lengkat i Provinsi Asia. Aha na sabenannyo toka i aiya mompotoka palakala nu aha mongkona aku hi kita Tuan, de aha daagi' ko apa-apaa anu okalaakakon mongkona aku.

²⁰Kabai sahanyo mian haha aijo' na monsisik ka'idekan apaa na anu i humpak nu aha hi belengku, tempo'nyo aku binoa hi Mian Kopian Daka' nu Agama.

²¹ Anu i humpak nu aha ola potatae sa'angu' aiya, anu tinaloakonku i ahop nu aha, aijo'mo potatae: Aku ingulus sinaa aiya kalana aku palesaya saba' to mia-mian mate po'ule' opotumuu'.”

²²Lantas i Feliks anu monsumbu'mo manjoo' na pangajalan mongkona i Yesus, madi'mo nonginsuhakon ulusan nu palakala aijo'. “Ku putusimo na palakala aijo',” tukoonyo, “de i Lisias kapala nu suludadu tokamo.”

²³Lantas ia nompalentahkon suludadu anu mangaku montoa i Paulus aijo' da tataap otalungku' na i Paulus, panyo mombee'i sangkiding kaloasan hi ia ka' mompobee' to sanga-sangalunyo mombee'i ia apaa na anu nu palalui.

²⁴Ilapas aijo' tino pia-pian sinaa, i Feliks tinokamo sinangaluan mae nu bengkele'nyo sanggonyo i Drusila; ia mian nu Yahudi. Lantas i Feliks nompokau mian mongala i Paulus, lapas aijo' i Feliks nompotombihingmo i Paulus notatae mongkona palesaya hi Kristus Yesus.

²⁵Panyo salatan i Paulus nolausakonmo potataenyo mongkona hal madi' timbali baleko' ka' tionyo ahi montahan napisu ka' mongkona hukuman i Sinaa Kakiamatan, i Feliks nabuhukmo, lantas notatae, “Beleyum timbalimo minsusule' sinaa uuka. Aku molagaje mule' beleyum de ko kasampatanmo.”

²⁶Hau-haunyo aijo' i Feliks nontaha'imanimo mohumpakmo doi hi Paulus. Mokonyo aijo' ia saja' monsai mian mongala i Paulus kahanda' basisik tiba ia.

²⁷Salatan ingohua'mo na taun, i Perkius Festus nombolosakonmo i Feliks salaku Gubernur. Ka' kalana i Feliks ka'oho' mongala kinyonyoa nu to mia-mian Yahudi, ia nompojohokmo i Paulus i uno nu talungku'.