Read Saluan SISIKON NU TO RASUL-RASUL 26 Bible Online

SISIKON NU TO RASUL-RASUL 26 - Saluan bible

SISIKON NU TO RASUL-RASUL 26

¹I Agripa notatae hi Paulus, “Beleyum opobee' motatae da mompototu'u kahondoan nu butongum.” Sahingga i Paulus nohangkat limanyo lantas nompotoka pompototu'u butongnyo sumo uuka.

²“Anu Opopodaka' Tomundo' Agripa! Aku nongoa'i inguntung hondo timbali mompotoka pompototu'u kahondoan nu butongku aiya i ahop nu kita Tomundo' mongkona iwi-iwi' anu pinotoka nu to mia-mian nu Yahudi mongkalaak aku;

³anu momonanyo hondo kalana kita Tomundo' monsumbu' hondo adat kabiasa'an ka' to hahan nu mian Yahudi. Mokonyo aijo', ku poita da timbali kita Tomundo' sabaan na mohongoakon katalanganku.

⁴Iwi-iwi' mian nu Yahudi monsumbu' mosia na aku tinumuu' lengkat pe'e ingolitau. Aha monsumbu' saba' lengkat pe'e aku ingolitau, aku tinumuu'mo i totonga' nu posi bansangku i Yerusalem.

⁵ Pininmo na aha nonsumbu' mongkona aku. Ka' de aha mongka'oho', aha timbali mombee'i katalangan saba' lengkat pe'e momonanyo aku tinumuu'mo sumo mian nu Farisi ka' mombatuki iwi-iwi' na atulannyo anu talalo maboat i uno nu agama mami.

⁶Ka' uuka aku tuminjo i aiya da o ulus kalana aku palesaya hi janji' anu binau nu Tumpu hi mompolee' mami.

⁷Anu jinanji' aijo'mo suele na anu otaha'imani nu sampulu' ohua' na bansa Israel, sahingga aha monsombah hi Tumpu sinaa ka' malom. Ka' kalana aijo' aku palesaya hi anu jinanji'mo aijo', kita Tomundo' Anu Opopodaka', aku pinoosala' nu to mia-mian nu Yahudi.

⁸Kadaka' to Utu-utus to mia-mian nu Yahudi madi' mompalesaya saba' Tumpu na po'ule' mompotumuu' mian mate?

⁹ Imoonanyo posi aku pe'e ko pikilan, mosia da aku tionyo mombau apa-apaa da bau pompoosala' i Yesus lengkat i Nazaret aijo'.

¹⁰Ka' memang aijo'mo na anu binaungkumo i Yerusalem. Tiba sulat kuasa lengkat hi kapala nu to imam-imam, aku nomposoopmo i uno nu talungku' da'isan na to mia-mian anu mohongo-hongo hi Tumpu Allah, aku mule' suele monsetujui da aha opokonai hukuman mate.

¹¹Saja' aku monsakisa aha i to lai-laigan pogalejaan, da mompakisa aha mombahakon apaa na anu nupalesaya nu aha. Sumo aijo' na ko singginyo nu kinyonyoangku hi aha, sahingga namba nokiijo' i kota-kota sangga'at mule' aku nololoi' aha i kiijo' mae.”

¹²“Aijo' na kahanda'nyo sahingga aku nomboa sulat kuasa lengkat hi kapala nu to imam-imam, ka' namba nokiijo' i Damsyik.

¹³Ka' tempo'nyo aku i totonga' nu jalan sonsu-sonsu'un na sinaa, kita Tomundo' Anu Opopodaka', aku nontoamo jingka lengkat i langit, molabihi jingka nu batu nu sinaa. Jingka aijo' nonjingkai titikub butongku ka' nontikubi to mia-mian anu i lumajang hingga-hinggat tiba aku. Kami iwi-iwi' notua' i tano'.

¹⁴Lantas aku nohongo potatae anu notatae mae hi belengku i uno nu basa' Ibrani, ‘Saulus, Saulus! Kadaka' beleyum saja' monsakisa Aku? Beleyum mongoa'ije sakit, de ola saja' mongewa tuanum anu tinimbalimo polaya'um.’

¹⁵Saba' aku notatae, ‘Ihe na kita, Tuan?’ Ka' Tumpu nontaami, ‘Akumo na i Yesus anu sinakisaum.

¹⁶Bulaamo ka' tinjo! Aku nompotoamo butong-Ku hi beleyum ko kahanda' da mongangkat beleyum timbali posaihon-Ku. Beleyum tionyo mompoto'i hi mian sangga'at, apaa na tinoaum sinaa aiya mongkona Aku, ka' mongkona apaa na Ku poto'ije hi beleyum saidi' mae i tempo' anu tokaje mae.

¹⁷Ku ga'atakon na beleyum i bansa Israel ka' bansa-bansa sangga'at anu misa' Yahudi. Ku pokaumo na beleyum mamba hi aha da mompojingka mata nu aha,

¹⁸da aha mosabat lengkat i kapintungan ka' minsoop i uno nu jingka; da aha molapas i ponggodaan nu Ibilis, lantas nu kuasaimo nu Tumpu. Kalana palesaya hi beleng-Ku to dosa-dosa' nu aha o ampunimo ka' aha timbalimo mian anu palesayamo hi Tumpu, anu pinile'anmo na aha.’ ”

¹⁹“Kalana aijo', kita Tomundo' Agripa, aku saja' bala usaha mohongo-hongo hi anu tinoa ka' tinalimangkumo lengkat mae hi Tumpu aijo'.

²⁰ Tiba sahondo-hondonyo aku mompoto'iakon hi to mia-mian, da aha bolimo mombau to dosa-dosa' nu aha, ka' mombee'mo butong nu aha hi Tumpu, lantas mompotoa i uno nu kantumuu'an nu aha saba' aha madi'mo daagi' mombau dosa-dosa' nu aha. Pinoto'ingkumo na han aijo' momonanyo i Damsyik, lapas aijo' i Yerusalem, ka' i songko-songko Yudea ka' aijo' hi aha to mia-mian anu misa' Yahudi.

²¹Mokonyo aijo' to mia-mian nu Yahudi nohakop aku i Laigan nu Tumpu ka' mompagala mompatei aku.

²²Panyo sampe tinoka i tempo' aiya aku jinagaan nu Tumpu Allah, sahingga aku tuminjo aiya mombee'i katalangan hi iwi-iwi' mian — anu ko pangkatnyo tiba anu madi' ko pangkatnyo. Apaa na anu tinaloakonkumo aiya madi' ko sangalasannyo aijo'mo na anu sinisikakonmo nu to nabi-nabi ka' i Musa;

²³ aijo'mo saba' Tomundo' anu Momposalamat anu jinanji'mo nu Tumpu aijo' tionyo mongepe susa', ka' tinimbalimo mian anu momona'nyo po'ule' tinumuu' noko silaka na ia; da kalana aijo' Ia timbali monsisikakon jingka — aitumo kasalamatan — mau hi to mia-mian Yahudi mau pe'e hi to mia-mian anu misa' Yahudi.”

²⁴Hau-haunyo i Paulus montutuhakon pompototu'u butongnyo aijo', i Festus nonsegaimo, “Beleyum notutuangmo Paulus! Ilimuu'um anu manjoo' atina' nompotimbalimo beleyum notutuang!”

²⁵Panyo tinaaman i Paulus, “Aku madi' notutuang, kita Anu Opopodaka'. Potataengku anu tinaloakonku aiya totu'u, ka' ilubat mae i pikilanku anu sinsumbu'.

²⁶Posi kita Tomundo' Agripa monsumbu'mo totu'u na hahan aijo'. Mokonyo aijo' aku baani motatae hi ahop nu kita Tomundo' tiba sahondo-hondonyo. Kusumbu' hondo-hondo madi' ko sa'angu' pe'e na hahan aijo' anu ma'isa sinumbu' nu kita Tomundo', kalana iwi-iwi' aijo' madi' tinimbali i tampat-tampat anu sulu-suluk.

²⁷Anu Opopodaka' Tomundo' Agripa, pa' kita Tomundo' palesaya hi apaa na anu tinaloakonmo nu to nabi-nabi? Kututugi kita Tomundo' palesaya!”

²⁸Lantas i Agripa notatae hi Paulus, “Koyum dengke na mompotimbali aku timbali mian Kristen i uno nu tempo' sasaingoni' aiya?”

²⁹“I uno nu tempo' anu sasaingoni' kabai i uno nu tempo' anu pin,” tinaaman i Paulus, “aku balado'a hi Tumpu da kita Tomundo' tiba to Tuan-tuan iwi-iwi' anu nohongomo aku sinaa aiya timbali sumo aku — ola ahi' pinompungu, na boli!”

³⁰Ahennyo i Tomundo', Gubernur tiba i Bernike, ka' iwi-iwi' na mian sangga'at tinuminjomo.

³¹Salatan i sambiha'nyomo aha notataemo samian ka' samian, “Mian aiya madi' nombau apa-apaa anu pantas o hukum nu hukuman mate kabai o talungku'.”

³²Lantas i Agripa notataemo hi Festus, “Mian aiya timbalimo opobebas, de ia madi' montuntut palakalanyo oputusi nu Tomundo.”