Read Saluan SISIKON NU TO RASUL-RASUL 28 Bible Online

SISIKON NU TO RASUL-RASUL 28 - Saluan bible

SISIKON NU TO RASUL-RASUL 28

¹Salatan tinumotano'mo tiba salamat, kami nonsumbu'je taalu' togong aijo' sanggonyo Malta.

²Mian anu monjoongi togong aijo' lame' hondo hi kami. Aha nolabot kami iwi-iwi' ma'ima' hondo ka' nomposuuni apu bau kapalaluan kami, kalana ujan tinudunmo ka' tempo'mo nu bakin.

³I Paulus nolimu' kau', ka' nompodumak to kau-kau' aijo' i apu. Hau-haunyo ia mombau aijo', sa'angu' na ulo nosabat mae kalana napanasmo nu apu aijo', lantas nombahe' limanyo.

⁴Salatan mian anu monjoongi togong aijo' nontoa ulo kala-kalayo' i lima i Paulus, aha notatae samian ka' samian, “Mian aiya tantu saja' nompatei, kalana maumo ia madi' binahaya i ambai, Pilogot Boune anu Adin madi' mompobee' ia tumuu'.”

⁵Panyo i Paulus nompipihakon ulo aijo' nokiijo' i apu, ka' madi' nongoa'i sakit sangkiding pe'e.

⁶Tinutugan nu aha sasaidi' lima i Paulus bangkakmo kabai madi' pin ia tombahangkangmo lau-laus mate. Panyo salatan nontanda'i to pia-pia manga na kopinnyo madi' ko apa-apaa anu okahelani tinimbali hi ia, kinyonyoa nu aha nongabali'mo, aha notatae tukoonyo nu aha i Paulus te pilogot.

⁷Madi' majo'on i tampat aijo' daagi' ko tano' tumpunyo i Publius, anu ko pangkat daka' i togong aijo'. Ma'ima' hondo na kinyonyoanyo nolabot kami sinonso' hi ia tinolun sinaa na kinopinnyo.

⁸Tempo'nyo aitu tuumanyo hau-haunyo masakit, sinihabannyomo ka' tohuhuson. I Paulus namba nolenga tuumanyo anu masakit aijo', lantas ia binalado'a ka' nompotiik lima i buannyo sahingga ia na'alin.

⁹Kalana han anu tinimbali aijo', iwi-iwi' na mian anu masakit i togong aijo' tinoka hi Paulus, ka' aha pina'alinnyo.

¹⁰Aha nombee'i kami manjoo' na palasen, ka' salatan kami kahanda'mo talabut, aha nomboai kami nokiijo' i kapan iwi-iwi' na anu opalalui mami i jalan.

¹¹Ilapas tinotolu' na bitu'on i kiijo' mae, kami nambamo mae i togong aijo' sinumake' i sa'angu' na kapan anu nolengkat nompala'i Aleksanderia, anu binalabu i togong aijo' tempo'nyo nu bakin. Kapan aijo' ko tandanyo “Pilogot Hapi' Kastor ka' Poluks.”

¹²Kami binalabu i kota' Sirakusa ka' jinojoong i kiijo'tinolun sinaa.

¹³Lengkat i kiijo' kami tinalabut mule' nontus biwi nu bone' tinoka i kota' Regium. Dodododopnyo baleba' nontampu'unimo lengkat mae i salatan sahingga tinoka i ko uwansainaanyomo kami tinokaje i kota' Putioli.

¹⁴I kiijo' mae kami nompahakabotmo tiba to pia-piangkuka na mian anu palesayamo hi Yesus, ka' kalana kami ilagamo nu aha sahingga kami jinojoongmo tiba aha sina'angu' na duminggu na ko pinnyo. Lantas kami namba nokiijo' i Roma.

¹⁵To Utu-utus i Roma anu palesayamo hi Yesus nohongo lele mongkona kami, sahingga aha tinoka nokiijo' i Pasar Apius ka' i Laigan panginapan Totolu' anu lewa' kasonso'an nu mian male' kahanda' molabot kami. Salatan i Paulus nompahakabotmo tiba aha, ia nomoita talima kaseh hi Tumpu ka' kinyonyoanyo sinanangmo.

¹⁶Tempo'nyo tinokamo i Roma, i Paulus pinobee'mo jojoong sausa'nyo ka' nujagai nu samian na suludadu.

¹⁷Salatan tinolun sinaamo, i Paulus nolagamo to tu'a-tu'anyo mian nu Yahudi i tampat aijo'. Ka' salatan sinihukmo na aha, ia notataemo hi aha, “To Utu-utus! Aku madi' ko sala' apa-apaa hi bansanto, kabai noolanggaimo adat kabiasa'an anu tinalima lengkat mae hi mompolee'to. Mau sumo aitu aku i hakop i Yerusalem ka' binee' hi to mia-mian nu Roma.

¹⁸Salatan palakalangku pinalesamo, aha mongka'oho'mo mompobebas aku, kalana inyata'mo aku madi' nombau sa'angu' pe'e na kasala'an anu tionyo o hukum mate.

¹⁹ Panyo kalana to mia-mian nu Yahudi nombahakon, sahingga aku sabole-bolehmo nontuntut palakalangku da oputusi hi Tomundo' nu Roma. Aku mombau aijo' misa' kalana aku daagi' ko apa-apaanyo kahanda' mongkalaak aha posi bansangku.

²⁰Ka' aijo'mo na sababnyo pinoitangku da mompahakabot tiba komiu da basisik tiba komiu; kalana aku tinalungku' monsawani anu Momposalamat ota-otanda'i nu bansa Israel.”

²¹Lantas aha notatae hi ia, “Kami ma'isa nontalima sa'angu' pe'e na sulat lengkat i Yudea mongkona kita Utus. Ka' madi' ko samian na utus pe'e lengkat i kiijo' mae anu tinoka nomboa mae lele mongkona kita Utus kabai motatae anu ma'idek mongkona kita Utus.

²²Panyo kami mongkahanda'i suele mohongo mongkona kapalesaya'an nu kita Utus, kalana kami iwi-iwi' nohongomo mian mompisala'i ajalan anu nubatuki nu kita Utus.”

²³Sahingga aha ka' i Paulus nontantukanmo sa'angu' na sinaa da bau pompahakabotan. I sinaa aijo' dina'isan na mian tinoka nokiijo' i kajojoongan i Paulus. Lengkat pe'e subu tinoka mamalom, na i Paulus nontalangkan nompotoka hi aha lele mongkona mosia na Tumpu mompalentah sumo Tomundo'. To ayat-ayat lengkat i Kitab i Musa ka' Kitab nu to Nabi-nabi, na pinake i Paulus, ia mompagala da aha palesaya hi Yesus.

²⁴Daagi' ko anu palesaya hi apa-apaa na anu tinaeakon i Paulus, panyo daagi' mule' ko anu madi' palesaya.

²⁵Kalana pikilan anu madi' mompahakona aha nompala'imo tampat aijo', salatan i Paulus nontaeakonmo sumo aijo' hi aha, “Memang kona hondo apaa na anu tinaeakonmo nu Roh nu Tumpu hi Nabi Yesaya kona hi mompolee' nu belemiu!

²⁶ Tumpu notatae, ‘Lako'mo taloakon hi bansa aiya: Komiu saja' mohongo, panyo madi' mangalati'; komiu saja' mompalahatikan, panyo madi' monsumbu' apaa na anu tinimbalimo.

²⁷Kalana pikilan nu bansa aiya pinonga'mo, bihing nu aha nabongonmo ka' mata nu aha pinipi di'akonmo. Aiya tinimbalimo da mata nu aha boli montoa, bihing nu aha boli mohongo, pikilan nu aha boli mangalati', ka' boli minsusule' mae hi beleng-Ku, lantas Aku mompa'alinje aha.’ ”

²⁸Ahennyo i Paulus notatae, “To Utu-utus tionyo monsumbu' saba' lele mongkona kasalamatan anu lengkat mae hi Tumpu uuka pinolelemo i to bansa-bansa sangga'at anu misa' Yahudi. Aha tionyo montuluti!” [

²⁹Salatan i Paulus notataemo sumo aitu, to mia-mian nu Yahudi aijo' nompala'imo tampat aijo' ka' pinainggagamo samian ka' samian.]

³⁰Ohua' na taun na ki no pinnyo i Paulus jinojoong i Roma, i laigan anu pinosi sewanyo. Ia sanang na montalima iwi-iwi' na mian anu toka molenga ia.

³¹Ka' baani hondo na ia mompoto'i hi aha mongkona mosia na Tumpu mompalentah sumo Tomundo', ka' mongkona i Tumpu Yesus Kristus. I Paulus nombau han aijo' binebas hondo madi' ko anu lewa' montewa'. 64