Read Saluan SISIKON NU TO RASUL-RASUL 6 Bible Online

SISIKON NU TO RASUL-RASUL 6 - Saluan bible

SISIKON NU TO RASUL-RASUL 6

¹Anu saja' mombatuki Yesus ko pipinnyo ko pintu-pintuangnyo manjoo'. Tempo'nyo aitu to mia-mian nu Yahudi anu motatae nu basa' Yunani, madi'mo sinanang hi to mia-mian anu daagi' Yahudi totu-totu'u. Anu mobasa' Yunani aijo' notatae, “To bouboune mami anu binalumo madi' sinukup nu pontulungi bau balanja sansina-sinaa anu binagi-bagiakon hi to mia-mian.”

²Kalana aitu, aha sampu-sampulu' ka' ohua' na to rasul-rasul aijo' nolimu' iwi-iwi' anu saja' mombatuk ka' notatae hi aha, “Madi' ma'ima' de kami belenti na mompolele potatae nu Tumpu Allah, kalana tionyo mongulus apaa na anu okaan.

³Jadi, sahanyo kita to Utu-utus mompile'i anu atina' hi komiu aha popitu' na anu kinyonyoanyo ma'ima' ka' nu kuasai nu Roh nu Tumpu tiba pande, anu timbali opokalaja mami mongulus hahan aiya;

⁴kalana kami kahanda' balado'a da ola saja' mompolele potatae nu Tumpu.”

⁵Iwi-iwi' na mian aijo' situju tiba pongka'oho' nu to rasul-rasul aijo'. Lantas aha nompile'i i Stefanus, samian na anu palesaya hondo hi Yesus ka' nukuasai nu Roh nu Tumpu. Suele tinompile'i: i Filipus, i Prokhorus, i Nikanor, i Timon, i Parmenas, ka' i Nikolaus lengkat i Antiokhia; ia misa' mian nu Yahudi, panyo ninsoopmo agama nu Yahudi.

⁶Aha popi-popitu' na mian aijo' opoita hi to rasul-rasul, da to rasul-rasul aijo' mondo'akon mompoita balakat hi Tumpu toka hi aha.

⁷Sumo aitumo na lele lengkat hi Tumpu nompaka togilelemo ka' anu saja' mombatuki Yesus i Yerusalem nompaka da'isanmo. Ka' da'isan mule' na to ima-imam anu pinalesayamo hi Yesus.

⁸I Stefanus talalo nu balakati nu Tumpu sahingga ia nombaumo manjoo' na anu okabangangi ka' hahan anu talalo hondo hi aha mian da'isan.

⁹Panyo daagi' ko to mia-mian anu madi' montalima ia; aha aijo'mo to mia-mian anu mogaleja i laigan pogalejaan anu osa-osanggohi Laigan Pogalejaan nu to Mia-mian anu Madi' Tataap. To mia-mian anu mogaleja i laigan pogalejaan aijo' atina'mo to mia-mian nu Yahudi lengkat mae i Kirene ka' i Aleksanderia. Aha tiba to mia-mian nu Yahudi lengkat mae i Kilikia ka' i Asia nahanggaga tiba i Stefanus.

¹⁰Panyo aha madi' noko ala nombahakon apaa na anu tinaloakon i Stefanus, kalana Roh nu Tumpu nombee'i ia kapandean motatae.

¹¹Kalana aijo' aha nontamboi to pia-piangkuka na mian da motatae, “Kami nohongo mian aijo' mongise-ise'akon i Musa ka' Tumpu!”

¹²Sumo aitumo na aha monsale'i to mia-mian, ka' to pola-polaya' nu Yahudi, tiba to gulu-gulu' nu agama. Lantas aha nambamo nohakop i Stefanus, lapas aijo' binoa na ia mangadap hi Mian Kopian Daka' nu Agama.

¹³Ka' aha nompopangadap mule' to saki-sakisi anu mombee'i to kata-katalangan anu madi' totu'u mongkona i Stefanus. To saki-sakisi aijo' notatae, “Mian aiya saja' mompopo'ise' Laigan nu Tumpu anu susi' ka' mompopo'ise' to pale-palentah nu Tumpu anu pinotokakonmo i Musa.

¹⁴Kami nohongomo i Stefanus notatae, tukoonyo i Yesus anu lengkat mae i Nazaret aijo' montua'akonmo Laigan nu Tumpu aiya, lantas mombali'i iwi-iwi' adat kabiasa'an anu pinotokakonmo i Musa hi kita!”

¹⁵Iwi-iwi' mian anu tinokamo i uno nu ulusan Mian Kopian Daka' nu Agama aijo' nontoa i Stefanus. Ka' tempo'nyo aitu ohup i Stefanus tinoa sumomo ohup nu malaikat.