Read Saluan SISIKON NU TO RASUL-RASUL 8 Bible Online

SISIKON NU TO RASUL-RASUL 8 - Saluan bible

SISIKON NU TO RASUL-RASUL 8

¹Ka' i Saulus suele sinanangmo kalana mian aijo' pinateanmo. Sinaa aitu mule' jama'at i Yerusalem mulaimo saja' o loloi', sahingga iwi-iwi' mian anu palesayamo, me sambiha'nyo to rasul-rasul, noga'a-ga'atmo nokiijo' i songko-songko na tano' nu i Yudea ka' i Samaria.

²To mia-mian anu mabuhuk hi Tumpu nolamunmo i Stefanus ka' nohangimo ia talalomo hondo nolibos.

³ Panyo i Saulus saja'mo binala usaha mongkabisa'i jama'at. Ia namba lengkat i sa'angu' na laigan mokiijo' i laigan sa'angu' ka' mohela' monsabatakon to mia-mian palesaya, lantas momposoop aha i uno nu talungku'.

⁴To mia-mian palesaya anu noga'a-ga'atmo aijo' noleleakonmo Lele Ma'ima' lengkat mae hi Tumpu aijo' iyaya mae.

⁵I Filipus namba nokiijo' i kota Samaria ka' noleleakon hi to mia-mian kiijo' mae mongkona Tomundo anu Momposalamat anu jinanji'mo.

⁶Salatan to mia-mian nohongomo i Filipus notatae ka' aha nontoamo hahan anu okabangangi binaunyo, da'isan na anu aijo' hi aha nompalahatikanmo apaa na anu tinaloakon i Filipus.

⁷Kalana to roh-roh ma'idek nosabatmo ka' naha kihisanmo nompala'imo mian da'isan anu pininsoopanmo nu setan. To mia-mian kapi' ka' pengko da'isan na anu pino'alinmo.

⁸Sahingga to mia-mian i kota Samaria aijo' i lame'mo hondo.

⁹I kota aijo' daagi' ko samian na mo'ane sanggonyo i Simon, anu noko to pia-piamangamo na tempo'nyo nombau to mia-mian nu Samaria tinalagoda nu ilimu'nyo. Ia nompoto'i hi to mia-mian tukoonyo ia mian hebat.

¹⁰Sahingga iwi-iwi' na mian da'isan i kota aijo' talalomo hondo nompalahatikan ia. “Mian aiya ko kahosonan lengkat hi Tumpu Allah anu talalo talasanggo, salaku ‘Kahosonan anu Daka'’ aijo',” na koonyo nu aha.

¹¹Pininmo hondo na ia lewa' nonggoda to mia-mian tiba kahosonan nu ponsumbu'annyo, sahingga aha talalomo nompalahatikan ia.

¹²Panyo i Filipus nompolele hi aha mongkona Lele Ma'ima', mosia na Tumpu mompalentah sumo Tomundo ka' mongkona i Yesus Kristus, Tomundo anu Momposalamat aijo'. Sahingga aha pinalesayamo i lele anu pinotokakon i Filipus, lantas aha pinalamandikanmo mau mian to momo'ane mau pe'e mian to bouboune.

¹³Posi i Simon pe'e suele pinalesayamo. Ka' ilapas pinalamandikan, ia lau-laus nombatukimo Filipus. Hahan anu okabangangi tini-tinimbali aijo' nombau i Simon kino banga-bangang.

¹⁴To Rasul-rasul i Yerusalem nohongo tukoonyo nu aha to mia-mian nu Samaria nontalimamo potatae nu Tumpu. Kalana aijo' aha nonsai i Petrus ka' i Yohanes namba nokiijo'.

¹⁵Salatan i Petrus ka' i Yohanes tinokamo, aha nondo'akonmo to mia-mian nu Samaria aijo' da aha mohumpak Roh nu Tumpu,

¹⁶kalana Roh nu Tumpu ma'isa tinoka nongkuasai mau pe'e samian anu aijo' hi aha; aha olaje pinalamandikan nu sanggo i Tumpu Yesus.

¹⁷Lantas i Petrus ka' i Yohanes nompotiikmo lima nu aha hi to mia-mian nu Samaria aijo'; sahingga aha nontalimamo Roh nu Tumpu Allah.

¹⁸I Simon na nontoa saba' lima nu to rasul-rasul pinotiikmo i buan nu ubak nu mian haha aijo', Roh nu Tumpu binee'mo hi aha. Kalana aijo' i Simon nomboa doi hi Petrus ka' hi Yohanes,

¹⁹ka' notatae, “Bee'i mae na aku suele kuasa aijo', da de limangku opotiik maumo pa' hi he, mian aijo' mohumpakmo Roh nu Tumpu.”

²⁰Panyo tinaaman i Petrus, “Silakamo na beleyum ka' doium! Te kooyum anu obee' nu Tumpu timbali o oli nu doi?

²¹Beleyum madi' ko hak mombatuki pakalaja'an mami, kalana kinyonyoaum madi' totu'u hi Tumpu.

²²Kalana aijo' pala'imo na tanga'anum anu ma'idek aijo', ka' poita hi Tumpu da Nu ampuni na pikilanum anu ma'idek aijo'!

²³Kalana ku sumbu' na beleyum saja' madi' sanang hi sangko sangalu ka' nu tobotuani nu ka'idekan.”

²⁴Lantas i Simon notatae hi Petrus ka' hi Yohanes, “Tulungi pe'e poitakon hi Tumpu da madi' ko sa'angu' pe'e na anu tinaloakonmo nu to utu-utus aijo' jadi hi belengku.”

²⁵Noko lapas na aha nombee'i katalangan ka' nompotoka potatae nu Tumpu, i Petrus ka' i Yohanes ninsusule'mo i Yerusalem. Ka' manjoo' na to kampu-kampung i lambanan nu aha aijo' nompotoka Lele Ma'ima' i Samaria.

²⁶Samian na Malaikat nu Tumpu notatae hi Filipus, “Donganmo mamba! Lako'mo mokiijo' i sasu Selatan i jalan anu lengkat mae i Yerusalem mokiijo' i Gaza.” Jalan aijo' liing.

²⁷Sahingga i Filipus mule' nambamo. Tempo'nyo aitu daagi' ko samian anu ko pangkat mokalaja i kalaja'an Etiopia anu hau-haunyo lumambanan minsusule' mokiijo' i lipu'nyo. Mian aitu samian anu ko pangkat matangkas anu mongulus iwi-iwi' kakaya'an i Kandake, Tomundo boune i lipu' Etiopia. Mian aijo' mambamo nokiijo' i Yerusalem da balado'a hi Tumpu, ka' uuka aiya hau-haunyomo minsusule' tiba bendinyo. Hau-haunyo suha-suhang i uno nu kasake'annyo aijo' ia nombasa' Kitab i Nabi Yesaya.

²⁹Roh nu Tumpu notatae hi Filipus, “Lako'mo oha-ohani i kasake'an aijo'.”

³⁰Sahingga i Filipus namba nongohani kasake'an aijo', lantas ia nohongo mian aijo' mombasa' Kitab Nabi Yesaya. I Filipus nompokilawa hi ia, “Apaa Kita Tuan mangalati' i anu o basa' nu Kita Tuan aijo'?”

³¹Tinaaman nu mian aijo', “Mosia na aku mangalati', de madi' ko anu mompotingaanakon hi belengku?” Lantas sinale'annyo na i Filipus sumake' i bendi ka' sumuhang hingga-hinggat ia.

³² Aiyamo na to aya-ayat anu binasa'nyo aijo', “Ia sumomo domba anu pinungu da o kolot, susumo anak nu domba anu madi' molokak de bulunyo o gunting, sumo aijo'mo na Ia madi' notatae santaa' pe'e.

³³Ia pinopo ambang ka' binee'an hukuman madi' adin. Napas-Nyo binubut i dunia aiya, sahingga samian pe'e madi' ko anu moko ala monsisikakon ihe na lee'-Nyo.”

³⁴Anu ko pangkat matangkas lengkat i Etiopia aitu notatae hi Filipus, “Soba poto'iakon mae hi belengku, ihe na anu nu patui nu nabi aiya? Posi butongnyo kabai mian sangga'at?”

³⁵Sahingga i Filipus mule' mulaimo notatae; ia nompake aya-ayat aijo' salaku pontampu'uni da moleleakonmo Lele Ma'ima' mongkona i Yesus hi anu ko pangkat matangkas aijo'.

³⁶Hau-haunyo i lumambanan, aha tinokamo i sa'angu' na tampat anu ko ueenyo. Anu ko pangkat matangkas aijo' notatae, “Toa aijo' ko ueenyo! Apaa mule' na kulangnyo mompalamandikan aku?” [

³⁷I Filipus notatae, “De Kita Tuan palesayamo totu-totu'u i kinyonyoa, Kita Tuan timbalimo o palamandikan.” “Aku palesayamo hi Yesus Kristus, aijo'mo Anak nu Tumpu Allah,” koonyo nu anu ko pangkat matangkas lengkat mae i Etiopia aijo'.]

³⁸Lantas ia nompoto'i bendinyo aijo' belenti; lapas aijo' ua-ua'aha, i Filipus ka' anu ko pangkat matangkas aijo' nintau'mo nokiijo' i uee ka' i Filipus nompalamandikan ia.

³⁹Salatan aha ninsusule'mo lengkat mae i uee, Roh nu Tumpu Allah nongalamo i Filipus lengkat i kiijo'. Anu ko pangkat matangkas lengkat mae i Etiopia aijo' madi'mo daagi' nontoa ia. Anu ko pangkat matangkas aijo' i lame'mo na nolausakon lumambanannyo.

⁴⁰Padahan i Filipus noko kiijo'mo i Asdod. Ka' salatan ia nolausakonmo lumambanannyo, ia mompolelemo Lele Ma'ima' mongkona i Yesus i songko-songko na kota sampe tinoka i Kaisarea.