Read Saluan SISIKON NU TO RASUL-RASUL 9 Bible Online

SISIKON NU TO RASUL-RASUL 9 - Saluan bible

SISIKON NU TO RASUL-RASUL 9

¹Hau-haunyo i Saulus saja'mo mongkahanda'i mompatei anu saja' mombatuki Tumpu Yesus. Ia namba hi imam daka',

²ka' nompoita sulat kuasa da mamba hi to pola-polaya' i to lai-laigan pogalejaan mian nu Yahudi i Damsyik, da de ia mompaha kabot kiijo' mae to mia-mian anu palesayamo hi Yesus, ia timbali mohakop aha, ka' momboa aha mokiijo' i Yerusalem.

³Hau-haunyo mompatui mokiijo' i Damsyik, salatan ingohanimo i kota aijo', madi' pinin sa'angu' na jingka lengkat i langit nonjingkaimo titikub hi Saulus.

⁴Ia notua' i tano' lantas nohongo potatae tinoka hi ia, “Saulus, Saulus! Apaa na sababnyo beleyum nonsakisa Aku?”

⁵“Ihe na Kita Tuan?” pinokilawa i Saulus. Lewo' aijo' nontaami, “Akumo na i Yesus, anu osakisa nu beleyum.

⁶Panyo uuka bulamo ka' pinsoop mokiijo' i kota. I kiijo' mae opoto'ije hi beleyum apaa na anu tionyo nu bau.”

⁷To mia-mian anu nombatuk hingga-hinggat i Saulus tinolokengkengmo sahingga madi'mo noko ala notatae; kalana aha nohongo lewo' aijo' panyo madi' nontoa samian pe'e.

⁸Lantas i Saulus tinuminjo ka' nombuka' matanyo, panyo matanyo madi'mo daagi' noko ala nontoa apa-apaa. Jadi aha nontoongi limanyo ka' nontaka' ia ninsoop mokiijo' i Damsyik.

⁹Tinolun sinaa na kopinnyo ia madi'mo daagi' noko ala nontoa ka' sapinnyo aijo' ia madi'mo toho' nongkaan kabai monginum.

¹⁰I Damsyik daagi' ko samian anu saja' mombatuki Tumpu Yesus sanggonyo i Ananias. Daagi' ko sa'angu' na tempo' ia nontoa, Tumpu nontaloakon hi ia. Tumpu notatae, “Ananias!” Tinaaman i Ananias, “Aku, Tumpu.”

¹¹Tumpu notatae, “Donganmo mamba uuka aiya. Lako'mo mokiijo' hi laigan i Yudas i Jalan anu Hodi'. Pokilawa kiijo' mae hi mian anu sanggonyo i Saulus nolengkat mae i kota Tarsus. Mian aijo' hau-haunyo balado'a,

¹²daagi' ko sa'angu' na tempo' ia nontoa samian na mo'ane, sanggonyo i Ananias, tinoka hi ia ka' nompotiik lima i buan nu ubaknyo da ia po'ule' montoa.”

¹³Tinaaman i Ananias, “Kita Tumpu, aku nohongomo da'isan na mian notatae mongkona mian aiya, anu talalo hondo binaunyo, hahan lewa' mongkabisa'i mian anu palesayamo hi Kita Tumpu kiijo' i Yerusalem.

¹⁴Ka' uuka ia tinokamo i aiya pinoloasmo nu kapala nu to ima-imam mohakop iwi-iwi' mian anu palesayamo hi Kita Tumpu.”

¹⁵Panyo kita Tumpu notatae hi Ananias, “Lako'mo! Kalana Aku noko pile'imo ia da mombau anu Ku palentahkon, da ia mompolele mongkona Aku hi to bansa-bansa sangga'at anu madi' ba'agama Yahudi ka' hi to tomu-tomundo, ka' suele mule' hi mian nu Israel.

¹⁶Ka' Ku potoaje hi ia iwi-iwi' na kasansala'an anu tionyo nu oa'i kalana Aku.”

¹⁷Sahingga i Ananias namba i laigan aijo' ka' nompotiik limanyo i buan nu ubak i Saulus. “Utusku Saulus,” koonyo i Ananias, “Tumpu Yesus anu tinoa nu kita Utus i totonga' nu jalan tempo'nyo kita Utus mo'ukamo mae, Iamo na nonsai mae aku toka da kita Utus timbali moko ala montoa mule' ka' nu kuasai nu Roh nu Tumpu.”

¹⁸Tempo'nyo aitu mule' daagi' ko apa-apaa sumo sonuku nu ikan nosabat lengkat i mata i Saulus ka' ia po'ule'mo nontoa. Sahingga ia mule' nobulamo, lantas pinalamandikan.

¹⁹Ka' noko kaan, ia tinompo'ule'mo nahoson. I Saulus jinojoong i Damsyik tiba anu saja' mombatuki Yesus tino pia-pian sinaa na kopinnyo.

²⁰Ia lau-laus namba nokiijo' i to lai-laigan pogalejaan ka' mulai nompolele tukoonyo i Yesus aijo'mo na Anak nu Tumpu.

²¹Iwi-iwi' mian binangang na nohongo i Saulus. Aha notatae, “Te misa'o iamo na anu kiijo' i Yerusalem nompatei iwi-iwi' mian anu palesaya hi Yesus? Ia tinoka mae aiya kalana mohakop ka' momboa aha hi kapala nu to ima-imam!”

²²Panyo i Saulus nompaka pakekemo na mombee'i sisik. Hahan anu inyata'mo apaa na anu pinotokanyo mongkona i Yesus mompohoson hondo pangalati'an saba' i Yesusmo aijo' na Tomundo anu Momposalamat. Sahingga to mia-mian Yahudi anu jojoong i Damsyik madi' daagi' noko ala nonggagakon.

²³ Salatan tinompoliumo to pia-pia manga, to mia-mian Yahudi nomposa'angu'mo tanga'an da mompatei i Saulus.

²⁴Panyo kahanda' nu aha sinumbu'nyomo. Sinaa pihi aha montanda'i i sabatan daka' nu kota da mompatei ia.

²⁵Panyo daagi' kino sampahu, anu saja' mombatuki Saulus nongala ia, lantas nonguluakon i uno nu sa'angu' na kalanjang i luanakon i paganmesen nu kota.

²⁶I Saulus namba nokiijo' i Yerusalem, ka' kiijo' mae ia binala usaha mosangalu tiba anu saja' mombatuki Yesus. Panyo aha mabuhuk hi ia, kalana aha madi' palesaya saba' ia totu-totu'u tinimbalimo anu saja' mombatuki Yesus aijo'.

²⁷Lapas aitu i Barnabas tinoka hi ia, lantas nomboa ia hi to rasul-rasul. I Barnabas nonsisikakon hi aha mongkona mosia na i Saulus nontoa Tumpu i totonga' nu jalan ka' mosia na Tumpu notatae hi ia. I Barnabas nompoto'i mule' mongkona mosia na ko baaninyo i Saulus nongajan i Damsyik mongkona sanggo i Yesus.

²⁸Sahingga aijo' i Saulus jinojoongmo tiba aha, ka' baani hondo na mompotoka sisik nu Tumpu i songko-songko Yerusalem tiba sanggo nu Tumpu.

²⁹Ia notatae ka' pinainggaga tiba to mia-mian Yahudi anu mobasa' Yunani, panyo aha bala usaha mompatei ia.

³⁰Salatan to mia-mian palesaya sangga'atannyo nonsumbu'mo mongkona han aijo', aha nomboa i Saulus nokiijo' i Kaisarea, lapas aitu nonsai ia nokiijo' i Tarsus.

³¹Sahingga jama'at i songko-songko na Yudea, Galilea ka' i Samaria madi'mo binata-bata. Roh nu Tumpu na nontulungi da nabuhuk hi Tumpu, sahingga to jama-jama'at aijo' nompaka majumo ka' nompaka da'isanmo.

³²I Petrus namba iyaya mae montoa to jama-jama'at. Daagi' kino sansinaan ia namba nontoa mian anu palesayamo hi Tumpu anu jojoong i Lida.

³³I kiijo' mae ia nompaha kabot tiba samian na mo'ane sanggonyo i Eneas, anu kapi' ka' madi'mo toho' nobula lengkat i kamale'annyo ualu'mo na taun na kopinnyo.

³⁴I Petrus notatae hi Eneas, “Eneas, i Yesus Kristus mompa'alinmo beleyum. Bulamo ka' poko piani na kamale'anum.” I Tempo'mo aitu na i Eneas nobula.

³⁵Iwi-iwi' mian anu jojoong i Lida ka' Saron nontoamo i Eneas, lantas aha iwi-iwi' pinalesayamo hi Tumpu.

³⁶Kiijo' i Yope daagi' ko samian na boune sanggonyo i Tabita. Ia samian anu palesaya hi Yesus. (Sanggonyo i uno nu basa' nu Yunani, i Dorkas alati'nyo jonga.) Ia ola ahi' saja' mombau hahan anu ma'ima' ka' montulungi to mia-mian kasiasi.

³⁷Tempo'nyo aitu ia masakit ka' sinilakamo. Ilapas pinindi na bangke'nyo, ia pino'una'mo i kaman anu i bawonyo.

³⁸Yope madi' sangkuka na kojo'onnyo lengkat i Lida. Jadi tempo'nyo anu saja' mombatuki Yesus kiijo' mae i Yope nohongomo i Petrus daagi' kiijo' i Lida, aha nonsai ua'aha namba hi Petrus ka' nompotuun sumo uuka, “Lia-lia' mae toka.”

³⁹Lau-laus i Petrus tinuminjo ka' nombatuki aha. Potokanyo kiijo' mae, ia binoa i kaman anu i bawonyo. Iwi-iwi' balu anu i kiijo' nontikubi i Petrus galo-galo' humaang ka' nompotoa hi ia to baju-baju'nyo ka' juba-juba' anu kina'utakon i Dorkas hi aha tempo'nyo ia daagi' tumuu'.

⁴⁰I Petrus nonsai aha iwi-iwi' mosabat, lantas ia dinumaladupu ka' binalado'a. Lapas aijo' ia nongahopi bangke' i Dorkas ka' notatae, “Tabita, pobulamo!” Sahingga i Dorkas nonjilakon matanyo, ka' salatan ia nontoa i Petrus, ia sinumuhangmo.

⁴¹Lantas i Petrus nontoongi limanyo ka' nontulungi ia tuminjo. Lapas aijo' i Petrus nolaga to mia-mian palesaya anu i kiijo' hingga-hinggat tiba to balu-balu aijo', lantas binee'nyo na i Dorkas anu po'ule'mo tinumuu' aijo' hi aha.

⁴²Lele mongkona anu tinimbali aijo' tinogilelemo nokiijo' i songko-songko na Yope, sahingga da'isan na mian anu pinalesayamo hi Yesus salaku Tomundo anu Momposalamat aha.

⁴³I Petrus jinojoong i kiijo' daagi' tino pia-pian sinaa i laigan nu samian anu topo ka'ut kilit sanggonyo i Simon.